Vʋ́k'ɔɔsa rɩ́ Levi duo nɩɛ yɩra
12
1 Ná vʋk'ɔɔsa rɩ́ Levi dunɩɛ ná há tɩ́ŋ Satɩɛl bio Zorobabɛl, rɩ́ Zozie mí a lɛ yomí ko Zerizalɛmɛ. Ɓa yɩra nɛ́ nyɛ: Seraya, Zeremi, Ɛsɩdɩrasɛ, 2 Amariya, Maluki, Hatʋʋsɛ; 3 Sekaniya, Rehumi, Meremɔtɛ; 4 Ido, Ginetoyi, Abiya; 5 Miyamɛŋ, Maadiya, Bilga, 6 Semaya, Yoyaribɛ, Yedaya, 7 Salu, Amɔkɛ, Hilkiya, arɩ́ Yedaya. Zozie tɛ́ŋ mɛ́, ɓa nyáŋ nɛ́ ká vʋk'ɔɔsa nɩhɩɛ̃́sɛ ɓa rɩ́wɔ́ maábináŋa. 8 Levi dunɩɛ sɩɛrʋ: Zozie, Binuwi, Kadimɩɛl, Serebiya, Ziida arɩ́ Mataniya rɩ́rʋ́ maábináŋa fa háá ɓá yɩɩla; 9 Bakbukiya rɩ́ Uuni rɩ́wɔ́ maábináŋa má nɛ́ fa cɩ́nɛ́ cáásɩ́wɔ́ aá láwɔ́ mɛ́. 10 Zozie nɛ́ lʋl Zʋakimi, Zʋakimi lʋl Elɩasɩɩbɛ, Elɩasɩɩbɛ má lʋl Zoyada, 11 Zoyada lʋl Zonataŋ, Zonataŋ lʋl Yadua. 12 Ná Zʋakimi tɛ́ŋ mɛ́, ɓa nɩɛ ná fa há ká vʋk'ɔɔsa a a jɩtɩ́náwa: Seraya jaa mɛ́ Meraya nɛ́, Zeremi jaa mɛ́ Hananiya nɛ́; 13 Ɛsɩdɩra jaa mɛ́ Mesulam nɛ́; Amariya jaa mɛ́ Yohanaŋ nɛ́; 14 Meluki jaa mɛ́ Zonataŋ nɛ́; Sebaniya jaa mɛ́ Zozɛfɛ nɛ́; 15 Harimi jaa mɛ́ Adina nɛ́, Merayɔtɛ jaa mɛ́ Hɛlkayi nɛ́; 16 Ido jaa mɛ́ Zakari ní, Gɩnɛtɔŋ jaa mɛ́ Mesulamɛ nɛ́, 17 Abiya jaa mɛ́ Zikiri ní, Miniyamɛŋ rɩ́ Mɔdɩya jaa mɛ́, Pilitayi ní; 18 Bilga jaa mɛ́ Samua nɛ́, Semaya jaa mɛ́ Zonataŋ nɛ́; 19 Yoyaribɛ jaa mɛ́ Matanayi ní; Yedaya jaa mɛ́ Uuzi ní; 20 Salayi jaa mɛ́ Kalayi ní; Amɔkɛ jaa mɛ́ Ebɛɛrɛ nɛ́; 21 Hilkiya jaa mɛ́ Hasabiya nɛ́, Yedaya jaa mɛ́ Netaneyɛl nɛ́. 22 Elɩasɩɩbɛ rɩ́ Yoyada, Yohanaŋ, arɩ́ Yaduya tɛ́ŋ mɛ́ nɛ́ ɓa pʋ́ŋsɛ Levi dunɩɛ jɩtɩ́náwa arɩ́ vʋk'ɔɔsa yɩra hé kɛnɔ mɛ́, Pɛrsɛ kuóro Darisi tɛ́ŋ mɛ́. 23 Levi dunɩɛ ná há ká jɩtɩ́náwa wuu yɩra nɛ́ ɓa pʋ́ŋsɛ hé kuóre wɩ́'állɛ kɛnɔ sɩɛrʋ; a kaa mʋ́ peri Elɩasɩɩbɛ bio Yohanaŋ tɛ́ŋ. 24 Levi dunɩɛ sɩ́dííre: Hasabiya rɩ́ Serebiya rɩ́ Kadɩmɩɛl bio Zozie; rɩ́wɔ́ maábináŋa ná há cɩ́ŋwɔ́ sɩ́ɛ́ rɩ́wɔ́ yɩɩ dɛ́nnɛ, a píŋsi Wɩɩsɛ, ɓa cɛ́ púl púlwa nɛ́, anɛ ɛ́ Wɩɩsɛ báálɔ Davidi há mákwɔ́. 25 Mataniya rɩ́ Bakbukiya rɩ́ Obadiya rɩ́ Mesulam rɩ́ Talmɔŋ arɩ́ Akubɛ nɛ́ ká dánnʋpɔ́ɔ́ra; ɓa nɛ́ faá pɔ́ jɩwiisi ná há mɩŋ Wɩɩsɛ jaa dánnʋʋsɛ laka. 26 Zozie bio Zʋakimi há ká Yosadakɛ nɩhĩ, rɩ́ Neemi há ká dɩtɩ́llɛ guvɛnɛɛrɛ, arɩ́ vʋk'ɔɔsɔ Ɛsɩdɩra há ká kɛŋzɩnnɔ tɛ́ŋ mɛ́, nɩɛ nyáŋ nɛ́ fa mɩŋ róŋ.Zeŋe ná ɓa há bɩrɛ sɔ́ bárka wɩ́sʋlɔ́ wɩ́ɛ́
27 Zerizalɛmɛ zeŋe ná ɓa há bɩrɛ sɔ́ bárka wɩsʋlɔ́ tɛ́ŋ mɛ́, ɓa yɩ́rɛ Levi dunɩɛ ná fa há mɩŋ dɩhɛ̃́ ná wuu rɩ́wɔ́ ko Zerizalɛmɛ, a makɛ rɩ́wɔ́ yɛ yɩɩla, a dú ceŋsi rɩ́ gbaŋceŋsi arɩ́ kuléŋléŋwa, a dɛnnɛ jʋɔsɛ bárka wɩsʋlɔ́ ná mɛ́. 28 Gɔkɛ́ lɛ́ dɩtɩ́llɛ ná há kíl Zerizalɛmɛ tɔ́nɛ rɩ́ Netofa tɔ́wɩɛla sɩɛrʋ, 29 rɩ́ Bɛtgɩlgal tɔ́ɔ́, rɩ́ Geba tɔ́ɔ́, arɩ́ Azimavɛtɛ tɔ́ɔ́. Bee wɩ́ɛ́, gɔkɛ́ ná fa sɔ́wɔ́ tɔ́nɛ a kíl Zerizalɛmɛ nɛ́. 30 Vʋk'ɔɔsa rɩ́ Levi dunɩɛ sɩɛ́ mʋ́ʋ́rɩ́wɔ́ tɩɩ busunnu, a mʋ́ʋ́rɛ nɩɛ ná má busunnu rɩ́ zeŋe arɩ́ dánnʋʋsɛ busunnu. 31 Ŋ ɔ́ɔ́ Ziida sɩ́dííre zɛ cɛ́ zeŋ ná dahá. Ká sɩɛ́ ka gɔkɛ ná ɓa púlzeŋsi bɛllɛ. Dʋ́ŋdʋʋ̃́ púl ná zɩ zeŋ ná néduu rɩ́, a va caasɛ pupul dánnʋɔ rɩ́. 32 Ooze rɩ́ Ziida nɩɛ sɩ́dííre káánɛ sɩɛ́ mɩ́ŋwɔ́ har; 33 Azariya, Ɛsɩdɩra, Mesulam, 34 Ziida, Bɛŋzamɛ, Semaya rɩ́ Zeremi, 35 ká vʋ́k'ɔɔsa bɛlɛ sɩɛrʋ, Zakari há ká Zonataŋ bio, Zonataŋ há ká Semaya bio, Semaya há ká Mataniya bio, Mataniya há ká Miise bio, Miise há ká Zakuri bio, Zakuri há ká Asafɛ bio sɩɛ́ múmu nyɩ́sɛ, 36 rɩ́rʋ́ maábináŋa Semaya rɩ́ Azarɛl rɩ́ Milalayi rɩ́ Gilayi rɩ́ Mayi rɩ́ Netaneyɛl rɩ́ Ziida rɩ́ Hanani nɛ́ faá dú cɩksɛ ná Wɩɩsɛ báálɔ Davidi há ɛ́ɛ́. Ɛsɩdɩra há ká kɛŋzɩnnɔ nɛ́ fa káwɔ́ nyuutɩna. 37 Ɓa há vá térké mʋ́ peri nyíbúlbʋɔ ná, ɓa tɩ́ŋ neŋcolo ná a zɛ́ zeŋe ná a caasɛ Davidi zʋ́ɔ́ a mʋ́ peri nyii dánnʋɔ ná há caasɛ wɩɩsɛ dɩpomí. 38 Gɔkɛ́ bʋllɛ nyúú mí púl má zɛ́ zeŋ ná, a va caasɛ nɛ́gʋɔ rɩ́. Káŋ má rɩ́ nɩkáánɛ ná naŋá isi zɛ́ a tɩ́ŋwɔ́ har. Á válɔ́ mʋ́ tɩŋ dɩ́pɛŋ dɩwasɩ́, a mʋ́ peri zeŋ ná dɩjɛlɔ; 39 a daarɛ Ɩfɩrayɩm dánnʋɔ mɛ́ rɩ́ dánnʋbɩnɛ rɩ́ náŋwʋlɛ dánnʋɔ mɛ́, a daarɛ Hananɩyɛl zeŋgbó, rɩ́ Meya zeŋgbó a mʋ́ peri pʋwɩɛla dánnʋɔ. A va mʋ́ cɛ́ bɩnajaa dánnʋɔ mɛ́. 40 Gɔkɛ́ púllí ná bɛllɛ wuu sɩɛ́ ko céŋ náŋá Wɩɩsɛ jaa mɛ́; ŋ má rɩ́ sɩ́dííre ná há tɩŋɩ́ŋ mɛ́ ko súúri, 41 arɩ́ vʋ́k'ɔɔsa Elɩakim rɩ́ Maaseya rɩ́ Miniyamiŋ rɩ́ Miise rɩ́ Elɩonayi rɩ́ Zakari arɩ́ Hananiya fa háá mu nyɩ́sɛ, 42 rɩ́ Maaseya rɩ́ Semaya rɩ́ Elazɛrɛ rɩ́ Uuzi rɩ́ Yohanaŋ rɩ́ Malkiya rɩ́ Elam arɩ́ Ezɛɛr. Gɔkɛ́ fa gɔkɔ́ ɓaá nɩ́wɔ́ líŋsi. Izirahiya nɛ́ fa káwɔ́ bíbello. 43 Ɛ́ kal nɩɛ ɔsɛ vʋka kɩ́ŋkáŋ a jʋɔsɛ, bee wɩ́ɛ́ Wɩɩsɛ pi satɔrɔ́ ɓɩzeno a héwó mí. Háála rɩ́ heŋbiisi má jɩ́jʋɔsɛ; rɩ́ nɛ́ŋ mɩŋ dɩ́bolí má ɩɩ́ nɛ̃ satɔrɔ́ kʋɔllɛ Zerizalɛmɛ mɛ́.
Vʋk'ɔɔsa rɩ́ Levi dunɩɛ kere wɩ́ɛ́
44 Ɛ́ kál tɩɩ, ɓa lɩ́sɛ báála rɩ́wɔ́ bíbel jɩwiisi ná mɛ́ ɓa há kéŋ satɔ́ɔ́rípállɛ rɩ́ oŋbʋʋrɛwa rɩ́ fí nyúú ker kaa ko bil. Ɓa nɛ́ sɩ́ la ker ná há ká vʋk'ɔɔsa rɩ́ Levi dunɩɛ kere; dɩtɩ́llɛ tɔ́nɛ ná mɛ́ a kaa ko anɛ ɛ́ wɩ́bilé há mákɛ́. Bee wɩ́ɛ́, vʋk'ɔɔsa rɩ́ Levi dunɩɛ tʋtʋmɛ́ ná fa tɔ́rɛ́ Ziida nɩɛ sɩɛnnɛ wérí. 45 Ɓa nɩ́ɩ́ bélwó Wɩɩsɛ tʋtʋmɛ́ ná mɛ́, rɩ́ busunnu mʋ́ʋ́rɛ wɩ́ɛ́, rɩ́ gɔkɛ́ arɩ́ dánnʋpɔ́ɔ́ra há mɔhɛ̃́ rɩ́wɔ́ tʋ́ŋwɔ́ tʋtʋmɛ́ anɛ ɛ́ Davidi rɩ́rʋ́ bio Salomɔŋ fa há mákɛ́ pɔ́wɔ́. 46 Fól wuu mí, a pɔ́ Davidi rɩ́ Asafɛ cɛ́rɛ mɛ́, gɔ́khɩɛ̃́sɛ rɩ́ yɩɩla mɩ́nɔ́ ɓa yɛ aá dɛnnɛ, aá píŋsi Wɩɩsɛ. 47 Zorobabɛl tɛ́ŋ mɛ́ rɩ́ Neemi tɛ́ŋ mɛ́, Ɩzɩrayɛl nɩɛ wuu kéŋ gɔkɛ́ rɩ́ dánnʋ́pɔ́ɔ́ra kere a kaa ko aá páwɔ́ a nɛ́ ɛ́ há mákɛ́ kal wuu. Ɓa kéŋ Wɩɩsɛ kere ná má a kaa ko pá Levi dunɩɛ. Levi dunɩɛ má baa lɩ́sɛ Wɩɩsɛ kere a pá Aarɔŋ duo nɩɛ.