Nɩɛ saŋɔ́ rɩ́wɔ́ tɩ́ŋ Wɩɩsɛ wɩ́bile ná
10
1 Wɩ́zʋllɛ nyáŋ wuu wɩ́ɛ́, á wuu kúó hé náŋá mɛ́, a tʋ́ŋ nʋɔ mɛ́ pʋ́ŋsɛ kɛnɔ a bil nʋtʋmɛ. Ɛ́ kɛnɔ daha, á sɩ́dííre rɩ́rá Levi duo nɩɛ rɩ́rá Wɩɩsɛ vʋk'ɔɔsa yɩra mɩŋ róŋ, ɓa cíkwó nɛ́ŋsa. 2 Ná nɩɛ ná yɩra há mɩŋ kɛnɔ ná ɓa há cíkwó nɛ́ŋsa nɛ́ ká:Hakaliya bio Neemi há ká guvɛnɛɛrɛ,
Sedekiya, 3 Seraya, Azariya, Zeremi, 4 Pasuri, Amariya, Malkiya, 5 Hatʋʋsɛ, Sebaniya, Maluk, 6 Harimɛ, Meremɔtɛ, Abidɩasɛ, 7 Danɩɛl, Gɩnɛtɔŋ, Baruk, 8 Mesulam, Abiya, Mɩyamɛŋ, 9 Maaziya, Bilgayi, arɩ́ Semaya ɓa nɛ́ ká vʋk'ɔɔsa. 10 Levi dunɩɛ ná há cíkwó nɛ́ŋsa kɛnɔ ná mɛ́ yɩra nɛ́ nyɛ́: Azaniya bio Zozie, Binuyi há lɛ́ Henadadɛ duo sɩɛrʋ, rɩ́ Kadimɩɛl, 11 rɩ́wɔ́ maábináŋa: Sebaniya, Hɔdiya, Kelita, Pelaya, Hanaŋ, 12 Miise, Rehɔbɛ, Hasabiya, 13 Zakuur, Serebiya, Sebaniya, 14 Hɔdiya, Bani, arɩ́ Beninu. 15 Nɩɛ ná sɩ́dííre há cíkwó nɛ́ŋsa kɛnɔ ná mɛ́ yɩra nɛ́ nyɛ: Parehɔsɛ, Pahatɛmʋɔbɛ, Elamɛ, Zatu, Bani, 16 Buni, Azigadɛ, Bebayi, 17 Adoniasɛ, Bigivayi, Adɛŋ, 18 Atɛɛrɛ, Ezekɩasɛ, Azur, 19 Hodiya, Hasum, Besayi, 20 Harifɛ, Anatɔtɛ, Nebayi, 21 Magpihasɛ, Mesulam, Heziri, 22 Mesezabɛl, Sadɔkɛ, Yadua, 23 Pelatiya, Hanaŋ, Anaya, 24 Oze, Hananiya, Hasubɛ, 25 Halohɛsɛ, Pila, Sobɛkɛ, 26 Rehum, Hasabina, Maaseya; 27 Ahiya, Hanaŋ, Anaŋ, 28 Maluk, Harim arɩ́ Baana. 29 Nɩkáánɛ ná rɩ́ vʋ́k'ɔɔsa rɩ́ Levi dunɩɛ rɩ́ dánnʋpɔ́ɔ́ra rɩ́ gɔkɛ́ rɩ́ Wɩɩsɛ jaa tʋtʋnna arɩ́ tɔ́nɛ ná nɩɛ náŋá há lɩ́sɩ́wɔ́ tɩɩ duhʋɔra mɛ́, rɩ́wɔ́ zíl Wɩɩsɛ wɩ́bilé ná. Ɓa rɩ́wɔ́ háála rɩ́wɔ́ tolé rɩ́wɔ́ heŋbóllí, ɓa ná wuu haá nɛ̃ wɩ́ɛ́ mʋ́ʋ́la. 30 Ɓa mʋ́ɔ́ súúríwó maábináŋa há káwɔ́ sɩ́dííre mí. Ɓa wuu tʋŋ nʋɔ mɛ́ a ŋmɩ́ɛ́sɛ, rɩ́ ɓa sɩ́ tɩŋ Wɩɩsɛ wɩ́bilé ná, ʋ há píé pɔ́ʋ́ tʋtʋnnɔ Moyizi. A saŋ rɩ ɓa sɩ́ tɩŋ Nyuutɩna Wɩɩsɛ, á Wɩɩsɛ kíŋse ná rɩ́ wɩ́makɛ ná rɩ́ wɩ́máŋsɛ ná ʋ há mákɛ́ pɔ́wɔ́, rɩ ɛ́ rá rɩ́ Wɩɩsɛ zɔ́kwɔ́. 31 Á tá nʋɔ, rɩ ráá wɩ́rá tolé píí pɔ́wɔ́ rɩ́wɔ́ ja, ká á má wʋ́ɔ́ tolé jáá párá bɛlɛ. 32 Ká fɩɛlɛ́ tápʋl, ɛ́rá má cana kal, rɩ tɔ́ɔ́ ná nɩɛ nɛ́ kéŋ ɓɩdííle ɛ́rá má cɩksɛ náŋa ko yɛ́llɛ párá, a waa sáŋ yɔ́wɩ́wɔ́. Bɩŋsɛ balpɛ nyúú mí, sɩ́ a tíé bɩŋfɩɛlɩ́, ká giri kɩma wuu tá. 33 Bɩna wuu, á sɩ́ fɩ́kɩ́rá tɩɩ mɛ́ a tɛ wárɛ gɩrámɛwa baná á Wɩɩsɛ jaa tʋtʋmɛ́ ná wɩ́ɛ́. Ʋ ɛ́ sɩ́ a wɩ́bilí a kaá mʋ́ wuu. 34 Ɛ́ wárɛ nɛ́ rɩ́wɔ́ pii yɔwɛ dɩpɛ́ŋwa ná ɓa há píé aá bil Wɩɩsɛ sɩ́ɛ́ ʋ jaa mɛ́ rɩ́ kal wuu óŋparɛ́ pállɛ rɩ́ kal wuu vʋkfíse pʋsɛ rɩ́ pʋsɛ ná ɓa há sɩ́ kaa ɔsɛ fɩɛlɛ́ tápʋl vʋka, rɩ́ caŋfɛlɔ kal vʋka pʋsɛ, arɩ́ caŋsɛ ná náŋa tápʋlɛ vʋka pʋsɛ. Ɓa nɛ́ rɩ́wɔ́ kaa yɔwɛ satɔ́ɔ́rɩ́pállɛ onni a pá Wɩɩsɛ, rɩ́ pʋsɛ ná ɓa há sɩ́ kaa ɔsɛ Ɩzɩrayɛl nɩɛ wɩ́bɔma vʋka; ká rɩ́wɔ́ kaa tʋŋ á Wɩɩsɛ jaa ná tʋtʋmɛ́ ná wuu. 35 A é vʋk'ɔɔsa, rɩ́ Levi dunɩɛ, rɩ́ nɩkáánɛ ná, á yó bíé ráá zɩŋ tɛ́ŋ ná mɛ́ jaa wuu nɩɛ há mɔhɛ̃́ rɩ́wɔ́ ka daasɛ kórá Wɩɩsɛ jaa sɩɛrʋ. Bee wɩ́ɛ́, bɩná wuu, anɛ ɛ́ wɩ́bilé há mákɛ́, á sɩ́ ka daasɛ ko rɩ́wɔ́ hé níŋ Nyuutɩna Wɩɩsɛ á Wɩɩsɛ koro ná daha. 36 Bɩna wuu, á sɛ́ ráá sɩ́ lɩsɩ́rá tíé oŋbʋʋrɛwa, rɩ́rá tuuni wuu nɔnɔ má oŋbʋʋrɛwa kaa ko Nyuutɩna Wɩɩsɛ jaa. 37 Ká á sɛ́ á toperbɛlɛ wuu, rɩ́rá pʋsɛ bidʋʋnɛwa, á sɛ́ káŋwɔ́ wuu mʋ́ Wɩɩsɛ sɩ́ɛ́ a pá vʋk'ɔɔsa ná háá tʋ́ŋrá Wɩɩsɛ jaa sɩɛrʋ anɛ ɛ́ wɩ́bilé há mákɛ́, á pʋzeŋsi rɩ́rá pʋwɩɛlla bidʋʋnɛwa; 38 á oŋparɛ oŋbʋʋrɛwa míŋ rɩ́rá satɔ́ɔ́rɩ́pállɛ rɩ́rá tunni wuu nɔnɔ rɩ́rá dɩvɛ́ŋ rɩ́rá nʋnnɛ; á sɩ́ káŋwɔ́ wuu mʋ́ Wɩɩsɛ jaa a pá vʋk'ɔɔsa ná háá tʋŋ Wɩɩsɛ jaa jɩwiisi ná sɩɛrʋ. Ká lɩ́sɩrá oŋparɛ́ fí nyúú ker pá Levi dunɩɛ má. Ɛ́ Levi dunɩɛ tɩɩ sɩ́ tɩŋ mʋ́ tɔ́nɛ ná wuu há mɩŋ tíé ná mɛ́ á háá parɛ́ a la fí nyúú ker. 39 Tɛ́ŋ ná mɛ́ Levi dunɩɛ háá mʋ́ɛ́ rɩ́wɔ́ la fí nyúú ker má fí nyúú ker a kaa ko Wɩɩsɛ jaa; a kaa zʋʋ bil ɓɩɛ dɩbilí jɩwiisi ná sɩɛnnɛ, Aarɔŋ duo sɩɛrʋ vʋk'ɔɔsɔ nɔ́ŋɔ sɩ́ tɩ́ŋwɔ́ mɛ́. 40 Ɩzɩrayɛl nɩɛ rɩ́ Levi dunɩɛ sɩ́ káŋwɔ́ bilé rɩ́ dɩvɛ́ŋ arɩ́wɔ́ nʋnnɛ wuu satɔ́ɔ́rɩ́pállɛ a kaa mʋ́ bil Wɩɩsɛ jaa jɩwiisi ná sɩɛnnɛ. Róŋ ní ká Wɩɩsɛ jaa cɩ́ksɛ dɩbilí ká vʋk'ɔɔsa há tɛ tʋmɛ́ rɩ́ dánnʋpɔ́ɔ́ra arɩ́ gɔkɛ́ má vá zʋ́zʋ́ ráŋ. Ɛ́ nɛ́ rá sɩ́rá Wɩɩsɛ jaa vɛ́ɛ́ tá.