Ɛsɩdɩra kármɛ́ wɩ́bile kɛnɔ nɩɛ wuu sɩ́ɛ́
8
1 Ɛ́ nɛ́ Ɩzɩrayɛl nɩɛ wuu sɩɛ́ hé náŋa mɛ́, anɛ bál balá dɩhɩ̃́ ná há mɩŋ nyíí dánnʋɔ mɛ́. Ká bʋl Ɛsɩdɩra há ká Wɩɩsɛ wɩ́bile kɛŋzɩnnɔ rʋ́ʋ́ pí Moyizi wɩ́bile kɛnɔ ná, wɩ́bile ná Nyuutɩna Wɩɩsɛ há pʋ́ŋsɛ́ pá Ɩzɩrayɛl, kaa ko. 2 Ɛ́ nɛ́ vʋk'ɔɔsɔ Ɛsɩdɩra pi wɩ́bile kɛnɔ ná kaa ko nɩɛ wuu sɩ́ɛ́. Róŋ ná báála, háála arɩ́ nɩɛ ná wuu há wo wɩ́ɛ́ zesi aá nɛ̃. Ʋ fa ká caŋsɛ balpɛ nyúú mí, dʋ́ŋdʋʋ̃́ tapʋ́l mɛ́ nɛ́. 3 A pɔ́ cɩ́cʋɔ a kaá ja wɔhɔ, Ɛsɩdɩra cɛ́ dɩhɩ̃́ ná há mɩŋ nyii dánnʋɔ, ká karmɛ kɛnɔ ná a pá báála rɩ́ háála, arɩ́ nɩɛ ná wuu há wo wɩ́ɛ́ mʋ́ʋ́la aá nɛ̃. Nɩɛ wuu faá zesi wɩ́bile ná karmɛ́ wérí. 4 Ɛ́ wɩ́ɩ́ yɩr mɛ́, ɓa á dapɩɛrɔ́; kɛŋzɩnnɔ Ɛsɩdɩra sɩɛ́ zɛ́ cɩ́nʋ́ daha. Nɩɛ ná fa há cɩ́nʋ́ neduu nɛ́ ká: Matitiya, Sema, Anaya, Uuri, Hilkiya arɩ́ Maseya. Ká Pedaya, Mikayɛl, Malikiya, Hasum, Hasɩbadana, Zakari arɩ́ Mesulam má cɩ́nʋ́ nɛ́gʋɔ rɩ́. 5 Ɛsɩdɩra fa zɩ́nɔ́ cɛ́ dapɩɛrɔ ná daha a culli nɩɛ wuu mí, a wúrí kɛnɔ ná nɩɛ wuu sɩ́ɛ́. Tɛ́ŋ ná mɛ́, ʋ há kéŋ kɛnɔ ná wúrí, nɩɛ wuu nóú a isi cɛ́ dahá. 6 Ɛsɩdɩra sɩɛ́ cʋɔlɛ Nyuutɩna Wɩɩsɛ, Wɩɩsɛ ná há zeno, nɩɛ wuu sɩɛ́ ɓɔ́wɔ́ nɛ́ŋsa bʋlɛ́: Amɩɩ, Amɩɩ! Ká tuwi ɓírmi a káŋwɔ́ sɩ́ɛ́ cú tíé a cʋɔlɛ Nyuutɩna Wɩɩsɛ. 7 Nɩɛ ná wuu há ise cɛ́ daha, Zozie rɩ́ Bani rɩ́ Serebiya rɩ́ Yamɛŋ rɩ́ Akubɛ rɩ́ Sabetayi rɩ́ Hodiya rɩ́ Maseya rɩ́ Kelita rɩ́ Azariya rɩ́ Yozabadɛ rɩ́ Hanaŋ rɩ́ Pelaya arɩ́ Levi duo nɩɛ sɩɛ́ púl pí Wɩɩsɛ wɩ́bile ná a máŋsɛ́ pɔ́wɔ́ rɩ́wɔ́ nɩ́wɔ́ mʋ́ʋ́la. 8 Ɓa há karmɛ́ Wɩɩsɛ wɩ́bilé ná, ɓa bɩ́rɔ́ máŋsɛ́ dɩkarmɩ́ ná mʋ́l, a makɛ rɩ́ nɛ́ŋ wuu nɛ̃ wɩ́ɛ́ ná mʋ́l wérí. 9 Nɩɛ ná wuu há zésí wɩ́bilé ná karmɛ́ ko tenni, ɓa wuu sɩɛrʋ zɔ́kɔ́ ɓa wi. Ɛ́ nɛ́ guvɛnɛɛrɛ Neemi, rɩ́ vʋk'ɔɔsɔ Ɛsɩdɩra há ká wɩ́bilé zɩ́zɩ́nnɩ́hɔ̃́, arɩ́ Levi duo nɩɛ ná há kármɛ́ wɩ́bilé ná a lɩ́sɩ́wɔ́ mʋ́ʋ́la; bʋ́lwɔ́ rɩ́ bʋlɛ́: Ɩ́ sɩ́ wí, ɩ́ sɩ́ sazɔkɔ́ á, bee wɩ́ɛ́ zaa kɛ́ɩ́wa Nyuutɩna Wɩɩsɛ tápʋl nɛ́! 10 Ɛsɩdɩra bʋ́lwɔ́ rɩ́ bʋlɛ́: Ɩ́ bɩr mʋ́ jɩɩsɛ; a dí ɓɩdíwere, ká nyɔ sɩpɔrɛ́. Ɩ́ pá nɛrɔ ná má há wɩ ɓɩdííle ɛ́ɛ́, bee wɩ́ɛ́ tápʋ́l né kárá Nyuutɩna Wɩɩsɛ tápʋl nɛ́. Ɩ́ sɩ́ sazɔkɔ́ á, bee wɩ́ɛ́ Nyuutɩna Wɩɩsɛ satɔrɔ́ nɛ́ kɛ́ɩ́wa dóé. 11 Levi dunɩɛ bʋ́ɔ́lɛ́ nɩɛ wuu a bʋlɛ́: Ɩ́ sikli! Bee wɩ́ɛ́ zaa ká Wɩɩsɛ tapʋ́l nɛ́, ɩ́ sɩ́ sazɔkɔ́ á. 12 Ɛ́ nɛ́ nɩɛ wuu bɩrmʋ́ jɩɩsɛ rɩ́wɔ́ dí ká nyɔ. Ká ɓa ɓɩdííle pɔ́wɔ́ kénnináŋa, ká ɓa wuu a satɔrɔ́. Bee wɩ́ɛ́, ɓa nɛ̃́ wɩ́ɛ́ ná ɓa há máŋsɛ́ pɔ́wɔ́.Lɔkɔ cana díí wɩ́ɛ́
13 Ʋ tápʋlɛ́ bɛllɛ kal, jɩtɩ́náwa ná wuu rɩ́ vʋk'ɔɔsa, arɩ́ Levi dunɩɛ wuu hé náŋá mɛ́ ko Ɛsɩdɩra há ká wɩ́bilé kɛŋzɩnɔ dɩhɩ̃́, rɩ́wɔ́ ɔsɛ zesi wɩ́bilé ná a zɩ́ŋwɔ́ mʋ́ʋ́la wérí. 14 Ɛ́ wɩ́bilé kɛnɔ sɩɛrʋ ɓa nóú rɩ́ Nyuutɩna Wɩɩsɛ fa mákɔ́ pá Moyizi; a bʋlɛ́ caŋsɛ balpɛ cana díí tɛ́ŋ mɛ́, Ɩzɩrayɛl nɩɛ mɔhɔ̃́ rɩ́wɔ́ mɩŋ lɔkɔ sɩɛnnɛ nɛ́. 15 Ka rɩ́wɔ́ bʋl pá tɔ́nɛ nɩɛ rɩ́ Zerizalɛmɛ nɩɛ wuu, rɩ́wɔ́ zɛ́ pallɛ nyunni a bónni olivi tupaarʋ rɩ́ gɩr sɩɛrʋ ólivi tupaarʋ rɩ́ mirti tupaarʋ rɩ́ habɛ tupaarʋ arɩ́ túí tupaarʋ, a kaa ko ciki lɔkɔ; anɛ ɛ́ há pʋ́ŋsɛ. 16 Ɛ́ nɛ́ nɩɛ lɩɩ mʋ́ bónni tupaarʋ, a kaa ko ciki lɔkɔ, ɓa cíkí náŋa ɓa jɩɩsɛ luŋse daha, náŋa ɓa wuolli mí, náŋa Wɩɩsɛ jaa wuolli sɩɛrʋ, a ciki náŋa nyii dánnʋɔ ná mɛ́, ká ciki náŋa má Efɩrayɩŋ dánnʋɔ mɛ́. 17 Ɓa nɩɛ ná wuu há bɩ́rɛ́ lɛ yomí ko, cíkí lɔkɔ a mɩ́ŋwɔ́ sɩɛnnɛ. A pɔ́ Nuŋ bio Zozie tɛ́ŋ mɛ́, ká kaa ko lɛ zaa, Ɩzɩrayɛl nɩɛ ha wɩ wɩ́ɩ́ né duo ɛ́ɛ́ ná, bee wɩ́ɛ́ jʋɔsɛ́ ná zénó kɩ́ŋkáŋ. 18 A pɔ́ dʋ́ŋdʋʋ̃́ tápʋl a kaa mʋ́ peri tápʋlɛ́ balpɛ kal, kál wuu ɓaá karmɛ Wɩɩsɛ wɩ́bilé. Ɓa dí cana ná tápʋlɛ́ balpɛ nɛ́, ká ʋ tápʋlɛ́ córí kal nɩɛ wuu ko hé náŋá mɛ́, a nɛ ɛ́ há mákɛ́.