4
1 Amá Saŋbala rɩ́ Tobiya rɩ́ Arabɛwa rɩ́ Amɔŋ duo nɩɛ arɩ́ Asɩdɔɔdɛ nɩɛ há nɩɛ̃́ rɩ Zerizalɛmɛ zeŋe ná bɩrsɔɛ mʋ́ sɩ́ɛ́, ká ɓa bɩr aá suki dɩcɔ́nnɛ, ɓa cɔ́ɛ́ wɩ́ɔ́ kɩ́ŋkáŋ. 2 Ɓa wuu hé náŋa mɛ́ vʋʋrɛ rɩ́wɔ́ ko Zerizalɛmɛ yo a zɔkɛ zɔ́krʋ. 3 Ɛ́ nɛ́ á sʋ́lɩ́rá Wɩɩsɛ, ká tɩ́ŋwɔ́ wɩ́ɛ́ a lɩ́sɛ pʋ́pɔ́ɔ́ra rɩ́wɔ́ pɔ́rá mɛ́ wɔhɔ rɩ́ tɩ́taŋ. 4 Ká Ziida nɩɛ má sɛ́: «Tʋtʋnna báá wɩ dóé kené ká zɩɓoru ná tɛ́ŋ kánɔ́, ɛ́ wɩ́ɛ́, á waá wólli bɩ́rsɔɔ zeŋe ná. 5 Á dɩŋdɔma fa sɛ́: Ɓa waá a rɩ́wɔ́ zɩŋ, ɓa waá a rɩ́wɔ́ ná wɩ́ɩ́ wuu a kaá ja tɛ́ŋ ná mɛ́ á há sɩ́ ko zʋ́wɔ́ sɩɛrʋ a ɓʋ́ʋ́sɩ́wɔ́, a zɔ́kwɔ́ tʋtʋmɛ́.Neemi pa lalyoórɩ́cɩksɛ pá tʋtʋnna
6 Ká Zuwifiwa ná fa há mɩ́ŋrá dɩ́ŋdɔma laka kó ráá rɩ́ a peri naasɩ́ fí a bʋl párá rá pɔ́rá tɩɩ mɛ́. Ɓa sɛ́ ɩ́ bɩ́r kó ráá rɩ́! 7 Ɛ́ nɛ́ tɛ, ŋ lɩ́sɛ nɩɛ ɓa pa tókowíé, cɔlmɩwa, arɩ́ tónni a mʋ́ féŋsi zeŋ ná har bʋɔnɛ sɩɛrʋ. Ŋ ɔ́ɔ́ ɓa féŋsi duó duówa nɛ́. 8 Ŋ há bélwó cɩ́nɛ ko tenni, ŋ bʋ́l sɩ́dííre rɩ́ tɔ́ɔ́ tɩ́náwa, arɩ́ nɩkáánɛ ná rɩ́ bʋlɛ́: Ɩ́ sɩ́ɩ́wa dɩ́ŋdɔma héwíŋ fá! Ɩ́ zɩŋ rɩ́ɩ́wa Nyuutɩna zeno a mɔ rɩ́wɔ́ fɔ́ʋ́; ɩ́ mɔhɔ̃́ rɩ́ɩ́wa yoo lɛ́ɩ́wa maábináŋa, ɩ́ bɛlɛ, ɩ́ tolé, ɩ́ háála, arɩ́rɩ́wa jɩɩsɛ! 9 Tɛ́ŋ ná mɛ́ á dɩŋdɔma há kúé zɩŋ rá ɛ̃ wɩ́ɩ́ ná nʋɔ mɛ́, a zɩŋ rɩ́ Wɩɩsɛ ɔ́ɔ́ ɓa sabɩɩna jáŋ gúl, á wuu bɩ́rɔ́ mʋ́ zeŋ ná dɩsɔ́ɛ́, nɛ́ŋ wuu tʋ́tʋ́mʋ́ tʋtʋmɩ́. 10 A pɔ́ ɛ́ tapʋ́l, ŋ tʋtʋnna ná fá, faá sɔ zeŋ ná nɛ́, ká fá náŋa ná má pa cɔlmɩwa, hɔkɛ́rɛ, tónni, arɩ́ hɔɔ gɛnnɛ. Ká nɩhɩɛ̃́sɛ má cɛ́ Ziida nɩɛ wuu har. 11 Nɩɛ ná háá sɔ zeŋ ná, rɩ́ nɩɛ ná háá cɩ́ɩ́nɛ cɩksɛ, ɓa oro wuu kéŋ nɛ́bala nɛ́ aá tʋŋ, ká nɛ́sɛ nɔ́ŋɔ má ka lalyóórícɩka; 12 Sʋsɔ́ɔ́rá ná oro wuu fa vɔ́wʋ́ tókowí ʋ tɩŋa mɛ́ nɛ́ kaá sɔ. Nɛ́ŋ ná fa háá mu nyɩ́la mɩ́nɩ́ŋ laka nɛ́. 13 Ɛ́ nɛ́, ŋ bʋl sɩ́dííre rɩ́ tɔ́ɔ́ tɩ́náwa, arɩ́ nɩkáánɛ ná rɩ́ bʋlɛ́: Tʋtʋmɩ́ ná zeno ʋ gbésó má, ká á pɩsɛ náŋá mɛ́ zekúme ná dáhá, á kɛ́kɛ́ náŋá mɛ́. 14 Ɛ́ wɩ́ɛ́, ɩ́ há mɩŋ róŋ ná wuu, rɩ́ɩ́wa nɛ́ nɛ̃́ nyɩ́la mui, ɩ́ wuu hé dóé ká kóŋ laka. Á Wɩɩsɛ sɩ́ yoo párá!» 15 Áá tʋŋ tʋtʋmɩ́ ná nyɛ́ nɛ́, á sɩɛrʋ nɩɛ fá, fa kéŋ cɔlmɛ ɓa nɛ́ŋsa mɛ́ a pɔ́ tɩ́tapʋlla a kaá ja caŋwʋllɛ lɩɩ. 16 Ɛ́ tɛ́ŋ tɩɩ mɛ́ nɛ́, ŋ baa bʋl pá nɩɛ ná bʋlɛ́: Rɩ́ nɛrɔ wuu rɩ́rʋ́ tʋtʋnnɔ ko cɔ Zerizalɛmɛ mɛ́, a pɔ́rá mɛ́ tɩ́taŋ ká rɩ́ tɔ́ɔ́ pʋ́lɔ́ rɩ́wɔ́ mʋ́ aá tʋŋ.» 17 Ŋ rɩ́rɩ́ŋ maábináŋa, ŋ tʋtʋnna, arɩ́ sóójiwa ná fa há tɩ́ŋɩ́ŋ mɛ́, wɩ́rá gɛnnɛ wúrké. Nɛ́ŋ wuu fa kenú lalcɩksɛ rɩ́ɩ́ nyii.