Neemi kɛnɔ
Neemi nɛ́ Zerizalɛmɛ labáárɛ
1
1 Ná Hakaliya bio Neemi wɩ́bʋlɛ́. Kuóro Artasɛrsɛ kuorí díí bɩŋsɛ mɛrɛ́ nyúú mí, Kisile acana sɩɛrʋ, rɩŋ é Neemi fa mɩŋ tɔ́zeno Suzi mí ní. 2 Ŋ maábináŋa sɩɛrʋ nɔ́ŋɔ Hanani rɩ́ báála náŋa lɛ́ Ziida dɩtɩ́llɛ ko. Ɛ́ nɛ́ ŋ bɔ́sɩ́wɔ́ Zuwifiwa ná há lúé lɛ́ yomi mí rɩ́ Zerizalɛmɛ wɩ́ɛ́. 3 Ɛ́ nɛ́ ɓa sɛ́: Ɓa ná há lúé lɛ́ yomi mí dɩtɩ́llɛ ná mɛ́, mɩŋ wɩɩla rɩ́ hɩɩ̃sɛ mɛ́; ká Zerizalɛmɛ zeŋe ná wuu cɔ́nnɛ, níŋ duú dánnʋʋsɛ bonni zɔkɛ.Neemi sʋ́l Wɩɩsɛ Ziide nɩɛ wɩ́ɛ́
4 Ŋ há nɛ̃́ wɩ́bʋlɛ́ nyáŋ, ŋ kénó a wí, a vɔwɛ nʋɔ tápʋlɛ́ ɓɩkana ŋ sɩɛrʋ wuu zɔkɛ ŋ ké bána nyúú Wɩɩsɛ sɩ́ɛ́ aá sʋ́lʋ́; 5 Ŋ sɛ́: Ŋŋ́ sʋ́lɩ́ rɛ́ Nyuutɩna Wɩɩsɛ, bána nyúú Wɩɩsɛ, Wɩɩsɛ ɩ zénó a mɔ rɩ́wɔ́ fɛ́ɩ́! Ɩ kéŋ nʋtʋmɛ́ rɩ́ nɩɛ ná há cóí, aá tɩ́ŋɩ́ kɩ́ŋse! 6 Ŋŋ́ sʋ́lɩ́ rɛ́, wúrí sɩ́ɛ́ cáásɩ́ŋ a ɓílí dɩllɛ zesi nɛ̃ wɩ́sʋllɔ́ né ŋ é há kɛ́ɩ́ tʋtʋnnɔ haá sʋ́lɩ́ rɩ́. Zaa, wɔhɔ rɩ́ tɩ́taŋ ŋ mɩ́nɩ́ sɩ́ɛ́ aá sʋ́lɩ́ rɩ́ɩ́ pi Ɩzɩrayɛl nɩɛ há kɛ́ɩ́ tʋtʋnna zɔ́krʋ cɛ́wɔ́, bee wɩ́ɛ́ á wuu nɛ́ zɔ́kɩ́ mɛ́. Ŋ rɩ́rɩ́ŋ jaa nɩɛ á wɩ́bɔmɔ. 7 Á cáásɔ́ tʋŋ bɔ́ŋbɔ́ŋ ɩ mɛ́; á vɔ́ɔ́ rá tɩ́ŋ kíŋse rɩ́ wɩ́bilé arɩ́ wɩ́makɛ́ ná ɩ há píé pá Moyizi, ɩ tʋtʋnnɔ. 8 Ŋŋ sʋ́lɩ́ rɛ́, bɩɩnɛ wɩ́bʋl ná wɩ́ɛ́ ɩ há bʋ́lɛ́ pá ɩ tʋtʋnnɔ Moyizi a bʋ́lɛ́: «Rɩɩ́wa nɛ́ tʋ́ŋ wɩ́tɩɛnnɛ, ŋ sɩ́ a rɩ́ɩ́wa pɩsɛ zʋ duowa sɩɛrʋ; 9 amá, rɩɩ́wa nɛ́ bɩ́rɛ kóŋ rɩ́, aá zílíŋ kíŋse kaá tɩ́ŋwɔ́; rɩ́ŋ fa có rɩ́ŋ yíkíwa tá nɛɛ́ má dúníé mí, ŋ sɩ́ bɩr káníwa ko hé náŋa mɛ́, rɩ́ŋ kánɩ́wa mʋ́ dɩhɩ̃́ ná ŋ há lɩ́sɛ́ rʋ́ʋ́ áŋ yɩr dɩmɩnɩ́. 10 Ɓa kɛ́ɩ́ tʋtʋnna rɩ́rɩ́ nɩɛ nɛ́, ɩ há lɛ́ɛ́ tá a tɩ́ŋɩ́ dóé zéno rɩ́rɩ́ vadóé mí. 11 Ŋŋ sʋ́lɩ́ rɛ́, Nyuutɩna ɓílí dɩllɛ zesi nɛ̃ ŋ wɩsʋllɔ́ rɩ́rɩ́ tʋtʋnna ná há có rɩ́wɔ́ fɛ́ɩ́ héwíŋ wɩ́sʋlɔ! Zaa, pɛ́ŋ mɛ́ rɩ́ŋ wɩ́ɛ́ cɛ́rɛ, a a rɩ́ báálɔ né fáŋ susu. Ɛ́ cɛ́rɛ mɛ́, ŋ nɛ́ faá zɩŋ kuóro sɩnyɔɔlɛ́ wɩ́ɛ́.