Ɛsɩdrasɛ rɩ́rʋ́ʋ́ har nɩɛ wɩ́ɛ́
8
1 Ná jɩtɩ́náwa ná há tɩ́ŋɩ́ŋ é Ɛsɩdrasɛ mɛ́ a lɛ́ Babɩlɔɔnɛ bɩrko Zerizalɛmɛ, kuóro Artasɛrsɛɛsɛ kuorí dí tɛ́ŋ mɛ́. Ɓa yɩra nɛ́ nyɛ́: 2 Gɛrsɔŋ há lɛ́ Pinihasɛ dunɩɛ sɩɛrʋ; Danɩɛl há lɛ́ Itamarɛ dunɩɛ sɩɛrʋ; Hatuusi há lɛ́ Davidi dunɩɛ sɩɛrʋ, 3 Sekaniya bio nɔ́ŋɔ; rɩ́ Zakari há lɛ́ Parɔsɛ dunɩɛ sɩɛrʋ, rɩ́rʋ́ʋ́ har báála zɔlɔ rɩ́ fí (150); 4 Zeraya bio Elɩɔhenayɩ há lɛ́ Pahatɛ'Mʋɔbɛ dunɩɛ sɩɛrʋ, má rɩ́rʋ́ har báála zɔ́wɛllɛ (200); 5 Yazɩyɛl bio Sekaniya há lɛ́ Zatu dunɩɛ sɩɛrʋ, má rɩ́rʋ́ har báála zɔtoro (300); 6 Zonataŋ bio Ebɛdɛ há lɛ́ Adiŋ dunɩɛ sɩɛrʋ, rɩ́rʋ́ʋ́ har báála rɩ́ fí (50); 7 Ataliya bio Ezayi há lɛ́ Elamɛ dunɩɛ sɩɛrʋ, rɩ́rʋ́ har báála mɛɛ́sɩ́botoro rɩ́ fí (70); 8 Mɩkayɛl bio Zebadiya há lɛ́ Sefatiya dunɩɛ sɩɛrʋ, rɩ́rʋ́ har báála mɛɛ́sɩbaná (80); 9 Yehɛl bio Abdiyaasɛ há lɛ́ Yʋabɛ dunɩɛ sɩɛrʋ, rɩ́rʋ́ har báála zɔwɛllɛ rɩ́ fí rí córí (218); 10 Yosifiya bio Selomiti há lɛ́ Bani dunɩɛ sɩɛrʋ, rɩ́rʋ́ har báála zɔlɔ rɩ́ mɛɛ́sɩ́botoro (60); 11 Bebayi bio Zakari há lɛ́ Bebayi dunɩɛ sɩɛrʋ, rɩ́rʋ́ har báála mɛrɛ́ rí córí (28); 12 Hakkataŋ bio Yohanaŋ há lɛ́ Azigadɛ dunɩɛ sɩɛrʋ, rɩ́rʋ́ har báála zɔlɔ rɩ́ fí (110); 13 Elɩfɛlɛtɛ, Yehɩɛl, arɩ́ Semaya há kɔ́wɔ́ sɩɛrʋ héŋbíísi, ɓa botoro ná lɛ́ Adonikamɛ dunɩɛ sɩɛrʋ, má rɩ́wɔ́ har báála mɛɛ́sɩbotoro (60); 14 Utayi, rɩ́ Zakur, há lɛ́ Bigɩvayi dunɩɛ sɩɛrʋ, rɩ́wɔ́ har báála mɛɛ́sɩbotoro rí fí (70).Zuwifiwa kéŋwó tɩɩ rɩ́wɔ́ mʋ́ Zerizalɛmɛ
15 Nɩɛ nyáŋ wuu ní, ŋ yɩrɛ ciki polnaa ná nyii há pálɛ́ caasɛ Ahava rɩ́ɩ́ cɔɔ, á wuu ké róŋ tápʋlɛ botoro. Ɓa há kóé ŋ kɩ́ɛ́lɛ nɩɛ ná rɩ́ vʋ́k'ɔɔsa ná sɩɛrʋ rɩ Leviti dunɛ́ŋ balá má tɩɩ fa tówó sɩɛrʋ. 16 Ɛ́ nɛ́ ŋ tʋ́ŋ ɓa yɩrɛ sɩ́dííre Eliyezɛɛrɛ, Arɩyɛl, Semaya, Ɛlnataŋ, Yaribɛ, Ɛlnataŋ, Nataŋ, Zakari, rɩ́ Mesulamɛ. Arɩ́ wɩ́bilé karmɩ́'ánáwa ná bɛllɛ Yoyaribɛ, rɩ́ Ɛlnataŋ. 17 Ŋ máŋsɛ wɩ́ɛ́ pɔ́wɔ́ rɩ́wɔ́ mʋ́ bʋl pá Kasifia sɩ́dííro Ido, rɩ́rʋ́ maábináŋa ná há mɩŋ Kasifia mɛ́, a a Wɩcʋlɩjaa tʋtʋnna, rɩ́wɔ́ ja tʋtʋnna rɩ́wɔ́ ko aá tʋ́ŋrá Wɩɩsɛ Wɩcʋɔlɩjaa ná mɛ́. 18 Á Wɩɩsɛ há mɩŋrá har wɩ́ɛ́, ɓa wólló ka Serebiya há ɛ̃́ wɩ́ɛ́ a kaa ko. Ʋ ka Levi dunɛ́ŋ rɛ́, a lɛ́ Mali dunɩɛ sɩɛrʋ, Ɩzɩrayɛl bio. Ʋ bɛlɛ rɩ́rʋ́ maábináŋa ka báála fí rí córí, 19 a sɩɛ́ suúri Hasabiya, rɩ́ Ezayi há lɛ́ Merari dunɩɛ sɩɛrʋ, arɩ́wɔ́ maábɩnáŋa rɩ́wɔ́ bɛlɛ, ɓa wuu a nɩɛ mɛrɛ́. 20 Ɓa pɔ́ɔ́ kɛsɛ Wɩcʋlɩjaa tʋtʋnna naŋá báála zɔwɛllɛ rɩ́ mɛrɛ́ (220) a kaa ko. Ɛ́ nɩɛ duo ní Davidi rɩ́rʋ́ kuówɩ́ɛ́la fa lɩ́sɛ, ɓaá pɛ́ Levi duo nɩɛ mɛ́. Ɓa dɩ́ɩ́sɩ́wɔ́ wuu yɩra nɛ́. 21 Ahava polnaa ná laka, ŋ ɔ́ɔ́ á vɔwɛ nʋɔ, a múúrírá tɩɩ, a sʋ́lrá Wɩɩsɛ, á ŋmɛ́nɔ ná wɩ́ɛ́. Á sʋ́lʋ́ rʋ́ʋ́ bélrá rɩ́rá jaa nɩɛ rɩ́rá ɓɩɛ mɛ́. 22 Beé wɩ́ɛ́, ʋ ɛ́ fa kéŋ hɩɩ̃sɛ páŋ, rɩ́ŋ sʋl kuóro rʋ́ʋ́ párá sóójíwa, rɩ́ zákzɩ́nna rɩ́wɔ́ nɛ́ lárá sɩ́ɛ́, a pɔ́rá mɛ́ rá dɩŋdɔma sɩ́rá wálmʋ́. Beé wɩ́ɛ́, á fa bʋ́lʋ́ pá kuóro ráá Wɩɩsɛ cɩ́nɔ́ tɩ́kʋ́ nɩɛ rʋ́ʋ́ a weri pɔ́wɔ́, ká bɩ́rʋ́ har tɛ́ nɩɛ ná há vɔ́ʋ́ nʋɔ tɩŋɛ́, aá dí cɔwɩɩlɔ́ ɓa nyúú. 23 Ɛ́ nɛ́ á wuu sáŋ vɔwɛ nʋɔ a sʋ́lrá Wɩɩsɛ rʋ́ cú tɔ́rá mɛ́. Ɛ́ nɛ́ ʋ sáŋrá wɩ́sʋlɔ́. 24 Ɛ́ har mɛ́, ŋ tʋ́ɔ́sɛ vʋk'ɔɔsa nɩhɩ́ɛ̃́sɛ fí rí bɛllɛ, há ká Serebiya rɩ́ Hasabiya arɩ́wɔ́ maábináŋa fí, 25 a dɩɩsɛ meéwíé rɩ́ salmɛ arɩ́ cɩksɛ ná, kuóro rɩ́rʋ́ cɩ́cáána, ʋ kuówɩɛla arɩ́ Ɩzɩrayɛl nɩɛ ná wuu há mɩŋ tɔ́ɔ́ ná mɛ́; há a satɔ́ɔ́rɩ́pállɛ á Wɩɩsɛ Wɩcʋɔlɩjaa ná yɩr mɛ́ a pɔ́wɔ́; 26 meéwíé tɔ́nɛwa mɛrɛ́, rɩ́ wárɛ tɔ́nɛwa botoro, cɩkwére arɩ́ salmɛ má tɔ́nɛwa botoro, ɓa nyɛ nɛ́ ŋ kérsi héwó nɛ́sɛ mɛ́; 27 a súúri salmɛ naŋtáŋsɛ mɛrɛ́, há pérí salmɛ kuléwa bʋ́ɩ́, rɩ́ kɔmɔ́ vitʋlɛ́ bɛllɛ. Ɛ́ kɔmɔ́ viini tʋlɛ́ nɩhɩ̃́ salmɛ nɛ́. 28 Ŋ bʋlwɔ́ rɩ́ a bʋlɛ́: «Ɩ́ ka Nyuutɩna Wɩɩsɛ nɩtɩ́llɛ nɛ́, cɩksɛ nyáŋ má ka Nyuutɩna Wɩɩsɛ tɩ́llɛ nɛ́. Meéwíé nyáŋ arɩ́ salmɛ nyáŋ ka satɔ́ɔ́rɩ́pállɛ nɛ́ a pá Nyuutɩna Wɩɩsɛ, ɩ́ naábalwa Wɩɩsɛ. 29 Ɛ́ wɩ́ɛ́, ɩ́ belwó mí wérí, a pɔ́wɔ́ mɛ́, a kaá ja tɛ́ŋ ná mɛ́ ɩ́ há sɩ́ páwɔ́ wuu kaa mʋ́ kérsi Zerizalɛmɛ mɛ́, Nyuutɩna Wɩɩsɛ Wɩcʋlɩjaa ná jɩwɩ́ɛ́la sɩɛrʋ, vʋk'ɔɔsa nɩhɩɛ̃́sɛ, rɩ́ Levi duo nɩɛ, arɩ́ Ɩzɩrayɛl jɩtɩ́náwa sɩ́ɛ́.» 30 Vʋ́k'ɔɔsa rɩ́ Levi duo nɩɛ la wárɛ ná, rɩ́ salmɛ ná, arɩ́ cɩkwéré ná wuu ɓa fa há kérse a kaa mʋ́ Zerizalɛmɛ, a kaa zʋ bílrá Wɩɩsɛ Wɩcʋɔlɩjaa ná mɛ́.
Zuwifiwa pérí Zerizalɛmɛ
31 Dʋ́ŋdʋʋ̃́ cana tápʋlɛ́ fí rí bɛllɛ kál nɛ́, á lɛ́ Ahava polnaa mɛ́ aá mʋ́ Zerizalɛmɛ. Á sɩɛ́ há lɛ́ ŋmɛ́nɔ, á Wɩɩsɛ mɩ́ŋrá har, a kɛ́rɛ dɩŋdɔma rɩ́ gabibara mɛ́ ɓa wɩ rá walmɛ. 32 Á há kúé peri Zerizalɛmɛ, á kénó fɩɛlɛ tápʋlɛ botoro. 33 Tápʋ́lɛ baná kál á ɔ́ɔ́ vʋk'ɔɔsɔ Meremɔtɛ há ká Uuri bio baa kérsi meéwíé ná, rɩ́ salmɛ ná, arɩ́ cɩkwere ná, á Wɩɩsɛ Wɩcʋɔlɩjaa ná sɩɛrʋ. Fineyaasɛ bio Eliyazaarɛ, rɩ́ Levi dunɛrɔ Yozabadɛ há ká Zozie bio, arɩ́ Binuwi bio Nodiya nɛ́ pɛ́wɔ́ mɛ́. 34 Ɓa dɩ́ɩ́sɩ́wɔ́ wuu, a kérsíwó wuu, a pʋ́ŋsɩ́wɔ́ wuu nʋɔ a hé kɛnɔ mɛ́. 35 Lal nɩkɛsɛ ná há bɩrɛ ko, ɓa ɔsɛ vʋk'físe pá Ɩzɩrayɛl Wɩɩsɛ, Ɩzɩrayɛl nɩɛ wuu yɩr mɛ́: Ɓa ɓʋ́ʋ́sɛ nɔɓallɛ fí rí bɛllɛ, peɓallɛ mɛɛ́sɩbaná rí fí rí balgo, arɩ́ pewiisi mɛɛ́sɩbotoro rí fí rí balpɛ, a ɓʋ́ʋ́sɛ bʋŋgboksi má fí rí bɛllɛ a ɔsɛ wɩ́bɔmɔ vʋk. Ɛ́ pʋsɛ wuu ɓa há ɓʋ́ʋ́sɛ, ɓa físíwó wuu ní pá Nyuutɩna Wɩɩsɛ. 36 Ɛ́ har mɛ́, ɓa pi kɛnnɛ ná há bʋl kuóro sabɩɩna wɩ́ɛ́, a pá nɩɛ ná háá saŋ kuóro yɩr mɛ́; arɩ́ Ɩfɩratɛ dɩtɩ́llɛ wɩɩsɛ dɩ́zʋʋlɩ́ cɔ́ɔ́ gúvɛ́rnɛ́ɛ́rwa. Ɓa isi ko pɛ́ Ɩzɩrayɛl nɩɛ mɛ́ a bɩrmɛ Wɩɩsɛ Wɩcʋɔlɩjaa ná.