Salomɔŋ sʋ́l zɩmɛ́ Wɩɩsɛ rɩ́, rʋ́ʋ́ dí kuorí
1
1 Davidi bio Salomɔŋ kuorí nalure ɔ́sɔ́ zʋ tíé. Bee wɩ́ɛ́, Nyuutɩna Wɩɩsɛ, ʋ Wɩɩsɛ, fa mɩ́nʋ́ har a a ʋ kuorí yɩr lɛ. 2 Salomɔŋ bʋ́l Ɩzɩrayɛl nɩɛ wuu rɩ́, sóójiwa bʋ́ɩ́wa nɩhɩɛ̃́sɛ, sóójiwa zɔlɔwa nɩhɩɛ̃́sɛ, sarɩ́yadííre, Ɩzɩrayɛl sɩ́dííre ná wuu, arɩ́ Ɩzɩrayɛl jɩtɩ́náwa rɩ́ a bʋlɛ́. 3 Salomɔŋ rɩ́ nɩɛ ná wuu hé náŋá mɛ́, a mʋ́ Gabaɔŋ, dɩhɩ̃́ ná ɓa háá ɔsɛ vʋka. Bee wɩ́ɛ́, ɛ́ dɩhɩ̃́ nɛ́ Wɩɩsɛ táŋtɛjaa ná Wɩɩsɛ tʋtʋnnɔ Moyizi fa há ɛ́ɛ́ gɩrbétéké sɩɛrʋ fa mɩŋ.4 Amá Davidi fa ɔ́ɔ́ ɓa mʋ́ Kiriyatɛyariimi a pi Wɩɩsɛ nʋtʋmɛ daká ná kaa ko bil dɩhɩ̃́ ná ʋ fa há bɩ́rmɛ́ bílú mí, bee wɩ́ɛ́, ʋ fa cíkí táŋtɛ Zerizalɛmɛ mɛ́ ʋ wɩ́ɛ́. 5 Ʋ fa pí kɔmɔ́ vʋk'ɔ́ɔ́sɩ́koro ná Uuri bio Bɛtɩsalɩɛl há ká Huur nɩhĩ fa há ɛ́ɛ́ a bil Nyuutɩna Wɩɩsɛ táŋtɛjaa ná sɩ́ɛ́. Salomɔŋ rɩ́ nɩɛ tʋ́ŋ ɛ́ nɛ́ a ɓaarɛ Nyuutɩna Wɩɩsɛ. 6 Salomɔŋ zɛ́ kɔmɔ́ vʋk'ɔ́ɔ́sɩ́koro ná daha, Nyuutɩna Wɩɩsɛ sɩ́ɛ́, a ɓʋ́ʋ́sɛ pʋsɛ bʋ́ɩ́ a ɔsɛ vʋkfíse vʋk'ɔ́ɔ́sɩ́koro ná há mɩŋ céme táŋtɛjaa ná laka. 7 Ɛ́ tɩ́taŋ, Wɩɩsɛ kenú tɩɩ nyɩɩsɛ Salomɔŋ mɛ́ a bʋ́lʋ́ rɩ́ɩ́ bʋlɛ́: «Sʋl omo ná ɩ haá jɛɛ́, ŋ sɩ́ pɛ́ɩ́.» 8 Ɛ́ nɛ́ Salomɔŋ bʋl Wɩɩsɛ rɩ́ bʋlɛ́: «Ɩ mákɩ́ nɩ́cɩ́tɩkɔ́ zeno ná páŋ áná Davidi, a lɩ́sɩ́ŋ rɩ́ŋ lɔ́ʋ́ nyúú mí a dí kuorí. 9 Mʋ́l neé mí, Nyuutɩna Wɩɩsɛ, lo rɩ́ɩ́ nʋɔ ná ɩ há tɛ́ɛ́ páŋ áná Davidi nʋɔ sú. Bee wɩ́ɛ́, ɩ nɛ́ lɩ́sɩ́ŋ rɩ́ŋ dí kuorí nɩɛ nyáŋ nyúú, há kánɔ́ anɛ tíé kúŋkulo. 10 Ɛ́ wɩɛ́, mʋ́l né mí páŋ zɩmɛ́ rɩ́ wɩ́ɛ́ zɩmɛ́, rɩ́ŋ wólli bel nɩɛ nyáŋ mɛ́. Rɩ ɛ́rá, áŋ rɛ́ wóí nɩɛ nyáŋ há kánɔ́ mɔ́ nyɛ mɛ́ aá bel>>» 11 Ɛ́ nɛ́ Wɩɩsɛ bʋl Salomɔŋ rɩ́ a bʋlɛ́: «Wɩ́ɩ́ néé ní há mɩ́nɩ́ sɩɛrʋ, kɛ́ɩ́ wɩ sʋ́lɛ́ jɩ́ja rɩ́ɩ́ ka ɓɩɛ, kuorí, rɩ́ píŋ, ɛ́rá má rɩ́ɩ́ dɩŋdɔma sʋsɛ, ká báá wɩ sʋ́lɛ́ jɩ́ja rɩ́ɩ́ ka mɩgbóó; ká taŋa jɩ́ja zɩmɛ́ rɩ́ wɩ́ɛ́ zɩmɛ́, rɩ́ɩ́ wólli bélíŋ nɩɛ ná ŋ há lɩ́sɩ́ rɩ́ɩ́ ɔ́wɔ́ kuóro, 12 ɛ́ wɩ́ɛ́, ŋ sɩ́ pɛ́ɩ́ zɩmɛ́ rɩ́ wɩ́ɛ́ zɩmɛ́. Ŋ sɩ́ pɛ́ɩ́ Kuóɓɩɛ rɩ́ nɛ́kanɔ́, arɩ́ píŋ; ɩ mɩɩsɛ wuu mí, rɩ́rɩ́ sʋʋ har mɛ́, kuór wuu waá a rʋ́ʋ́ mɩŋ a mɔ́ɩ́. 13 Ɛ́ har mɛ́, Salomɔŋ lɛ́ dúŋdúóŋ ná daha ɓa háá ɓaarɛ venni Gabaɔŋ mɛ́ céme táŋtɛjaa ná sɩ́ɛ́; a bɩrko Zerizalɛmɛ. A ké róŋ dí kuorí Ɩzɩrayɛl nyúú.
Salomɔŋ dóé rɩ́rʋ́ kuóɓɩɛ wɩ́ɛ́ 9.25-28; 1kuóre 10.26-29
14 Salomɔŋ hóú laltórkowa rɩ́ zákzɩ́nna náŋá mɛ́. Ʋ fa kéŋ laltórkowa bʋ́ɩ́ arɩ́ zɔwaná nɛ́ (1400), záksɛ má bʋ́ɩ́ fí arɩ́ bɛllɛ, (12000) ʋ pii tá tɔ́nɛ ná mɛ́ rɩ́ Zerizalɛmɛ mɛ́, kuóro dɩhɩ̃́. 15 Salomɔŋ kuóri díí tɛ́ŋ mɛ́, ʋ ɔ́ɔ́ wárɛ rɩ́ salmɛ pʋrkɛ wérí, anɛ́ dɔ́wʋ́ɔ́ Zerizalɛmɛ mɛ́. Sɛɛdɩr má pʋrkɛ anɛ pirsi Ziida tɔ́ɔ́ dúŋdúóme daha. 16 Salomɔŋ záksɛ fa lɛ́ Ezipiti tɔ́ɔ́ rɩ́ Keve tɔ́ɔ́ nɛ́. Kuóro báyɛlɛ́ fa mʋ́ Keve tɔ́ɔ́ nɛ́ aá yɔwɛ. 17 Ɓaá mʋ́ Ezipiti ní a yɔwɛ lalyóórítórko wuu meéwícááka zɔwalgo, a yɔwɛ záka má meéwícááka zɔlɔ mɛɛ́sɛllɛ rɩ́ fí. Ɓa má sɩɛ́ baa bɩr kaa ko lɩ́sɛ yɛ́llɛ pá Hititiwa kuóre, arɩ́ Siiri kuóre.
Salomɔŋ kénú tɩɩ rʋ́ʋ́ sɔ Wɩcʋɔlɩjɩzeno
18 Salomɔŋ ɔ́ɔ́ ɓa sɔ jaa Nyuutɩna Wɩɩsɛ yɩr mɛ́, ká sɔ kuójaa a pɔ́ʋ́ tɩɩ.