Wɩcʋɔlɩjɩzeno sɔ́ɛ́ satɔ́ɔ́rɩ́pállɛ wɩ́ɛ́
29
1 Kuóro Davidi bʋ́l nɩɛ wuu rɩ́ bʋlɛ́: «Ŋ bio Salɔmɔŋ dʋŋɔ nɛ́ Wɩɩsɛ lɩ́sɛ rʋ́ʋ́ sɔ jaa pá Nyuutɩna Wɩɩsɛ. Ʋ sɩ́ɛ́ ká heŋbíé, ʋ wɩ wɩ́zɩmɛ kené; ká jaa ná sɔɛ a tʋtʋ́ŋ zéní, bee wɩ́ɛ́, ʋ to nɩbíŋ kuójaa, amá Nyuutɩna Wɩɩsɛ ná há ká Wɩɩsɛ nɛ́ tʋ́ʋ̃́. 2 Ɛ́ wɩ́ɛ́, ŋ héŋ dóé wuu, ŋ Wɩɩsɛ jaa ná sɔɛ wɩ́ɛ́, a ja salmɛ rɩ́ meéwí rɩ́ kɔmɔ́ rɩ́ hɔɔ arɩ́ daasɛ há mɔhɛ̃́ rɩ́wɔ́ kaa tʋŋ tʋtʋmɛ́ ná wuu. Ŋ ha já Oníksi dɔ́wʋ́ɔ́, dɔ́wɩ́cɔ́ɔ́lɛ, dɔ́wɩ́tʋlɛ́, dɔ́wʋ́ɔ́ rɩ́wɔ́ íriŋ duo wuu, dɔ́wɩ́wéré rɩ́wɔ́ duo wuu arɩ́ dɔ́wɩ́pʋŋsɛ ná ɓa háá yɩ́rɛ álbáltɩr ɓɩkana. 3 A tɩ́ŋɩ́ŋ há kéŋ cólle rɩ́rɩ́ŋ Wɩɩsɛ jaa ná, ŋ lɩ́sɩ́ŋ tɩɩ óŋkánɛ, ŋ Wɩɩsɛ jaa ná sɔɛ wɩ́ɛ́, salmɛ rɩ́ meéwícááka a súúri onni ná ŋ há jɛ́ɛ́ bil Wɩɩsɛ dɩmɩnɩ́ ná yɩr mɛ́: 4 Ofiiri salmɛ tɔ́ɔ́nɛwa bʋ́ɩ́toro (3 000) rɩ́ meéwícááka ɓa há cʋ́ɔ́rɛ́ má tɔ́ɔ́nɛwa bʋ́ɩ́walpɛ (7000 ) rɩ́wɔ́ kaa mʋɔlɛ jɩɩsɛ ná zeŋe. 5 Ɛ́ salmɛ nɛ́ sɩ́ cʋɔrɛ salmɛ onni ká rɩ́ meéwí ná má cʋɔrɛ meéwí onni ná arɩ́ tʋtʋmɛ́ ná wuu nɛ́sɛ tʋtʋnna há mɔhɛ̃́ rɩ́wɔ́ tʋŋ. Zaa, áŋ rɩ́ có rʋ́ʋ́ púú salmɛ rɩ́rʋ́ meéwí tɛ Nyuutɩna Wɩɩsɛ tʋtʋmɛ́ ná yɩr mɛ́>>» 6 Ɛ́ nɛ́ Ɩzɩrayɛl jɩtɩ́náwa, Ɩzɩrayɛl jɩmʋ́ʋ́la sɩ́dííre, sóóji bʋ́ɩ́wa nyúútɩ́náwa, sóóji zɔlɔwa nyúútɩ́náwa arɩ́ kuóro tʋtʋmɛ́ nyúútɩ́náwa saŋ rɩ́wɔ́ tɛ́wɔ́ satɔ́ɔ́rɩ́pállɛ. 7 Ɓɩ́ɛ́ ná ɓa há kené ko Wɩɩsɛ jaa tʋtʋmɛ́ ná yɩr mɛ́ nɛ́ nyɛ́: Salmɛ tɔ́ɔ́nɛwa zɔlɔ mɛɛ́sɩ́botoro rɩ́ fí (170), salmɛ kuléwa bʋ́ɩ́ fí (10 000) wárɛ há kɛ tɔ́ɔ́nɛwa zotoro (300), kɔmɔ́ há pérí tɔ́ɔ́nɛwa zɔwɔlgo (600) arɩ́ hɔrɛ há kɛ tɔ́ɔ́nɛwa bʋ́ɩ́toro (3 000). 8 Nɩɛ ná má fa há kéŋ dɔ́wɩ́were píwó pá Yehɩɛl há lɛ́ Gɛrsɔŋ duo sɩɛrʋ, rʋ́ʋ́ pii hé Nyuutɩna Wɩɩsɛ jaa kuóɓɩɛ ná sɩɛrʋ. 9 Nɩɛ jʋ́ɔ́sɔ́ ɓa satɔ́ɔ́rɩ́pállɛ ná yɩr mɛ́, bee wɩ́ɛ́, arɩ́wɔ́ sɩɛnnɛ wuu ní ɓa fa bɛ́llɛ lɩ́sɛ rɩ́wɔ́ pá Nyuutɩna Wɩɩsɛ; Kuóro Davidi má sɩɛrʋ tɔ́rɔ́ kɩ́ŋkáŋ ɛ́ wɩ́ɛ́ yɩr mɛ́.Kuóro Davidi bɔ́llɛ Wɩɩsɛ
10 Davidi bɔ́llɛ Nyuutɩna Wɩɩsɛ nɩɛ wuu sɩ́ɛ́, a bʋlɛ́: «Nyuutɩna Wɩɩsɛ á áná Zakɔbɛ Wɩɩsɛ, ɩ nɛ́ tɛ barka cʋɔla tɛ́ŋ wuu mí, a kaá mʋ́ wuu. 11 Nyuutɩna Wɩɩsɛ, ɩ zéno, ɩ duóko, ɩ wéro, ɩ ká kuór, ɩ kéŋ pʋmmɔ; bee wɩ́ɛ́, onni ná wuu há mɩŋ bána rɩ́ tíé nyúú, ɩ nɛ́ tɩ́wɔ́. Nyuutɩna Wɩɩsɛ, ɩ nɛ́ tɛ tíŋ, ɩ dóé nɛ́ kɛ onni wuu. 12 Kuorí rɩ́ píŋ lɩ́ɩ́ nɛ́; ɩ nɛ́ kéŋ sɛ́ onni wuu nyúú. Tíŋ arɩ́ dóé mɩ́nɩ́ nɛ́sɛ mɛ́ nɛ́, ɩ nɛ́ kéŋ tíŋ a ka nɛrɔ aá ɓɔ́ káá pɔ́ʋ́ dóé. 13 Mʋ́l né mí, á Wɩɩsɛ, á dɛ́nnɩ́, á cʋ́ɔ́lɩ́ yɩwero ná. 14 Ŋ ká beé, ŋ nɩɛ é ká beéwa, ráá wólli tɛ satɔ́ɔ́rɩ́pállɛ mɔ nyɛ>> Onni wuu mɩ́nɩ́ rɩ́ nɛ́, onni ná á há píé pɛ́ɩ́ lɩ́ɩ́ nɛ́. 15 Á ká nɩhʋ́ɔ́rá rɛ́, zʋ́zʋ́llɛ́ ɩ sɩ́ɛ́ mɛ́ anɩ́rá naabálwa wuu. Á tíé nyúú tápʋlɛ́ dáárʋ́ a nɛ́ cuunó, á wɩ yɩɛla kené. 16 Nyuutɩna Wɩɩsɛ, á Wɩɩsɛ, oŋkana nyáŋ wuu á há jɛ́ɛ́ hé náŋá mɛ́ ráá sɔ jaa pɛ́ɩ́, ɩ yɩr ná há kɔ́ʋ́ dʋŋɔ wɩ́ɛ́, ɓa lɩ́ɩ́ nɛ́. Ɩ nɛ́ tɩ́wɔ́ wuu. 17 Ŋ Wɩɩsɛ, ŋ ɩ́ɔ̃́ rɩ́ɩ́ kɩ́ɛ́lɛ nɩbííno sɩɛrʋ wérí, ɩ có nɛrɔ ná háá tʋŋ yɛ́rɛ́. Ŋ sɩɛ́ pɛ́ɩ́ satɔ́ɔ́rɩ́pállɛ nyáŋ arɩ́ sapʋmmɩ́ nɛ́, ŋ sɩɛrʋ sɩɛ́ tɔ́rɔ́ mʋ́l né mí ŋ há néí nɩɛ ná há mɩŋ rɛ́ɛ́, aá pɛ́ɩ́ satɔ́ɔ́rɩ́pállɛ. 18 Nyuutɩna Wɩɩsɛ, á naabál Abɩrahaŋ, Ɩzakɛ arɩ́ Ɩzɩrayɛl Wɩɩsɛ, lo rɩ́ sabɩŋ né duo mɩ́nɩ́ nɩɛ mɛ́ tɛ́ŋ wuu mí, a lo rɩ́wɔ́ bɩ́bɩ́ɩ́nɩ́ wɩ́ɛ́. 19 Lo rɩ́ŋ bio Salomɔŋ ka sɩɛrʋ balá rɩ́rɩ́ɩ́, a makɛ rʋ́ʋ́ zílí wɩ́makɛ́ rɩ́rɩ́ɩ́ wɩ́bilé rɩ́rɩ́ɩ́ wɩ́máŋsɛ, a tɩ́ŋwɔ́ wuu ká sɔ kuójaa ná ŋ há jɔ́ʋ́ ɓɩɛ wuu bil.
Salomɔŋ kuorí díí arɩ́ Davidi sʋʋ wɩ́ɛ́
20 Davidi bʋ́l jamáŋ ná wuu rɩ́ bʋlɛ́: «Ŋ́ sʋ́lɩ́wa, ɩ́ bárkɛ Nyuutɩna Wɩɩsɛ, ɩ́ Wɩɩsɛ.» Ɛ́ nɛ́ jamáŋ ná wuu bárkɛ Nyuutɩna Wɩɩsɛ, ɓa naabálwa Wɩɩsɛ. Ɓa ɓírmí tíé, a káŋwɔ́ sɩ́ɛ́ cú Nyuutɩna Wɩɩsɛ arɩ́ kuóro sɩ́ɛ́. 21 Ʋ tɔ́ɔ́ há pʋ́lɛ́, ɓa ɔ́sɛ́ vʋka pá Nyuutɩna Wɩɩsɛ, a ɔsɛ vʋkfise pá Nyuutɩna Wɩɩsɛ: Ɓa ɓʋ́ʋ́sɛ nɔɓallɛ bʋ́ɩ́ (1 000), peɓallɛ bʋ́ɩ́ (1 000) arɩ́ pewiisi má bʋ́ɩ́ (1 000) a sɩɛ́ súúríwó dɩvɛ́ŋ ɔ́ŋsɛ táálɛ mɛ́. Ká ɔsɛ vʋka ɓɩkana Ɩzɩrayɛl nɩɛ wuu yɩr mɛ́. 22 Ɛ́ kal, Ɩzɩrayɛl nɩɛ dí ɓɩɛ́ ká nyɔ, a jʋɔsɛ kɩ́ŋkáŋ Nyuutɩna Wɩɩsɛ sɩ́ɛ́. Ká ɔ́ŋsɛ lɩ́sɛ nʋʋ hé Davidi bio Salomɔŋ nyúú mí, a bílú rʋ́ʋ́ dí Ɩzɩrayɛl kuorí bʋllɛ nyúú mí. Ɓa ɔ́ŋsɛ lɩ́sɛ nʋʋ hóú mí rʋ́ʋ́ dí kuorí ní, ká ɔ́ŋsɛ hé Sadɔkɛ má nyúú mí, rʋ́ʋ́ a vʋk'ɔɔsɔ. 23 Salomɔŋ lɔ́ʋ́ áná Davidi nyúú mí rʋ́ʋ́ dí kuorí, a ké Nyuutɩna Wɩɩsɛ kuóɓasa daha. Salomɔŋ nɛ́rɔ́ wérí, Ɩzɩrayɛl nɩɛ wuu búbú. 24 Ɩzɩrayɛl nɩhɩɛ̃́sɛ wuu, sóójiwa arɩ́ Davidi bɛlɛ ná wuu má tɩɩ múúriwó tɩɩ pá kuóro Salomɔŋ. 25 Nyuutɩna Wɩɩsɛ kéŋ Salomɔŋ ɓɔ́ ʋ a nɩyɩr Ɩzɩrayɛl nɩɛ wuu sɩ́ɛ́ mɛ́. Ʋ ɔ́ɔ́ ʋ kuorí kɩ́llɛ Ɩzɩrayɛl kuóre ná wuu há lɔ́ʋ́ sɩ́ɛ́. 26 Izayi bio Davidi dí Ɩzɩrayɛl wuu kuorí. 27 Ʋ kuorí ná wuu ʋ há dí Ɩzɩrayɛl nyúú ká bɩŋsɛ mɛɛ́sɛllɛ nɛ́: Ɩbrɔŋ mɛ́, ʋ dí kuorí bɩŋsɛ balpɛ; ká dí kuorí bɩŋsɛ mɛrɛ́ rɩ́ fí rɩ́ botoro Zerizalɛmɛ mɛ́. 28 Davidi nɩ́ɩ́nɔ́ wérí, kuóɓɩɛ rɩ́ yɩr vɔ́kʋ́, ʋ dí tɔ́ɔ́ má vɔkɛ ká zɩŋ sʋwɛ. Ʋ bio Salomɔŋ nɛ́ lɔ́ʋ́ nyúú mí a dí kuorí. 29 Kuóro Davidi wɩ́'állɛ, ɓa púle rɩ́wɔ́ tenné mɩŋ muullináárɔ Samɩɛl wɩ́'állɛ kɛnɔ sɩɛrʋ rɩ́ Wɩɩsɛ wɩ́laabʋllɔ Nataŋ wɩ́'állɛ kɛnɔ sɩɛrʋ arɩ́ Wɩɩsɛ wɩ́laabʋllɔ Gadɛ wɩ́'állɛ kɛnɔ sɩɛrʋ. 30 Ɛ́ kɛnnɛ sɩɛrʋ nɛ́ ɓa máŋsʋ́ kuorí díí wɩ́ɛ́, ʋ ballɩ́ díí wuu wɩ́ɛ́; ʋ hiẽsó wɩ́'állɛ wuu Ɩzɩrayɛl mɛ́ arɩ́ tɔ́nɛ ná náŋa dɩtɩ́llɛ wuu mí.