Dɩŋdɔma pɔ́ rɩ́ Zuifiwa sɩ́ bɩrsɔ́ Wɩcʋɔlɩjaa ná.
4
1 Ziida jɩmʋ́l arɩ́ Bɛŋzamɛ jɩmʋ́l dɩŋdɔma há nɩ́ɛ̃́ rɩ́ nɩɛ ná há bɩrɛ lɛ́ yomí ko, mɩŋ róŋ aá sɔ́ Nyuutɩna Wɩɩsɛ, Ɩzɩrayɛl Wɩɩsɛ Wɩcʋɔlɩjaa ná; 2 ɓa ísó ko ná Zorobabɛl rɩ́ jɩ́tɩ́náwa, a bʋlwɔ́ rɩ́ bʋlɛ́: «A có ráá pɛ́ɩ́wa mɛ́, ráá sɔ Wɩɩsɛ Wɩcʋɔlɩjaa ná. Beé wɩ́ɛ́, Asiiri kuóro Asarhadɔŋ há kɛ́sɩ́rá ko rɛ́, á rɩ́rɩ́ɩ́wa wuu fáá cʋɔlɛ Wɩɩsɛ balá nɛ́, á ɔsɛ vʋka aá pɔ́ʋ́. 3 Ɛ́ nɛ́, Zorobabɛl, Zozie, rɩ́ Ɩzɩrayɛl jɩtɩ́náwa ná naŋá bʋlwɔ́ rɩ́ bʋlɛ́: «Á rɩ́rɩ́ɩ́wa wɩ náŋá héé sɔ Wɩcʋɔlɩjaa rɩ́ɩ́ párá Wɩɩsɛ. Á dʋŋɔ́ nɛ́ sɩ́ sɔ Nyuutɩna Wɩɩsɛ, Ɩzɩrayɛl Wɩɩsɛ Wɩcʋɔlɩjaa ná, anɛ ɛ́ Pɛrsɛ kuóro Siriisi tɩɩ há makɛ párá.» 4 Amá tɔ́ɔ́ ná nɩɛ bʋ́l wɩ́ɛ́, aá já rɩ́wɔ́ zɔ́kɛ Zuwifiwa ná sɩɛnnɛ, a hé héwíŋ pɔ́wɔ́ rɩ́wɔ́ baá sɩ́ wólli sɔ Wɩɩsɛ Wɩcʋɔlɩjaa ná. 5 Ɓa pɔ́ Pɛrsɛ kuóro Siriisi tɛ́ŋ wuu mí ní, a kaa mʋ́ peri kuóro Dayirisi tɛ́ŋ mɛ́. Ɓa já meéwíé pá kuóro cɩ́cáána ká rɩ́wɔ́ hé dóé a a rɩ́ Zuwifiwa sabɩɩna jáŋwa gúl.Zuwifiwa dɩŋdɔma pʋ́ŋsɛ kɛnɔ a pá kuóro Artasɛrsɛɛsɛ
6 Zuwifiwa dɩŋdɔma pʋ́ŋsɛ kɛnɔ á bʋl wɩ́ɛ́ cɛ́ Ziida rɩ́ Zerizalɛmɛ nɩɛ mɛ́; a pii tʋŋ ɓa káá mʋ́ pá kuóro Asuerusi, ʋ kuorí díí dʋ́ŋdʋ́ʋ̃́ bɩna mɛ́ nɛ́. 7 Ɛ́ nɛ́ Pɛrsɛ kuóro Artasɛrsɛɛsɛ kuóri díí tɛ́ŋ mɛ́, Biselamɛ, Miterɛdatɛ, Tabɛl, rɩ́wɔ́ tʋtʋnnɩnaŋá ná má pʋ́ŋsɛ kɛnɔ pá kuóro. Ɓa kéŋ Aramɩɛ nɩɛ pʋ́ŋsɩ́bíé ní pʋ́ŋsɛ ɛ́ kɛnɔ ɓa Armɩɛwa liŋó mí. 8 Rehum há ká dɩtɩ́llɛ bíbello, rɩ́rʋ́ kɛŋpʋ́ŋsɔ Simesayi nɛ́ pʋ́ŋsɛ ɛ́ kɛnɔ, a bʋl Zerizalɛmɛ nɩɛ wɩ́ɛ́ wérí, a píí tʋ́ŋ ɓa kaa mʋ́ pá kuóro Artasɛrsɛɛsɛ. Ɓa kɛnɔ ná púl nyɛ nɛ́: 9 «Ŋ é Rehum há ká dɩtɩ́llɛ bíbelló, rɩ́ kɛŋpʋ́ŋsɔ Semesayi, rɩ́ráá tʋtʋnnɩnáŋá há lɛ́ Diŋ dɩtɩ́llɛ, Afarsatakɛ dɩtɩ́llɛ, Tarpɛl dɩtɩ́llɛ, Afarasɛ dɩtɩ́llɛ, Ɛrɛkɛ dɩtɩ́llɛ, Babɩlɔɔnɛ dɩtɩ́llɛ, Suuzi dɩtɩ́llɛ, Deha dɩtɩ́llɛ, arɩ́ Elam dɩtɩ́llɛ; 10 rɩ́ duówa ná naŋá kuózeno Asɩnapaarɛ há kɛ́sɛ́ ko hé Samari tɔ́nɛ, arɩ́ dɩtɩ́llɛ ná naŋá mɛ́, a caasɛ Ɩfɩratɛ fuo, wɩɩsɛ dɩzʋʋlɩ́ rɩ́.» 11 Ɓa kɛnɔ ná sɩɛrʋ wɩ́bʋlɛ́ nɛ́ nyɛ: «Oó kuóro Artasɛrsɛɛsɛ, ɩ tʋtʋnna ná há mɩ́ŋ Ɩfɩratɛ dɩtɩ́llɛ wɩɩsɛ dɩzʋʋlɩ́ rɩ́ cɔɔ; á nɛ́ pʋ́ŋsɛ kɛnɔ né ráá pɛ́ɩ́. 12 Á kuóro, aá ja ráá bʋl pɛ́ɩ́ rɩ́ɩ́ zɩŋ rɩ́ Zuwifiwa ná há lɩ́ɩ́ tɔ́ɔ́ ko Zerizalɛmɛ; ɓaá ja rɩ́wɔ́ bɩrsɔ́ tɔ́ɔ́ ná nɩɛ há ka nɩbɩ́ɩ́lɛ́, a a saháksɩ́tɩ́ɩ́na nɛ́. Ɓa bílú mʋ́l, a bɩr sɩ́sɔ́ʋ́ zeŋe ná. 13 Ɛ́ wɩ́ɛ́, kuóro, zɩŋ rɩ nɩɛ nyáŋ nɛ́ wóllé bɩrsɔ tɔ́ɔ́ né arɩ́rʋ́ zeŋe ná wuu; ʋ nɩɛ báá waá sáŋ túŋ kɩma rɩ́ loŋpówa ná, arɩ́ kɩɛsɔ́wa ná wuu ɓa há mɔhɛ̃́ rɩ́wɔ́ tuŋ. Ʋ ɛ́ sɩɛ́, ɩ kuótɔ́ɔ́ ɓɩɛ sɩ́ múúri. 14 Ɛ́ nɛ́ tɛ́, á é há kɛ́ɛ́ tʋtʋnná, á wɩ wɩ́ɩ́ né duo wuó ná káá sáŋʋ́, bee wɩ́ɛ́, ʋ kɛ́ɩ́ kuóro yɩzɔkɔ́ rɛ́, ɛ́ nɛ́ á pʋ́ŋsɛ wɩ́ɛ́ nyáŋ pɛ́ɩ́. 15 Ɛ́ wɩ́ɛ́, kuóro aá sʋ́lɩ́, rɩ́ɩ́ kɩ́ɛ́lɛ dɩtɩ́llɛ ná kuóre wɩ'állɛ kɛnnɛ sɩɛrʋ. Ɩ sɩ́ ná rɩ́ Zerizalɛmɛ nɩɛ díé má ká nɩbɩ́ɩ́lɛ́ rɛ́. Ɓa ká nɩɛ ná há wɩ́wɔ́ kuóre, rɩ́wɔ́ dɩtɩ́llɛ bíbelle nʋʋsɛ sáŋ nɛ́. Ɓa ká nɩɛ ná háá vúkmi tɔ́ɔ́ nɛ́, ɛ́ nɛ́ tɛ tɔ́ɔ́ ná a tɔ́zɔ́kɩ́. 16 Kuóro, á có rá pi fól bʋl pɛ́ɩ́ rɩ́ɩ́ zɩŋ, rɩ́ Zuwifiwa nɛ́ wólle bɩrsɔ Zerizalɛmɛ tɔ́ɔ́ rɩ́rʋ́ zeŋe ná; zɩŋ rɩ́ ɓa baá wá sáŋ rɩ́ɩ́ tɩ́llɛ Ɩfɩratɛ wɩɩsɛ dɩzʋʋlɩ́ rɩ́ɩ́ cɔɔ ná.»
Kuóro Artasɛrsɛɛsɛ nʋlɩ́sɔ wɩ́ɛ́
17 Kuóro Artasɛrsɛɛsɛ má baá pʋ́ŋsɛ kɛnɔ bʋ́l pɔ́wɔ́ bʋlɛ: «Dɩtɩ́llɛ bíbello Rehum, kɛŋpʋ́ŋsɔ Simesayi, arɩ́wɔ́ tʋtʋnnɩnaŋá ná há mɩŋ Samari mí; rɩ́wɔ́ ná há mɩŋ dɩtɩ́llɛ ná cɔɔ, a caasɛ Ɩfɩratɛ wɩɩsɛ dɩzʋʋlɩ́ rɩ́ cɔɔ, ŋŋ́ cʋ́ɔ́lɩ́wa. 18 Kɛnɔ ná ɩ́ há pʋ́ŋsɛ páŋ, ɓa kénú ko a karmɛ, a lɩ́sʋ́ mʋ́l páŋ rɛ́. 19 Taŋá, ŋ ɓɩɛ́ná ɔ́ɔ́ ɓa bel kɛnnɛ sɩɛrʋ, ɓa nóó rɩ́ Zerizalɛmɛ tésíé wuu mí; ʋ nɩɛ ká nɩbɩ́ɩ́lɛ́, a cɩ́ŋwɔ́ kuóre má tɩɩ mɛ́. Ɓa ká nɩɛ ná háá vúkmi tɔ́ɔ́ nɛ́. 20 Tésíé mí, Zerizalɛmɛ fa kéŋ kuóbɩbara. Ɓa nɛ́ fa tɛ Ɩfɩratɛ wɩɩsɛ dɩzʋʋlɩ́ rɩ́ cɔɔ dɩtɩ́llɛ ná wuu. A a ɓa túŋwó kɩma, loŋpowa arɩ́ kɩɛsɔwa ná naŋá aá pɔ́wɔ́. 21 Ɛ́ wɩ́ɛ́, mʋ́l neé mí, ɩ́ bʋ́l pá Zuwifiwa ná rɩ́wɔ́ báá sɩ́ tʋtʋmɩ́ wuu tʋ́mʋ́, a sɩ́ tɔ́ɔ́ ná sɔ́, a kaá ja tɛ́ŋ ná mɛ́ ŋ há sɩ́ pá ŋmɛ́nɔ. 22 Ɩ́ sɩɛ́ pɔ́ wérí, a sɩ́ wɩ́ɩ́ né sɛ́ŋɓɛlɩ́ á. A makɛ rɩ́wɔ́ háá ná dóé, a ɔsɛ a bɔ́ŋbɔ́ŋ cɛ́ kuóre mí.» 23 Ɓa há kármɛ kuóro Artasɛrsɛɛsɛ kɛnɔ ná, Rehum, rɩ́ kɛŋpʋ́ŋsɔ Simesayi, arɩ́wɔ́ tʋtʋ́nnɩ́naŋá ná wuu sɩ́ɛ́, a ko tenni, ɓa wuu ísó ɓalaɓala rɩ́ a mʋ́ Zerizalɛmɛ, a fɩkɛ Zuwifiwa ná mɛ́, bɩbárɩ́ arɩ́ dóé, rɩ́wɔ́ pi jaa ná sɔ́ɛ́ tá.
Ɓa baa púló aá sɔ́ Wɩɩsɛ Wɩcʋɔlɩjaa ná
24 Ɛ́ wɩ́ɛ́, Zuwifiwa fa pí Zerizalɛmɛ Wɩɩsɛ Wɩcʋɔlɩjaa ná sɔ́ɛ́ tá; a kaá ja Pɛrsɛ kuóro Darisi kuorí díí bɩŋsɛ bɛllɛ nyúú mí.