5
1 Kal oro, Wɩɩsɛ wɩlaabʋlla Aze rɩ́ Ido bio Zakari bʋ́l Zerizalɛmɛ rɩ́ Ziida Zuwifiwa rɩ́, Ɩzɩrayɛl Wɩɩsɛ, ɓa Wɩɩsɛ yɩr mɛ́. 2 Ɛ́ nɛ́ Saltɩɛl bio Zorobabɛl, rɩ́ Yosadakɛ bio Zozie isi púl Wɩɩsɛ Wɩcʋɔlɩjaa ná sɔ́ɛ́ Zerizalɛmɛ mɛ́. Wɩɩsɛ wɩlaabʋlla ná má isi pɛ́wɔ́ mɛ́. 3 Ɛ́ nɛ́, Ɩfɩratɛ wɩɩsɛ dɩzʋʋlɩ́ rɩ́ɩ́ cɔɔ dɩ́tɩllɛ bíbello Tatenayɩm, rɩ́ Setar'Bozinayi, arɩ́wɔ́ tʋtʋ́nnɩ́naŋá ná sɩɛ́ isi ko bɔ́sɩ́wɔ́ bʋlɛ́: «Áŋ rɛ́ pɛ́ɩ́wa ŋmɛ́nɔ rɩ́ɩ́wa bɩrsɔ́ Wɩɩsɛ Wɩcʋɔlɩjaa rɩ́rʋ́ zeŋe ná? 4 Ɩ́ pʋ́ŋsɛ nɩɛ ná háá sɔ́ jaa ná yɩra párá.» 5 Amá, ɓa Wɩɩsɛ tɩɩ sɩ́ɩ́ fɛ́l Zuwifiwa nɩhɩɛ̃sɛ ná nyúú mí bélé wérí; nɛ́ŋ wʋ́ɔ́ mɛ́ kɛ́rɛ́ rɩ́wɔ́ sɩ́ jaa ná sɔ́, a káá já rɩ́wɔ́ pʋ́ŋsɛ kɛnɔ bílwó nʋɔ pá Darisi, káá dɛ́llʋ́ nʋlɩ́sɔ.Ɓa bʋ́l Zuwifiwa wɩ́ɛ́ pá kuoro Darisi
6 Kɛnɔ ná dɩtɩ́llɛ bíbello Tatenayi, rɩ́ Setar'Bozinayi, arɩ́wɔ́ tʋtʋ́nnɩ́naŋá ná há mɩŋ Ɩfɩratɛ wɩɩsɛ dɩzʋʋlɩ́ rɩ́ɩ́ cɔɔ, Afarsakɛ mɛ́; há pʋ́ŋsɛ pá kuóro Darisi nɛ́ nyɛ́: 7 Ɓa pʋ́ŋsɩ́wɔ́ nʋbilkɛnɔ ná a pá kuóro Darisi a bʋlɛ́: «Rɩ́ tɛŋfɩ́ɛ́l peri kuóro! 8 Á kuóro, aá já ráá bʋl pɛ́ɩ́ rɩ́ɩ́ zɩŋ ráá mʋ́ Ziida pʋ́rvɛ́ŋsɛ sɩɛrʋ, róŋ ná Doewuutɩna Wɩɩsɛ Wɩcʋɔlɩjaa há mɩnɛ́. Á ɓɩɛ́na kɩ́ɛ́lɔ rɩ ɓa mɩ́ŋ ráŋ aá sɔ. Ɓá sɔ́ʋ́ rɩ́ dɔwɩcɔ́ɔ́lɛ́, a pá dole pɩɛrɛ sakɛ. Tʋtʋmɩ́ ná wɩ cɩ́nɛ́, ɓa déé tʋŋ rɩ́ sɩ́ɩ́fɩ́ɛ́ma nɛ́. 9 Ɛ́ nɛ́ á bɔ́sɩ́wɔ́ nɩhɩɛ̃sɛ ráá zɩŋ nɛrɔ ná há pɔ́wɔ́ ŋmɛ́nɔ rɩ́wɔ́ bɩrsɔ́ Wɩcʋɔlɩjaa ná rɩ́rʋ́ zeŋe ná. 10 Á bɔsɔ́ ráá zɩ́ŋwɔ́ yɩra, a makɛ ráá pʋ́ŋsɛ nɩɛ ná wuu há mɩŋ tʋtʋ́mɛ́ ná sɩ́ɛ́ yɩra pɛ́ɩ́ kuóro. 11 Ɛ́ nɛ́ ɓa sɛ́: “Á ká bána rɩ́ tíé Wɩɩsɛ tʋtʋnna nɛ́. Á já ráá bɩrsɔ Wɩcʋɔlɩjaa ná Ɩzɩrayɛl kuózeno oro fa há sɔ́ɛ́ tenni fól wuu ní. 12 Beé wɩ́ɛ́, á naabálwa nɛ́ fa ɛ́ɛ́ zɔ́kɛ bána nyúú rí Wɩɩsɛ mɛ́, a púsú cɔwɩɩlɔ́, ʋ píwó hé Kalde nɩɛ Nabikanezaarɛ há ká Babɩlɔɔnɛ kuóro nɛ́sɛ mɛ́. Ɛ́ kuóro ní yóé zɔkɛ Wɩcʋɔlɩjaa ná, ká kɛ́sɛ́ jamáŋ ná káá mʋ́ yomí Babɩlɔɔnɛ tɔ́ɔ́ mɛ́. 13 Amá Babɩlɔɔnɛ kuóro Siriisi kuóri díí dʋ́ŋdʋʋ̃́ bɩna mɛ́ nɛ́ ʋ tɩɩ párá nʋɔ, ráá bɩrmʋ́ sɔ́ Wɩɩsɛ Wɩcʋɔlɩjaa ná Zerizalɛmɛ mɛ́. 14 Kuóro Siriisi tɩɩ há cɛ́ róŋ mí, a pa Zerizalɛmɛ Wɩɩsɛ jaa salmɛ cɩksɛ, rɩ́ meéwicaaka cɩksɛ ná, kuóro Nabikanezaare fa há pɛ́ɛ́ káá mʋ́ bíl Babɩlɔɔnɛ venni jaa mɛ́; a píí hé Sebasarɛ nɛ́sɛ mɛ́. Ɛ́ Sebasarɛ, kuóro tɩɩ nɛ́ lɩ́sʋ́ rʋ́ʋ́ bíbel Ziida dɩtɩ́llɛ mɛ́. 15 Ka bʋ́lʋ́ rɩ́ɩ́ bʋlɛ́: Pá cɩksɛ nyáŋ káá mʋ́ Zerizalɛmɛ a bíl Wɩcʋɔlɩjaa ná sɩɛrʋ, ká bɩrsɔ́ Wɩɩsɛ Wɩcʋɔlɩjaa ná ʋ múkur ná tɩɩ mɛ́. 16 Ɛ́ Sebasaarɛ kó Zerizalɛmɛ, a bíl Wɩɩsɛ Wɩcʋɔlɩjaa ná mʋ́l. Ʋ tʋtʋ́mɛ́ sɩɛ́ há púlé, arɩ́ zaa ɓa há wɩ tenne 17 Ɛ́ wɩ́ɛ́, rɩ́ kuóro ní có, rʋ́ʋ́ a rɩ́wɔ́ bel Babɩlɔɔnɛ kuóre wɩ́'állɛ kɛnnɛ sɩɛrʋ, a ná rɩ́ kuóro Siriisi tɩɩ nɛ́ pá ŋmɛ́nɔ rɩ́wɔ́ bɩrsɔ́ Wɩɩsɛ Wɩcʋɔlɩjaa ná Zerizalɛmɛ mɛ́. Ká rɩ́ kuóro mákʋ́ sabɩɩna párá ɛ́ wɩ́ɩ́ mɛ́.»