Zozie rɩ́ Zorobabɛl bɩ́rɔ́ má vʋk'ɔ́ɔ́sɩ́koro
3
1 Bɩna ná sɩɛrʋ, caŋsɛ balpɛ nyuú mí, Ɩzɩrayɛl nɩɛ ná há mɩŋwɔ́ tɔ́nɛ sɩɛrʋ kó Zerizalɛmɛ, a hé náŋá mɛ́ anɛ nɛ́ŋ balá. 2 Yosadakɛ bio Zozie há ká vʋk'ɔɔsɔ rɩ́rʋ́ maábináŋa má há ká vʋk'ɔɔsa, arɩ́ Saltɩɛl má bio Zorobabɛl rɩ́rʋ́ jaa nɩɛ bɩ́rɔ́ má Ɩzɩrayɛl Wɩɩsɛ vʋk'ɔ́ɔ́sɩ́koro ná; rɩ́wɔ́ ɔsɛ vʋk'físe róŋ, anɛ ɛ́ Wɩɩsɛ báálɔ Moyizi há bʋ́lʋ́ wɩ́bile kɛnɔ sɩɛrʋ. 3 Duówa ná há ko ké tɔ́ɔ́ ná sɩɛrʋ héwíŋ kéŋwó. A rɩ́ ɛ́ wuu, ɓa bɩrɔ́ má Wɩɩsɛ vʋk'ɔ́ɔ́sɩ́koro ná ʋ múkur ná tɩɩ tɩɩ mɛ́. A ɔsɛ cɩ́cʋɔ rɩ́ gbaanɛ vʋk'físe a pá Nyuutɩna Wɩɩsɛ. 4 Ʋ ɛ́ har mɛ́, Ɩzɩrayɛl nɩɛ dí lɔkɔ cana anɛ ɛ́ wɩ́bile há makɛ; ká ɔsɛ kal wuu vʋk'físe ná ɓa nʋɔ mɛ́, wɩ́bile há makɛ. 5 A de pɔ́ ɛ́ mɛ́, ɓa ɔsɛ kál wuu vʋk'fisé, rɩ́ cana wuu dʋ́ŋdʋʋ̃́ tápʋ́l vʋka, rɩ́ Nyuutɩna Wɩɩsɛ caŋsɛ díí vʋka, arɩ́ nɩɛ satɔ́ɔ́rɩ́pállɛ vʋka; aa pá Nyuutɩna Wɩɩsɛ ɛ́ vʋk'ɔ́ɔ́sɩ́koro nyúú. 6 Ɛ́ nɛ́ tɛ́, caŋsɛ balpɛ nyúú mí, dʋ́ŋdʋ́ʋ̃́ tápʋl, ɓa púl ɔsɛ vʋk'físe róŋ a pá Nyuutɩna Wɩɩsɛ. Ʋ ɛ́ rɩ́ ɓa ha wɩ Nyuutɩna Wɩɩsɛ Wɩcʋɔlɩjaa ná mʋ́l bíle. 7 Ʋ har mɛ́, ɓá ja meéwíé pá dɔ́wɩcɔ́ɔ́ra rɩ́ dákʋnna, a pá Sɩɩdɔŋ nɩɛ rɩ́ Tiiri nɩɛ, ɓɩdííle, rɩ́ nyɔɔlɔ́, arɩ́ nʋʋ, ká ɓa pá Lɩbaŋ sɛɛdrɛ daasɛ; a kaa tɩŋ mʋʋ mɛ́ kaa ko Jafa. Pɛrsɛ kuóro Siriisi nɛ́ fa pɔ́wɔ́ nʋɔ rɩ́wɔ́ wólli ɛ́ aá tʋŋ.Wɩcʋɔlɩjɩfɛlɔ mʋ́biló wɩ́ɛ́
8 Bɩna ná ɓa há ko Zerizalɛmɛ Wɩɩsɛ Wɩcʋɔlɩjaa ná dɩsɔ́ɛ́, ʋ bɩna ná há tʋ́kɛ́, ʋ caŋsɛ bɛllɛ nyúú mí, Saltɩyɛl bio Zorobabɛl, Yosadakɛ bio Zozie, rɩ́wɔ́ maábinaŋá, rɩ́ vʋk'ɔɔsa, Levi duó nɩɛ, arɩ́ nɩɛ ná wuu há lɛ́ yomí bɩrko, iso púl Wɩɩsɛ Wɩcʋɔlɩjaa ná tʋtʋmɛ. Ɓa lɩ́sɛ Levi duó nɩɛ ná há kéŋ bɩŋsɛ mɛrɛ́ rɩ́ dɔwɛ, rɩ́wɔ́ nɛ́ bíbel Nyuutɩna Wɩɩsɛ Wɩcʋɔlɩjaa ná tʋtʋmɛ́ mɛ́. 9 Zozie rɩ́rʋ́ bɛlɛ, rɩ́rʋ́ maábinaŋá, Kadɩmɩɛl rɩ́rʋ́ bɛlɛ há lɛ́ Ziida jɩmʋ́l nɩ́ɩ́ bel tʋtʋnna ná háá tʋŋ Wɩɩsɛ Wɩcʋɔlɩjaa ná mɛ́. Levi dunɩɛ ná há lɛ́ Henadadɛ dunɩɛ má nɛ́ súúríwó mí, ɓaá bel Wɩɩsɛ Wɩcʋɔlɩjaa tʋtʋnna mɛ́. 10 Jɩsɔɔra há bíl Nyuutɩna Wɩɩsɛ Wɩcʋɔlɩjaa ná mʋ́l, ɓa ɔ́ɔ́ vʋk'ɔɔ́sa súwó gɛnnɛ a pá nyɩ́sɛ, ká Levi duo nɩɛ, Asafɛ bɛlɛ pa zɩ́ŋzɔnɛ, rɩ́wɔ́ yɩ́ɩ́ dɛnnɛ Nyuutɩna Wɩɩsɛ mɛ́; anɛ ɛ́ Ɩzɩrayɛl kuóro Davidi há makɛ́. 11 Ɓa dɛnnɛ Nyuutɩna Wɩɩsɛ, a yɩ́ yɩ́l né a bʋ́ʋ́ yɩr mɛ́ a bʋlɛ́: «Nyuutɩna Wɩɩsɛ wéró, ʋ cólle ná ʋ há kéné rɩ́ Ɩzɩrayɛl wɩ tokó kené!» Nɩɛ wuu ɔsɛ dɛnnɛ, a cáási kɩ́ŋkáŋ a mákwɔ́ satɔrɔ́ Nyuutɩna Wɩɩsɛ sɩ́ɛ́, ʋ Wɩcʋɔlɩjaa ná mʋ́l há bílé wɩ́ɛ́. 12 Vʋk'ɔɔsa, rɩ́ Levi duo nɩɛ, arɩ́ jɩtɩ́náwa ná há ká nɩhɩɛ̃́sɛ a zɩŋ die Wɩɩsɛ Wɩcʋɔlɩjaa ná, ká zaá baa nóú ɓɩfɛlɔ né mʋ́l há bíle; ɓa ɓɩkaná sɩɛnnɛ zɔ́kɔ́ ɓa wí kɩ́ŋkáŋ. Amá ɓa ɓɩkana má sɩɛnnɛ wuu nɛ́ tɔ́rɛ́ ɓa cáási aá dɛnnɛ Wɩɩsɛ. 13 Ɛ́ kal, nɛ́ŋ fa wɩ satɔrɔ tɩ́náwa caase, rɩ́ sazɔkɔ́ tɩ́náwa buŋse kʋɔlɛ wúó caksɛ naŋá mɛ́, beé wɩ́ɛ́, nɩɛ wuu fa de kʋkɔ kʋɔllɩzeno nɛ́. Rɩ́ nɛ́ŋ mɩ́ŋ dɩbolí má ɩɩ́ nɩ́wɔ́ kʋɔlɛ.