Zoziyasɛ dí pakɛ cana
2K 23. 21-23
35
1 Dʋ́ŋdʋʋ̃́ cana tápʋlɛ fí rí córí kal, Zoziyasɛ ɔ́ɔ́ ɓa ɓʋ́ʋ́sɛ pʋsɛ a dí pakɛ cana Nyuutɩna Wɩɩsɛ yɩr mɛ́, Zerizalɛmɛ mɛ́. 2 Ʋ bíl vʋk'ɔɔsa a makwɔ́ tʋtʋmɛ́ pɔ́wɔ́, a duóríwó naasɛ rɩ́wɔ́ tʋtʋ́ŋ Nyuutɩna Wɩɩsɛ jaa tʋtʋmɛ́ ná. 3 Ʋ bʋ́l Levi duo nɩɛ ná ɓa há lɩ́sɛ Nyuutɩna Wɩɩsɛ tʋtʋmɛ́ ná yɩr mɛ́, ɓa kɩkarmɛ Ɩzɩrayɛl nɩɛ wuu rɩ́ a bʋlɛ́: «Ɩ́ pi Wɩɩsɛ nʋtʋmɛ daká ná a kaá zʋ́ bil wɩcʋɔlɩjaa ná Davidi bio Salomɔŋ há ká Ɩzɩrayɛl kuóro há sɔ́ɛ́ sɩɛrʋ. Ɩ́ baa too rɩ́ɩ́wa pi daka ná baasɩ́wa vapɩpara mɛ́, a kaá va. Mʋ́l néé mí ɩ́ tʋŋ pá Nyuutɩna Wɩɩsɛ ɩ́ Wɩɩsɛ, rɩ́ Ɩzɩrayɛl há kɔ́ʋ́ nɩɛ! 4 Ɛ́ wɩ́ɛ́, ɩ́ sɩ́ lɩ́sɛ nɩɛ jaá jaáwa, rɩ́wɔ́ tʋtʋŋ púl púlwa, anɛ ɛ́ Ɩzɩrayɛl kuóro Davidi rɩ́rʋ́ bio Salomɔŋ há makɛ. 5 Anɛ ɛ́ ɩ́ há kéŋ Levi duo nɩɛ ná ɓa púl púlwa, jaa wuu sɩɛrʋ, púl ná há mɔhɛ̃́ rʋ́ʋ́ tʋŋ, sɩ́ zʋ Wɩɩsɛ dʋŋɔ dɩmɩnɩ́ ná a tɩ́ŋwɔ́ maábinaŋá ná yɩr mɛ́. 6 Ɩ́ ɔsɛ pakɛ vʋk, a mʋ́ʋ́rɩ́wa tɩɩ busunnu, ká dí pakɛ cana pɛ́ɩ́wa maábinaŋá anɛ ɛ́ Nyuutɩna Wɩɩsɛ há makɛ a tɩ́ŋʋ́ tʋtʋnnɔ Moyizi mí. 7 Zoziyasɛ kɛ́sɛ́ pʋwɩɛla sɩɛrʋ, pewiisi arɩ́ bʋwiisi a pá tɔ́ɔ́ nɩɛ, pakɛ pʋsɛ ná ʋ há ɓʋ́ʋ́sɛ a pá nɩɛ ná há mɩŋ róŋ nɛ́ bʋ́ɩ́ mɛ́rɛ́ rí fí (30 000), a kɛ́sɛ kuóro pʋsɛ sɩɛrʋ nɔɓallɛ bʋ́ɩ́toro a suúri. 8 Ʋ minisiwa má kɛ́sɛ pʋsɛ a pá nɩɛ rɩ́ vʋk'ɔɔsa arɩ́ Levi duo nɩɛ rɩ́wɔ́ lá dí pakɛ cana. Hilkiya rɩ́ Zakari arɩ́ Yehiyɛl haá bel Wɩɩsɛ jaa ná mɛ́, má kɛ́sɛ pʋwɩɛla bʋ́ɩ́wʋllɛ rí zɔwalgo arɩ́ pʋzeŋse zotoro a pá vʋk'ɔɔsa, rɩ́wɔ́ lá ɓʋ́ʋ́sɛ pakɛ cana vʋk ná wɩ́ɛ́. 9 Konaniya rɩ́rʋ́ maábinaŋá Semaya rɩ́ Netanɛl rɩ́ Hasabiya rɩ́ Yeyɛl arɩ́ Yozavadɛ há ká Levi dunɩɛ nɩhɩ́ɛ̃́sɛ má kɛ́sɛ pewiisi bʋ́ɩ́wɔmmʋ́ɔ́, arɩ́ nɛsɛ zɔmmʋ́ɔ́ a pá Levi dunɩɛ rɩ́wɔ́ lá ɔsɛ pakɛ vʋk ná. 10 Nyɛ nɛ́ ɓa dí pakɛ cana ná: Ɓa ɔ́ɔ́ vʋk'ɔɔsa rɩ́ Levi duo nɩɛ, ɓa nɛ́ŋ wuu bɩr púú tʋtʋmɩ́ Wɩɩsɛ jaa ná sɩɛrʋ, anɛ ɛ́ kuóro fa há mákɛ́. 11 Ɓa ɓʋ́ʋ́sɛ pakɛ cana pʋsɛ ná, vʋk'ɔɔsa cakɛ cɛl a pii waasɛ koro ná; ká Levi duo nɩɛ paa puri. 12 Ɓa lɩ́sɛ pʋwɩɛla ná ɓa há kené ko rɩ́wɔ́ ɔsɛ vʋkfíse, a pá jaa wuu nɩɛ rɩ́wɔ́ lá ɔsɛ vʋk pá Nyuutɩna Wɩɩsɛ; anɛ ɛ́ há pʋ́ŋsɛ Moyizi kíŋse kɛnɔ mɛ́. Nɛsɛ ná má, ɓa a ɛ́ nɛ́. 13 Ɓa lá sɩɛ́ wasɛ pakɛ cana pewie ná, anɛ ɛ́ ná há makɛ. Ká pʋʋrɛ náŋa ná há ká Wɩɩsɛ tɩ́llɛ́ halɛ́wa rɩ́ naŋtaŋŋáwa arɩ́ daŋsaŋwa sɩɛrʋ, a pii ɓa nɩɛ ná wuu kɩ́kɛ́lɛ́ kɩ́kɛ́lɛ́. 14 Ɛ́ har mɛ́, Levi duo nɩɛ lɔ́wɔ́ rɩ́ vʋk'ɔɔsa vʋk naŋmɩŋsa ná kere a cɔ́ɔ́. Bee wɩ́ɛ́, vʋk'ɔɔsa ná há ká Aarɔŋ duo faá bel vʋkfíse ná mɛ́ nɛ́, kaá nyɩ́kɛ naŋnʋnnɛ a kaa ja tɩ́táŋ. Ɛ́ nɛ́ tɛ́ Levi duo nɩɛ nɛ́ a ɓɩdííle a pɔ́wɔ́ rɩ́ vʋk'ɔɔsa ná há ká Aarɔŋ duo nɩɛ. 15 Ɓa ɔ́ɔ́ Azafɛ bɛlɛ ná há ká gbɔ́kɛ má tʋtʋŋ tʋtʋmɩ́ ná Davidi rɩ́ Azafɛ rɩ́ Hemaŋ arɩ́ kuóro muulináárɔ Yedutuni kíŋse fa há mákɛ́. Ká dannʋpɔ́ɔ́ra má cɩ́ dannʋɔ́ wuu mí. Ɓa maábinaŋá Levi duo nɛ́ fa a ɓɩdííle aá pɔ́wɔ́, ɛ́ nɛ́ tɛ́ ɓa oro wuu wɩ tʋtʋmɩ́ ná vɛ́ɛ́ tá. 16 Ɛ́ kal, ɓa tʋ́ŋ Nyuutɩna Wɩɩsɛ tʋtʋmɛ́ ná wuu ɓa há mɔhɛ̃ rɩ́wɔ́ tʋ́ŋ a dí pakɛ cana, a ɔsɛ vʋka Nyuutɩna Wɩɩsɛ koro ná dahá, anɛ ɛ́ kuóro Zoziyasɛ há mákɛ́. 17 Ɩzɩrayɛl nɩɛ ná fa há mɩŋ róŋ, dí pakɛ cana ná ɛ́ tɛ́ŋ mɛ́, ká dí sɩbʋ́rtóó dɩ́pɛ́ŋ cana ná má tápʋlɛ balpɛ. 18 A dé pɔ́ Wɩɩsɛ wɩlaabʋllɔ Samɩɛl tɛ́ŋ mɛ́, ɓa wɩ pakɛ cana né duo dié ná Ɩzɩrayɛl mɛ́. Ɩzɩrayɛl kuóre oro wuu wɩ cana ná díé a mɔ́ Zoziyasɛ rɩ́ vʋ́k'ɔɔsa rɩ́ Levi duo nɩɛ rɩ́ Ziida nɩɛ rɩ́ Ɩzɩrayɛl nɩɛ arɩ́ Zerizalɛmɛ nɩɛ há mɩŋ ráŋ ɛ́ kal a cáásɔ dú ɛ́ . 19 Zoziyasɛ kuorí bɩŋsɛ fí rí córí nyúú mí ní, ɓa dí ɛ́ pakɛ cana.Zoziyasɛ kuorí tenné wɩ́ɛ́
(2 K 23. 28-30)
20 Wɩ́ɛ́ nyáŋ wuu har mɛ́, Zoziyasɛ há bɩ́rmɛ Wɩɩsɛ jaa ná tenni, Ezipiti kuóro Neko rɩ́rʋ́ lalyoore ísó mʋ́ Ɩfɩratɛ caasɛ́, Karkemɩsɛ rʋ́ʋ́ yoo lal. Ɛ́ nɛ́ Zoziyasɛ isí lɩɩ cémú. 21 Ɛ́ nɛ́, Neko tʋŋ nɩɛ rɩ́wɔ́ mʋ́ bʋ́l Zoziyasɛ rɩ́ bʋlɛ́: «Ziida kuóro, bee mɩnɩ́ŋ rɩ́rɩ́ pɛkɛ>> Ɩ rá, ŋ rɩ́rɩ́ŋ lalyoore lɛ rá yó zaa, amá ŋ dɩŋdɔŋ bɩnɛ́ nɛ́. Wɩɩsɛ tʋmɩ́ŋ rɩ́ŋ mʋ́ kɩ́kɛ́lɛ. Ɛ́ wɩ́ɛ́, sɩ́ isí cɩ́ Wɩɩsɛ ná há mɩnɩ́ŋ har, rʋʋ́ haá zɔkɩ́.» 22 Amá Zoziyasɛ wɩ sabɩɩna bɩrsɛ, kaá ja gbel rʋ́ʋ́ yóú. Ʋ wɩ Neko há bʋ́l Wɩɩsɛ wɩ́ɛ́ ná pɔ́ʋ́ zésé; ká isi aá ko rʋ́ʋ́ yoo lal Megido polo sɩɛrʋ. 23 Túyoore yakɛ́ kuóro Zoziyasɛ, ɛ́ nɛ́ ʋ bʋ́lʋ́ tʋtʋnna rɩ́ a bʋlɛ́: «Ɩ́ kánɩ́ŋ lɛ lal ná sɩɛrʋ, bee wɩ́ɛ́, ŋ pɩr bɔ́ŋbɔ́ŋ.» 24 Ɛ́ nɛ́ ʋ tʋtʋnna lɩ́sʋʋ́ lalyóórítórko ná mɛ́, a hoú bʋllɛ lalyóórítórko mɛ́, a kánʋ́ bɩ́rmʋ́ Zerizalɛmɛ. Róŋ ní Zoziyasɛ sʋ́wɛ́. Zerizalɛmɛ rɩ́ Ziida nɩɛ wíú yúó; ká púú húú naábálawa lɛlbulli sɩɛrʋ. 25 Wɩɩsɛ wɩlaabʋllɔ Zeremi fa ɓá zeŋbí a bʋ́l Zoziyasɛ sʋʋ wɩ́ɛ́. A pɔ́ ɛ́ tɛ́ŋ mɛ́, a kaá ko lɛ́ zaa wuu, Ɩzɩrayɛl bágbɔ́kɛ arɩ́ hágbɔ́kɛ wuu gbɔ́kɩ́ sɩɛrʋ ɓa haá bʋ́l Zoziayasɛ sʋʋ wɩ́ɛ́. Ʋ ɛ́ ká Ɩzɩrayɛl kusúŋ ní ɓa vaá a. Ɓa pʋ́ŋsʋ́ wɩ́bʋlɛ́ hé gbɔ́kɛ kɛnnɛ sɩɛrʋ. 26 Zoziyasɛ wɩ́'állɛ ná naŋá, rɩ́rʋ́ sawer tʋtʋmɛ́ ná ʋ há tʋmɛ́ anɛ ɛ́ há pʋ́ŋsɛ Nyuutɩna Wɩɩsɛ wɩ́bilé kɛnɔ sɩɛrʋ, 27 ʋ kuorí pulé, rɩ́rʋ́ tenné wɩ́ɛ́, ɓa pʋ́ŋsɩ́wɔ́ hé Ɩzɩrayɛl rɩ́ Ziida kuóre kɛnɔ mɛ́ nɛ́.