Zoziyasɛ kuorí díí wɩ́ɛ́
(2K 22.1-2; 24.4-20)
34
1 Zoziyasɛ kúó aá dí kuorí rʋ́ʋ́ fa kéŋ bɩ́ŋsɛ córí ní, ká dí kuorí Zerizalɛmɛ mɛ́ bɩ́ŋsɛ mɛ́rɛ́ rí bála. 2 Zoziyasɛ tʋ́ŋ yɛrɛ́ Nyuutɩna Wɩɩsɛ sɩ́ɛ́ mɛ́, ʋ púú naabál Davidi naabulle, a wɩ cʋ́rɛ́ mʋ́ nɛ́duu ɛ́rá má nɛ́gʋɔ rɩ́. 3 Zoziyasɛ kuorí díí bɩ́ŋsɛ córí nyúú mí, ʋ fa há ká heŋbié. Ɛ́ tɛ́ŋ mɛ́ nɛ́, ʋ púl aá ja Wɩɩsɛ há kɔ́ʋ́ áná Davidi Wɩɩsɛ. Ʋ bɩ́ŋsɛ fí rí bɛllɛ nyúú mí, ʋ lá sɩ́ɛ́ ɔsɛ vʋ́k, a mʋ́ʋ́rɛ Ziida rɩ́ Zerizalɛmɛ busunnu, a zɔkɛ dɩɓaarɛ ná há mɩ́ŋ dúŋduome daha, a gínni dácɔ́ŋsɛ rɩ́ veŋgúlli arɩ́ venni ná ɓa há kéŋ kɔmɔ cʋ́ɔ́rɛ. 4 Ʋ ɔ́ɔ́ ɓa ceŋŋí Baalwa korsi ná rɩ́ tulaalewa dɩnyɩkɛ ná wuu ʋ sɩ́ɩ́ mɛ́. A bonni dacɔ́ŋsɛ rɩ́ veŋcɔ́ɔ́lɛ rɩ́wɔ́ ná ɓa há kéŋ kɔmɔ cʋɔrɛ́; a ŋmɔ́sɩ́wɔ́ buksi, a pá mʋ́ yó tá nɩɛ ná fa há ɔsɛ vʋka pɔ́wɔ́ lɛlbulli daha. 5 Ʋ pá vʋk'ɔɔsa heŋgbele a nyɩ́kwɔ́, ɓa tɩɩ korsi dahá. Nyɛ́ nɛ́ Zoziyasɛ tʋ́ŋ a mʋ́ʋ́rɛ Ziida rɩ́ Zerizalɛmɛ busunnu. 6 Manase tɔ́nɛ mɛ́ rɩ́ Ɩfɩrayɩŋ tɔ́nɛ mɛ́ rɩ́ Sɩmɩyɔŋ tɔ́nɛ mɛ́ arɩ́ Nɛfɩtalɩ tɔ́nɛ mɛ́, rɩ́wɔ́ kílo dɩtɩ́llɛ mɛ́; 7 Ʋ zɔ́kɛ korsi, a cónni dapékíse arɩ́ venni ná wuu múnémúné. Ʋ céŋŋí tulaale dɩnyɩ́kɛ ná wuu há mɩŋ Ɩzɩrayɛl tɔ́ɔ́ wuu mí. Ká Zoziyasɛ bɩrko Zerizalɛmɛ.Vʋk'ɔɔrsɔ nɔhɔ̃ ná wɩ́bilé kɛnɔ
(2 K 22. 3-10)
8 Zoziyasɛ kuorí bɩ́ŋsɛ fí rí córí nyúú mí, ʋ mʋ́ʋ́rɛ tɔ́ɔ́ ná rɩ́ Wɩɩsɛ jaa ná busunnu tenni. Ká sɩɛ́ tʋŋ Akalyahu bio Safaŋ, há ká Maseyahu tɔ́tɩ́ná, arɩ́ Yʋakaazɛ bio Yʋa há ká kuóro wɩlaabʋllɔ rɩ́wɔ́ mʋ́ bɩ́rmɛ Nyuutɩna Wɩɩsɛ, ʋ Wɩɩsɛ jaa ná dɩkɔŋsa. 9 Ɛ́ nɩɛ kéŋ meéwíé ná ɓa há kené ko hé Wɩɩsɛ jaa mɛ́ a pá vʋk'ɔɔsa nɔhɔ̃́ Hilikiya. Ɛ́ meéwíé, Levi duo nɩɛ ná haá pɔ́ dánnʋɔ mɛ́, nɛ́ lɔ́wɔ́ Manase nɩɛ rɩ́ Ɩfɩrayɩŋ nɩɛ rɩ́ Ɩzɩrayɛl nɩkaanɛ ná wuu rɩ́ Ziida arɩ́ Bɛŋzamɛ nɩɛ wuu rɩ́ arɩ́ Zerizalɛmɛ nɩɛ rɩ́. 10 Ɓa pi ɛ́ meéwíé pá tʋtʋnna ná háá bɩ́rmɛ Nyuutɩna Wɩɩsɛ jaa dɩkɔŋsa sɩ́dííre. Ɛ́ nɩɛ sɩɛ́ fa háá tʋ́ŋ Nyuutɩna Wɩɩsɛ jaa ná mɛ́, sɩɛ́ la a bɩ́rmɛ ɛ́ jaa dɩkɔŋsa. 11 Ɓa pi ɛ́ meéwíé pá dakʋnna rɩ́ jɩsɔɔra rɩ́wɔ́ yɔ́wɛ́ daasɛ ɓa há sɩ́ ká ɓasɛ arɩ́ dáwɩcɔɔlɛ́ ríwɔ́ ká bɩ́rmɛ. Ká bɩrmɛ́ Wɩɩsɛ jaa ná sɩɛrʋ jɩwiisi ná Ziida kuóre fa há lóé ɓa zɔ́kɛ. 12 Ɛ́ nɩɛ saŋɔ́ tʋ́ŋwɔ́ tʋtʋmɩ́ rɩ́wɔ́ sɩɛrʋ wuu. Ɓa lɩ́sɛ Yahatɛ rɩ́ Ovadiyahu há ká Merari bɛlɛ, arɩ́ Zekariya rɩ́ Mesulamɛ há ká Kehatɛ bɛlɛ, Levi dunɩɛ sɩɛrʋ, rɩ́wɔ́ nɛ́ mɩ́ŋ tʋtʋnna ná sɩ́ɛ́. Ɛ́ Levi dunɩɛ wuu fa ɛ̃ gɔkcɩksɛ duí. 13 Levi duo nɩɛ nɛ́ fa mɩŋ nɩɛ ná háá cɩ́ɩ́nɛ́ cɩksɛ arɩ́ tʋtʋnna ná wuu sɩɛ́, nɛ́ŋ wuu tʋŋ róŋ ná ʋ há kéŋ zɩmɛ́ nɛ́. Ɛ́ Levi duo nɩɛ sɩɛrʋ naŋá fa ká kɛŋpʋ́ŋsa nɛ́, ká naŋá má a dánnʋpɔ́ɔ́ra. 14 Ɓa há wurí Nyuutɩna Wɩɩsɛ jaa meéwíé daka ná rɩ́wɔ́ lɩ́sɛ meéwi, vʋk'ɔɔsɔ Hilkiya ná Nyuutɩna Wɩɩsɛ kɩ́ŋse kɛnɔ ná Moyizi há pʋ́ŋsɛ́. 15 Hilkiya sɩɛ́ bʋ́l kɛŋpʋ́ŋsɔ Safaŋ rɩ́ bʋlɛ́: «Ŋ ná kíŋse kɛnɔ Nyuutɩna Wɩɩsɛ jaa ná sɩɛrʋ.» Hilkiya sɩɛ́ pi ɛ́ kɛnɔ pá Safaŋ. 16 Ɛ́ nɛ́ Safaŋ kaá mʋ́ pá kuóro ká máŋsɛ wɩ́ɛ́ ná wuu naasɛ pɔ́ʋ́ a bʋlɛ́: «Wɩ́ɛ́ ná wuu ɓa há mákɛ́ pɛ́ɩ́ tʋtʋnna; ɓa tʋ́ŋwɔ́ wuu ní. 17 Ɓa pí Nyuutɩna Wɩɩsɛ jaa daka meéwíé ná ɓa há neé, a hé tʋtʋnna sɩ́dííre rɩ́ tʋtʋnna nɛ́sɛ mɛ́.» 18 Ká, kɛŋpʋ́ŋsɔ Safaŋ sɩɛ́ bʋ́l kuóro rí a bʋlɛ́: «Ná kɛnɔ vʋk'ɔɔsɔ Hilkiya há píé páŋ. Ká Safaŋ sɩɛ́ wurí a karmʋ́ kuóro sɩ́ɛ́ mɛ́.
Zoziyasɛ ɔ́ɔ́ ɓa bɔsɛ Wɩɩsɛ háwɩ́laabʋllɔ Hulda
19 Kuóro há zésí wɩ́ɛ́ ná há mɩŋ kíŋse kɛnɔ ná sɩɛrʋ a ko tenní, ʋ kénú gɛnnɛ cɔ́nnɛ. 20 Ká pí liŋó né pá vʋk'ɔɔsɔ Hilkiya rɩ́ Safaŋ bio Ahɩkamɛ rɩ́ Mika bio Abidɔŋ rɩ́ kɛŋpʋ́ŋsɔ́ Safaŋ arɩ́ Asaya há ká kuóro tʋtʋnnɔ, a bʋlɛ́: 21 “Ɩ́ mʋ́ bɔsɛ Nyuutɩna Wɩɩsɛ a zɩŋ wɩ́ɛ́ ná há mɩŋ kɛnɔ né á há néí sɩɛrʋ mʋ́ʋ́la a máŋsɛ páŋ rɩ́ Ɩzɩrayɛl nɩkáánɛ ná rɩ́ Ziida nɩɛ. Beé wɩ́ɛ́, Nyuutɩna Wɩɩsɛ cɔwɩɩlɔ́ ná há tuwírá nyúú zeno, a tɩ́ŋrá á ánáwa há wɩ Nyuutɩna Wɩɩsɛ wɩ́bʋ́l tɩŋɛ́, a wɩ wɩ́ɛ́ ná wuu há pʋ́ŋsɛ kɛnɔ neé sɩɛrʋ tɩŋɛ́.” 22 Hilkiya rɩ́ nɩɛ ná kuóro há tʋɔsɛ sɩɛ́ isí mʋ́ háwɩ́laabʋllɔ Hulda rí. Ɛ́ háwɩ́laabʋllɔ bála nɛ́ ká Salumi háá bel Wɩɩsɛ jaa gɛnnɛ mɛ́. Salumi áná nɛ́ ká Sadɔk, Sadɔk má áná nɛ́ ká Hasra. Ɛ́ háwɩ́laabʋllɔ fa mɩŋ Zerizalɛmɛ mɛ́ nɛ́ zɔfɛlɔ́ ná mɛ́. Nɩɛ ná sɩɛ́ cesi wɩ́ɩ́ ná a pɔ́ʋ́. 23 Háwɩ́laabʋllɔ ná sɩɛ́ bʋ́lwɔ́ rɩ́ a bʋlɛ́: «Ɩ́ nóú ná Nyuutɩna Wɩɩsɛ, Ɩzɩrayɛl Wɩɩsɛ há sɛ́: Ɩ́ bʋ́l pá báálɔ ná há tʋmɩ́wa ŋ rɩ́ bʋlɛ́: 24 “Ná Nyuutɩna Wɩɩsɛ há sʋ́ʋ́ ná: Ŋ sɩ́ a rɩ wɩɩla peri dɩhɩ̃́ né arɩ́rʋ́ nɩɛ, ká a rɩ́ kɛnɔ ná ɓa há cɩ́ Ziida kuóro sɩ́ɛ́ karmɛ sɩɛrʋ bʋrawa ná wuu nʋɔ su. 25 Bee wɩ́ɛ́, ɓa vɛ́ŋ tá, ká mʋ́ nyɩ́kɛ áŋsáŋwa a pá wɩŋsa náŋa, a tɩ́ŋwɔ́ wɩ́'állɛ wuu mɛ́ a a wɩ́ŋ mɛ́. Ɛ́ nɛ́ tɛ́ ŋ ká cɔwɩɩlɔ́ a cɩ́ dɩhɩ̃́ né mí, ʋ sɩɛ́ tó ɓɩpɔrɩ́ má. 26 Amá ɩ́ sɩ́ bʋl nyɛ́ pá Ziida kuóro ná há tʋmɩ́wa rɩ́ɩ́wa bɔsɛ Nyuutɩna Wɩɩsɛ, a bʋlɛ́: Ná Nyuutɩna Wɩɩsɛ, Ɩzɩrayɛl Wɩɩsɛ há sʋ́ʋ́ ná: Ɩ há nɛ̃ wɩ́bʋlɛ́ ná, 27 há tɩɩnɛ dɩhɩ̃ ne rɩ́rʋ́ nɩɛ mɛ́, ɩ bɩrsɛ sabɩɩna, a múúrí tɩɩ Wɩɩsɛ sɩ́ɛ́. Ɩ múúrí tɩɩ a kanɩ́ gɛnnɛ cɔ́nnɛ ká bɩsɛ sɩ́mɩɩrʋ ŋ sɩ́ɛ́ mɛ́. Ɛ́ wɩ́ɛ́, ŋ má saŋɩ́ sʋlɛ́ rɛ́. Nyuutɩna Wɩɩsɛ nɛ́ bʋ́l ɛ́. 28 Ɛ́ nɛ́ tɛ́ ŋ sɩ ló rɩ́ɩ́ ká tɛŋfɩ́ɛ́l a mʋ́ɩ́ ánáwa rɩ́. Ɩɩ́ kúó sʋ́sʋwɛ rɩ́ sɩ́ɩ́ há wɩ wɩɩla ná wuu ŋ́ háá já rɩ́ŋ pii a dɩhɩ̃́ né rɩ́rʋ́ nɩɛ mɛ́ néé.'” Ɛ́ nɛ́ nɩɛ ná bɩrká liŋó ná mʋ́ pá kuóro.
Zoziyasɛ bɩrɔ bil nʋtʋmɛ arɩ́ Wɩɩsɛ
(2K 22.20b-23.3)
29 Ɛ́ nɛ́ kuóro tʋ́ŋ ɓa yɩ́rɛ Ziida rɩ́ Zerizalɛmɛ nɩhɩɛ̃́sɛ wuu a hé naŋá mɛ́. 30 Ká Kuóro rɩ́ Ziida nɩɛ wuu rɩ́ Zerizalɛmɛ nɩɛ rɩ́ vʋk'ɔɔsa rɩ́ Levi duo nɩɛ arɩ́ nɩɛ wuu duó a pɔ́ nɔhɔ̃ mɛ́ a kaá mʋ́ perí héŋbíé mí; wuu hé naŋá mɛ́ mʋ́ Nyuutɩna Wɩɩsɛ jaa. Kuóro sɩɛ́ a ɓa ɓɔ́ liŋo a karmɛ wɩ́ɛ́ ná há mɩŋ nʋtʋmɛ kɛnɔ ná ɓa há néé, Nyuutɩna Wɩɩsɛ jaa sɩɛrʋ. 31 Kuóro ísó cɩ́ koro daha ʋ dɩcɩ́nɛ́ ná mɛ́, Nyuutɩna Wɩɩsɛ sɩ́ɛ́ a baa bil nʋtʋmɛ ʋ rɩ́ Nyuutɩna Wɩɩsɛ pɛ́kɛ rʋ́ʋ́ zílú kíŋse, ʋ wɩ́makɛ́, rɩ́rʋ́ wɩ́bilé arɩ́rʋ́ sɩɛrʋ wuu rɩ́rʋ́ dʋma wuu. Kaá tɩ́ŋ nʋtʋmɛ wɩ́bʋlɛ́ ná há pʋ́ŋsɛ kɛnɔ ná sɩɛrʋ. 32 Ʋ ɔ́ɔ́ nɩɛ ná wuu fa há mɩŋ Zerizalɛmɛ mɛ́ rɩ́ Bɛŋzamɛ mɛ́ saŋ tɩ́ŋ Wɩɩsɛ ɓa naábalwa Wɩɩsɛ nʋtʋmɛ́ ná. 33 Ɩzɩrayɛl tɔ́nɛ ná wuu mí Zoziyasɛ ɔ́ɔ́ ɓa zɔkɛ wɩ́tɩɛnnɛ venni ná. Ká bʋ́l pá nɩɛ ná fa há mɩŋ Ɩzɩrayɛl mɛ́, rɩ́wɔ́ tɩ́ŋ Nyuutɩna Wɩɩsɛ ɓa Wɩɩsɛ mɛ́. Zoziyasɛ hiẽ́so wuu mí, ɓa wɩ cʋ́rɛ́ ká tá Nyuutɩna Wɩɩsɛ, ɓa naábalwa Wɩɩsɛ.