Manase kuorí díí wɩ́ɛ́
33
1 Manase kúó aá dí kuorí rʋʋ fa kéŋ bɩŋsɛ fí rí bɛllɛ nɛ́, ká dí kuorí bɩŋsɛ mɛɛ́sɛllɛ rí fí rí bɔmmʋ́ɔ́ Zerizalɛmɛ mɛ́. 2 Ʋ ɔ́ɔ́ zɔkɛ Nyuutɩna Wɩɩsɛ mɛ́, ʋ há tɩ́ŋ duowa ná Nyuutɩna Wɩɩsɛ há kíré kaa la tɔ́ɔ́ ná a pá Ɩzɩrayɛl nɩɛ, wɩ́tɩɛnnɛ. 3 Ʋ bɩ́rɔ́ sɔ dɩɓaarɛ́ ná há mɩŋ dúŋdúóme daha ʋ áná Ezekiyasɛ fa há zɔ́kɛ́, a sɔ korsi a pá Baalwa, a cɔ́ŋsɛ daɓaarɛ́, ká ɓírmí bána nyúú onni wuu sɩ́ɛ́ a ɓááríwɔ́. 4 Ʋ má korsi Nyuutɩna Wɩɩsɛ jaa ná sɩɛrʋ. Ɛ́ wɩcʋɔlɩjaa wɩ́ɛ́ nɛ́ fá Nyuutɩna Wɩɩsɛ sɛ́: “Zerizalɛmɛ mɛ́ nɛ́ ŋ yɩr sɩ́ mɩŋ a kaa mʋ́ wuu.” 5 Nyuutɩna Wɩɩsɛ wɩ́cʋɔlɩjaa wuolli ná bɛllɛ wuu sɩɛrʋ, ʋ má korsi ráŋ bána nyúú onni yɩr mɛ́. 6 Ʋ tɩɩ púú bɛlɛ físi níŋ mí Bɛŋ-Hinɔŋ polo sɩɛrʋ, ʋ ja nyɩnɛwa háá máŋsɛ cíé wɩ́ɛ́, a vʋrɛ, a tʋŋ hɩlɩ́, a yɩ́rɛ lɛlnʋʋsɛ. Ʋ ɔ́sɔ́ aa zɔkɛ Nyuutɩna Wɩɩsɛ mɛ́ kɩ́ŋkáŋ, ʋ cɔ́ɛ́ wɛ. 7 Ʋ cɔ́ veno a bil wɩcʋɔlɩjaa sɩɛrʋ. Ká Nyuutɩna Wɩɩsɛ sɩɛ́ fa bʋ́l Davidi rɩ́rʋ́ bio Salomɔŋ rɩ́ a bʋlɛ́: “Jaa néé arɩ́ Zerizalɛmɛ tɔ́ɔ́ nɛ́ ŋ bɛ́llɛ lɩ́sɛ Ɩzɩrayɛl jɩmʋ́ʋ́la ná wuu sɩɛrʋ, rɩ́ŋ a rɩ́ŋ yɩr yɩ́rɛ ráŋ a kaá mʋ́ wuu. 8 Rɩ Ɩzɩrayɛl nɩɛ nɛ́ tɩ́ŋ wɩ́ɛ́ ná wuu ŋ há mákɛ́ a pɔ́wɔ́: kíŋse rɩ́ wɩ́bilé arɩ́ wɩ́makɛ́, ŋ há tɩ́ŋ Moyizi mí a máŋsɛ a pɔ́wɔ́. Ŋ báá wʋ́ɔ́ mɩ́ɩ́ fɩkɛ rɩ́wɔ́ kɛkɛ tɔ́ɔ́ ná mɛ́ ŋ há píé a pɔ́wɔ́ naabálwa, rɩ́ɩ́ mʋ́ dɩbolí.» 9 Amá Manase ɔ́ɔ́ Ziida rɩ́ Zerizalɛmɛ nɩɛ tɛl, a ɔsɛ a bɔ́ŋbɔ́ŋ a kɩ́llɛ nɩɛ ná Nyuutɩna Wɩɩsɛ fá há zɔ́kɛ́ Ɩzɩrayɛl nɩɛ sɩ́ɛ́, ká ɓa tɩ́llʋ́. 10 Nyuutɩna Wɩɩsɛ bʋ́l Manase rɩ́rʋ́ nɩɛ rɩ́, amá ɓa wɩ zésé. 11 Ɛ́ nɛ́ Nyuutɩna Wɩɩsɛ a Siiri kuóro lalyóóre sɩ́dííre ko yówó: A ka Manase, a hé hɔɔ ʋ mɩɩsɛ mɛ́ a vɔ́wʋ́ rɩ́ɩ́ kɔmɔ bɛŋzɛllɛ bɛllɛ a kánʋ́ mʋ́ Babɩlɔŋnɛ. 12 Ɛ́ sazɔkɔ́ sɩɛrʋ nɛ́ sɩɛ́, Manase já Nyuutɩna Wɩɩsɛ ʋ Wɩɩsɛ, a múúrú tɩɩ ɓóŋ ʋ naabálwa Wɩɩsɛ sɩ́ɛ́. 13 Ʋ sʋ́l Nyuutɩna Wɩɩsɛ, ʋ sáŋ pɔ́rʋ́ tɩɩ a sáŋʋ́ sʋlɛ́, a lo ʋ bɩrko ké Zerizalɛmɛ mɛ́ a dí kuorí. Ɛ́ mɛ́ nɛ́ sɩɛ́ Manase zɩŋ rɩ́ Nyuutɩna Wɩɩsɛ nɛ́ ká Wɩɩsɛ. 14 Ɛ́ har mɛ́, Manase ɔ́ɔ́ ɓa sɔ zekɛ́rɛ Davidi zʋ́ɔ́ ná har rɩ́, polo sɩɛrʋ a pɔ́ Gɩhɔŋ nyinaa wɩɩsɛ dɩzʋʋlɩ́ rɩ́ɩ́ cɔɔ, ká mʋ́ yakɛ dánnʋɔ ná ɓa háá yɩ́rɛ náŋwʋlɛ́ dannʋɔ mɛ́ a kíl Ɔfɛl. Ʋ ɔ́ɔ́ ɓa sɔ́ʋ́ ʋ isi kɩ́ŋkáŋ. Ʋ hé sóójihɩ́ɛ̃́sɛ Ziida tɔ́sɔkɛ́rɛ wuu mí. 15 Ʋ ɔ́ɔ́ ɓa pa veŋhʋɔra ná rɩ́ veno ná ʋ háá ɛ́ɛ́ ɓa cɔ́ a bil Nyuutɩna Wɩɩsɛ wɩcʋɔlɩjaa ná sɩɛrʋ. Ká gínni korsi ná wuu ʋ há ɛ́ɛ́ ɓa má paalɔ ná daha Nyuutɩna Wɩɩsɛ wɩ́cʋɔlɩjaa ná sɩɛrʋ, arɩ́ Zerizalɛmɛ mɛ́ , a káŋwɔ́ wuu lɩɩ tá tɔ́ɔ́ har. 16 Ʋ bɩ́rɔ́ má Nyuutɩna Wɩɩsɛ koro ná, a ɔsɛ tɛŋfɩ́ɛ́l rɩ́ bárka cʋɔla vʋka ráŋ, ká bʋl Ziida nɩɛ rɩ́ rɩ́wɔ́ cɩ́cʋɔlɛ Nyuutɩna Wɩɩsɛ, Ɩzɩrayɛl Wɩɩsɛ. 17 Nɩɛ há válɔ́ aá ɔsɛ vʋka tɔ́ɔ́ ná dúŋdúóme daha ɓa háá ɓaarɛ venni ráŋ, amá Nyuutɩna Wɩɩsɛ, ɓa Wɩɩsɛ dʋŋɔ yɩr mɛ́ nɛ́.18 Manase wɩ́'állɛ ná náŋa ʋ há cʋ́ɔ́lʋ́ Wɩɩsɛ ɛ́, wɩ́bʋlɛ́ ná wɩ́laabʋlla fa há bʋ́lɛ́ a pɔ́ʋ́ Nyuutɩna Wɩɩsɛ Ɩzɩrayɛl Wɩɩsɛ yɩr mɛ́, mɩŋ Ɩzɩrayɛl kuóre wɩ́'állɛ kɛnɔ sɩɛrʋ nɛ́. 19 Manase wɩsʋlɔ́ arɩ́ Wɩɩsɛ há sáŋʋ́ sʋlɛ́ ɛ́, ʋ wɩ́bɔma ná wuu ʋ há ɛ́ɛ́, ʋ Wɩɩsɛ vɛɛ tɛ́, arɩ́ dɩhɛ̃́ ná wuu ʋ há lɩ́sɛ́ ɓaá ɓaarɛ dúŋdúóme daha, a cɔ́ŋsɛ dapékíse rɩ́ veŋgúlli ráŋ, ʋ fa há wʋ́ʋ́ tɩɩ múúré, ɓa pʋ́ŋsɩ́wɔ́ wuu hé Hozayi wɩ́'állɛ kɛnɔ mɛ́ nɛ́.
20 Manase há sʋ́wɛ́ ɓa húú ʋ jaa mɛ́ nɛ́, kɔ́ʋ́ bio Amɔŋ lɔ́ʋ́ nyúú mí a dí kuorí.
Amɔŋ kuorí díí wɩ́ɛ́
21 Amɔŋ kúó aá dí kuorí rʋʋ fa kéŋ bɩŋsɛ mɛ́rɛ́ rɩ́ bɛllɛ nɛ́, ká dí kuorí Zerizalɛmɛ mɛ́ bɩŋsɛ bɛllɛ. 22 Amɔŋ tʋ́ŋ bɔ́ŋbɔ́ŋ Nyuutɩna Wɩɩsɛ sɩ́ɛ́ mɛ́, anʋ́ áná Manase. Ʋ ɔsɛ vʋka pá venni ná wuu ʋ áná Manase fa há ɛ́ɛ́, a ɓáárɩ́wɔ́. 23 Amɔŋ é fa vɔ́ɔ́ rʋ́ʋ́ múúrú tɩɩ Nyuutɩna Wɩɩsɛ sɩ́ɛ́, anʋ́ʋ́ áná Manase há saŋɛ́ múúrú tɩɩ ɛ́; ká tʋ́ŋ bɔ́ŋbɔ́ŋ kɩ́ŋkáŋ. 24 Ɛ́ nɛ́ ʋ tʋtʋ́nna isi cɩ́nʋ́ mɛ́, a ɓʋ́ʋ́ ʋ jaa mɛ́. 25 Amá tɔ́ɔ́ ná nɩɛ ɓʋ́ʋ́sɛ nɩɛ ná wuu fá há isé a cɛ́ kuóro Amɔŋ mɛ́, ká lɩ́sʋ́ bio Zoziyasɛ nɛ́ rʋ́ʋ́ nɛ́ lɔ́ʋ́ nyúú mí a dí kuorí.