Zʋakaazɛ kuorí díí wɩ́ɛ́
(2K 23.30-24.17)
36
1 Ɛ́ har mɛ́, tɔ́ɔ́ ná nɩɛ lɩ́sɛ Zoziyasɛ bio Zʋakaazɛ, a bilú Zerizalɛmɛ mɛ́, rʋ́ʋ́ dí kuorí ʋ áná nyúú mí. 2 Zʋakaazɛ kuó aá dí kuorí, rʋ́ʋ́ fa kéŋ bɩŋsɛ mɛrɛ́ rí botoro ní, ká dí kuorí caŋsɛ botoro Zerizalɛmɛ mɛ́. 3 Ezipiti kuóro kúó Zerizalɛmɛ a lá Zʋakaazɛ kuorí ká ɓá loŋpó a pá tɔ́ɔ́ ná rʋ́ʋ́ túŋ wárɛ kiló bʋ́ɩ́toro arɩ́ salmɛ kiló mɛrɛ́ rí fí. 4 Ezipiti kuóro lɩ́sɛ Zʋakaazɛ maábinɔŋɔ́ Eliyakim rʋ́ʋ́ dí Ziida rɩ́ Zerizalɛmɛ kuorí, a bɩrsʋ́ yɩr hé Zʋwakimi. Neko kénú maábinɔŋɔ́ Zʋakaazɛ é mʋ́ Ezipiti ní.5 Zʋakimi kuó aá dí kuorí rʋ́ʋ́ fa kéŋ bɩŋsɛ mɛrɛ́ rɩ́ bɔmmʋ́ɔ́ nɛ́; ka dí kuorí bɩŋsɛ fí rí oro Zerizalɛmɛ mɛ́. Ʋ tʋŋ Nyuutɩna Wɩɩsɛ ʋ Wɩɩsɛ sakuósɩ́wɩ́ɛ́. 6 Ɛ́ nɛ́ Nyuutɩna Wɩɩsɛ a Babɩlɔɔnɛ kuóro Nabikanezaarɛ kó yó dúú. Ká kánʋ́ a vɔwɛ rɩ́ kɔmɔ bɛŋzɛllɛ bɛllɛ a kaá mʋ́ Babɩlɔɔnɛ. 7 Kuóro Nabikanezaarɛ pɛ́ pá Nyuutɩna Wɩɩsɛ jaa cɩ́ksɛ, a kaá mʋ́ bílú kuójaa sɩɛrʋ Babɩlɔɔnɛ mɛ́.
8 Zʋakimi wɩ́'állɛ ná naŋá mɩ́ŋ Ɩzɩrayɛl rɩ́ Ziida kuóre wɩ́'állɛ kɛnɔ mɛ́ nɛ́. Róŋ ní, ɓa pʋ́ŋsɛ wɩ́tɩ́ɛnɛ ná ʋ há tʋmɛ́, rɩ́ wɩ́ɛ́ ná wuu há pérú a hé. Ʋ bio Zʋakɩŋ nɛ́ lɔ́ʋ́ nyúú mí a dí kuorí.
9 Zʋakɩŋ kuó aá dí kuorí rʋ́ʋ́ fa kéŋ bɩŋsɛ córí ní, ká dí kuorí caŋsɛ botoro rí tapʋ́lɛ fí Zerizalɛmɛ mɛ́. Zʋakɩŋ ɔ́ɔ́ zɔkɛ Nyuutɩna Wɩɩsɛ sɩɛrʋ. 10 Ʋ bɩna tenné mí, kuóro Nabikanezaarɛ ɔ́ɔ́ ɓa kánʋ́ arɩ́ Nyuutɩna Wɩɩsɛ jaa cɩ́kwére ná wuu a kaá mʋ́ Babɩlɔɔnɛ. Ká lɩ́sʋ́ maábinɔŋɔ́ Sedesiyasɛ rʋ́ʋ́ a Zerizalɛmɛ rɩ́ Ziida kuóro.
Sedesiyasɛ kuorí díí arɩ́ Zerizalɛmɛ yoo lɛ́ wɩ́ɛ́.
2 K 24.18-25.21; Zer 39.1-10 ; 52.1-27
11 Sedesiyasɛ kúó aá dí kuorí rʋʋ fá kéŋ bɩŋsɛ mɛrɛ́ arɩ́ balá nɛ́. Ʋ dí kuorí bɩŋsɛ fí arɩ́ balá nɛ́ Zerizalɛmɛ mɛ́. 12 Ʋ ɔ́ɔ́ a zɔ́kɛ Nyuutɩna Wɩɩsɛ ʋ Wɩɩsɛ mɛ́. Ʋ vɔ́ʋ́ rʋ́ʋ́ múúrú tɩɩ pa Wɩɩsɛ wɩlaabʋllɔ Zeremi fa há la Nyuutɩna Wɩɩsɛ nʋɔ wɩ́ɛ́ aá bʋ́l. 13 Ʋ isó cɛ́ kuóro Nabikanazaarɛ tɩɩ mɛ́, fa há ɛ́ɛ́ ʋ ŋmɩ́ɛ́sɛ Wɩɩsɛ sɩ́ɛ́ mɛ́. Sedesiyasɛ vɔ́ɔ́ rʋ́ʋ́ múúrú tɩɩ, ká duórú baŋcɩla a vɛ rʋ́ʋ́ bɩrko Nyuutɩna Wɩɩsɛ Ɩzɩrayɛl Wɩɩsɛ rɩ́. 14 Vʋk'ɔɔsa nɩhɩɛ̃́sɛ ná wuu rɩ́ nɩɛ, ɔsɔ́ tʋ́ŋ wɩ́tɩ́ɛ́nɛ, a cesi duhʋɔra ná naŋá wɩlaama. Ɓa ɔ́ɔ́ Nyuutɩna Wɩɩsɛ jaa ná ʋ fa há lɩ́sɛ ʋ ɔ́ʋ́ dɩmɩnɩ́ Zerizalɛmɛ mɛ́, zʋ busunnu. 15 Nyuutɩna Wɩɩsɛ, ɓa naabálwa Wɩɩsɛ, tɛ́ŋ wuu mí, tʋmʋ́ʋ́ wɩlaabʋlla ɓa ko pʋʋsɩ́wɔ́ dɩlla mɛ́. Bee wɩ́ɛ́, ʋ susúfɔɔ ná ʋ há kené ʋ nɩɛ rɩ́rʋ́ dɩmɩnɩ́ ná yɩr mɛ́. 16 Amá, ɓa lɔ́rɛ Wɩɩsɛ nɩtʋmɛ́ ná, a púú wɩ́bʋlɛ yɩr yɔo, a bel guónnú wɩlaabʋlla. Ɛ́ nɛ́ tɛ́, Nyuutɩna Wɩɩsɛ cɔ́ɛ́ cáásɛ isú nɩɛ nyúú, ʋ baa wɩ wuó pi aá cɛ́wɔ́. 17 Ɛ́ nɛ́ Nyuutɩna Wɩɩsɛ a Kalde kuóro kó yówó; a ɓʋ́ʋ́sɩ́wɔ́ heŋbiwafɛlɛ ná há mɩŋwɔ́ Wɩɩsɛ dɩmɩnɩ́, a wɩ bápʋɔsɛ rɩ́ toopere rɩ́ bánɩɩnáwa arɩ́ nɩbɔllɛ cóké tá. Wɩɩsɛ kɛ́sɩ́wɔ́ wuu hé Babɩlɔɔnɛ Nabikanazarɛ nɛ́sɛ mɛ́. 18 Ʋ pá Wɩɩsɛ jaa cɩ́kwiisi rɩ́ cɩ́kzeŋse ná wuu a kaa mʋ́ Babɩlɔɔnɛ. Wɩɩsɛ jaa kuóɓɩɛ rɩ́ kuóro zʋɔ ɓɩɛ arɩ́rʋ́ minisiwa kuóɓɩɛ, ɓa wuu nɩ́ ʋ kaa mʋ́ Babɩlɔɔnɛ. 19 Babɩlɔɔnɛ nɩɛ nyɩ́kɛ Wɩɩsɛ jaa ná, a zɔkɛ Zerizalɛmɛ zenaa ná wuu, ka nyɩ́kɛ tɔ́ɔ́ ná jɩwere, a zɔ́kʋ́ oŋwere wuu. 20 Ká kɛ́sɛ nɩɛ ná há lué lɛ lal mɛ́ a kaá mʋ́ Babɩlɔɔnɛ; ɓa a yósi a tʋŋ aá pɔ́ʋ́ rɩ́rʋ́ bɛlɛ, a kaá ja tɛ́ŋ ná mɛ́ Pɛrsɛ kuóro há kué la dɩhɩ̃́. 21 Nyɛ́ nɛ́ tʋmɛ́ Nyuutɩna Wɩɩsɛ wɩ́bʋlɛ́ ná wɩlaabʋllɔ Zeremi há bʋlɛ́ nʋɔ sú. A makɛ rɩ́ tɔ́ɔ́ ná ná fɩɛla ná ʋ fa wɩ neé ʋ zɔ́kɛ tɛ́ŋ mɛ́, a kaá ja rɩ́ bɩ́ŋsɛ mɛɛsɩ́botoro rɩ́ fí nʋɔ sú.» 22 Pɛrsɛ kuóro Siirisi, kuorí dí dʋ́ŋdʋʋ̃́ bɩna mɛ́ nɛ́; Nyuutɩna Wɩɩsɛ fa a wɩ́bʋlɛ́ ná ʋ fa lá sɩ́ɛ́ bʋl pɔ́ʋ́ wɩ́laabʋllɔ Zeremi nʋɔ sú. Ŋ pi sabɩŋ hé Pɛrsɛ kuóro Siirisi sɩɛrʋ, ʋ pʋ́ŋsɛ kɛnnɛ, ká a ɓa buólu dɩtɩ́llɛ wuu, a bʋlɛ́: 23 Nóú ná Pɛrsɛ kuóro Siirisi há sɛ́: Nyuutɩna Wɩɩsɛ, bána nyúú rí Wɩɩsɛ; ná há pí tíé nyúú dɩtɩ́llɛ wuu kuorí héŋ nɛ́sɛ mɛ́; héŋ sabɩŋ mɛ́ rɩ́ŋ sɔɔ wɩ́cʋɔlɩjaa pɔ́ʋ́; Zerizalɛmɛ mɛ́, Ziida dɩtɩ́llɛ sɩɛrʋ. Ɛ́ wɩ́ɛ́, ɩ́ nɩɛ ná wuu há ká Nyuutɩna Wɩɩsɛ nɩtɩ́llɛ, ɩ́ wuu bɩrmʋ́ Zerizalɛmɛ. Nyuutɩna Wɩɩsɛ ɩ́ Wɩɩsɛ sɩ́ mɩnɩ́wa har.»