Akaazɛ kuorí díí pulé wɩ́ɛ́
(2 K 16.1-20)
28
1 Akaazɛ kúó aá dí kuorí rʋ́ʋ́ fa kéŋ bɩŋsɛ mɛ́rɛ nɛ́; ká dí kuorí bɩŋsɛ fí rí balgo Zerizalɛmɛ mɛ́. Amá ʋ wɩ yɛ́rɛ tʋ́mɛ́ Nyuutɩna Wɩɩsɛ sɩ́ɛ́ mɛ́, anʋ́ʋ́ áná Davidi. 2 Amá ʋ césí Ɩzɩrayɛl kuóre wɩ́'állɛ, a má veŋgúlli a pa baalawa. 3 Ʋ tɩɩ fa nyɩ́kɛ́ áŋsáŋsɛ Bɛnɛhɩnɔŋ polo sɩɛrʋ, a púú bɛlɛ má tɩɩ a fisí níŋ sɩɛrʋ a ɔsɛ vʋka, a tʋ́ŋ wɩ́tɩɛnnɛ anɛ ɛ duowa ná Nyuutɩna Wɩɩsɛ fa há kíré Ɩzɩrayɛl nɩɛ sɩ́ɛ́ mɛ́, há tʋ́mɛ́. 4 Ʋ ɔsɛ́ vʋka, a nyɩ́kɛ́ áŋsáŋsɛ dúŋdúóme ná daha ɓa háá ɓaarɛ venni ráŋ rɩ́ dúŋdúóme daha arɩ́ tulaarɛ wuu mʋʋla. 5 Ɛ́ nɛ́ Nyuutɩna Wɩɩsɛ, ʋ Wɩɩsɛ kánʋ́ hé Siiri kuóro nɛ́sɛ mɛ́ ʋ ko yoo dí dóé Akaazɛ nyúú. A kɛ́sʋ́ nɩɛ ɓɩkana kaa mʋ́ tɔ́ɔ́ bɩnájaa Damasɛ mɛ́. Nyuutɩna Wɩɩsɛ baa a Ɩzɩrayɛl kuóro ko yo dí dóé Akaazɛ nyúú, a zɔkɛ zɔkrɛ kɩ́ŋkáŋ. 6 Peka há ká Remaliya bio, ɓʋ́ʋ́sɛ Ziida lalyóóríbibara bʋ́ɩ́zɔlɔ rí mɛ́rɛ kal balá. Bee wɩ́ɛ́, Ziida nɩɛ vɛ Nyuutɩna Wɩɩsɛ, ɓa naabálwa Wɩɩsɛ tá. 7 Zikiri há ká lalyóóríbibar Ɩfɩrayɩŋ mí, ɓʋ́ kuóro bio Maseya rɩ́ kuóro jaa nɔhɔ̃́ Azirikam arɩ́ Ɛlkana há tʋ́kɛ́ kuóro mí. 8 Ɛ́ kal, Ɩzɩrayɛl nɩɛ kɛ́sɩ́wɔ́ maábinaŋá háála rɩ́ heŋbólli arɩ́wɔ́ tolé bʋ́ɩ́mɛɛ́sɛllɛ nɛ́ a kaa mʋ́ tɔ́ bɩnajaa Samari mí. Ká pɔ́wɔ́ lalɓɩɛ kɩ́ŋkáŋ a kaá col Samari. 9 Nyuutɩna Wɩɩsɛ wɩ́laabʋllɔ oro fa mɩŋ róŋ ɓaa yɩrʋ́ Ɔbɛdɛ. Ʋ lɩ́ɔ́ ceŋ lalyoore ná há bɩ́rɛ aá ko Samari, a bʋlwɔ́ rɩ́ bʋlɛ́: «Nyuutɩna Wɩɩsɛ, ɩ́ naabálwa Wɩɩsɛ cɔ́ɛ́ nɛ́ fa isi Ziida bɛlɛ nyúú; ɛ́ nʋʋ kɛ́sɩ́wɔ́ héíwa nɛ́sɛ mɛ́ ɩ́ yoo díwó. Ɩ́ cáásɔ́ ɓʋ́ʋ́sɩ́wɔ́ kɩ́ŋkáŋ rɩ́ cɔwɩɩlɩ́zeno há zɩ́nɛ́ yakɛ bána mɛ́. 10 Ká mʋ́l néé mí, ɩ́ kɛ́sɛ́ Ziida arɩ́ Zerizalɛmɛ bɛlɛ, rɩ́wɔ́ ɛ́ɩ́wa yósi rɩ́rɩ́wa tʋtʋnna. Ɩ́ sɩɛ́ wɩ ɛ̃ rɩ́ɩ́wa há tʋ́ŋ nyɛ ná, ɩ́ ɔ́ɔ́ zɔkɛ Nyuutɩna Wɩɩsɛ, ɩ́ Wɩɩsɛ mɛ́ nɛ́ɛ́>> 11 Mʋ́l néé mí, ɩ́ zesíŋ. Ká tɛ́ɩ́wa maábinaŋá ná ɩ́ há kɛ́sɛ́ ɓa a bɩnajaa nɩɛ; rɩ́ ɛ́rá Nyuutɩna Wɩɩsɛ, cɔwɩɩlɩ́zeno ná sɩ́ ísíwa nyúú.» 12 Ɩfɩrayɩŋ nɩɛ sɩ́dííre ná sɩɛrʋ; Yohanaŋ bio Azariya rɩ́ Mesilɛmɔtɛ bio Berekiya rɩ́ Salum bio Yehizikiya arɩ́ Hadilayi bio Amasa, ísó cɛ́ nɩɛ ná há bɩ́rɛ lɛ lal ná aá ko mí. 13 Ká ɓa bʋ́lwɔ́ rɩ́ a bʋlɛ́: «Ɩ́ sɩ́ nɩkɛsɛ́ nyáŋ káá zʋ rɛ́ɛ́! Bee wɩ́ɛ́, ɩ́ sɩ́ á ráá a nyɔ́rkɛ Nyuutɩna Wɩɩsɛ mɛ́. Ɩ́ ná rá wɩ́bɔma rɩ́rá dɩnyɔ́rkɛ káŋ mʋɔsɔ rɛ́. Ká ɩ́ jɩ́já rɩ́ɩ́wa ɔsɛ súúrírá wɩ́bɔmɔ rɩ́rá dɩnyɔ́rkɛ, rɩ́ Nyuutɩna Wɩɩsɛ cɔwɩɩlɩ́zeno ɔsɛ ísí Ɩzɩrayɛl nyúú!» 14 Sɩ́dííre arɩ́ nɩɛ wuu sɩ́ɛ́ mɛ́, lalyoore ná sáŋɔ́ pí nɩkɛ́sɛ ná tá ká píwó cɩksɛ má páwɔ́. 15 Ka ɓa lɩ́sɛ báála ɓa sɩɛrʋ ɓa bʋl wɩ́ɛ́ dúóri lalnɩkɛ́sɛ ná naasɛ. Lal ɓɩɛ ná sɩɛrʋ, ɓa lɩ́sɛ gɛnnɛ a su nɩɛ ná wuu fa há kéŋ tɛŋɓɩla ká pɔ́wɔ́ gɛnnɛ rɩ́ natɔɔsɛ rɩ́ ɓɩdííle arɩ́ nyɔɔlɔ; a sɛsɛ nɩɛ ná há pɩrɛ fʋrsɛ. Ɛ́ har mɛ́, ɓa ɔɔ nɩɛ ná wuu há ká pʋɔlɛ zɛ kokusi, ɓa káŋwɔ́ mʋ́ Zeriko, habɛɛ tuuni tɔ́ɔ́ mɛ́, ɓa maábinaŋá rɩ́. Ka ɓa tɩɩ bɩ́rko Samari.Kuóro Akaabɛ sʋ́l Asiiri kuóro rʋ́ʋ́ ko pɔ́ʋ́ mɛ́
16 Ɛ́ tɛ́ŋ mɛ́, kuóro Akaabɛ sʋ́l sáŋɛ Asiiri kuóre rɩ́. 17 Edɔŋ nɩɛ báá kúó yoo dí Ziida nɩɛ, a kɛ́sɩ́wɔ́ naŋá mʋ́ tɔ́ bɩnajaa. 18 Filisiti nɩɛ kúó yoo Sefeela rɩ́ Nɩgɛɛvɛ tɔ́nɛ há mɩŋ Ziida dɩtɩ́llɛ mɛ́. Ɓa yóó la, Bɛtsemɛsɛ rɩ́ Ayalɔŋ arɩ́ Gederɔtɛ. A yoo dí Soko rɩ́rʋ́ kíle tɔ́nɛ, Timina rɩ́rʋ́ kíle tɔ́nɛ, Gimizo rɩ́rʋ́ kíle tɔ́nɛ, a fa tɩ́llɩ́wɔ́. 19 Nyuutɩna Wɩɩsɛ tɩŋ Ɩzɩrayɛl kuóro Ahaazɛ wɩɛ́, a a Ziida dɩtɩ́llɛ ná wɩɩla. Bee wɩ́ɛ́ ʋ tɩɩ fa tó tékétéké rɩ́ Nyuutɩna Wɩɩsɛ, ka yíki nɩɛ ná má ɓa tɛl a aa zɔkɛ Nyuutɩna Wɩɩsɛ mɛ́. 20 Siiri kuóro Tegilatɛfalasar há kué ʋ wɩ Ahaazɛ mɛ́ pɛ́ɛ́, ká yoo díú, a hóú wɩɩla mɛ́. 21 Bee wɩ́ɛ́, Akaazɛ pá Nyuutɩna Wɩɩsɛ jaa kuóɓɩɛ ɓarma rɩ́ kuóro jaa ɓɩɛ arɩ́ minisiwa ɓɩɛ a tɛ́ ɓa kaá mʋ́ a di zile a pá Asiiri kuóro, ka rʋ́ʋ́ pɛ́ʋ́ mɛ́. Amá, ʋ vɔ́ʋ́ ʋ wʋ́ʋ́ mɛ́ sáŋɛ́. 22 Amá kuóro Akaazɛ mɩŋ sazɔkɔ mɛ́ ɛ, ká há ɔsɛ aa zɔkɛ Nyuutɩna Wɩɩsɛ mɛ́. 23 Ʋ ɔ́sɛ́ vʋka a pá Damasɛ nɩɛ venni ná fa há ɛ́ɛ́ ɓa yoo díú; ká bʋlɛ́: «Siiri kuóre venni nɛ́ haá pɛ́wɔ́ mɛ́, ɛ́ wɩ́ɛ́, ŋ sɩ́ ɔsɛ vʋka pɔ́wɔ́, ká rɩ́wɔ́ pɛ́ŋ mɛ́. Venni ná ɓaarɛ ɔ́ɔ́ ʋ rɩ́ Ɩzɩrayɛl nɩɛ wuu tɛl. 24 Akaazɛ pá Nyuutɩna Wɩɩsɛ jaa cɩksɛ ná hé naŋá mɛ́ a ŋmɔ́sɩ́wɔ́ céŋŋi, ká tɔ́ Nyuutɩna Wɩɩsɛ jaa ná dánnʋʋsɛ. Ká má korsi Zerizalɛmɛ ŋmɛ́ŋcáksáwa wuu mí. 25 Ziida tɔ́nɛ oro wuu mí, ʋ lɩ́sɛ dúŋdúóme ná ɓa há ɓáárɛ venni rɩ́wɔ́ nyɩ́kɛ áŋsáŋsɛ ráŋ aá pá veŋhʋɔra. Ɛ́ ɔ́ɔ́ ʋ a zɔ́kɛ Nyuutɩna Wɩɩsɛ, ʋ naabálwa Wɩɩsɛ mɛ́. 26 Ziida rɩ́ Ɩzɩrayɛl kuóre wɩ́'állɛ kɛnɔ sɩɛrʋ nɛ́, ɓa pʋ́ŋsɛ Akaazɛ tʋtʋmɛ́ púle rɩ́rʋ́ tenné a hé. 27 Akaazɛ há sʋ́wɛ́, ɓa húú Zerizalɛmɛ mɛ́ nɛ́. Ɓa taŋa wʋ́ʋ́ húé Ɩzɩrayɛl kuóre lɛlbulli sɩɛrʋ. Ʋ bio Ezekiyasɛ nɛ́ lɔ́ʋ́ nyúú mí a dí kuorí.