Zotamɛ kuorí díí wɩ́ɛ́
(2K 15.32-38)
27
1 Zotamɛ kúó aá dí kuorí rʋʋ fa kéŋ bɩŋsɛ mɛrɛ́ rí bɔmmʋ́ɔ́ nɛ́; ká dí kuorí bɩŋsɛ fi rɩ́ balgo Zerizalɛmɛ mɛ́. Ʋ maá yɩr nɛ́ fa ká Yerusa, Sadɔkɛ toló. 2 Ʋ tʋ́ŋ yɛ́rɛ́ Nyuutɩna Wɩɩsɛ sɩ́ɛ́ mɛ́ a nʋ́ʋ́ áná Oziyasɛ fa há tʋ́ŋ ɛ́; ʋ taŋa wɩ Nyuutɩna Wɩɩsɛ wɩcʋɔlɩjaa sɩɛrʋ zʋ́ɛ́. Amá nɩɛ ná há káánɛ wɩbɔma sɩɛrʋ. 3 Ʋ nɛ́ sɔ́ Nyuutɩna Wɩɩsɛ jaa dánnʋzeno ná. Ʋ sɔ́ jɩɩsɛ ɓɩkana má Ɔfɛl zenaa ná nyúú. 4 Ʋ sɔ́ tɔ́nɛ Ziida pallɛ sɩɛnnɛ, a sɔ zekɛ́rɛ arɩ́ pʋ́pɔ́ɔ́ra dɩhɩ̃́ gɩr sɩɛrʋ. 5 Yotamɛ nɛ́ mʋ́ɛ́ yoo dí Amɔŋ nɩɛ kuóro. Ɛ́ bɩna, Amɔŋ nɩɛ túŋ wárɛ tɔ́nnɛ botoro rɩ́ bilé tɔ́nnɛ bʋ́ɩ́toro arɩ́ ɔrzɛ má tɔ́nnɛ́ bʋ́ɩ́toro nɛ́ a pá kuóro Yotamɛ. Bɩŋsɛ bɛllɛ ná náŋa há tʋ́kɛ́, loŋpówa nyáŋ nɛ́ Amɔŋ nɩɛ túŋ pá Yotamɛ. 6 Yotamɛ kuorí ɔ́sɔ́ ka dóé, bee wɩ́ɛ́ ʋ cɛ́ Nyuutɩna Wɩɩsɛ, ʋ Wɩɩsɛ yɛ́rɛ́ ná sɩɛrʋ. 7 Yotamɛ wɩ́'állɛ ná náŋa, ʋ lalwa wuu yoe arɩ́rʋ́ tʋtʋmɛ́, ɓa pʋ́ŋsɩ́wɔ́ hé Ziida rɩ́ Ɩzɩrayɛl kuóre wɩ́'állɛ kɛnɔ sɩɛrʋ nɛ́. 8 Ʋ kúó aá dí kuorí rʋʋ fa kéŋ bɩŋsɛ mɛrɛ́ rɩ́ bɔmmʋ́ɔ́ nɛ́; ká dí kuorí bɩŋsɛ fí rí balgo Zerizalɛmɛ mɛ́. 9 Yotamɛ há sʋ́wɛ́ a mʋ́ʋ́ ánáwa rɩ́, ɓa húú Davidi zʋ́ɔ́ mɛ́ nɛ́. Ʋ bio Akaazɛ nɛ́ dí kuorí ʋ nyúú mí.