Oziyasɛ kuorí díí wɩ́ɛ́
(2K 14.21-22 ; 15. 1-7)
26
1 Ziida nɩɛ wuu lɩ́sɛ Oziyasɛ fa há kéŋ bɩ́ŋsɛ fí rí balgo, rʋʋ lɔ́ʋ́ áná Amasiya nyúú mí a dí kuorí. 2 Ʋ áná há sʋ́wɛ́ a mʋ́ʋ́ ánáwa rɩ́ har mɛ́, ʋ nɛ́ bɩ́rɛ́ yoo la Ela tɔ́ɔ́, a bɩrsɔ́ a pá Ziida nɩɛ. 3 Oziyasɛ kúó aá dí kuorí rʋ́ʋ́ fa kéŋ bɩŋsɛ fí rí balgo ní; ká dí kuorí bɩŋsɛ mɛɛ́sɛllɛ rí fí rí bɛllɛ Zerizalɛmɛ mɛ́. Ʋ maá yɩ́r nɛ́ fa ká Yekoliya, a lɛ Zerizalɛmɛ. 4 Ʋ fa tʋ́ŋ yɛ́rɛ́ Nyuutɩna Wɩɩsɛ sɩ́ɛ́ mɛ́, a nʋ́ʋ́ áná Amasiya há tʋ́ŋ ɛ́ tɩɩ tɩɩ. 5 Ʋ já Wɩɩsɛ Zakari hiẽsó tɛ́ŋ mɛ́, Zakari fa kármɛ́ Oziyasɛ, ʋ ka Wɩɩsɛ héwífɔ́ɔ́. Nyuutɩna Wɩɩsɛ fa ɔ́ɔ́ ʋ wɩ́ɛ́ cɛ́rɛ, tɛ́ŋ ná mɛ́ ʋ há cɩ́nɛ́ tɩkɛ Wɩɩsɛ. 6 Oziyasɛ mʋ́ɔ́ yoo dí Filisi nɩɛ, ká zɔkɛ Gatɛ rɩ́ Yabne arɩ́ Asɩdɔɔdɛ zenaasɛ. Ká a ɓa sɔ tɔ́nɛ Asɩdɔɔdɛ, arɩ́ Filisi dɩtɩ́llɛ mɛ́. 7 Wɩɩsɛ ɔ́ɔ́ ʋ yoo dí Filisi nɩɛ rɩ́ Arabɛwa ná há mɩŋ Gur'Baal mɛ́ arɩ́ Amɔŋ nɩɛ. 8 Amɔŋ nɩɛ fa túŋ loŋpówa aá pá Oziyasɛ; ʋ ɛ́ a Oziyasɛ yɩ́r lɛ a peri Ezipiti. Bee wɩ́ɛ́, ʋ kuorí fa ɔ́sɔ́ ká dóé wérí. 9 Oziyasɛ sɔ́ pʋ́pɔ́ɔ́ra dɩhɩ́ɛ̃́ Zerizalɛmɛ mɛ́, nɔ́ŋɔ naŋgbáŋjɛ́ dánnʋɔ daha, a sɔ nɔ́ŋɔ má polo rɩ́ɩ́ dánnʋɔ daha, ká sɔ nɔ́ŋɔ má naŋgbáŋjɛ́ nɔ́ŋɔ má daha a a ɓa ká dóé. 10 Ká sɔ pʋ́pɔ́ɔ́ra jɩɩsɛ gɩrbétéke mí, a lú nyibʋɔnnɛ ɓɩkana, bee wɩ́ɛ́ ʋ fa kéŋ pʋsɛ ɓɩkana. Ʋ fa kéŋ baka tʋtʋnna Sefala rɩ́ típaŋtaŋɩ́ mɛ́. Ʋ kéŋ víínyí bíbelle pallɛ daha arɩ́ karmɛl mɛ́. Oziyasɛ fa có pár wérí. 11 Oziyasɛ fa kéŋ lalyoore há ɛ̃ lal yoe a wólli lal aá mʋ́. Ɓa faá mʋ́ lal púl púlwa nɛ́, a tɩŋ ɛ́ ná kɛŋpʋ́ŋsɔ Yehɩɛl arɩ́ oŋɓello Maseya, há dɩ́sɩ́wɔ́, a pii hé kuóro sóójiwa nɔhɔ̃́ Hananiya nɛ́sɛ mɛ́. 12 Jɩtɩ́náwa ná háá bélú lalyóóríbibara mɛ́, nɛ́ nɩɛ bʋ́ɩ́wʋllɛ rɩ́ zɔwalgo (2 600). 13 Ɓa fa kéŋ lalyoore bʋ́ɩ́zɔtoro rɩ́ balpɛ arɩ́ zɔmmʋ́ɔ́ há wo lal aá yó rɩ́ dóé arɩ́ baŋcɩpɩrɩ́, ɓa nɛ́ mɔhɛ̃́ rɩ́wɔ́ yoo la kuóro ʋ dɩŋdɔmɔ nɛ́sɛ mɛ́. 14 Lal é wuu mí, Oziyasɛ faá ja hɔkɛ́rsɛ rɩ́ cɔlma rɩ́ néŋcunni rɩ́ hɔɔgɛnnɛ rɩ́ tóni arɩ́ dɔ́wɩ́yooló dɔ́wʋ́ɔ́ a pɔ́wɔ́. 15 Oziyasɛ ɔ́ɔ́, ɓa luki lalyóórícɩksɛ Zerizalɛmɛ mɛ́, a sakɛ pʋ́pɔ́ɔ́ra dɩhɛ̃́ arɩ́ naŋgbáŋjɛ́wa daha, rɩ́wɔ́ kaá yo hɛmɛ arɩ́ dɔ́wɩ́zeŋse. Oziyasɛ yɩr lɩ́ɔ́ a mʋ́ dɩbólí, bee wɩ́ɛ́, Wɩɩsɛ pɔ́ʋ́ mɛ́ kíŋkáŋ, ʋ caasɛ ka dóé. 16 Amá Oziyasɛ kuorí ná há kéŋ dóé ɔ́ɔ́ ʋ nyʋkʋ́ tɩɩ a zɔ́kʋ́ tɩɩ, ka vɛ Nyuutɩna Wɩɩsɛ, ʋ Wɩɩsɛ tá: Ʋ tɩɩ ísó zʋ Nyuutɩna Wɩɩsɛ wɩcʋɔ́lɩjɩzeno, rʋ́ʋ́ nyɩ́kɛ aŋsáŋsɛ, tulaale koro daha. 17 Ɛ́ nɛ́ vʋk'ɔɔsɔ nɔhɔ̃́ Azariya tɩ́ŋʋ́ har zʋ, ʋ rɩ́ Nyuutɩna Wɩɩsɛ vʋ́k'ɔɔsa mɛɛ́sɩ́baná há kéŋ baŋcɩ́pɩrɩ. 18 A cɛ́ kuóro Oziyasɛ sɩ́ɛ́ a bʋlɛ́: kuóro Oziyasɛ, ɩ tɩɩ ra wɩ mɔhɛ̃́ rɩ́ɩ́ zʋʋ nyɩkɛ́ áŋsáŋsɛ a pá Nyuutɩna Wɩɩsɛ. Amá Aarɔŋ bɛlɛ ná há ká vʋk'ɔ́ɔ́sá ɓa lɩ́sɛ ɛ́ tʋtʋmɩ́ yɩ́r mɛ́ ɓa tʋtʋmɩ́ nɛ́. Mʋ́ lɛ Wɩɩsɛ dɩmɩnɩ́ ná mɛ́ bee wɩ́ɛ́, ɩ ɔ́ɔ́ zɔkɛ! Ɛ́ wɩ́ɩ́ yɩweró pá Nyuutɩna Wɩɩsɛ sɩ́ɛ́ mɛ́! 19 Ɛ́ wuu, rɩ Oziyasɛ cɔ́ɛ́ ísó, ká ɛ́ tɛ́ŋ mɛ́ rʋ́ʋ́ fa kéŋ áŋsáŋsɛ kurpóóti ʋ nɛ́sɛ mɛ́. Tɛ́ŋ ná mɛ́ ʋ cɔ́ɛ́ há ísí vʋk'ɔɔsa ná nyúú, dayálmʋ lukme lʋ́ʋ́ tule mí, vʋk'ɔɔsa ná sɩ́ɛ́, Nyuutɩna Wɩɩsɛ wɩcʋɔlɩjaa ná sɩɛrʋ, tulaale koro ná laka. 20 Vʋk'ɔɔsa nɔhɔ̃́ Azariya arɩ́ vʋk'ɔɔsa ná wuu há belú, ɓa nóú rɩ dayálmɛ lukme lʋ́ʋ́ tule mí, ɛ́ nɛ́ ɓa sʋ́ʋ́ lɛ pʋmmɔ kɩ́kɛ́lɛ́, ɛ́ nʋ́ʋ́ lɛ kɩ́kɛ́lɛ́; bee wɩ́ɛ́ Nyuutɩna Wɩɩsɛ ŋmɔ́wʋ́ rɩ́ dayálmʋ.Oziyasɛ kuorí tenné wɩ́ɛ́
21 Kuóro Oziyasɛ sɩɛ́ a dayálmʋ́ a mʋ́ perú sʋ́ʋ́. Ʋ dayálmɛ ná wɩ́ɛ́, ʋ dʋŋɔ nɛ́ fa mɩŋ jaa mɛ́. Bee wɩ́ɛ́, ʋ fa wɩ mɔhɛ̃́ rʋ́ʋ́ zʋ Nyuutɩna Wɩɩsɛ jaa. Ʋ bio Yotamɛ fa há ká kuóro jaa sɩ́dííro, ʋ nɛ́ kúé dí tɔ́ɔ́ ná nɩɛ sɩ́ɛ́. 22 Wɩlaabʋllɔ Izayi há ká Amɔtɛ bio nɛ́ pʋ́ŋsɛ Oziyasɛ dʋ́ŋdʋ́ʋ̃́ rɩ́rʋ́ hatɩ́ŋnnɛ́ wɩ́'állɛ a hé kɛnɔ mɛ́. 23 Oziyasɛ há sʋ́wɛ́ a mʋ́ʋ́ ánáwa rɩ́, ɓa húú ʋ ánáwa lɛbulli mí ní, kuóre dɩhuí. Bee wɩ́ɛ́, ɓa sɛ́: «Dayalmɔ nɛ́.» Ʋ bio Zotamɛ nɛ́ lɔ́ʋ́ nyúú mí a dí kuorí.