Amasiya kuorí díí wɩ́ɛ́
(2 K 14. 1-20)
25
1 Amasiya kúó aá dí kuorí rʋ́ʋ́ fa kéŋ bɩŋsɛ mɛ́rɛ rɩ́ bɔmmʋ́ɔ́ nɛ́. Ká ké Zerizalɛmɛ mɛ́ a dí kuorí bɩŋsɛ mɛ́rɛ rí nɛ́mɛ. Ʋ maá yɩ́r nɛ́ fa ká Yʋadaŋ, a lɛ Zerizalɛmɛ. 2 Amasiya ɔ́ɔ́ ná há ká yɛ́rɛ́ Nyuutɩna Wɩɩsɛ sɩ́ɛ́, ʋ taŋa fa wɩ tʋmɛ́ arɩ́rʋ́ sɩɛrʋ wuu.3 Amasiya kuorí há kúé ká dóé, ʋ ɔ́ɔ́ ɓa ɓʋ́ʋ́sʋ́ tʋtʋnna ná fa há ɓʋ́ kuóro Zʋasɛ, ʋ áná. 4 Amá ʋ wɩ nɩɓʋ́ʋ́ra ná bɛlɛ ɓʋ́ʋ́sɛ́, ká rʋ́ʋ́ zíl wɩ́bilé ná há mɩŋ Moyizi kɛnɔ sɩɛrʋ. Bee wɩ́ɛ́, ráŋ, Nyuutɩna Wɩɩsɛ sɛ́: “Ánáwa wɩ mɔhɛ̃́ rɩ́wɔ́ sʋ́sɩ́wɔ́ bɛlɛ wɩ́bɔma yɩr mɛ́, bɛlɛ má wɩ mɔhɛ̃́ rɩ́wɔ́ sʋ́sɩ́wɔ́ ánáwa wɩ́bɔma yɩr mɛ́; nɛrɔ wuú sʋ́wʋ́ tɩɩ wɩ́bɔma yɩr mɛ́ nɛ́.”
5 Amasiya tɩ́ŋ duó duówa a lɩ́sɛ sóójiwa bʋ́ɩ́wa nyúútɩ́náwa arɩ́ sóójiwa zɔlɔwa nyúútɩ́nawa Ziida duo sɩɛrʋ. Rɩ́wɔ́ gʋɔrɛ Ziida arɩ́ Bɛŋzamɛ duo sɩɛrʋ a dɩɩsɛ báála ná há kéŋ bɩŋsɛ mɛ́rɛ arɩ́ dɔwɛ. Ɛ́ báála wuu ɓa há dɩ́ɩ́sɛ́ ká lalyóóríbibara bʋ́ɩ́zɔtoro (300 000) a zɩŋ cɔlmɛ rɩ́ hɔkɛ́rɛ kaa yoe. 6 Ká pi wárɛ tɔ́nnɛ botoro a yɔwɛ lalyóóríbibara bʋ́ɩ́zɔlɔ, Ɩzɩrayɛl mɛ́. 7 Amá Wɩɩsɛ báálɔ oro kúó bʋ́lʋ́ rɩ́ a bʋlɛ́: «Kuóro! Sɩ́ Ɩzɩrayɛl lalyoore kɛ́sɩ́ mʋ́ lal ná dɩyóé. Bee wɩ́ɛ́, Ɩzɩrayɛl bɛlɛ ná wuu há lɛ́ Ɩfɩrayɩŋ Nyuutɩna Wɩɩsɛ tówó har! 8 Rɩ ɓa nɛ́ tɩ́ŋɩ́ mɛ́ mʋ́ lal ná dɩyóé, rɩɩ có rɩ́ɩ́ ka dóé a kɩ́llɛ dɩŋdɔmɔ má, Wɩɩsɛ sɩ́ a rɩ́ɩ́ gúl lal ná yoe mí. Bee wɩ́ɛ́, Wɩɩsɛ nɛ́ kéŋ dóé rʋ́ʋ́ pɛ́ɩ́ mɛ́, ɛ́rá má rʋ́ʋ́ a rɩ́ɩ́ gúl.» 9 Amasiya sɩɛ́ bʋ́l Wɩɩsɛ báálɔ ná rɩ́ a bʋlɛ́: «Ká wárɛ tɔ́nnɛ botoro ná ŋ há píé yɔwɛ Ɩzɩrayɛl lalyóóríbibara ná, ŋ ɔ́wɔ́ wɩ́ɛ́ ɛrɛɛ́>>» Ɛ́ nɛ́ Wɩɩsɛ báálɔ ná sɛ́: «Nyuutɩna Wɩɩsɛ sɩ́ wólli bɩr pɛɩ́ a kɩ́llɛ nyáŋ.» 10 Ɛ́ nɛ́ Amasiya a, lalyoore ná há lɛ Ɩfɩrayɩŋ ɓa wuu bɩrmʋ́ jɩɩsɛ. Amá lalyoore ná wuu cɔ́ɛ́ wɩ́ɔ́ kɩ́ŋkáŋ Ziida nɩɛ nyúú ɓa bɩrmʋ jɩɩsɛ rɩ́ cɔwɩɩlɩ́zeno.
11 Amasiya kuorí há kúé ka dóé, ʋ ísó hóú nɩɛ náŋá mɛ́, ɓa mʋ́ yo Seyiiri yɛsɛ polo sɩɛrʋ; a ɓʋ́ʋ́sɛ Edɔŋ báála bʋ́ɩ́ fí (10 000). 12 Ziida nɩɛ kɛ́sɛ́ báwómme bʋ́ɩ́fí (10 000), a kaa zɛ́ bʋ́ɩ́pallɔ nyúú rí, ká yíkwó tá ɓa ɓallɛ nyʋ́ksɛ. 13 Lalyoore ná Amasiya fa há wɩ sáŋɛ́ rɩ́wɔ́ tɩ́ŋʋ́ mɛ́ mʋ́ yo lal ná, mʋ́ɔ́ yo Ziida tɔ́nɛ ná, a pɔ́ Samari mí ká kaa mʋ́ peri Bɛthɔrɔŋ. A ɓʋ́ʋ́sɩ́wɔ́ báála bʋ́ɩ́toro (3000) ká pɔ́wɔ́ ɓɩɛ kɩ́ŋkáŋ a kaa cól. 14 Amasiya há mʋ́ɛ́ yoo dí Edɔŋ nɩɛ, ʋ pá Seyiiri nɩɛ venni kaa ko jaá. Ɓa nɛ́ kúé ɔ́ʋ́ wɩŋsa, ʋ ɓírmɩ́wɔ́ sɩ́ɛ́, a ɔsɛ vʋka arɩ́ áŋsaŋwa aá pɔ́wɔ́. 15 Ɛ́ nɛ́ Nyuutɩna Wɩɩsɛ cɔ́ɛ́ isi Amasiya nyúú; ʋ tʋ́mʋ́ wɩ́laabʋllɔ ʋ rɩ́ a bʋlɛ́: «Bee rɩ́ tɛ́ ɩ bɩrɛ aá ɓaarɛ nɩɛ nyáŋ wɩŋsa ná há wɩ wóllé lɔ́wɔ́ nɩɛ tá ɩ nɛ́sɛ mɛ́>> 16 Tɛ́ŋ ná mɛ́, Wɩɩsɛ wɩ́laabʋllɔ ná háá bʋl Amasiya rɩ́, Amasiya bɛ́sʋ́ mɛ́, a bʋlɛ́: "Á nɛ́ lɩ́sɩ́ rɩ́ɩ́ a kuóro cɩ́cáánɔ>> Tɔ́ɩ́ nʋɔ mɛ́, ɩɩ́ já rɩ́wɔ́ ŋmɔ́wɩ́ nɛ́ɛ́>>" Ɛ́ nɛ́ Wɩɩsɛ wɩ́laabʋllɔ ná sikli, ká bʋlɛ́: «Ŋ ɩ̃ɔ́ rɩ́ Wɩɩsɛ ja rʋ́ʋ́ zɔ́kɩ́ nɛ́, bee wɩ́ɛ́ ɩ wɩ́ŋ cáánɛ zésé ká tʋ́ŋ nyɛ."
Ɩzɩrayɛl kuóro Zʋasɛ yoo dí Amasiya
17 Ziida kuóro Amasiya zésú cɩ́cáána ká sɩɛ́ tʋŋ nɩɛ Ɩzɩrayɛl kuóro Zʋasɛ rɩ́. Zʋasɛ áná nɛ́ ká Zʋakaazɛ, Zʋakaazɛ áná nɛ́ ká Zehu. Ziida kuóro Amasiya sɛ́: “Ko ráá céŋ náŋá a yo náŋá! 18 Ɛ́ nɛ́ Ɩzɩrayɛl kuóro Zʋasɛ tʋ́ŋ ɓa mʋ́ bʋl pá Ziida kuóro Amasiya a bʋlɛ́: “Lɩbaŋ Sɔkóle tʋ́mɔ́ rɩ́wɔ́ bʋl Lɩbaŋ sɛɛdɩrɛ rɩ́ a bʋlɛ́: Píí toló páŋ bio rʋ́ʋ́ ja. Amá Libaŋ ballɔ kúó aá daarɛ a nʋɔsɛ ɛ́ sɔkóle ɓʋ́.” 19 Ɩ sɛ́, taŋá há wéró: “Ɩ yóó dí Edoŋ. Ɩ sɩɛrʋ tɔ́rɛ ɩɩ́ nyʋ́kɩ́ tɩɩ. Amá taŋa kaa mɔ́ɩ́ jaa! Beé rí ɩ jɩ́já wɩhála lal né sɩɛrʋ, há sɩ zɔkɩ́ tɩɩ, ká zɔkɛ Ziida nɩɛ a súúrí mí>>” 20 Amá Amasiya wʋ́ʋ́ zésé. Bee wɩ́ɛ́ Wɩɩsɛ tɩɩ nɛ́ faá já rʋ́ʋ́ ka Amasiya rɩ́rʋ́ lalyoore héwó dɩŋdɔma nɛ́sɛ mɛ́. A tɩŋ ɓa há ɓáárɛ́ Edoŋ nɩɛ venni wɩ́ɛ́. 21 Ɛ́ nɛ́ Ɩzɩrayɛl kuóro Zʋasɛ mʋ́ ʋ rɩ́ Ziida kuóro Amasiya yo náŋá, Bɛtɛsɛmɛɛsɛ mɛ́, Ziida dɩtɩ́llɛ mɛ́. 22 Ɩzɩrayɛl nɩɛ yóó dí Ziida nɩɛ, ɓa oro wuu fá mʋ́ʋ́ jaa. 23 Ɩzɩrayɛl kuóro Zʋasɛ kéŋ Ziida kuóro Amasiya a tɔ́ bɩnajaa Bɛtɛsɛmɛɛsɛ mɛ́. Amasiya ná áná nɛ́ ká Zʋasɛ, Zʋasɛ áná nɛ́ ká Ahaziya. Kuóro Zʋasɛ lɩ́sʋ́ Bɛtɛsɛmɛɛsɛ mɛ́ a kaa mʋ́ Zerizalɛmɛ. Ʋ zɔkɛ Zerizalɛmɛ zenaa gbesi há peri mɛɛ́tɩr zɔwɛllɛ, a pɔ́ Ɩfɩrayɩŋ dánnʋɔ mɛ́ kaá mʋ́ yakɛ nágbaŋjɛ́ dánnʋɔ mɛ́. 24 Ká pa salmɛ rɩ́ wárɛ wuu arɩ́ cɩksɛ ná wuu fa há mɩŋ Wɩɩsɛ jaa mɛ́ Ɔbɛɛdɛ pʋ́pɔ́, arɩ́ kuóro jaa cɩkpiŋe ná wuu. Ká kɛsɛ nɩɛ a bɩrmʋ́ Samari.
Amasiya kuorí tenné wɩ́ɛ́
25 Ɩzɩrayɛl kuóro Zʋasɛ há ká Zʋakaazɛ nɩhĩ sʋʋ har mɛ́, Ziida kuóro Amasiya há ká Zʋasɛ bio, ha dí tɔ́ɔ́ a peri bɩŋsɛ fí arɩ́ bɔmmʋ́ɔ́. 26 Amasiya dʋ́ŋdʋ́ʋ̃́ rɩ́rʋ́ hátɩ́ŋnɛ́ wɩ́'állɛ ná náŋa mɩŋ “Ziida rɩ́ Ɩzɩrayɛl kuóre wɩ́'állɛ kɛnɔ” sɩɛrʋ nɛ́. 27 A pɔ́ tɛ́ŋ ná mɛ́ Amasiya há kenú tɩɩ kɛkɛ Nyuutɩna Wɩɩsɛ mɛ́; nɩɛ ísó cɩ́nʋ́ mɛ́ Zerizalɛmɛ mɛ́, ʋ fá mʋ́ Lakiisi. Amá ɓa ɔ́ɔ́ nɩɛ kírú har a mʋ́ ɓʋ́ʋ́ Lakiisi ná mɛ́. 28 Zaksɛ nɛ́ pɔ́sʋ́ lɛlɔ rɩ́ lalyóórítórko, a kánʋ́ bɩrko húú Zerizalɛmɛ mɛ́, ʋ ánáwa lɛlbule sɩɛrʋ, Ziida tɔ́ɔ́ oro mí.