Zʋasɛ dí kuorí Ziida mɛ́
(2K 12.1-22)
24
1 Zʋasɛ kúó aá dí kuorí, rʋʋ fa kéŋ bɩŋsɛ balpɛ nɛ́. Ká dí kuorí bɩŋsɛ mɛɛ́sɛllɛ Zerizalɛmɛ mɛ́. Ʋ maá yɩr nɛ́ fa ká Sibiya, ʋ lɛ́ Bɛrsɩba nɛ́. 2 Vʋk'ɔɔsɔ Yoyada hiẽsó wuu mí, Zʋasɛ ɔ́ɔ́ ná há cɛ́rɛ́ Nyuutɩna Wɩɩsɛ sɩ́ɛ́ mɛ́. 3 Yoyada já háála bɛllɛ a pá Zʋasɛ, ɓa lʋl heŋbólli arɩ́ tolé a pɔ́ʋ́.4 Ɛ́ har mɛ́, Zʋasɛ bɩ́ɩ́nɔ́ rʋ́ʋ́ bɩrmɛ Nyuutɩna Wɩɩsɛ jaa. 5 Ʋ yɩ́rɛ vʋk'ɔɔsa arɩ́ Levi duo nɩɛ hé náŋá mɛ́ a bʋ́lwɔ́ rɩ́ bʋlɛ́: «Ɩ́ a rɩ́ Ɩzɩrayɛl nɩɛ ná wuu há mɩŋ Ziida tɔ́nɛ mɛ́ kɩɛsɛ meéwíé, rɩ́ɩ́wa la bɩ́bɩrmɛ ɩ́ Wɩɩsɛ jaa ná bɩná wuu. Ɩ́ hé dóé tʋ́mʋ́ kɩ́kɛ́lɛ́.» Amá Levi duo nɩɛ ná wɩ dóé hé rɩ́ɩ́ tʋ́ŋ tʋtʋmɩ́ ná kɩ́kɛ́lɛ. 6 Ɛ́ nɛ́ kuóro yɩ́rɛ vʋk'ɔɔsɔ nɔhɔ̃́ Yoyada a bʋ́lʋ́ rɩ́ bʋlɛ́: «Wɩɩsɛ tʋtʋnnɔ Moyizi arɩ́ Ɩzɩrayɛl nɩɛ faá túŋ nʋtʋmɛ táŋtɛjɩɩsɛ loŋpówa; ká beé rí tɛ, ɩ wɩ ɛ́ɛ́ rɩ́ Levi duo nɩɛ fɩkɛ la loŋpówa Ziida nɩɛ arɩ́ Zerizalɛmɛ nɩɛ rɩ́, a kaa ko>> 7 Bee wɩ́ɛ́, hásɔhɔtɩɩnɔ Atali rɩ́rʋ́ bɛlɛ ló Wɩɩsɛ jaa ná zeŋe cɔ́nnɛ; ká ɓa pa Nyuutɩna Wɩɩsɛ jaa cɩksɛ ná a ɓaarɛ Baalɛwa.»
8 Kuóro sɩɛ́ a ɓa ɓásɛ meéwíé dáka, a pii bil pʋmmɔ Nyuutɩna Wɩɩsɛ wɩcʋɔlɩjaa dánnʋɔ mɛ́. 9 Ká, a ɓa gʋɔrɛ Zerizalɛmɛ rɩ́ Ziida tɔ́nɛ sɩɛrʋ, a bʋl pá Ɩzɩrayɛl nɩɛ a bʋlɛ́, nɛrɔ wuu mɔhɔ̃́ rʋ́ʋ́ ko túŋ Nyuutɩna Wɩɩsɛ loŋpó ná Moyizi há ká Wɩɩsɛ tʋtʋnnɔ há mákɛ́ pá Ɩzɩrayɛl nɩɛ gɩrbétéke sɩɛrʋ. 10 Ɓa há bʋ́l ɛ́, sɩ́dííre arɩ́ nɩɛ wuu sɩɛnnɛ tɔ́rɔ́, ɓa nɛ́ŋ wuu kánʋ́ loŋpó ko hé meéwíé dáka ná mɛ́, ʋ sú. 11 Rɩ meéwíé dáka ná kaa mʋ́ kuóro oŋbelle sɩ́ɛ́ tɛ́ŋ nɛ́ kúé peri, rɩ́ Levi duo nɩɛ ná háá bélú mí kɩ́ɛ́lɛ́ zɩŋ rí meéwíé kánɔ́ dáka ná sɩɛrʋ, kuóro kɛŋpʋ́ŋsɔ rɩ́ vʋk'ɔɔsɔ nɔhɔ̃́ oŋbello nɩ́ɩ́ ko bɩ́sɛ. Ká bɩr kaa mʋ́ bílú dɩbilí. Nyɛ nɛ́ ɓaá tʋŋ kál wuu, aá ná meéwíé kɩ́ŋkáŋ. 12 Kuóro rɩ́ Yoyada sɩɛ́ pii hé tʋtʋnna ná háá bel Nyuutɩna Wɩɩsɛ jaa tʋtʋmɛ́ nɛ́sɛ mɛ́. Ɛ́ meéwíé ní ɓa pii aá túŋ dɔ́wɩ́cɔ́ɔ́ra rɩ́ dakʋnna ná háá tʋŋ Nyuutɩna Wɩɩsɛ jaa mɛ́. Ɓa nɛ́, ɓa ha pii aá túŋ nɩɛ ná háá tʋŋ hɔɔ rɩ́ kɔmɔ́ má tʋtʋmɛ́, ká rɩ́wɔ́ bɩrmɛ Nyuutɩna Wɩɩsɛ jaa ná. 13 Jaa ná tʋtʋnna há púl tʋtʋmɛ́ ná, ɓa báá wɩ cɩ́nɛ́. Ɓa bɩrmɛ́ Wɩɩsɛ jaa ná ʋ bɩrnʋ́ʋ́ nɩɩsɔ a ka dóé.
14 Ɓa há ténní tʋtʋmɛ́ ná, ɓa kéŋ meéwíkáánɛ ná bɩrmʋ́ pá kuóro arɩ́ Yoyada. Ɓa pii luki cɩksɛ a bil Nyuutɩna Wɩɩsɛ jaa sɩɛrʋ: Cɩksɛ ná ɓa há kené aá tʋŋ, vʋkfíse cɩksɛ rɩ́ viini arɩ́ cɩksɛ ná ɓa há kéŋ salmɛ rɩ́ meéwíé a. Yoyada hiẽsó wuu mí, tɛ́ŋ wuu mí, ɓaá ɔsɛ vʋkfíse Nyuutɩna Wɩɩsɛ jaa ná mɛ́.
Zʋasɛ wɩ cɩnɛ́ tɩkɛ Wɩɩsɛ
15 Yoyada nɩ́ɩ́nɔ́ wérí a dí tɔ́ɔ́ vɔkɛ, ká sʋwɛ. Ʋ kúó aá sʋwɛ, rʋʋ kéŋ bɩŋsɛ zɔlɔ rɩ́ mɛrɛ́ ríí fí ní. 16 Ɓa húú kuóre lɛlbulli sɩɛrʋ, Davidi zʋ́ɔ́ mɛ́; bee wɩ́ɛ́ ʋ fa tʋ́ŋ wérí Ɩzɩrayɛl mɛ́, a tʋŋ taŋá a caasɛ Wɩɩsɛ rɩ́rʋ́ jaa.
17 Yoyada sʋʋ har mɛ́, Ziida nɩhɩɛ̃́sɛ kúó ɓírmi kuóro sɩ́ɛ́, Ɛ́ nɛ́ kuóro zésíwó. 18 Ɩzɩrayɛl nɩɛ vɛ́ɩ́ Nyuutɩna Wɩɩsɛ, ɓa naabálwa Wɩɩsɛ jaa tá, ká bɩr aá ɓaarɛ dacɔ́ŋsɛ arɩ́ venni. Ɛ́ nɛ́ Wɩɩsɛ cɔ́ɛ́ isi Zerizalɛmɛ rɩ́ Ziida dɩtɩ́llɛ nɩɛ nyúú, ɓa wɩ́zɔkɩ́ néé wɩ́ɛ́. 19 Nyuutɩna Wɩɩsɛ tʋ́mʋ́ wɩ́laabʋlla rɩ́wɔ́ bʋl káŋwɔ́ bɩrkóú rí, amá ɓa wɩ zésé. 20 Ɛ́ nɛ́ Wɩɩsɛ sabɩɩna tuwi vʋk'ɔɔsɔ Zakari nyúú há ká Yoyada bio, ʋ lɩɩ cɛ́ nɩɛ ná sɩ́ɛ́, a gáásɛ wɩ́ɛ́ ɓa rɩ́ a bʋlɛ́: «Ɩ́ zesi Wɩɩsɛ há sʋ́ʋ́ ná: "Beé rɩ́ tɛ ɩ́ wɩ Nyuutɩna Wɩɩsɛ kɩ́ŋse ná zílé>> Ɩ́ waá a rɩ́ɩ́wa nɛrɛ! Bee wɩ́ɛ́, ɩ́ vɛ́ Nyuutɩna Wɩɩsɛ tá, ʋ má vɛ́ɩ́wa tá!"»
21 Nɩɛ vʋ́ʋ́rɔ́ cɩ́nʋ́ mɛ́, kuóro pɔ́wɔ́ nʋɔ ɓa yósú rɩ́ɩ́ dɔ́wʋ́ɔ́, a ɓʋ́ʋ́ Nyuutɩna Wɩɩsɛ wɩ́cʋɔlɩjɩzeno wuolo sɩɛrʋ. 22 Kuóro Zʋasɛ sʋ́llɛ sawér ná wuu Zakari áná Yoyada há ɛ́ɛ́ pɔ́ʋ́, ká ɓʋ́ʋ́ bio Zakari. Ʋ há kúé aá sʋwɛ, ʋ sɛ́: «Rɩ́ Nyuutɩna Wɩɩsɛ bel ɛ́ wɩ́ɩ́ ká sɩ́ píí cɛ́ʋ́!»
Zʋasɛ kuorí tenné wɩ́ɛ́
23 Bɩna tenné mí, Siiri lalyoore kúó yo Zʋasɛ. Ɓa yóó dí Ziida arɩ́ Zerizalɛmɛ, a ɓʋ́ʋ́sɩ́wɔ́ sɩ́dííre wuu, ká pɔ́wɔ́ lal ɓɩɛ wuu a kaa mʋ́ pá Damasɛ kuóro. 24 Siiri lalyoore wɩ kaŋ a ko, amá Nyuutɩna Wɩɩsɛ ɔ́ɔ́ ɓa yoo dí Ziida lalyoore ɓɩkana. Bee wɩ́ɛ́, ɓa fa vɛ́ Nyuutɩna Wɩɩsɛ, ɓa naabálwa Wɩɩsɛ tá. Ká Siiri lalyoore sɩɛ́ bɛŋsɛ Zʋasɛ wérí. 25 Siiri nɩɛ collé ná har mɛ́, Zʋasɛ bʋ́rmɔ́ a caasɛ mɩŋ wɩɩla sɩɛrʋ. Ɛ́ nɛ́ ʋ tʋtʋnna vʋʋrɛ cɩ́nʋ́ mɛ́; a ɓʋ́ʋ́ ʋ gódó daha, ʋ há ɓʋ́ʋ́sɛ vʋk'ɔɔsɔ Yoyada bɛlɛ ná wɩ́ɛ́. Ʋ há sʋwɛ, ɓa wʋ́ʋ́ kuóre lɛlbulli sɩɛrʋ húé, amá ɓa hú Davidi zʋ́ɔ́ mɛ́ nɛ́. 26 Zabaadɛ há ká Simeyatɛ bio a lɛ Amɔŋ duo sɩɛrʋ arɩ́ Yozabaadɛ ná maá há ká Simirɩtɛ, a lɛ Mʋabɛ duo sɩɛrʋ. Ɓa nyáŋ nɛ́ fa vʋ́ʋ́rɛ́ cɩ́nʋ́ mɛ́.
27 Ɓa pʋ́ŋsɛ Zʋasɛ bɛlɛ wɩ́ɛ́ rɩ́rʋ́ wɩ́zɩmɛ tʋtʋmɛ́ wɩ́ɛ́ arɩ́rʋ́ há bɩ́rmɛ́ Wɩɩsɛ jaa wɩ́ɛ́, a hé kuóre wɩ́'állɛ kɛnɔ sɩɛrʋ nɛ́. Ʋ bio Amasiya nɛ́ lɔ́ʋ́ nyúú mí a dí kuorí.