Zozafa bíl Saríyadííre Ziida mɛ́
19
1 Ziida kuóro Zozafa lɛ́ lal ná dɩyóé, a bɩrɛ mʋ́ Zerizalɛmɛ rɩ́ tɛŋfɩ́ɛ́l. 2 Wɩɩsɛ wɩ́laabʋllɔ Yehu há ká Hanani bio lɩ́ɔ́ céŋ Zozafa a bʋ́lʋ́ rɩ́ bʋlɛ́: «Beé rɩ́ tɛ ɩ mʋ́ pɛ́ yoo la wɩ́bɔ'aarɔ́ né>> Bee rɩ́ tɛ́ ɩ rɩ́ nɩɛ ná há cɛ́ Nyuutɩna Wɩɩsɛ mɛ́, nɛ́ bɩrɛ ka nʋtʋmɛ>> Ɛ́ wɩ́ɛ́, zɩŋ rɩ́ púsi Nyuutɩna Wɩɩsɛ cɔ́ɛ́ héí tɩɩ mɛ́.» 3 Amá, ɩ tɩɩ tʋ́ŋ wɩ́were, a ja Wɩɩsɛ rɩ́rɩ́ sɩɛrʋ wuu: Bee wɩ́ɛ́, ɩ ɔ́ɔ́ ɓa nyɩkɛ venno Asera dacɔ́ŋsɛ ná ɓa nyɩ́ɩ́kɛ tɔ́ɔ́ ná sɩɛrʋ.»4 Zozafa ké Zerizalɛmɛ mɛ́. Ká baa gʋɔrɛ tɔ́ɔ́ ná sɩɛrʋ, a pɔ́ Bɛrsɩba mɛ́, ká mʋ́ yakɛ Ɩfɩrayɩŋ paalɔ mɛ́. A bʋl ka nɩɛ sabɩŋsɛ bɩrko Nyuutɩna Wɩɩsɛ, ʋ naabálwa Wɩɩsɛ rɩ́. 5 Ʋ bíl saríyadííré Ziida tɔ́ɔ́ sɩɛrʋ rɩ́ tɔ́sɔkɛ́rɛ wuu sɩɛnnɛ arɩ́ tɔ́ɔ́ wuu sɩɛrʋ. 6 Ka sɩɛ́ bʋl saríyadííre ná rɩ́ a bʋlɛ́: «Ɩ́ há sɩ́ ɔ́ɔ́ ná, ɩ́ pɔ́ʋ́ mɛ́ wérí: Bee wɩ́ɛ́, ɩ́ wɩ mɔhɛ̃́ rɩ́ɩ́wa dí saríya a nɛ ɛ nɩbííne háá dí saríya, amá ɩ́ taŋa dí saríya a nɛ ɛ́ Nyuutɩna Wɩɩsɛ há sɛ́; ɩ́ lo rɩ́ Nyuutɩna Wɩɩsɛ tɩɩ nɛ́ mɩŋ rɩ́rɩ́ɩ́wa ɛ́ saríya díí mí. 7 Mʋ́l néé mí, ɩ́ lo rɩ́ Nyuutɩna Wɩɩsɛ héwífɔ́ɔ́ mɩ́nɩ́wa mɛ́. Ɩ́ pɔ́ wérí a tʋŋ ɛ́. Bee wɩ́ɛ́, Nyuutɩna Wɩɩsɛ, á Wɩɩsɛ wɩ nyɩɛrʋ ɛ̃, a wɩ nɩɛ́ caksɛ, a wɩ zílyɔwɛ la.» 8 Zerizalɛmɛ má tɩɩ mɛ́, Zozafa lɩ́sɛ Levi duo nɩɛ rɩ́ vʋk'ɔɔsa arɩ́ Ɩzɩrayɛl jɩtɩ́nawa naŋá rɩ́wɔ́ ʋ́'ɔsɛ Zerizalɛmɛ nɩɛ pɛ́kɛ wɩ́ɛ́ ká a rɩ́ Nyuutɩna Wɩɩsɛ taŋá ná nyɩɩsɛ. 9 Ʋ sɩɛ́ bʋl líŋsi nyáŋ pɔ́wɔ́ a bʋlɛ́: «Ɩ́ lo rɩ́ Nyuutɩna Wɩɩsɛ héwífɔ́ɔ́ mɩ́nɩ́wa mɛ́ rɩ́ɩ́wa tʋ́ŋ taŋá sɩɛrʋ rɩ́rɩ́ɩ́wa sɩɛrʋ wuu. 10 Tɛ́ŋ wuu mí, rɩ́ɩ́wa maábináŋa ná há mɩ́ŋwɔ́ tɔ́nɛ mɛ́ nɛ́ kéŋ wɩ́ɩ́ aá pɔsɛ náŋá a mʋ́ tɩɩnɛ nɩɓʋ́ mɛ́, ɛ́rá má wɩ́bilé mí, ɛ́rá má wɩ́makɛ́ mɛ́, ɛ́rá má wɩ́máŋsɛ mɛ́, ɛ́rá má kusuŋ wɩ́ɛ́; ɩ́ máŋsɩ́wɔ́ naasɛ pɔ́wɔ́ a makɛ rɩ́wɔ́ sɩ́ aá zɔkɛ Nyuutɩna Wɩɩsɛ mɛ́; rɩ́ɩ́ púsú cɔ́ɛ́ héíwa tɩɩ mɛ́ arɩ́rɩ́ɩ́wa maábináŋa mɛ́. Ɩ́ tʋŋ nyɛ rɩ́ɩ́wa sɩ́ bɔ́ŋbɔ́ŋ píí cɩ́ɩ́nɩ́wa tɩɩ. 11 Ná, vʋk'ɔɔsɔ nɔhɔ̃́ Amariya sɩ́ mɩ́nɩ́wa sɩ́ɛ́ aá sáŋɩ́wa mɛ́ Nyuutɩna Wɩɩsɛ wɩ́ɛ́ ná wuu sɩɛrʋ. Zebadiya há ká Ɩsɩmayɛl bio a a Ziida jɩtɩ́na nɛ́ sɩ́ zɩ́zɩŋ wɩ́ɛ́ ná wuu há tɩ́ɩ́nɛ́ kuóro mí. Ká rɩ́ Levi duo nɩɛ má mɩ́nɩ́wa sɩ́ɛ́ a a kɛŋpʋ́ŋsa. Ɛ́ wɩ́ɛ́, ɩ́ ɓáŋŋɩ́wa baŋcɩllɛ a tʋŋ; rɩ́ Nyuutɩna Wɩɩsɛ mɩŋ rɩ́ nɛ́ŋ ná wuu há sɩ́ tʋŋ wérí!»