Zozafa kuorí wɩ́ɛ́
(1R 15.24 ; 22.41-45)
17
1 Aza há kúé sʋwɛ, ʋ bio Zozafa nɛ́ lɔ́ʋ́ nyúú mí a dí kuorí. Zozafa kuorí há kúé ká dóé, ʋ ísó cɛ́ Ɩzɩrayɛl mɛ́. 2 Ʋ bíl lalyoore púl Ziida tɔ́sɔkɛ́rɛ ná wuu sɩɛnnɛ nɛ́. Ká lɩ́sɛ tʋtʋnnɩhɩɛ̃́sɛ ɓa bíbel Ziida tɔ́ɔ́ arɩ́ Ɩfɩrayɩŋ tɔ́nɛ ná wuu ʋ áná Asa fa há yóé la. 3 Nyuutɩna Wɩɩsɛ fa mɩŋ Zozafa har, bee wɩ́ɛ́, ʋ fa tɩ́ŋ dʋ́ŋdʋʋ̃ ŋmɛ́ŋsɛ ná ʋ naabál David fa há tɩ́ŋɛ́. Ʋ wɩ Baalwa ɓáárɛ. 4 Amá ʋ tɩ́ŋ Nyuutɩna Wɩɩsɛ, ʋ áná Wɩɩsɛ mɛ́, ʋ tɩ́ŋʋ́ kíŋse ná rɩ́ taŋá. Ʋ wɩ Ɩzɩrayɛl nɩɛ wɩ́'állɛ ná cése. 5 Nyuutɩna Wɩɩsɛ ɔ́ɔ́ Zozafa kuorí ka dóé. A a Ziida nɩɛ wuu ka satɔ́ɔ́rɩ́pallɛ ko aá pɔ́ʋ́. Ɛ́ ɔ́ɔ́ ʋ ka kuóɓɩɛ rɩ́ píŋ kɩ́ŋkáŋ. 6 Zozafa fa tɩ́ŋ Nyuutɩna Wɩɩsɛ rɩ́rʋ́ sɩɛrʋ; ɛ́ nɛ́ tɛ ʋ zɔkɛ dɩɓaarɛ́ ná há mɩŋ dúŋdúóme nyúú, arɩ́ dacɔ́ŋsɛ ná ɓa háá ɓaarɛ́ Ziida dɩtɩ́llɛ mɛ́. 7 Ʋ kuorí díí bɩŋsɛ botoro nyúú mí, ʋ lɩ́sʋ́ tʋtʋnnɩhɩɛ̃́sɛ; Bɛnɛhayi, Obadiya, Zakari, Netanɛl arɩ́ Mɩkaya rɩ́wɔ́ kɩ́karmɛ nɩɛ Ziida tɔ́nɛ mɛ́. 8 Ʋ lɩ́sɛ Levi duo nɩɛ Semaya, Netaniya rɩ́ Zebadiya rɩ́ Asayɛl rɩ́ Semɩramɔtɛ rɩ́ Yonataŋ rɩ́ Adoniya rɩ́ Tobiya arɩ́ Tɔbadoniya. A súúri vʋk'ɔɔsa Elɩsama rɩ́ Yoramɛ. 9 Ɓa pí Nyuutɩna Wɩɩsɛ wɩ́bilé kɛnɔ a karmɛ nɩɛ Ziida tíé mí. Ɓa gʋ́ɔ́rɛ Ziida dɩtɩ́llɛ tɔ́nɛ wuu a karmɛ nɩɛ.Zozafa kuorí dóé wɩ́ɛ́
10 Nyuutɩna Wɩɩsɛ héwífɔ́ɔ́ fa mɩŋ duowa ná wuu há kíl Ziida dɩtɩ́llɛ tɔ́nɛ ná mɛ́. Ɓa oro wuu rɩ́ Zozafa wɩ lal kené. 11 Filisiti nɩɛ fa kéŋ satɔ́ɔ́rɩ́pállɛ, arɩ́ meéwíé kaa ko aá pá Zozafa, ká túŋ loŋpówa má aá pɔ́ʋ́. Arabɛwa má tɩɩ fa kéŋ pʋsɛ kaa ko aá pɔ́ʋ́: Peɓallɛ bʋ́ɩ́walpɛ zɔwalpɛ arɩ́ bʋnnɛ má bʋ́ɩ́walpɛ zɔwalpɛ.
12 Zozafa kuorí ɔ́sɔ́ aá súúrí kɩ́ŋkáŋ, ʋ sɔ zenaasɛ kíl Ziida tɔ́nɛ, ká sɔ náŋa má, ɓa ɔ́ʋ́ cɩksɛ dɩbilé. 13 Ʋ fa bíl ɓɩdííle ɓɩkana Ziida tɔ́nɛ sɩɛrʋ, arɩ́ lalyóóríbibara Zerizalɛmɛ mɛ́. 14 Zozafa kenú lalyoore ɓa jaá jaáwa nɛ́. Ziida jɩmʋ́l sɩɛrʋ, sóójiwá bʋ́ɩ́wa (1000) nɩhɩɛ́sɛ mɩ́nɔ́: Adɩna nɛ́ ká lalyóóríbibara bʋ́ɩ́zotoro (300 000) nɔhɔ̃́, 15 ʋ laka Yohanaŋ nɛ́ mɩŋ ráŋ, ʋ nɛ́ ká lalyóóríbibara bʋ́ɩ́zɔwɛllɛ mɛɛ́sɩbaná (280 000) nɔhɔ̃́; 16 ʋ laka, Zikiri bio Amasiya nɛ́ mɩŋ ráŋ, ʋ nɛ́ fa ká lalyóóríbibara bʋ́ɩ́zɔwɛllɛ (200 000) nɔhɔ̃́. Ʋ fa bɛ́llɔ́ pi rʋ́ʋ́ tʋŋ pá Nyuutɩna Wɩɩsɛ. 17 Bɛŋzamɛ jɩmʋ́l sɩɛrʋ: Elɩabɛ há ká lalyóóríbibar, nɛ́ ká lalyoore bʋ́ɩ́zɔwɛllɛ (200 000) há kéŋ tóni, arɩ́ hɔkɛ́rsɛ nɔhɔ̃́. 18 Ʋ laka, Yehozabaadɛ nɛ́ mɩŋ ráŋ, ʋ nɛ́ fa ká lalyoore bʋ́ɩ́zɔlɔ mɛɛ́sɩbaná (180 000) há kéŋwó tɩɩ lal yoe mí nɔhɔ̃́. 19 Lalyoore nyaŋ nɛ́ fa tʋmɛ́ aá pa kuóro, ká ɓa ná há mɩŋ Ziida tɔ́sɔkɛ́rɛ wuu mɛ́ wɩ́ɛ́ to ráŋ.