Lal isi Aza rɩ́ Ɩzɩrayɛl kuóro Basa pɛ́kɛ
16
1 Aza kuorí díí bɩŋsɛ mɛrɛ́ rí fí rí balgo nyúú mí, Ɩzɩrayɛl kuóro Basa mʋ́ɔ́ rʋ́ʋ́ yo Ziida, a sɔ zeŋe a kíl Rama tɔ́ɔ́ a makɛ rʋ́ʋ́ kɛ́rɛ Ziida kuóro Aza mɛ́ rʋ́ʋ́ sɩ́ zʋ́. 2 Ɛ́ nɛ́ Aza lɩ́sɛ wárɛ rɩ́ salmɛ há mɩŋ Nyuutɩna Wɩɩsɛ jaa sɩɛrʋ kuóɓɩɛ ná sɩɛrʋ, arɩ́ kuóro tɩɩ jaa kuóɓɩɛ ná sɩɛrʋ ɓa kaa mʋ́ Damaasɛ a pá Siiri kuóro Bɛnɛhadaadɛ. Ká bʋ́lʋ́ rɩ́ a bʋlɛ́: 3 «Lo rɩ́ŋ rɩ́rɩ́ɩ́ tʋŋ nʋɔ mɛ́, anɩ́rá ánáwa fa há tʋ́ŋ nʋɔ mɛ́ ɛ́. Ná wárɛ arɩ́ salmɛ nɛ́ ŋ tɛ rɩ́wɔ́ kaa ko a pɛ́ɩ́. Mʋ́ zɔkɛ nʋtʋmɛ ná há mɩ́nɩ́ rɩ́ Ɩzɩrayɛl kuóro Basa pɛ́kɛ, a makɛ rʋ́ʋ́ báá sɩ́ŋ yó.» 4 Bɛnɛhadaadɛ saŋ kuóro Aza sʋlɛ́, a tʋ́mʋ́ sóójihɩ́ɛ̃́sɛ ɓa mʋ́ yoo dí Ɩzɩrayɛl tɔ́nɛ; Iyɔŋ rɩ́ Daŋ rɩ́ Abɛlmayimi arɩ́ Nɛfɩtalɩ dɩtɩ́llɛ ná wuu sɩɛrʋ ʋ fa háá bílú ɓɩɛ. 5 Basa há nɛ̃́ ɛ labaarɛ, ʋ tá Rama zeŋe sɔɛ́ kile, a tɔ́ʋ́ tʋtʋmɛ́ ná. 6 Ɛ́ nɛ́ kuóro Aza yɩ́rɛ Ziida nɩɛ wuu hé náŋá mɛ́. A a ɛ́ nɩɛ mʋ́ pá dɔ́wʋ́ɔ́ ná rɩ́ dole Basa fa há kené sɔ zeŋe aá kíl Rama tɔ́ɔ́, a kaa ko. Aza píwó a sɔ zeŋe a kíl Geba arɩ́ Mispa.Aza kéŋ Wɩɩsɛ Wɩlaabʋllɔ Hanani tɔ́ bɩnajaa.
7 Ɛ́ tɛ́ŋ mɛ́, Wɩɩsɛ wɩlaabʋllɔ Hanani kúó ná Ziida kuóro Aza a bʋ́lʋ́ rɩ́ bʋlɛ́: «Ɩ há wɩ Nyuutɩna Wɩɩsɛ ɩ Wɩɩsɛ mɛ́ tɩ́ɛ́kɛ; ká píí tɩɩ tɩɛkɛ Siiri kuóro mí ní! Ɛ́ ɔ́ɔ́ Siiri kuóro lalyoore lú lɩ́ɩ́ nɛ́sɛ mɛ́. 8 Etiopi nɩɛ arɩ́ Libi nɩɛ lalyoore fa wɩ kaŋ rɛ́ɛ́, ɓa lalyóórítórkowa arɩ́wɔ́ zákzɩ́nna fa wɩ kaŋ kɩ́ŋkáŋ rɛ́ɛ́>> Amá, Nyuutɩna Wɩɩsɛ ɔ́ɔ́ ɩ yoo díí dóé ɓa nyúú; ɩ há tɩ́ɛ́kʋ́ mɛ́ wɩ́ɛ́. 9 Bee wɩ́ɛ́, Nyuutɩna Wɩɩsɛ sɩ́ɛ́ bel tíé nyúú wuu mí, aá ja nɩɛ ná há píwó yɩɛla wuu hóú mí, rʋ́ʋ́ pɛ́ɩ́wɔ́ mɛ́. Ɛ́ wɩ́ɛ́, ɩ tʋ́ŋ nɩcʋ́l wɩ́ɩ́ rɛ́. Ɛ́ nɛ́ tɛ lalwa sɩ́ cɩ́nɩ́ mɛ́. 10 Aza cɔ́ɛ́ ísí Wɩɩsɛ wɩ́laabʋllɔ Hanani nyúú, ʋ a ɓa kánʋ́ tɔ́ɔ́ bɩnajaa. Bee wɩ́ɛ́, ʋ wɩ́bʋlɛ́ ná fa kéŋ cɔ́wɩɩlɔ́ a pɔ́ʋ́. Ɛ́ tɛ́ŋ mɛ́, Aza púló aá bɛŋsɛ tɔ́ɔ́ ná nɩɛ náŋa.
Aza kuorí tenné wɩ́ɛ́
11 Ziida rɩ́ Ɩzɩrayɛl kuóre wɩ́'állɛ kɛnɔ sɩɛrʋ mɛ́ nɛ́, ɓa pʋ́ŋsɛ Aza tʋtʋmɛ́ púle, arɩ́wɔ́ tenné wɩ́ɛ́ a hé róŋ. 12 Aza kuorí bɩŋsɛ mɛrɛ́ rí nɛ́mɛ́ nyúú mí, ʋ ɓál naasɛ pʋɔlɩ́ bɔ́ŋbɔ́ŋ. Ʋ wɩ Nyuutɩna Wɩɩsɛ jɛ́ɛ́ rʋ́ʋ́ dúórú, ká mʋ́ lu'aara rɩ́ nɛ́. 13 Aza kuorí díí bɩŋsɛ mɛɛ́sɛllɛ rí balá nyúú mí ní ʋ sʋwɛ, a mʋ́ʋ́ ánáwa rɩ́. 14 Aza há sʋ́wɛ́, ɓa húú lɛlbule ná ʋ tɩɩ há lɛ́sɛ́ mɛ́ nɛ́, Davidi zʋ́ɔ́ mɛ́. Ɓa púú bil gódó daha, ráŋ ná áŋsáŋsɛwa rɩ́ tulaaléwa ná sɔ́ŋ há wéró a súú wuu; ká ɓa nyɩkɛ níŋ zeno a pɔ́ʋ́.