Kuóro Aza vɔ́ɔ́ rɩ́wɔ́ ɓaarɛ venni
15
1 Wɩɩsɛ sabɩɩna túwí Odɛɛdɛ bio Azariya nyúú; 2 ʋ lɩɩ céŋ Aza, a bʋ́lʋ́ rɩ́ a bʋlɛ́: «Aza rɩ́ Ziida nɩɛ arɩ́ Bɛŋzamɛ duo nɩɛ, ɩ́ zésíŋ rɩ́! Nyuutɩna Wɩɩsɛ mɩ́nɩ́wa har, rɩɩ́wa nɛ́ cɩ́nɛ́ tɩ́kʋ́. Rɩɩ́wa nɛ́ jɔ́ʋ́, ɩ́ sɩ́ túkú mí, amá rɩɩ́wa nɛ́ vɔ́ʋ́ tá, ʋ má sɩ́ vɛ́ɩ́wa tá. 3 Tápʋlɛ́ ɓɩkana há dáárɛ́, Ɩzɩrayɛl nɩɛ báá fa wɩ taŋá Wɩɩsɛ kené, ɓa báá fa wɩ vʋk'ɔɔsɔ kené há sɩ́ kɩ́kármɩ́wɔ́, ɓa báá fa wɩ wɩ́bilí kené. 4 Amá ɓa sazɔkɔ́ sɩɛrʋ, ɓa bɩ́rɔ́ ko Nyuutɩna Wɩɩsɛ, Ɩzɩrayɛl Wɩɩsɛ rɩ́; ɓa bɩ́rɔ́ jɔ́ʋ́, ɛ́ nɛ́ ʋ má kánʋ́ tɩɩ nyɩ́ɩ́sɩ́wɔ́ mɛ́. 5 Ɛ́ tɛ́ŋ mɛ́, tɛŋfɩ́ɛ́l fa toó a pá nɩɛ ná háá mʋ́ɛ́ arɩ́ nɩɛ ná háá kué. Amá héwíŋ ɓɩzeno fa kéŋ tɔ́nɛ nɩɛ wuu. 6 Wɩɩsɛ fa ɔ́ɔ́ sazɔkɔ́ rɩ́rʋ́ duó wuu zʋ́wɔ́. Ɓa isi aá yó náŋá duó rɩ́ duó, tɔ́ɔ́ rɩ́ tɔ́ɔ́. 7 Amá ɩ́ é, ɩ́ cɛ́ géŋgéŋ, a sɩ́ yʋ́ɔ́rʋ́, bee wɩ́ɛ́, ɩ́ sɩ́ néíwa tʋtʋmɛ́ túme.» 8 Aza há nɛ̃́ wɩ́ɛ́ nyáŋ rɩ́ Wɩɩsɛ liŋó ná Wɩɩsɛ wɩ́laabʋllɔ Odɛɛdɛ há bʋ́lɛ́; Aza naasɛ dúóró, ʋ a ɓa gínni venni ná wuu há mɩŋ Ziida rɩ́ Bɛŋzamɛ dɩtɩ́llɛ wuu mí. Ʋ gínníwó ná má wuu há mɩŋ Ɩfɩrayɩŋ pallɛ sɩɛnnɛ, tɔ́nɛ ná ʋ há yóé la sɩɛrʋ. Ʋ bɩ́rɔ́ ɔsɛ má Nyuutɩna Wɩɩsɛ koro ná há mɩŋ Wɩcʋɔlɩjɩzeno ná sɩ́ɛ́. 9 Ʋ yɩ́rɛ Ziida rɩ́ Bɛŋzamɛ nɩɛ wuu hé naŋá mɛ́ rɩ́ Ɩfɩrayɩŋ duo nɩɛ rɩ́ Manase duo nɩɛ arɩ́ Sɩmɩyɔŋ duo nɩɛ ná há kúé féŋsíwó sɩɛrʋ. Ɩzɩrayɛl nɩkana há kúé zɩŋ rɩ́ Nyuutɩna Wɩɩsɛ, ʋ Wɩɩsɛ fa mɩ́nʋ́ har ɓa kéŋwó tɩɩ ko cɔ́ʋ́ mɛ́. 10 Aza kuorí díí bɩŋsɛ fí rí bɔmmʋ́ɔ́ nyúú mí, caŋsɛ botoro nyúú mí, ɓa wuu kuó hé naŋá mɛ́ Zerizalɛmɛ mɛ́. 11 Ɛ́ kal, ɓa ɓʋʋsɛ nɛsɛ zɔwalpɛ arɩ́ pʋwɩɛla bʋ́ɩ́walpɛ (7 000) a ɔsɛ vʋka pá Nyuutɩna Wɩɩsɛ. Ɛ́ pʋsɛ wuu ɓa yóó lɔ́wɔ́ dɩŋdɔma rɩ́ɩ́ nɛ́. 12 Ɓa bíl nʋtʋmɛ, a bɛllɛ pi rɩ́wɔ́ ja Nyuutɩna Wɩɩsɛ, ɓa naabálwa Wɩɩsɛ, rɩ́wɔ́ sɩɛrʋ wuu arɩ́wɔ́ dʋma wuu. 13 Nɛrɔ ná wuu há sɩ́ vɛɛ Nyuutɩna Wɩɩsɛ, Ɩzɩrayɛl Wɩɩsɛ tɩŋɛ́, rʋʋ ká heŋbíé ɛ́rá má nɔhɔ̃́, rʋʋ ká bál ɛ́rá má hál ɓaá ɓʋ́ tɩ́na nɛ́. 14 Ɛ́ nɛ́ ɓa wuu saŋ a bil ŋmɔ́ɔ́ ɓa rɩ́ Nyuutɩna Wɩɩsɛ pɛ́kɛ, ká cáási satɔrɔ́ a ŋmɔwɛ nɛ́poro a mu mulli arɩ́ nyɩ́sɛ a hé. 15 Ziida nɩɛ wuu á satɔrɔ́ ŋmɔ́ɔ́ ná wɩ́ɛ́. Bee wɩ́ɛ́ ɓa fa bíl ɛ́ ŋmɔ́ɔ́ rɩ́wɔ́ sɩɛrʋ wuu; a já Nyuutɩna Wɩɩsɛ rɩ́ sawér, ɛ́ nʋ́ʋ́ saŋ kánʋ́ tɩɩ nyɩ́ɩ́sɩ́wɔ́ mɛ́, a a tɛŋfɩ́ɛ́l mɩ́ŋwɔ́ rɩ́wɔ́ kílo nɩɛ wuu pɛ́kɛ. 16 Kuóro Aza kírú maá Maaka má tɩɩ fa há ká hákuóro ʋ kuorí díí mí, bee wɩ́ɛ́, ʋ má veŋgúlbɔmɔ oro a pá veno ná ɓa háá yɩ́rɛ Akera. Aza ɔ́ʋ́ ɓa yiki ɛ́ veŋgúlbɔmɔ a yo a yɛ́rkʋ́ a paa tuwi Sedirɔŋ polo nyɩkɛ. 17 Amá ʋ wɩ Ɩzɩrayɛl dɩɓaarɛ́ ná há mɩŋ dúŋdúóme daha é zɔ́kɛ́. Aza hiẽsó wuu mí ʋ tɩ́ŋ Nyuutɩna Wɩɩsɛ mɛ́ arɩ́ taŋa. 18 Ʋ ɔ́ɔ́ ɓa pa wárɛ rɩ́ salmɛ arɩ onni ná ʋ rɩ́rʋ́ áná fa há píé pá Wɩɩsɛ, a kaa ko bil Nyuutɩna Wɩɩsɛ wɩcʋɔlɩjɩzeno ná sɩɛrʋ. 19 Lal báá wɩ ísé a kaá ja Aza kuorí díí bɩŋsɛ mɛrɛ́ rí fí rí bɔmmʋ́ɔ́ nyúú mí.