Aza dí Ziida kuorí
14
1 Aza hɩẽsó wuu mí, ʋ tʋ́ŋ wérí arɩ́ yɛ́rɛ́ Nyuutɩna Wɩɩsɛ, ʋ Wɩɩsɛ sɩ́ɛ́ mɛ́. 2 Ʋ zɔ́kɛ́ korhʋɔra ná rɩ́ dúŋdúóme ná ɓa háá ɓaarɛ venni ráŋ, a yɛ́rkɛ dɔ́wɩ́cɔ́ŋsɛ ná, ká conni dacɔ́ŋsɛ ná ɓa háá ɓaarɛ́, a tá. 3 Ʋ bʋ́lɔ́ pá Ziida nɩɛ, rɩ́wɔ́ ja Nyuutɩna Wɩɩsɛ, ɓa naabálwa Wɩɩsɛ; káá tɩ́ŋʋ́ wɩ́bíle arɩ́rʋ́ kíŋse ná. 4 Aza kuorí dí tɛ́ŋ mɛ́, ʋ zɔ́kɛ́ dúŋdúóme ná ɓa háá ɓaarɛ venni ráŋ arɩ́ korsi ná daha ɓa háá nyɩ́kɛ tulaalewa ráŋ, Ziida tɔ́nɛ ná wuu sɩɛrʋ. ká tɔ́ɔ́ ná mɩŋ tɛŋfɩ́ɛ́l mɛ́. 5 Ʋ sɔ́ zenaasɛ kíl Ziida tɔ́nɛ, bee wɩ́ɛ́ ɛ́ tɛ́ŋ mɛ́ tɔ́ɔ́ ná fa mɩŋ tɛŋfɩ́ɛ́l mɛ́. Nyuutɩna Wɩɩsɛ ɔ́ɔ́ ɛ́ bɩŋsɛ nʋɔ mɛ́ lal wɩ Aza wálmɛ́; kɔ́ʋ́ ké tɛŋfɩ́ɛ́l mɛ́. 6 Aza bʋ́l Ziida nɩɛ rɩ́ a bʋlɛ́: «Ɩ́ ɩ́ɔ̃́ mʋ́l né mí, tɔ́ɔ́ ná ká raá tɩ́llɛ nɛ́, ɛ́ wɩ́ɛ́, ɩ́ lo rá sɔ zenaasɛ kíl tɔ́nɛ́ ná wuu, a hé dánnʋʋsɛ rɩ́ boryakɛ́. Bee wɩ́ɛ́ á já Nyuutɩna Wɩɩsɛ á Wɩɩsɛ, ɛ́ nɛ́ tɛ́ ʋ párá tɛŋfɩ́ɛ́l a kílo wuu mí.» Ɓa ɓɩɛ́na iso a sɔ zenaasɛ ná. 7 Aza lalyoore ná há lɛ́ Ziida, a zɩŋ hɔkɛ́rzeno arɩ́ cɔlmɛ kaa yóé, ká nɩɛ bʋ́ɩ́ zɔtoro (300 000), ká ɓa ná má há lɛ́ Bɛŋzamɛ duo sɩɛrʋ, a zɩŋ hɔkɛ́rwie arɩ́ túó kaa yoe, ká nɩɛ bʋ́ɩ́zɔwɛllɛ mɛɛ́sɩbaná (280 000). Ɓa wuu fa ká lalyóóríbibara nɛ́. 8 Etiopi báálɔ Zera hóú lalyoore bʋ́ɩ́wa bʋ́ɩ́ arɩ́ lalyóórítórkowa má zɔtoro naŋá mɛ́, a mʋ́ rʋ́ʋ́ yówó, a kírwo har a mʋ́ peri Maresa. 9 Ɛ́ nɛ́ Aza rɩ́rʋ́ lalyoore lɩɩ cémú Sefata polo mí, Maresa laka, ɓa káŋwɔ́ tɩɩ rɩ́wɔ́ yo náŋá. 10 Aza ŋmɔ́wɛ búŋse hé Nyuutɩna Wɩɩsɛ, ʋ Wɩɩsɛ mɛ́ a bʋlɛ́: «Nyuutɩna Wɩɩsɛ, ɩ dʋŋɔ léŋ nɛ́ wo pʋɔla ɛ́rá má bɩbar mɛ́ aá pɛ́. Nyuutɩna Wɩɩsɛ, á Wɩɩsɛ pɛ́rá mɛ́, bee wɩ́ɛ́, á yéllí mí ní, ɩ yɩr mɛ́ nɛ́ á sɩ́ yó nɩkana nyáŋ. Nyuutɩna Wɩɩsɛ, ɩ nɛ́ kárá Wɩɩsɛ, sɩ́ ló rɩ́ nɩbííno dí dóé ɩ nyúú.» 11 Ɛ́ nɛ́ Nyuutɩna Wɩɩsɛ á Aza rɩ́ Ziida lalyoore yoo dí dóé Etiopi nɩɛ nyúú, ɓa gúl ká fá. 12 Aza rɩ́rʋ́ lalyoore kírtɩ́ŋwɔ́ mɛ́ a mʋ́ peri Geraarɛ. Ɓa ɓɩkana ɓallɛ sʋsɛ, ɓa nɛ́ŋ balá má wɩ káánɛ, bee wɩ́ɛ́ Nyuutɩna Wɩɩsɛ rɩ́rʋ́ lalyoore púl dí dóé ɓa nyúú. Aza nɩɛ pá onni ɓɩkana nɛ́ a kaa col. 13 Ɓa zɔ́kɛ́ Geraarɛ kílo tɔ́nɛ ná wuu ní. Bee wɩ́ɛ́, Nyuutɩna Wɩɩsɛ fa ɔ́ɔ́ héwíŋ zʋ́wɔ́. Ká ɓa pa tɔ́nɛ ná wuu kuóɓɩɛ, bee wɩ́ɛ́ ɓa kuóɓɩɛ ná ɓa fa há sɩ́ pa káŋ. 14 Ɓa zɔ́kwɔ́ pʋtuni, ká kɛsɛ pʋwɩɛla ɓɩkana arɩ́ nyʋ́kmawa kaa cól. Ɛ́ har mɛ́, ɓa bɩ́rɔ́ mʋ́ Zerizalɛmɛ.