Abiya kuorí díí wɩ́ɛ́
13
1 Zerobohamɛ kuorí bɩŋsɛ fí rí córí nyúú mí ní, Abiya dí Ziida kuorí. 2 Ʋ há dí kuorí Zerizalɛmɛ mɛ́, bɩŋsɛ botoro ní. Ʋ maá yɩr nɛ́ fa ká Mikaya, Uriyɛl há lɛ́ Gibeya toló ní. Lal fa dé mɩŋ Abiya arɩ́ Zerobohamɛ pɛ́kɛ nɛ́ tɛ́ŋ wuu mí. 3 Abiya tʋ́ɔ́sʋ́ lalyóóríbibara bʋ́ɩ́zɔwana (400 000) náŋá mɛ́, ɛ́ nɛ́ Zerobohamɛ má tʋɔsɛ lalyóóríbibara bʋ́ɩ́zɔlɔcórí (800 000) náŋá mɛ́ rɩ́wɔ́ yo náŋá. 4 Abiya sɩɛ́ mʋ́ zɛ́ Semarayimi paalɔ ná há mɩŋ Ɩfɩrayɩŋ pallɛ sɩɛrʋ nyúú, ká cáási bʋl Zerobohamɛ arɩ́ Ɩzɩrayɛl nɩɛ wuu rɩ́ bʋlɛ́: «Ɩ́ zesi! 5 Ɩ́ wɩ ɛ̃ rɩ́ Nyuutɩna Wɩɩsɛ, Ɩzɩrayɛl Wɩɩsɛ lɩ́sɛ Davidi rɩ́rʋ́ duo nɩɛ nɛ́ rɩ́wɔ́ nɛ́ dídí Ɩzɩrayɛl kuorí a kaá mʋ́ wuu>> Ɩ́ wɩ ɛ̃ rɩ́ ɛ́ nʋtʋmɛ sɩɛ́ tó ɓɩgirí>> 6 Amá Nɛbatɛ bio Zerobohamɛ há ká Davidi bio Salomɔŋ tʋtʋnnɔ, ísó cɩ́nʋ́ nyúútɩ́na mɛ́. 7 Nɩkɔŋsa arɩ́ nɩlaama kúó súúrú mí, ɓa yoo dí Salomɔŋ bio Robohamɛ. Ɛ́ tɛ́ŋ mɛ́, rɩ́ Robohamɛ fa ha ká heŋbíé, ʋ wɩ wɩ́ɩ́ wuó a ɓa sɩ́ɛ́ mɛ́. 8 Amá mʋ́l neé mí, ɩ́ sɩ́ɩ́wa dúókó rɩ́, a isi cɛ́ Nyuutɩna Wɩɩsɛ kuorí ná há mɩ́ŋ Davidi bɛlɛ nɛ́sɛ mɛ́. Ɩ́ nɩɛ kánɔ́ a tɩŋ salmɛ nɔɓalwiisi ná Zerobohamɛ há ɛ́ɛ́ ɓa luki pɛɩ́wa ɩ́ ɓɩ́ɓáárɩ́wɔ́ anɛ wɩŋsa. 9 Ɩ́ vɛ́ Aarɔŋ duo nɩɛ arɩ́ Levi duo nɩɛ Nyuutɩna Wɩɩsɛ tɩɩ há lɩ́sɛ́, ʋ vʋk'ɔsɔ́ ná yɩr mɛ́, ká lɩ́sɛ vʋk'ɔɔsa anɛ tɔ́nɛ ná naŋá nɩɛ haá tʋŋ ɛ́. Ká rɩ nɛ́ŋ kéŋ nɔɓala arɩ́ peɓallɛ balpɛ ko rɩ́ɩ́wa ɓʋ́ʋ́sɛ ɔsɛ vʋ́k ka rʋʋ́ a wɩ́ŋsa ná há to taŋá wɩ́ŋsá vʋk'ɔɔsɔ, ɩ́ɩ́ de saŋ nɛ́; ká ɓa to Wɩɩsɛ. 10 Á é rɩ́, Nyuutɩna Wɩɩsɛ nɛ́ kárá Wɩɩsɛ, á sɩɛ́ wʋ́ʋ́ har lɛ. Vʋ́k'ɔɔsa ná há ɔsɛ vʋ́ka aá pá Nyuutɩna Wɩɩsɛ ká Aarɔŋ bɛlɛ nɛ́; ká Levi duo nɩɛ má pɛ́ɩ́wɔ́ mɛ́. 11 Cɩ́cʋɔ rɩ́ gbaanɛ wuu, ɓa ɔ́sɛ́ vʋkfíse aá pá Nyuutɩna Wɩɩsɛ, aá nyɩkɛ áŋsáŋsɛ ná sɔ́ŋ há wéró, ɓa nɩ́ɩ́ pa Wɩɩsɛ jaa dɩpɛ́ŋwa ná aá bil táábɩl ná há wɩ busunnu kené dáha. Ká gbaanɛ wuu, ɓaa nyɩkɛ cáŋsɛ ná há sákɛ́ salmɛ cáŋdaasɛ ná daha. Bee wɩ́ɛ́, á é tʋŋ nyɛ nɛ́ aá pá Nyuutɩna Wɩɩsɛ, á Wɩɩsɛ, ká ɩ́ é vɔ́ʋ́ tá. 12 Ɩ́ ná, Wɩɩsɛ nɛ́ kárá lalyoore Nyuutɩna, ʋ vʋk'ɔɔsa rɩ́wɔ́ nyɩ́sɛ ná ɓa há sɩ́ mu ráá yóéwa mɩ́ŋrá har. Ɩzɩrayɛl nɩɛ, ɩ́ pɔ́ rɩ́ɩ́wa háá yo Nyuutɩna Wɩɩsɛ, ɩ́ naabálwa Wɩɩsɛ, bee wɩ́ɛ́ ɩ́ waá wólli.» 13 Zerobohamɛ fa ɔ́ɔ́ sóójipúl nɔ́ŋɔ mʋ́ féŋsi Ziida nɩɛ har. Ɛ́ wɩ́ɛ́, Ɩzɩrayɛl nɩɛ kil Ziida lalyoore hé sɩ́sɩ́ɛ́nnʋ́wa, púl nɔ́ŋɔ sɩ́ɛ́, ká púl nɔ́ŋɔ má mɩ́ŋwɔ́ har. 14 Ziida lalyóóre bɩ́rɔ́ bel rɩ́ Ɩzɩrayɛl lalyoore naŋá mɩ́ŋwɔ́ sɩ́ɛ́ naŋá má mɩ́ŋwɔ́ har rɩ́, ɛ́ nɛ́ ɓa ŋmɔwɛ búŋse hé Nyuutɩna Wɩɩsɛ mɛ́, ká vʋk'ɔɔsa múmu nyɩ́sɛ, 15 Ziida lalyoore búŋsi lal búŋse. Ɛ́ tɛ́ŋ mɛ́ nɛ́, Wɩɩsɛ yoo dí Zerobohamɛ arɩ́ Ɩzɩrayɛl lalyoore wuu Abiya arɩ́ Ziida nɩɛ sɩ́ɛ́. 16 Wɩɩsɛ ɔ́ɔ́ Ziida lalyóóre yoo dí Ɩzɩrayɛl lalyoore, ɓa gúl ká fá. 17 Abiya rɩ́rʋ́ lalyoore, dí dóé Ɩzɩrayɛl lalyoore nyúú kɩ́ŋkáŋ, ɓa lalyóóríbibara bʋ́ɩ́zɔmmʋɔ (500 000) nɛ́ ɓállɛ́ sʋsɛ. 18 Ɛ́ tɛ́ŋ mɛ́, Ɩzɩrayɛl lalyoore dí hɩɩ̃sɛ ká Ziida nɩɛ dí ballɩ́ Ɩzɩrayɛl lalyóóre nyúú, bee wɩ́ɛ́ ɓa fa yéllí Nyuutɩna Wɩɩsɛ, ɓa naabálwa Wɩɩsɛ mɛ́ nɛ́. 19 Abiya kíró tɩŋ Zerobowamɛ mɛ́, a lɔ́ʋ́ tɔ́nɛ: Bɩtɛl rɩ́rʋ́ kílo tɔ́wɩɛla, Yesana rɩ́rʋ́ kílo tɔ́wɩɛla arɩ́ Efrɔŋ rɩ́rʋ́ kílo tɔ́wɩɛla. 20 Abiya kuorí tɛ́ŋ wuu mí, Zerobohamɛ baa wɩ tíŋ oro wuu kené. Ká Nyuutɩna Wɩɩsɛ ŋmɔ́wʋ́ ɓʋ́. 21 Abiya kuorí ɔ́sɔ́ ka dóé wérí. Ʋ ja háála fí rí baná, a lʋl heŋbólli mɛrɛ́ rɩ́ bɛllɛ arɩ́ tolé má fí rí balgo. 22 Wɩɩsɛ wɩ́laabʋllɔ Ido wɩ́'állɛ kɛnɔ sɩɛrʋ nɛ́ ɓa pʋ́ŋsɛ Abiya wɩ́'állɛ arɩ́rʋ́ tʋtʋmɛ́ wuu hé. 23 Abiya há kúé sʋwɛ a mʋ́ʋ́ ánáwa rɩ́, ɓa húú Davidi zʋ́ɔ́ mɛ́ nɛ́. Kɔ́ʋ́ bio Aza lɔ́ʋ́ nyúú mí a dí kuorí.Aza kuorí díí wɩ́ɛ́
1k 15. 9-24
Aza kuorí díí tɛ́ŋ mɛ́, tɔ́ɔ́ ná mɩŋ tɛŋfɩ́ɛ́l mɛ́ a peri bɩŋsɛ fí.