Saaba hákuóro kúó ná Salomɔŋ
9
1 Saaba hákúóro nɛ̃́ Salomɔŋ yɩr há lɛ́ ɛ́. Ɛ́nʋ́ ko Zerizalɛmɛ rʋ́ʋ́ mɩ́lʋ́ a bɔ́sʋ́ rɩ́ wɩ́bʋl siké. Ʋ háá kué, ʋ kɛ́sʋ́ tʋtʋnna ɓɩkana, ɓa zɛ́ nyʋ́kmawa a cɩ́ɩ́nɛ tulaaléwa sɔ́ŋ há wéró, salmɛ ɓɩkana arɩ́ dɔ́wɩ́tʋlɛ́ a kaa ko Salomɔŋ dɩhɩ̃́. Ʋ há kúé ʋ bʋ́l wɩ́ɛ́ ná wuu há mɩ́nʋ́ sɩɛrʋ a pá Salomɔŋ. 2 Ɛ́ nɛ́ Salomɔŋ lɩ́sʋ́ wɩ́bɔsɛ ná wuu sɩ́ɛ́ a pɔ́ʋ́. Wɩ́ɩ́ oro wuu fa wɩ féŋse, Salomɔŋ há wɩ wóllé lɩ́sʋ́ mʋ́l pɔ́ʋ́. 3 Saaba hákuóro há ná zɩmɛ́ ná Salomɔŋ há kené, kuójaa ná ʋ há sɔ́ɛ́, 4 ɓɩdííle ná ʋ háá díé, ʋ wuolo tʋtʋnna jaa, ʋ tʋtʋnna háá tʋŋ ɛ́ rɩ́wɔ́ gɛnnɛ ná ɓa há sué, nɩɛ ná háá kénʋ́ oŋnyɔɔlɛ́ ko aá pɔ́ʋ́ arɩ́wɔ́ gɛnnɛ, arɩ́ vʋk'fise ná Salomɔŋ háá ɔsɛ Nyuutɩna Wɩɩsɛ wɩcʋɔlɩjɩzeno ná sɩɛrʋ, ʋ nʋɔ máánɔ́. 5 Ɛ́ nɛ́ ʋ bʋl kuóro rɩ́ bʋlɛ́: «Ŋ há mɩ́nɩ́ŋ tɔ́ɔ́ mɛ́, ká nɛ̃ wɩ́ɛ́ ná wuu há tɩ́ɩ́nɩ́ wɩ́bʋlɛ́ ná mɛ́ arɩ́ zɩmɛ́ ná ɩ há kené, ká taŋá nɛ́. 6 Ŋ wɩ wɩ́ɛ́ ná ɓa fa há bʋ́lɛ́ páŋ lɛ́ɛ́ dí; rʋʋ nɛ́ to mʋ́l né mí ŋ tɩɩ há kéŋ sɩ́ɩ́ ko ná nyɛ. Ɓa fa wɩ́ɩ́ zɩmɛ́ ɓɩzeno ná ɓarma wɩ́ɛ́ bʋ́lɛ́ páŋ. Ɩ yɩr kɛ́ ɛ́ ná ŋ fa há nɩ́ɛ̃́. 7 Nyúwer ní a pɛɩ́ nɩɛ, nyúwer ní a pá nɩɛ ná háá tʋ́mɩ́ laka tɛ́ŋ wuu mí kaá zesí zɩmɛ́ wɩ́bʋlɛ́! 8 Ŋŋ́ dɛnnɛ Nyuutɩna Wɩɩsɛ, ɩ Wɩɩsɛ, ʋ sɩɛrʋ há tɔ́rɩ́ nyúú, ʋ lɩ́sɩ́ bílú kuóɓasa daha rɩ́ɩ́ dí kuorí Nyuutɩna Wɩɩsɛ, ɩ Wɩɩsɛ yɩr mɛ́. Bee wɩ́ɛ́ ɩ Wɩɩsɛ có Ɩzɩrayɛl, a có rʋ́ʋ́ mɩŋ a kaá mʋ́ wuu, ɛ́ nɛ́ ʋ lɩ́sɩ́ rɩ́ɩ́ ɔ́ɔ́ kuóro, a bélwó mí rɩ́ taŋá arɩ́ yɛ́rɛ́.» 9 Ɛ́ nɛ́ Saaba hákuóro ná pi salmɛ píŋ há pérí salmɛ tɔ́nnɛwa botoro rɩ́ɩ́ fá a pá Salomɔŋ rɩ́ tulaalé ɓɩkana sɔ́ŋ há wéró, arɩ́ dɔ́wɩ́tʋlɛ́ yɛlɩ́ há dúókó. Nɛ́ŋ wuu ha wɩ ɛ́ tulaalé duo kené ko pá Salomɔŋ a mɔ ɓa ná Saaba hákuóro há píé pɔ́ʋ́. 10 Huramɛ tʋtʋnna arɩ́ Salomɔŋ tʋtʋnna ná fa kéŋ Ɔfiiri salmɛ aá mʋ́ rɩ́wɔ́ pá Salomɔŋ ɓa nɛ́ pɛ́ɛ́ ka sáŋtal daasɛ arɩ́ dɔ́wɩ́tʋlɛ́ yɛlɩ́ há dúóko a kaa mʋ́. 11 Kuóro kéŋ sáŋtal daasɛ nɛ́ a a Wɩ́cʋɔlɩjɩzeno arɩ́rʋ́ kuójaa ná neŋcolsɩ́ɛ́, ká baa káŋwɔ́ a gbaŋceŋsi arɩ́ ceŋsi a pá nɩɛ ná háá yɛ yɩɩla. Ziida tɔ́ɔ́ wuu mí, nɛ́ŋ há wɩ cɩksɛ nyáŋ duo néé ná. 12 kuóro Salomɔŋ pá Saaba hákuóro ɓɩɛ ná wuu ʋ fa háá hɩ́ɛ́nɩ́wɔ́ sʋlɛ́, a kɩ́llɩ́wɔ́ ná ʋ fa há kené ko pá kuóro. ká ʋ rɩ́rʋ́ tʋtʋnna bɩr mʋ́ʋ́ tɔ́ɔ́.Salomɔŋ kuóɓɩɛ wɩ́ɛ́
13 Bɩná wuu, salmɛ zíŋ há pérí tɔ́nnɛwa mɛrɛ́ ɓa kaa ko aá pá Salomɔŋ; 14 ká nɩgʋɔrɛ rɩ́ báyɛlɛ́ háá túŋwó ná sɩ́ɛ́ to ráŋ. Arabi kuóre wuu arɩ́ tɔ́ɔ́ ná gúvɛ́nɛ́ɛ́rɛwa fa kéŋ salmɛ rɩ́ wárɛ kaa ko aá pá Salomɔŋ. 15 Kuóro Salomɔŋ ɔ́ɔ́ ɓa ka salmɛ cʋɔrɛ, hɔkɛ́rzeŋsi zɔwɛllɛ (200). Oro wuu ká salmɛ kííló balgo ní ɓa kaa ɔ́wɔ́, 16 ká ka salmɛ cʋɔrɛ hɔkɛ́rwɩɛla má zɔtoro (300), ɓa oro wuu ká salmɛ kííló botoro ní ɓa kaa ɔ́wɔ́. Kuóro pɔ́wɔ́ bil jaa ná ɓa há kené aá yɩ́rɛ "Liibaŋ Kʋkɔrɔ" mɛ́. 17 Kuóro baa a ɓa ka betúnyɩl a bɩrmɛ kuóɓasɩzeno, ʋ pi salmɛ cʋɔrɩ́ tɔ́ʋ́ wuu mí. 18 Ɛ́ kuóɓasɩzeno fa kéŋ salmɛ neŋcolsɩ́ɛ́ balgo arɩ́ salmɛ naasɛ dɩsakɩ́. Ɓasa ná sáŋsɛ bɛllɛ wuu mí, nɛ́ŋsa dɩsakɛ́ mɩŋ ráŋ, ká kɩ́ŋkánáwa bɛllɛ cɛ́ nɛ́ŋsa dɩsakɛ́ ná bɛllɛ mɛ́. 19 Neŋcolsɩ́ɛ́ ná balgo mí, kɩ́ŋkánáwa fí arɩ́ bɛllɛ cɛ́ sáŋsɛ ná bɛllɛ mɛ́. Ɓa ha wɩ kuóɓasa né duo ɛ́ɛ́ dɩtɩ́llɛ oro wuu mí. 20 Kuóro Salomɔŋ nyíŋgbaŋsɛ wuu fa ká salmɛ nɛ́. Ʋ gbaŋsɛ ná wuu há mɩŋ jaa ná ɓa háá yɩ́rɛ Liibaŋ kʋkɔrɔ mɛ́, salmɛ cʋɔrɩ́ dʋŋɔ nɛ́ ɓa kaa ɔ́wɔ́. Wárɛ óŋ wuu fa to ráŋ, bee wɩ́ɛ́ Salomɔŋ tɛ́ŋ mɛ́ rɩ wárɛ fa wɩ píŋ kené. 21 Kuóro fa kéŋ nyiidaborsi ʋ rɩ́ Huramɛ tʋtʋnna kaá mʋ́ Tarsisi. Bɩŋsɛ botoro é wuu nʋɔ mɛ́ ɓaá bɩr ko ní a pɛ́ cɩ́ɩ́nɛ salmɛ, wárɛ, betúnyɩla, ɔma arɩ́ kolókolwere (nyidiwízeŋse) bamma. 22 Kuóro Salomɔŋ zɩmɛ́, rɩ́rʋ́ kuóɓɩɛ fa kɛ tíé nyúú kuóre wuu ní. 23 Dúníé kuóre wuu fa có rɩ́wɔ́ ko zesi nɛ̃ Salomɔŋ zɩmɛ́ wɩ́bʋlɛ́ ná Wɩɩsɛ há pɔ́ʋ́. 24 Bɩná wuu, oro wuu sɩ́ ka zilé ko ná Salomɔŋ: Wárɛ ɓɩɛ, salmɛ ɓɩɛ, gɛnnɛ, lalyóórícɩ́ksɛ arɩ́ tulaaléwa, záksɛ arɩ́ kokúmé ká zákawa. 25 Salomɔŋ fa kéŋ záksɛ rɩ́ laltórkowa dɩcɩ́nɛ bʋ́ɩ́wʋná, arɩ́ zákzɩ́nna bʋ́ɩ́ fí arɩ́ bɛllɛ, ʋ pii tá tɔ́nɛ ná mɛ́ ʋ háá bílú laltórkowa, ká tá náŋa má Zerizalɛmɛ mɛ́, kuóro laka. 26 A pɔ́ Ɩfɩratɛ fuo mí, a mʋ́ pérí Filistɛŋwa tɔ́ɔ́, ká kaa mʋ́ yakɛ Ezipiti súsúbʋɔ mɛ́, Salomɔŋ nɛ́ faá dí doé ɛ́ kuóre wuu nyúú. 27 Kuoró fa ɔ́ɔ́ Zerizalɛmɛ mɛ́, wárɛ pʋrkɛ wérí anɛ dɔ́wʋ́ɔ́, ká sɛ́ɛ́dɩr má pʋrkɛ wérí anɛ pirsolo há pʋ́rkɛ́ ɛ́ tɔ́ɔ́ mʋ́l rɩ́. 28 Salomɔŋ záksɛ fa lɛ́ Ezipiti ní arɩ́ tɔ́nɛ wuu ní aá ko.
Kuóro Salomɔŋ sʋ́ʋ́ wɩ́ɛ́
29 Salomɔŋ wɩ́'állɛ ná náŋa, a pɔ́ʋ́ dʋ́ŋdʋ́ʋ̃́ wɩ́ɛ́ mɛ́ ká mʋ́ peri hátɩ́ŋnnɛ́ wɩ́ɛ́ mɛ́, ɓa pʋ́ŋsɩ́wɔ́ hé wɩ́laabʋllɔ Nataŋ wɩ́'állɛ kɛnɔ mɛ́ nɛ́. Ɛ́ kɛnɔ sɩɛrʋ nɛ́, Silo báálɔ Ahiya wɩ́muulináálɛ ná arɩ́ Yebo wɩ́náálɛ ná a tɩɩnɛ Nebatɛ bio Zeroboyamɛ mɛ́. 30 Salomɔŋ dí Ɩzɩrayɛl nɩɛ kuorí bɩŋsɛ mɛ́ɛ́sɛllɛ Zerizalɛmɛ mɛ́. 31 Ká Salomɔŋ sʋwɛ, a mʋ́ʋ́ ánáwa rɩ́, ɓa púú húú áná Davidi zʋɔ mɛ́. Ʋ bio Robohaŋ nɛ́ lɔ́ʋ́ nyúú mí dí kuorí.