Salomɔŋ tʋtʋmɛ́ náŋa wɩ́ɛ́
8
1 Bɩŋsɛ mɛrɛ́ nɛ́ Salomɔŋ kaa sɔ́ʋ́ Nyuutɩna Wɩɩsɛ Wɩcʋɔlɩjɩzeno rɩ́rʋ́ tɩɩ kuójaa ná a tenni; 2 Ʋ ɔ́sɔ́ sɔ tɔ́nɛ ná Huramɛ fa há píé pɔ́ʋ́, Ɩzɩrayɛl nɩɛ mɩ́ŋwɔ́ sɩɛnnɛ. 3 Ɛ́ har mɛ́, Salomɔŋ mʋ́ɔ́ yoo dí Hamatɛ há mɩŋ Soba dɩtɩ́llɛ, a tɩ́llʋ́. 4 Ʋ sɔ́ Tadmɔrɛ gɩrbétéke mɛ́, ká sɔ tɔ́nɛ ná wuu Hamatɛ dɩ́tɩllɛ mɛ́ rɩ́wɔ́ ɔ́ʋ́ cɩksɛ dɩbilí. 5 Ʋ sɔ́ Bɛtɛ'Horɔŋ cɔɔ ná há mɩŋ nyúú rí, rɩ́ Bɛtɛ'Horɔŋ cɔɔ ná há mɩŋ mʋ́l rɩ́; arɩ́ tɔ́sɔkɛ́rɛ ná wuu ɓa há héwó dánnʋʋsɛ boryakɛ́; 6 a súúri Balatɛ arɩ́ tɔ́nɛ ná wuu há ká Salomɔŋ cɩksɛ dɩbilé arɩ́ lalyóórítórkowa dɩbilé arɩ́ zákzɩ́nna tɔ́nɛ. Ʋ sɔ́ jɩɩsɛ ná wuu ʋ há có Zerizalɛmɛ mɛ́ rɩ́ Libaŋ mɛ́ arɩ́ tɔ́ɔ́ ná wuu sɩɛrʋ ʋ háá belé mí. 7 Nɩɛ ná há káánɛ tɔ́ɔ́ ná sɩɛrʋ nɛ́ ká Hɛtɛ dunɩɛ, Amɔŋ dunɩɛ, Perizi dunɩɛ, Hivi dunɩɛ arɩ́ Zebu dunɩɛ. Ɓa fa to Ɩzɩrayɛl dunɩ́ɛ́. 8 Ɛ́ nɩɛ bɛlɛ ná há káánɛ tɔ́ɔ́ ná sɩɛrʋ, Ɩzɩrayɛl nɩɛ wɩ́wɔ́ ɓʋ́ʋ́sɛ; Salomɔŋ fɩ́kwɔ́ mɛ́ ɓaá tʋŋ tʋŋtʋ́ŋ duoru a ko aá lɛ zaa. 9 Amá Salomɔŋ fa wɩ lóé rɩ́ Ɩzɩrayɛl nɛ́ŋ wuu a yómo aá tʋ́mʋ́ tʋtʋmɛ́. Ɓee wɩ́ɛ́, ɓa nɛ́ fa kɔ́ʋ́ lalyoore rɩ́rʋ́ tʋtʋnnɩhɩɛ̄́sɛ rɩ́rʋ́ laltorkowa nɩhɩ́ɛ̃́sɛ arɩ́ zákzɩ́nna nɩhɩ́ɛ̃́sɛ. 10 Kuóro Salomɔŋ lɩ́sɛ tʋtʋnnɩhɩɛ̄́sɛ zɔwɛllɛ mɛɛ́sɛllɛ arɩ́ fí (250); ɓa bíbel nɩɛ mɛ́. 11 Salomɔŋ ɔ́ɔ́ ɓa lɩ́sɛ Faarɔŋ toló Davidi zʋ́ɔ́ mɛ́, a kaa mʋ́ hé jaa ná mɛ́ ʋ há sɔ́ɛ́ pɔ́ʋ́. Bee wɩ́ɛ́ ʋ fa sɛ́: «Ʋ wɩ cɛ́rɛ́ rɩ́ háálɔ tɩ́ŋɩ́ŋ wɩ́ɛ́ a zʋ Ɩzɩrayɛl kuóro Davidi jaa. Bee wɩ́ɛ́, dɩhɛ̃́ ná Nyuutɩna Wɩɩsɛ nʋtʋmɛ dáka ná há zʋ́ɛ́ ká Wɩɩsɛ tɩ́llɛ nɛ́.» 12 Nyuutɩna Wɩɩsɛ koro ná Salomɔŋ há sɔ́ɛ́ záwára ná sɩ́ɛ́; ʋ ɔ́sɛ́ vʋkfíse ráŋ a pá Nyuutɩna Wɩɩsɛ. 13 Salomɔŋ faá ɔsɩ́wɔ́ anɛ ɛ́ há mákɛ́ kal wuu ní, arɩ́ ɛ́ ná Moyizi kíŋse há mákɛ́ a tɩɩnɛ fɩɛlɛ́ tapʋ́lɛ vʋka mɛ́, caŋsɛ dʋ́ŋdʋ́ʋ̃́ tapʋ́lɛ vʋ́ka mɛ́, arɩ́ bɩna sɩɛrʋ caŋsɛ díí naasɩ́ botoro vʋka mɛ́: Sibʋrɛ tóó dɩpɛ́ŋ cana, ɓɩɛ kʋsɛ cana, arɩ́ lɔkɔ cana. 14 Anɛ ɛ́ ʋ áná Davidi há mákʋ́, ʋ lɩ́sɛ vʋk'ɔɔsa woó woówa a héwó ɓa tʋtʋmɛ́ mɛ́, arɩ́ Levi dunɩɛ a héwó ɓa tʋtʋmɛ́ mɛ́, rɩ́wɔ́ cɛ́ vʋk'ɔɔsa sɩ́ɛ́ aá dɛnnɛ Nyuutɩna Wɩɩsɛ anɛ ɛ́ há mákɛ́ kal wuu. Ʋ kéŋ dánnʋpɔ́ɔ́ra ɓa púl púlwa a héwó dánnʋ́ɔ́ wuu mí. Bee wɩ́ɛ́, Wɩɩsɛ báálɔ Davidi fa mákɛ́ ɛ́ nɛ́. 15 Kuóro há bʋ́l wɩ́ɛ́ ná wuu a tɩɩnɛ́ vʋ́k'ɔ́ɔ́sa rɩ́ levitiwa, arɩ́ Wɩɩsɛ jaa ɓɩɛ ná wuu mí, ɓa wuu ní ɓa a. 16 Salomɔŋ wólló tʋŋ Wɩcʋɔlɩjaa ná tʋtʋmɛ́ wuu ní; a pɔ́ʋ́ púle mí a kaa mʋ́ tenní. Nyɛ nɛ́ Wɩcʋɔlɩjaa ná sɔ tenní. 17 Salomɔŋ mʋ́ Ɛsɩyɔŋgɛbɛrɛ arɩ́ Ɛlatɛ há mɩŋ mʋʋ nʋɔ, Edoŋ tíé mí. 18 Huramɛ hóú nɩɛ ná há ɛ̃ mʋʋ rɩ́ daborsi kaa valɛ́. Ʋ rɩ́ Salomɔŋ nɩɛ kuosi mʋ́ Ofiiri a ká salmɛ píŋ há kɛ tɔ́nnɛwa fí rí botoro a kaa mʋ́ pá kuóro Salomɔŋ.