5
1 Nyɛ́ nɛ́ kuóro Salomɔŋ tʋŋ tʋtʋmɛ́ ná wuu Nyuutɩna Wɩɩsɛ jɩzeno ná mɛ́ a tenni. Salomɔŋ pá onni ná wuu ʋ áná Davidi fa há píé pá Nyuutɩna Wɩɩsɛ, ɓa ɔ́ɔ́ tɩ́llɛ, a kaa zʋʋ bil Nyuutɩna Wɩɩsɛ jizeno ná sɩɛrʋ: Wárɛ, salmɛ, arɩ́ cɩ́ksɛ ná wuu. Ʋ pɔ́wɔ́ kaa zʋʋ bil Wɩɩsɛ jaa cɩksɛ dɩhɩ̃́.Ɓa kéŋ nʋtʋmɛ daka ná zʋʋ bil Wɩcʋɔlɩjɩzeno mí
2 Kuóro Salomɔŋ yɩ́rɛ Ɩzɩrayɛl nɩhɩ́ɛ̃́sɛ, rɩ́ jɩmʋ́ʋ́la nɩhɩ́ɛ̃́sɛ wuu, arɩ́ Ɩzɩrayɛl jɩtɩ́náwa ná ɓa wuu ko hé náŋá mɛ́ Zerizalɛmɛ mɛ́, rɩ́wɔ́ pi Nyuutɩna Wɩɩsɛ nʋtʋmɛ dáka ná Sɩyɔŋ mɛ́, Davidi tɔ́ɔ́ mɛ́ a kaa mʋ́ bil Wɩcʋɔlɩjɩzeno ná sɩɛrʋ. 3 Ɛ́ nɛ́ Ɩzɩrayɛl báála wuu ko hé naŋá mɛ́, kuóro laka rɩ́wɔ́ dí cana. Caŋsɛ balpɛ nyúú mí ní fa. 4 Ɩzɩrayɛl nɩhɩɛ̃́sɛ wuu há kúé, Levi duo nɩɛ ísó cɩ́ɩ́nɛ Nyuutɩna Wɩɩsɛ nʋtʋmɛ dáka ná. 5 Wɩɩsɛ vʋk'ɔɔsa rɩ́ Levi duo nɩɛ nɛ́ cɩ́ɩ́nɛ nʋtʋmɛ dáka ná, rɩ́ céme táŋtɛ, arɩ́rʋ́ sɩɛrʋ cɩksɛ ná wuu há ká Wɩɩsɛ tɩ́llɛ. 6 Kuóro Salomɔŋ rɩ́ Ɩzɩrayɛl nɩɛ ná wuu há kúé hé naŋá mɛ́ ʋ laká, daka ná sɩ́ɛ́; ɓa ɓʋ́ʋ́sɛ pʋwɩɛla rɩ́ pʋzeŋsi ɓɩkana, nɛ́ŋ há wʋ́ɔ́ wuo dɩɩsɛ haá zɩ́ŋwɔ́ nʋɔ. 7 Ɛ́ har mɛ́, Wɩɩsɛ vʋk'ɔɔsa pí Nyuutɩna Wɩɩsɛ nʋtʋmɛ dáka ná ko zʋʋ bílú dɩbilí Wɩɩsɛ jaa sɩɛrʋ, Wɩɩsɛ dʋ́ŋɔ́ dɩ́mɩnɩ́ ná mɛ́, malɩ́kawa ná kɩŋkeru mʋ́l. 8 Malɩ́kawa ná kɩŋkeru fa jɛ́rɔ́ tɔ́ Nyuutɩna Wɩɩsɛ nʋtʋmɛ dáka ná mɛ́, rɩ́rʋ́ dagbóru ná mɛ́ ɓa há kené pípú. 9 Nʋtʋmɛ daasɛ ná fa gbésó wérí; rɩɩ nɛ́ zʋ́ Wɩɩsɛ dɩmɩnɩ́ dáka ná laka ɩɩ́ nówó. Amá rɩ nɛ́ mɩŋ pʋmmɔ, ɩ wʋ́ɔ́ ná. Dáka ná ha mɩŋ ráŋ a rɩ́ zaa wuu. 10 Nʋtʋmɛ dáka ná sɩɛrʋ, óŋ ná fa há mɩŋ róŋ nɛ́ ká dɔ́wɩ́pɛ́rsɛ ná bɛllɛ Moyizi há píé hóú sɩɛrʋ Hɔrɛbɛ paalɔ ná mɛ́, tɛ́ŋ ná mɛ́ Nyuutɩna Wɩɩsɛ há tá nʋɔ pá Ɩzɩrayɛl nɩɛ, ɓa Ezipiti tíé lɩɩ tɛ́ŋ mɛ́. 11 Tɛ́ŋ ná mɛ́ Wɩɩsɛ vʋk'ɔɔsa há lɛ́ dɩhɩ̃́ ná há ká Wɩɩsɛ dɩmɩnɩ́; vʋk'ɔɔsa ná wuu fa há mɩŋ róŋ mʋ́ʋ́rɩ́wɔ́ busunnu, ɓa rɩ́wɔ́ ná wuu há to Wɩɩsɛ vʋk'ɔɔsa; 12 rɩ́ Levi duo nɩɛ ná wuu fa há ká gɔkɛ́, Azafɛ, Hemaŋ, Yedutuni, rɩ́wɔ́ bɛlɛ, arɩ́wɔ́ maábináŋa a su gepúwɩɛ́lwie pɛ́ŋsɛ gɛnnɛ a pa kuléŋléŋwa, cemo, arɩ́ cɩ́wa a cɛ́ Wɩɩsɛ koro ná wɩɩsɛ dɩpomí caasɛ́ aá dɛnnɛ Wɩɩsɛ. Vʋk'ɔɔsa zɔlɔ rɩ́ mɛrɛ́ nɛ́ fa cɩ́ŋwɔ́ laka aá mu nyɩ́sɛ. 13 Tɛ́ŋ ná mɛ́, nɩɛ ná há mú nyɩ́sɛ arɩ́ yɩyɩɩra há hé náŋá mɛ́, liŋó balá mɛ́ rɩ́wɔ́ píŋsi Nyuutɩna Wɩɩsɛ, a dɛ́nnʋ́, ɓa mú nyɩ́sɛ, a dú kuléŋléŋwa, arɩ́ yɩɩla cɩksɛ a píŋsi Nyuutɩna Wɩɩsɛ a bʋlɛ́: «Ʋ wéró, bee wɩ́ɛ́ ʋ nɩcɩ́tɩkɔ́ wɩ tokó kené; ɛ́ tɛ́ŋ mɛ́ nɛ́ duóbána de ko tuwi tɔ́ jaa ná, Nyuutɩna Wɩɩsɛ jaa ná mɛ́. 14 Wɩɩsɛ vʋk'ɔɔsa báá wɩ́ wóllé zʋʋ tʋ́ŋwɔ́ tʋtʋmɛ́, bee wɩ́ɛ́, Nyuutɩna Wɩɩsɛ píŋ fa mɩŋ duóbána ná sɩɛrʋ a sú Wɩɩsɛ jaa ná wuu.