Wɩcʋɔlɩjɩzeno sɔɛ wɩ́ɛ́
3
1 Zerizalɛmɛ mɛ́, Morizaa paalɔ daha nɛ́ Salomɔŋ púl aá sɔ Nyuutɩna Wɩɩsɛ jaa ná. Ráŋ nɛ́ Nyuutɩna Wɩɩsɛ fa kánʋ́ tɩɩ nyɩ́ɩ́sʋ́ áná Davidi mí; dɩhɩ̃́ ná ʋ fa há bɩ́rmɛ́ Zebuzi tɩ́náwa Ɔrnaŋ tʋ́ɔ́ mɛ́. 2 Ʋ kuóri díí bɩŋsɛ baná, caŋsɛ bɛllɛ nyúú mí tápʋlɛ́ bɛllɛ kal nɛ́ ʋ púl Wɩcʋɔlɩjaa ná tʋtʋmɛ́. 3 Ná Wɩɩsɛ jaa ná Salomɔŋ há sɔ́ɛ́ mʋ́biló há ká ɛ́: Ʋ gbési fa ká nɛ́gotóko sɩ́ɩ́ mɛ́sɩbotoro, kɔ́ʋ́ jɛ́l má a nɛ́gotóko sɩ́ɩ́ mɛrɛ́; anɛ fól wuu nɛ́gotóko sɩ́ɩ́. 4 Zawara ná gbési ká nɛ́gotóko sɩ́ɩ́ mɛrɛ́, ʋ rɩ́ jaa ná wuu jɛ́l mɔ náŋá; kɔ́ʋ́ isé a nɛ́gotóko sɩ́ɩ́ zɔlɔ rɩ́ mɛrɛ́. Ʋ mʋ́ɔ́lʋ́ sɩɛrʋ wuu rɩ́ salmɛ cʋɔrɩ́. 5 Ʋ pí sɩ́ɩ́pɩr dacɔrʋ nɛ́ a tɔ́ jɩzeno ná zeŋe mí, ká ɓɩ́ɛ́rʋ́ rɩ́ salmɛ cʋɔrɩ́. A ŋméŋsi haabɛ paarʋ, arɩ́ bɛŋzɛlwɩɛla a héwó mí. 6 Ʋ ɓɩ́ɛ́rɛ jaa ná wuu rɩ́ dɔ́wɩ́tʋlɛ́; salmɛ ná fa lɛ́ Parvayim ní. 7 Ʋ pi salmɛ nɛ́ mʋɔlɛ jaa ná: Ʋ dole, ʋ dánnʋzʋʋlɛ́, ʋ dánnʋgillé rɩ́rʋ́ bonni. Ká sɩɛ́ ŋméŋsi malɩ́kawa a hé dánnʋgillé ná mɛ́. 8 Ʋ sɔ jaa há ká Wɩɩsɛ dʋŋɔ dɩmɩnɩ́. Ʋ gbési ká nɛ́gotóko sɩ́ɩ́ mɛrɛ́, kɔ́ʋ́ jɛ́l a nɛ́gotóko sɩ́ɩ́ mɛrɛ́ ʋ rɩ́ jaa ná jɛ́l mɔ náŋá. Ʋ pí Salmɛ cʋɔrɩ́ zíŋ há pérí tɔ́nnɛwa mɛrɛ́ a mʋ́ɔ́lʋ́ sɩɛrʋ. 9 Salmɛ téŋkúlli ná zíŋ fa ká gɩ́rámɛwa zɔmmʋ́ɔ́ (500) nɛ́. Ʋ pí salmɛ mʋɔlɛ túko jɩwiisi ná. 10 Ʋ ɔ́ɔ́ ɓa ká kɔmɔ́ cʋɔrɛ malɩ́kawa bɛllɛ, a cʋɔrɛ salmɛ tɔ́wɔ́ mɛ́ a pii bil Wɩɩsɛ dʋŋɔ dɩmɩnɩ́ ná. 11 Malɩ́kawa bɛllɛ ná kɩŋkeru gbési ká nɛ́gotóko sɩ́ɩ́ mɛrɛ́. Dʋ́ŋdʋ́ʋ̃́ ɓɩnɔ kɩŋko balá gbési ká nɛ́gotóko sɩ́ɩ́ bɔmmʋ́ɔ́, ká tɩ́ɛ́nɛ tɩkɛ jaa ná sɩɛrʋ zeŋ mí. Bʋllɛ kɩŋko má ká nɛ́gotóko sɩ́ɩ́ bɔmmʋ́ɔ́ a mʋ́ tɩkɛ dʋ́ŋdʋ́ʋ̃́ ɓɩnɔ ná kɩŋko ná mɛ́. 12 Malɩ́ka ná nɔ́ŋɔ kɩŋko gbési ká nɛ́gotóko sɩ́ɩ́ bɔmmʋ́ɔ́, a mʋ́ tɩkɛ jaa ná sɩɛrʋ zeŋ mí. Ká kɩŋko ná nɔ́ŋɔ má gbési a nɛ́gotóko sɩ́ɩ́ bɔmmʋ́ɔ́ a mʋ́ tɩkɛ dʋ́ŋdʋ́ʋ̃́ malɩ́ka ná kɩŋko mí. 13 Ɛ́ Malɩ́kawa kɩŋkeru ná há jɛ́rɛ́ gbési ká nɛ́gotóko sɩ́ɩ́ mɛrɛ́, ɓa oro wuu isi cɛ́ dahá ɓa sɩ́ɛ́ bɩr caasɛ Wɩɩsɛ jaa ná. 14 Ʋ pí gepúwɩɛlɩ́wie ɓɩmʋɔlɩ́, ɓɩfɩɛŋsɛ, cʋŋvala arɩ́ ɓɩkɔklɛ a sɔ pɛ́nɛ a nyɛrɛ patɩ́ɩ́sazeno, a ŋméŋsi malɩ́kawa a hé ráŋ.Kɔmɔ nafarsɛ arɩ́ koro wɩ́ɛ́
15 Ʋ luki nafarsɛ bɛllɛ a bil Wɩɩsɛ jaa ná sɩ́ɛ́. Ɓa isé a nɛ́gotóko sɩ́ɩ́ mɛrɛ́ rí fí rí bɔmmʋ́ɔ́. Ká luki nyútɔ́llɛ nɛ́gotóko sɩ́ɩ́ bɔmmʋ́ɔ́ a sakɛ nafarsɛ ná oro wuu nyúú ɓóŋɓóŋ. 16 Ʋ cʋ́ɔ́rɛ́ bɛŋzɛlwɩɛla ɓa nɛ̃ Wɩɩsɛ jaa ɓɩɛ a sakɛ Wɩɩsɛ jaa nafarsɛ ná nyúú ɓóŋɓóŋ. Ʋ cʋ́ɔ́rɛ́ gírénádíé nɔnɔ zɔlɔ a pii tʋʋ bɛŋzɛlwɩɛla ná mɛ́. 17 Ʋ cɔ́ŋsɛ nafarsɛ ná Wɩcʋɔlɩjɩzeno ná sɩ́ɛ́, nɔ́ŋɔ mɩŋ nɛ́duu, ká nɔ́ŋɔ má mɩŋ nɛ́gʋɔ. Ʋ ná há mɩŋ néduu, ʋ hóú yɩr Yakɩŋ, ʋ ná má há mɩŋ nɛ́gʋɔ, ʋ hóú má yɩr Bʋɔzɛ.