Ɓa há bíl Ɩzɩrayɛl lalyoore ɛ́
27
1 Ná Ɩzɩrayɛl nɩɛ, jɩtɩ́náwa, sóóji bʋ́ɩ́wa nyúútɩ́náwa, zɔlɔwa nyúútɩ́náwa, rɩ́ kɛŋpʋ́ŋsa ná háá tʋŋ kuóro yɩr mɛ́ nɩɛ nʋɔ. Ɓa nɛ́ mɔhɛ̃́ rɩ́wɔ́ ka sóójiwa ná ɓa púllíwa; a makɛ rɩ́ bɩna sɩɛrʋ, rɩ́wɔ́ tʋŋ aá la naŋá mɛ́ cana canawa. Púl wuu sɩɛ́ fa ka sóójiwa bʋ́ɩ́ mɛ́rɛ́ rɩ́ baná nɛ́ (24 000). 2 Dʋ́ŋdʋ́ʋ̃́ púl ná há mɔhɛ̃́ rʋ́ʋ́ tʋŋ dʋ́ŋdʋ́ʋ̃́ cana mɛ́: Zabdɩyɛl bio Yasobeyammɛ púl ní. Ɛ́ púl sóójiwa nʋɔ ká bʋ́ɩ́ mɛ́rɛ́ rɩ́ baná (24 000) nɛ́. 3 Pɛrɛtɛ bio nɔ́ŋɔ nɛ́. Ʋ fa ká sóóji nyúútɩ́náwa ná há mɔhɛ̃́ rʋ́ʋ́ tʋŋ dʋ́ŋdʋ́ʋ̃́ cana ná mɛ́ nyúútɩ́na. 4 Bʋllɛ nyúú mí púl ná há mɔhɛ̃́ rʋ́ʋ́ tʋŋ caŋsɛ bɛllɛ nyúú mí nɛ́ ká Ahoya tɩ́náwa Dodayi púl. Mɩklɔtɛ nɛ́ kɔ́wɔ́ púl nyúútɩ́na. Ɛ́ púl sóójiwa nʋɔ ká bʋ́ɩ́ mɛ́rɛ rɩ́ baná (24 000) nɛ́. 5 *****Caŋsɛ botoro nyúú mí, botoro nyúú mí sóójipúl nyúútɩ́na nɛ́ ká vʋk'ɔɔsa nɔhɔ̃́ Yehoyada bio Benaya. Ʋ púl sóójiwa nʋɔ ká bʋ́ɩ́ mɛ́rɛ rɩ́ baná (24 000) nɛ́. 6 Ɛ́ Benaya fa ká bɩbár rɛ́, sóójibɩbára mɛ́rɛ rɩ́ fí ná sɩɛrʋ, ʋ nɛ́ kɔ́wɔ́ nyúútɩ́na. Ʋ bio Amizabadɛ fa mɩ́nʋ́ púl ná sɩɛrʋ nɛ́. 7 Caŋsɛ baná nyúú mí, baná nyúú púl nɩ́ɩ́ tʋmɛ́. Zʋabɛ maábinɔ́ŋɔ Azayɛl nɛ́ ká ɛ́ púl nyúútɩ́na; ʋ sʋʋ har mɛ́, ʋ bio Zebadiya nɛ́ lɔ́ʋ́ nyúú mí. Ʋ púl sóójiwa ká bʋ́ɩ́ mɛ́rɛ rɩ́ baná (24 000) nɛ́. 8 Caŋsɛ bɔmmʋɔ nyúú mí, bɔmmʋ́ɔ́ nyúú mí púl ní; Yizira tɩ́náwa báálɔ Samehu nɛ́ ká nyúútɩ́na. Ʋ púl sóójiwa nʋɔ ká bʋ́ɩ́ mɛrɛ́ rɩ́ baná (24 000) nɛ́. 9 Caŋsɛ balgo nyúú mí, balgo nyúú mí púl ní; Tekoa tɩ́náwa báálɔ Ikɛsɛ bio Iira nɛ́ ká nyúútɩ́na. Ʋ púl sóójiwa nʋɔ ka bʋ́ɩ́ mɛrɛ́ rɩ́ baná (24 000) nɛ́. 10 Caŋsɛ balpɛ nyúú mí, balpɛ nyúú mí púl ní. Pelɔŋ tɩ́náwa báálɔ Hɛlɛsɛ, há lɛ́ Ɩfɩrayɩm jɩmʋ́l sɩɛrʋ nɛ́ ká nyúútɩ́na. Ʋ púl sóójiwa nʋɔ ká bʋ́ɩ́ mɛrɛ́ rɩ́ baná (24 000) nɛ́. 11 Caŋsɛ córí nyúú mí, córí nyúú mí púl ní. Husa tɩ́náwa báálɔ Sibkayi há lɛ́ Husa, Zera duo sɩɛrʋ nɛ́ ká nyúútɩ́na. Ʋ púl sóójiwa nʋɔ ká bʋ́ɩ́ mɛrɛ́ rɩ́ baná (24 000) nɛ́. 12 Caŋsɛ nɛ́mɛ nyúú mí, nɛ́mɛ nyúú mí púl ní; Anatɔtɛ báálɔ Abiezɛɛrɛ há lɛ́ Bɛŋzamɛ jɩmʋ́l sɩɛrʋ nɛ́ ká nyúútɩ́na. Ʋ púl sóójiwa nʋɔ bʋ́ɩ́ mɛrɛ́ rɩ́ baná (24 000) nɛ́. 13 Caŋsɛ fí nyúú mí, fí nyúú mí púl ní; Netofa tɩ́náwa báálɔ Maharayi há lɛ́ Zera duo sɩɛrʋ púl ní. Ʋ púl sóójiwa nʋɔ ká bʋ́ɩ́ mɛrɛ́ rí baná (24 000) nɛ́. 14 Caŋsɛ fí rí oro nyúú mí, fí rí oro nyúú mí púl ní; Piratɔŋ tɩ́náwa báálɔ Benaya há lɛ́ Ɩfirayiŋ jɩmʋ́l sɩɛrʋ nɛ́ ká nyúútɩ́na. Ʋ púl sóójiwa nʋɔ ká bʋ́ɩ́ mɛrɛ́ rɩ́ baná (24 000) nɛ́. 15 Caŋsɛ fí rí bɛllɛ nyúú mí, fí rí bɛllɛ nyúú mí púl ní; Nɛtofa tɩ́náwa báálɔ Hɛldayi há lɛ́ Ɔtɩnɩɛl duó sɩɛrʋ nɛ́ ká nyúútɩ́na. Ʋ púl sóójiwa nʋɔ ká bʋ́ɩ́ mɛrɛ́ rɩ́ baná (24 000) nɛ́.Ɩzɩrayɛl jɩmʋ́ʋ́la sɩ́dííre
16 Ná Ɩzɩrayɛl jɩmʋ́ʋ́la wuu sɩ́dííre: Rubaŋ jɩmʋ́l sɩ́dííro nɛ́ ká: Zikiri bio Eliezɛɛrɛ. Sɩmɩɔŋ jɩmʋ́l sɩ́dííro nɛ́ ká: Maaka bio Sefatiya. 17 Levi jɩmʋ́l sɩ́dííro nɛ́ ká: Kemʋyɛl bio Hasabiya. Aarɔŋ duo sɩɛrʋ Sadɔkɛ nɛ́ ká sɩ́dííro. 18 Ziida jɩmʋ́l sɩ́dííro nɛ́ ká: Davidi maábinɔ́ŋɔ Elihu. Isakaarɛ jɩmʋ́l sɩ́dííro nɛ́ ká: Mɩkayɛl bio Ɔmiri. 19 Zabilɔŋ jɩmʋ́l sɩ́dííro nɛ́ ká: Abdɩyasɛ bio Isemaya nɛ́. Nɛfɩtalɩ jɩmʋ́l sɩ́dííro nɛ́ ká: Azɩrɩyɛl bio Yerimɔtɛ. 20 Ɩfɩrayɩm jɩmʋ́l sɩ́dííro nɛ́ ká: Azaziya bio Ooze. Manase jɩmʋ́l fá ná sɩ́dííro nɛ́ ká: Pedaya bio Zowɛl. 21 Manase jɩmʋ́l fá ná há mɩŋ Galaadɛ mɛ́; sɩ́dííro nɛ́ ká: Zakari bio Ido. Bɛŋzamɛ jɩmʋ́l sɩ́dííro nɛ́ ká: Abinɛrɛ bio Yasɩyɛl. 22 Daŋ jɩmʋ́l sɩ́dííro nɛ́ ká: Yeroham bio Azarɛyɛl. Ɓa nyáŋ nɛ́ ká Ɩzɩrayɛl jɩmʋ́ʋ́la sɩ́dííre. 23 Davidi wɩ ŋmɛ́nɔ pɛ́ɩ́ rɩ́wɔ́ dɩɩsɛ nɩɛ ná wuu há kéŋ bɩŋsɛ mɛrɛ́ arɩ́wɔ́ ná há wɩ mɛrɛ́ péré; bee wɩ́ɛ́ Nyuutɩna Wɩɩsɛ fa sʋ́ʋ́ sɩ́ a rɩ́ Ɩzɩrayɛl nɩɛ pul kɩ́ŋkáŋ anɛ bána nyúú caŋwʋllɛ. 24 Zʋwabɛ ná maá há ká Seruya nɛ́ fa púl nɩdɩɩsɛ ná, amá ʋ wɩ ténné, ka Wɩɩsɛ cɔ́ɛ́ isi Ɩzɩrayɛl nɩɛ nyúú. Ɛ́ nɛ́ tɛ ɓa wɩ Ɩzɩrayɛl nɩɛ wuu nʋɔ ɛ̃ rɩ́wɔ́ pʋ́ŋsɛ hé kuóro Davidi wɩ́'állɛ kɛnɔ sɩɛrʋ.
Kuóro ɓɩɛ bíbelle wɩ́ɛ́
25 Adɩɛl bio Azimavɛtɛ nɛ́ faá bel kuóro Davidi kuóɓɩɛ mɛ́. Ká Ozɩyasɛ bio Zonataŋ má nɛ́ faá bíbel ɓɩɛ ná kuóro há tʋ́ɔ́lɛ́ baksɛ rɩ́ tɔ́zeŋsi rɩ́ tɔ́wɩɛla arɩ́ tɔ́nɛ ná ɓa há sɔ́ɛ́ kíl sɩɛnnɛ mɛ́. 26 Kuóro bakpaara ná wuu, Keluub bio Ezri níí bélwó mí. 27 Simeya há lɛ́ Rama má nɛ́ faá bel víínyi baksɛ mɛ́. Ká Zabdi há lɛ́ Sefaŋ má nɛ́ bíbélú viínyi baksɛ dɩvɛ́ŋ mɛ́. 28 Baalɛhanaŋ há lɛ́ Gɛdɛɛrɛ nɛ́ faá bel olívi tuuni baksɛ arɩ́ pirsolo baksɛ mɛ́, Sefala rɩ́. Ká Yohasɛ má bíbel nʋʋ dɩbile mí. 29 Sitirayi há lɛ́ Sarɔŋ nɩ́ɩ́ bel pʋzeŋsi ná ɓa háá nʋɔlɛ Sarɔŋ polo mí. Ká Adɩlayi bio Safatɛ má bibel pʋzeŋsi ná ɓa háá nʋɔlɛ polli mí. 30 Ɩsɩmayɛl dunɛrɔ Obil nɛ́ fa ká nyʋ́kmawa bíbello. Ká Merɔnɔtɛ báálɔ Yediya má nɛ́ fa bíbel kokúmaáwa mí. 31 Hagaarɛ dunɛrɔ Yaziiz nɛ́ faá bel pʋwɩɛla mɛ́. Nɩɛ nyáŋ nɛ́ faá bél kuóro Davidi kuóɓɩɛ mɛ́.
Kuóro Davidi laka tʋtʋnna wɩ́ɛ́
32 Davidi nɩ́ɛ́rá Zonataŋ nɛ́ kɔ́ʋ́ cɩ́cáánɔ; ɛ́ Zonataŋ sɩɛ́ fa ká kɛŋzɩnnɔ ná há kéŋ wɩ́zɩmɛ nɛ́. Ká Yehɩɛl Hakmoni bio kɩ́karmɛ kuóro bɛlɛ. 33 Ahitofɛl fa ká kuóro cɩ́cáánɔ nɛ́. Ká Husayi há lɛ́ Arka fa a kuóro naŋnɔ́ŋɔ. 34 Benaza bio Yoyada rɩ́ Abiyataarɛ nɛ́ lá Ahitofɛl nyúú mí, aá cáánɛ kuóro. Ká Zʋwabɛ nɛ́ ká kuóro lalyóóre nyúútɩ́na.