Dánnʋpɔ́ɔ́ra púlli wɩ́ɛ́
26
1 Wɩɩsɛ jaa dánnʋpɔ́ɔ́ra púlli wɩ́ɛ́: Koore duo sɩɛrʋ: Koore bio Meselemiya há ká Azafɛ dunɛrɔ nɛ́. 2 Meselemɩya bɛlɛ nɛ́ balpɛ: Ʋ bihɔ̃́ nɛ́ ká Zakari, bʋllɛ nyúú mí ní ká Yediayɛl, botoro nyúú mí ní ká Zebadiya, 3 baná nyúú mí ní ká Yatɩnɩɛl; bɔmmʋ́ɔ́ nyúú mí ní ká Elammɛ, balgo nyúú mí ní ká Yohanaŋ, ká Eliehonayi a balpɛ nyúú mí bio. 4 Obɛɛd'Edɔŋ lʋ́l bɛlɛ córí: Ʋ bihɔ̃́ nɛ́ ká Semaya, bʋllɛ nyúú mí ní ká Yehozabaadɛ, botoro nyúú mí ní ká Yʋa, baná nyúú mí ní ká Sakaarɛ, bɔmmʋ́ɔ́ nyúú mí ní ká Netaneyɛl; 5 balgo nyúú mí ní ká Amɩɛl, balpɛ nyúú mí ní ká Isakaarɛ, ká Pehultayi a córí nyúú mí nɛrɔ. Bee wɩ́ɛ́ Wɩɩsɛ fa hé Obɛɛd'Edɔmmɛ nyúú bárka. 6 Obɛɛd'Edɔmmɛ bihɔ̃́ Semaya lʋ́l heŋbólli, ɓa fa kéŋ tíŋ ɓa duo sɩɛrʋ. Ɓa fa ká lalyóóríbibárá rɛ́. 7 Semaya bɛlɛ nɛ́ ká: Ɔtini, Refayɛl rɩ́ Obɛɛdɛ rɩ́ Ɛlzabadɛ rɩ́wɔ́ maábináŋa Elihu arɩ́ Semakiya há ká bɩbárá. 8 Obɛɛd'Edɔmmɛ bɛlɛ, rɩ́rʋ́ nihẽ, arɩ́rʋ́ maábináŋa, ká nɩɛ mɛɛ́sɩbotoro rɩ́ bɛllɛ. Ɓa wuu ká nɩduorú, a a bɩbárá ɓa tʋtʋmɛ́ sɩɛrʋ.9 Meselemiya bɛlɛ, rɩ́rʋ́ maábináŋa wuu fa ká báála fí rɩ́ córí, a a bɩbárá.
10 Hosa há lɛ́ Merari duo sɩɛrʋ lʋ́l bɛlɛ baná: Simiiri ní, ʋ áná pi jɩtɩnnɛ pá, kɔ́ʋ́ raá tó bihɔ̃́. 11 Ʋ bʋllɛ nyúú mí bio ní ká Hilkiya, botoro nyúú mí bio ní ká Tebaliya, baná nyúú mí bio ní ká Zakari. Hosa bɛlɛ rɩ́rʋ́ maábináŋa wuu ká nɩɛ fí rí botoro. 12 Dánnʋpɔ́ɔ́ra púlli nyáŋ rɩ́wɔ́ sɩ́dííre arɩ́wɔ́ maábináŋa faá tʋŋ Nyuutɩna Wɩɩsɛ jaa ná mɛ́ nɛ́. 13 Ɛ́ nɛ́ ɓa yo bíé, a tɩŋ jaá jaáwa, dánnʋ́ɔ́wa, heŋbiisi arɩ́ nɩhɩɛ̃́sɛ mɛ́. 14 Ɓa yó bíé, rɩ Selemiya nɛ́ mɔhɛ̃́ rʋ́ʋ́ pɔ́ dannʋɔ ná há mɩŋ wɩɩsɛ dɩpomí rɩ́. Ɓa báá yó bíé a lɩ́sʋ́ bio Zakari fa há ká cɩ́cáánɔ, a ka zɩmɛ́ wérí, rʋ́ʋ́ nɛ́ pʋ́pɔ́ dánnʋɔ ná há cáásɛ wɩɩsɛ dɩpomí nɛgʋ́ɔ́ rɩ́. 15 Obɛɛd'Ɛdɔmmɛ nɛ́ tɛ dánnʋɔ ná há mɩŋ wɩɩsɛ dɩpomí néduu rɩ́; kɔ́ʋ́ bɛlɛ má pʋ́pɔ́ cɩksɛ jɩɩsɛ mɛ́. 16 Ká Supimmɛ rɩ́ Hosa nɛ́ pʋ́pɔ́ wɩɩsɛ dɩzʋʋlɩ́ dannʋɔ ná rɩ́ Salekɛtɛ dannʋɔ ná há wúre caasɛ dúŋduóŋ ŋmɛ́nɔ rɩ́. Púl wuu fa cɩ́nɔ́ caasʋ púl nɔ́ŋɔ nɛ́. 17 Wɩɩsɛ dɩpomí rɩ́ dannʋɔ ná mɛ́, kál wuu Levi duo nɩɛ balgo nɩ́ɩ́ pɔ́ ráŋ; dannʋɔ ná há mɩŋ wɩɩsɛ dɩpomí nɛ́gʋɔ rɩ́, kál wuu Levi duo nɩɛ baná nɩ́ɩ́ pɔ́ ráŋ; dannʋɔ ná há mɩŋ wɩɩsɛ dɩpomí néduu rɩ́, kál wuu Levi duo nɩɛ baná nɩ́ɩ́ pɔ́ ráŋ; ká cɩksɛ jɩɩsɛ ná mɛ́, Levi nɩɛ baná nɩ́ɩ́ pɔ́ dɩhɛ̃́ bɛllɛ mɛ́; 18 Wɩɩsɛ jaa laka jiwie ná há cáásɛ́ wɩɩsɛ dɩzʋʋlɩ́, ʋ dánnʋɔ ná há caasɛ ŋmɛ́nɔ rɩ́, Levi duo nɩɛ baná nɩ́ɩ́ pɔ́ ráŋ, ká bɛllɛ má mɩŋ jiwie ná rɩ́.
19 Dánnʋpɔ́ɔ́ra púlli nyáŋ ní ká Koore rɩ́ Merari duo nɩɛ.
Tʋtʋmɛ́ ná há ká Levi duo nɩɛ náŋá dʋŋɔ́ tʋtʋmɛ́
20 Ahiya há ká Levi duo nɩɛ sɩɛrʋ oro, ʋ nɛ́ faá bel Wɩɩsɛ jaa kuóɓɩɛ rɩ́rʋ́ sɩɛrʋ cɩksɛ ná há ká Wɩɩsɛ dʋŋɔ tɩ́llɛ mɛ́. 21 Ladaŋ há ká Gɛrsɔŋ dunɛ́ŋ, ʋ bɛlɛ nɛ́ fa ká Ladaŋ dunɩɛ jɩtɩ́náwa. Yehɩɛl lɛ́ Ladaŋ duó sɩɛrʋ nɛ́. 22 Yeheli bɛlɛ nɛ́ ká Zetammɛ rɩ́rʋ́ maábinɔ́ŋɔ Zowɛl; ɓa nɛ́ faá bel Nyuutɩna Wɩɩsɛ jaa kuóɓɩɛ mɛ́. 23 Amɩrammɛ rɩ́ Yitsehaarɛ rɩ́ Hebrɔŋ rɩ́ Uzɩɛl duo nɩɛ sɩɛrʋ, 24 Sebuwɛl há ká Gɛrsɔŋ bio nɛ́ fa ká nɩɛ ná háá bel Wɩɩsɛ jaa ɓɩɛ mɛ́ sɩ́dííro. Gɛrsɔŋ áná nɛ́ ká Moyizi. 25 Ɛ́ Sebuwɛl maábinaŋá há ká Eliezɛɛrɛ duo nɩɛ, ɓa nɛ́ ká: Eliezɛɛrɛ bio ní ká Rehabiya, Rehabiya bio ní ká Ezayi, Ezayi bio ní ká Yorammɛ, Yorammɛ bio ní ká Zikri, Zikri bio ní ká Selomiti. 26 Cɩksɛ ná wuu há ká Wɩɩsɛ dʋŋɔ tɩ́llɛ, kuóro Davidi rɩ́ jɩtɩ́náwa rɩ́ nɩɛ bʋ́ɩ́wa nyúútɩ́náwa rɩ́ zɔlɔwa nyúútɩ́náwa arɩ́ sóóji nyúútɩ́náwa pii pá Wɩɩsɛ; Selomɩtɛ rɩ́rʋ́ maábináŋa nɛ́ faá bélwó mí: 27 Ɓa há yó lal a la ɓɩɛ ná, ɓa sɩɛrʋ nɛ́ ɓa lɩ́sɛ a pá Nyuutɩna Wɩɩsɛ, ʋ jaa ná bɩrmɛ́ wɩ́ɛ́. 28 Selomɩtɛ rɩ́rʋ́ maábinaŋá nɛ́ faá bel ɓɩɛ ná wuu muulináárɔ Samɩɛl rɩ́ Kisi bio Sayul rɩ́ Nɛɛrɛ bio Abnɛɛrɛ rɩ́ Seruya bio Zʋabɛ há píé pá Nyuutɩna Wɩɩsɛ mɛ́ arɩ́ onni ná wuu nɩɛ há píé pá Wɩɩsɛ mɛ́. 29 Yisehaarɛ duo nɩɛ sɩɛrʋ, ɓa lɩ́sɛ Kenaniya rɩ́rʋ́ bɛlɛ nɛ́, rɩ́wɔ́ zɩ́zɩŋ Ɩzɩrayɛl nɩɛ wɩ́ɛ́ ká nɛ́ ɔ́wɔ́ kɛŋpʋ́ŋsa rɩ́wɔ́ saríyadííre. 30 Hebrɔŋ duo sɩɛrʋ, Hasabiya rɩ́rʋ́ mábinaŋá há ká lalyóóríbíbárá, ɓa nɩɛ bʋ́ɩ́ rɩ́ zɔwalpɛ (1 700), nɩ́ɩ́ bel Ɩzɩrayɛl nɩɛ ná há mɩŋ Zʋrdɛŋ daarɛ́, wɩɩsɛ dɩzʋʋlɩ́ rɩ́, aá tʋŋ Nyuutɩna Wɩɩsɛ tʋtʋmɛ́ ná wuu arɩ́ koúro tʋtʋmɛ́. 31 Hebrɔŋ duo nɩɛ sɩɛrʋ, Yeriya nɛ́ fa kɔ́wɔ́ nyúútɩ́na, ʋ woo sɩɛrʋ arɩ́rʋ́ jaa sɩɛrʋ. Kuóro Davidi kuóri bɩŋsɛ mɛɛ́sɛllɛ nyúú mɩ́ ní, ɓa kɩ́ɛ́lɩ́wɔ́, a ná lalyóóríbibárá Yazɛɛrɛ mɛ́, Galaadɛ dɩtɩ́llɛ mɛ́. 32 Ʋ maábináŋa fa ká jɩ́tɩ́náwá rɛ́, a a lalyóóríbibára, ɓa nɩɛ bʋ́ɩ́wʋllɛ rɩ́ zɔwalpɛ (2700). Kuóro Davidi fa lɩ́sɩ́wɔ́ nɛ́ ɓa a Rɩbaŋ rɩ́ Gadɛ jɩmʋ́l arɩ́ Manase jɩmʋ́l fá ná háá zɩŋ wɩ́ɛ́ ná wuu há tɩ́ɩ́nɛ wɩɩsɛ mɛ́ arɩ́ kuóro mí, nyúútɩ́náwa.