Davidi kéŋ Levi dunɩɛ ɓa púl púlwa
23
1 Davidi há kóé hɩ́ɛ̃́sɛ, a dí tɔ́ɔ́ vɔkɛ, ʋ bílú bio Salomɔŋ nɛ́, rʋ́ʋ́ dí Ɩzɩrayɛl kuorí. 2 Ká a ɓa yɩ́rɛ Ɩzɩrayɛl nɩɛ sɩ́dííré wuu, vʋk'ɔɔsa arɩ́ Levi duo nɩɛ ɓa ko hé náŋá mɛ́. 3 Ɓa há dɩ́ɩ́sɛ Levi duo nɩɛ ná há kéŋ bɩŋsɛ mɛrɛ́ rɩ́ fí rɩ́ dɔwɛ; balá baláwa, ɓa wuu nʋɔ ká bʋ́ɩ́ mɛrɛ́ rɩ́ fí rɩ́ córi (38 000). 4 Davidi lɩ́sɛ nɩɛ bʋ́ɩ́ mɛrɛ́ rɩ́ baná (24 000) rɩ́wɔ́ bíbel Nyuutɩna Wɩɩsɛ jaa ná sɔɛ tʋtʋtmɛ́ mɛ́; a lɩ́sɛ kɛŋpʋ́ŋsa rɩ́ sarɩ́yadííre má bʋ́ɩ́walgo (6 000), 5 a lɩ́sɛ dannʋpɔ́ɔ́ra bʋ́ɩ́wʋna 4 000, rɩ́ gɔkɛ má bʋ́ɩ́wʋna 4 000 rɩ́wɔ́ bɩbɛ Nyuutɩna Wɩɩsɛ mɛ́ arɩ́ cɩksɛ ná ʋ há ɛ́ɛ́ gɔkɩ́ wɩ́ɛ́. 6 Davidi kéŋ Levi bɛlɛ ná ɓa púl púlwa a tɩŋ Gɛrsɔŋ duo rɩ́ Kehatɛ duo arɩ́ Merari duo mí. 7 Gɛrsɔŋ bɛlɛ nɛ́ ká: Ladaŋ rɩ́ Simeyi. 8 Ladaŋ bɛlɛ ká botoro, ɓa nɛ́ ká: Yehɩɛl, ʋ bihɔ̃́, a sɩɛ́ pí Zetammɛ rɩ́ Zowɛl. 9 Simeyi bɛlɛ nɛ́ ká: Selomiti rɩ́ Hazɩɛl arɩ́ Haraŋ. Ɓa nɩɛ botoro. Ɓa nɛ́ ká Labaŋ duo nɩɛ jɩtɩ́náwa. 10 Simeyi lʋ́l bɛlɛ baná: Yahatɛ rɩ́ Ziza arɩ́ Yehuusi arɩ́ Beriya. 11 Yahatɛ nɛ́ ka bihɔ̃́, Ziza a bʋllɛ nyúú nɛrɔ. Yehusi rɩ́ Beriya é wɩ bɛlɛ kɩ́ŋkáŋ lʋ́lɛ́, ɛ́ wɩ́ɛ́ ɓa é ká jaa balá nɩɛ nɛ́. 12 Kehatɛ lʋ́l bɛlɛ baná nɛ́: Amɩrammɛ rɩ́ Isaarɛ rɩ́ Hebrɔŋ arɩ́ Uzɩyɛl. 13 Amɩrammɛ bɛlɛ nɛ́ ká: Aarɔŋ rɩ́ Moyizi. Aarɔŋ rɩ́rʋ́ bɛlɛ nɛ́, ɓa lɩ́sɛ Ɩzɩrayɛl bɛlɛ sɩɛrʋ rɩ́wɔ́ tʋ́tʋŋ Wɩɩsɛ jaa ná mɛ́; a nyɩ́nyɩkɛ tulaaléwa Wɩɩsɛ sɩ́ɛ́, ka sʋ́l Nyuutɩna bárka aá pá nɩɛ tɛ́ŋ wuu mí. 14 Moyizi há Wɩɩsɛ báálɔ, ɓa dɩɩsɛ é bɛlɛ hé Levi jɩmʋ́l nɩɛ sɩɛrʋ nɛ́. 15 Moyizi bɛlɛ nɛ́ ká: Gɛrsɔŋ rɩ́ Elɩɛzɛɛrɛ. 16 Gɛrsɔŋ bihɔ̃́ nɛ́ ká: Sebuyɛl. 17 Eliezɛrɛ lʋ́l Rehabiya há ká sɩ́dííro, ʋ lʋ́lʋ́ dʋŋɔ nɛ́; amá Rehabiya é lʋ́l bɛlɛ kɩ́ŋkáŋ. 18 Ɩsaarɛ bihɔ̃́ nɛ́ ká: Selomiti há ká sɩ́dííro. 19 Hɛbrɔŋ bɛlɛ nɛ́ ká: Yeriya há kɔ́ʋ́ bihɔ̃́, Amariya nɛ́ kɔ́ʋ́ bʋllɛ nyúú mí bio, Yahaziyɛl nɛ́ kɔ́ʋ́ botoro nyúú mí bio ká Yekameyammɛ ɔ́ʋ́ bána nyúú mí bio. 20 Uziyɛl bɛlɛ nɛ́ ká: Miise há kɔ́ʋ́ bihɔ̃́ rɩ́ Ɩsiya há kɔ́ʋ́ bʋllɛ nyúú mí bio. 21 Merari bɛlɛ nɛ́ ká: Mali rɩ́ Muusi. Mali má bɛlɛ nɛ́ ká Eleyazaarɛ rɩ́ Kiisi. 22 Eleyazaarɛ lʋ́l tolé dʋŋɔ́ nɛ, ʋ wɩ heŋbólli lʋ́lɛ, ka sʋwɛ. Ɓa maábináŋa há ká Kiisi bɛlɛ nɛ́ jáwɔ́. 23 Muusi heŋbólli ká botoro: Mali rɩ́ Edɛɛrɛ rɩ́ Yeremɔtɛ. 24 Ɓa nyáŋ nɛ́ ká Levi bɛlɛ, a tɩ́ŋ jaa jaawa, ɓa nɛ́ ká jɩtɩ́náwa ná, ɓa dɩɩsɛ balá baláwa a hé wɩ́'állɛ kɛnɔ mɛ́. Ɓa há kóé ká bɩŋsɛ mɛrɛ́ rɩ́ dɔwɛ, ɓa púló aá tʋŋ Nyuutɩna Wɩɩsɛ jaa ná mɛ́. 25 Bee wɩ́ɛ́, Davidi fa sɛ́: «Nyuutɩna Wɩɩsɛ, Ɩzɩrayɛl Wɩɩsɛ pɔ́ʋ́ nɩɛ tɛŋfɩ́ɛ́l, ká Wɩɩsɛ tɩɩ ha mɩ́ŋ Zerizalɛmɛ mɛ́ a káá mʋ́ wuu. 26 Ɛ́ wɩ́ɛ́, Levi duo nɩɛ báá wɩ kɛnɔlɔ́k ná rɩ́rʋ́ tʋtʋ́nnɩ́cɩksɛ ná cɩ́ɩ́nɩ́.» 27 Davidi hatɩ́ŋnɛ́ wɩ́bʋlɛ́ nyáŋ har mɛ́ nɛ́, ʋ a ɓa dɩɩsɛ Levi duo nɩɛ, a pɔ́ bɩŋsɛ mɛrɛ́ rɩ́ dɔwɛ mɛ́. 28 Ɓa nɛ́ mɔhɛ̃́ rɩ́wɔ́ pɛ́ Aarɔŋ bɛlɛ mɛ́ aá tʋŋ Nyuutɩna Wɩɩsɛ jaa ná sɩɛrʋ, a bɩrmɛ wuolli arɩ́ jɩwɩɛla ná ká mʋ́ʋ́rɛ cɩksɛ ná wuu há ká Wɩɩsɛ tɩ́llɛ́, kaá tʋŋ Wɩɩsɛ jaa ná tʋtʋmɛ́. 29 Ɓa nɛ́ mɔhɛ̃́ rɩ́wɔ́ bél dɩpɛ́ŋwa ná ɓa háá bil Wɩɩsɛ sɩ́ɛ́ rɩ́ satɔ́ɔ́rɩ́pálɔ míŋ ná rɩ́ sɩbʋ́rtoó gaátówa rɩ́ gaátówa ná ɓa háá wasɛ cíŋcele mí rɩ́ onni ná ɓa háá cɔ́ɛ́ rɩ́ onni ná ɓa há kené aá kérsi zíŋ arɩ́ onni ná ɓa há kené aá máŋsɛ gbési. 30 Ɓa mɔhɔ̃́ rɩ́wɔ́ zʋ Nyuutɩna Wɩɩsɛ sɩ́ɛ́ cɩ́cʋɔ rɩ́ gbaanɛ wuu, a dɛ́nnʋ́, a píŋsú, 31 ká ɔsɛ vʋkfíse ná wuu pá Nyuutɩna Wɩɩsɛ, fɩɛlɛ́ tápʋlɛ́ mɛ́ rɩ́ caŋfɛlɛ mɛ́ rɩ́ jʋɔsɛ́ tápʋlɛ́ mɛ́ rɩ́wɔ́ nʋɔ cesi anɛ ɛ́ há bílé pɔ́wɔ́ rɩ́wɔ́ tʋŋ tɛ́ŋ wuu mí Nyuutɩna Wɩɩsɛ sɩ́ɛ́. 32 Ɓa nɩ́ɩ́ pɔ́ céme kɛnɔlɔ́k ná mɛ́ rɩ́ Wɩɩsɛ dɩmɩnɩ́ ná mɛ́. Ɓa nɩ́ɩ́ pɛ́wɔ́ maábináŋa Aarɔŋ bɛlɛ mɛ́ aá tʋŋ Nyuutɩna Wɩɩsɛ jaa tʋtʋmɛ́ ná.