Vʋk'ɔɔsa púlli wɩ́ɛ́
24
1 Ɓa kéŋ Aarɔŋ bɛlɛ ɓá púl púlwa. Aarɔŋ bɛlɛ ka baná: Nadabɛ, Abihu, Eliyazaarɛ, rɩ́ Itamaarɛ. 2 Nadaabɛ rɩ́ Abihu láwɔ́ áná Aarɔŋ sɩ́ɛ́ sʋsɛ, rɩ́ ɓa fa ha wɩ bɛlɛ lʋlɛ. Ká Eliyazaarɛ rɩ́ Itamaarɛ nɛ́ kaanɛ aá tʋŋ vʋk'ɔɔsɛ tʋtʋmɛ́ ná. 3 Sadɔkɛ há lɛ Eliyazaarɛ jaa rɩ́ Ahɩmɛlɛkɛ há lɛ́ Itamaarɛ jaa nɛ́ pɛ́ Davidi mí, ɓa ká Aarɔŋ bɛlɛ ná ɓa púl púlwa a cɛ́rɛ nɛrɔ wuu tʋtʋmɩ́. 4 Ɓa kɩ́ɛ́lɔ́ rɩ́ Eliyazaarɛ bɛlɛ nyúútɩ́nawa káŋ nɛ́ kɛ́ Itamaarɛ bɛlɛ; ɛ́ nɛ ɓa káŋwɔ́ ɓa nyɛ́: Eliyazaarɛ bɛlɛ jɩ́tɩ́nawa: nɩɛ fí rɩ́ balgo (16); Itamaarɛ bɛlɛ jɩ́tɩ́nawa: nɩɛ córi (8). 5 Ɓa tɩ́ŋ bíé yóé mí ní, a káŋwɔ́ ɓa, bee wɩ́ɛ́, Wɩɩsɛ dɩmɩnɩ́ sɩ́dííre arɩ́ Wɩɩsɛ tʋtʋmɛ́ sɩ́dííre fa ka Eliyazaarɛ rí Itamaarɛ bɛlɛ nɛ́. 6 Netaneyɛl bio Semaya há ka Levi dunɛ́ŋ, a a kɛŋpʋ́ŋsɔ, pʋ́ŋsɩ́wɔ́ yɩra kuóro rɩ́ sɩ́dííre rɩ́ vʋk'ɔɔsɔ Sadɔkɛ rɩ́ Abiyataarɛ bio Ahimelɛkɛ rɩ́ vʋk'ɔɔsa jɩ́tɩ́nawa arɩ́ Levi duo nɩɛ jɩ́tɩ́náwa sɩ́ɛ́ mɛ́. Ɓa sɩɛ́ faá lɩ́sɛ jaa balá a pá Eleazaarɛ, a lɩ́sɛ jaa balá má a pá Itamaarɛ. 7 Ná púllí nyúútɩ́nawa ná ɓa há yó bíé lɩ́sɛ há tʋkɛ náŋá mɛ́ ɛ́wa: Dʋŋdʋ́ʋ̃́ mɛ́ Yoyarib ní; bʋllɛ mɛ́, Yedaya nɛ́ 8 botoro mí Harimmi ní; baná mɛ́ Sehorimmi ní; 9 bɔmmʋ́ɔ́ mɛ́, Malkiya nɛ́; baglgo mí Miyamɛŋ nɛ́; 10 balpɛ mɛ́, Hakɔtɛ nɛ́; corí mí, Abiya nɛ́; 11 nɛ́mɛ́ mɛ́, Zozie ní; fí mí, Sekaniya nɛ́; 12 fí rí oro mí, Eliyasiib ní; fí rí bɛllɛ mɛ́, Yakimmi ní; 13 fí rí botoro mí, Hupa nɛ́, fí rí bána mɛ́, Yesebeyaabɛ nɛ́; 14 fí rí bɔmmʋ́ɔ́ mɛ́, Bilga nɛ́, fí rí balgo mí, Imɛɛrɛ nɛ́; 15 fí rí balpɛ mɛ́, Heziir ní; fí rí corí mí, Hapɩsɛtɛ nɛ́; 16 fí rí nɛ́mɛ́ mɛ́, Petatiya nɛ́; mɛ́rɛ́ mɛ́ Ezekɩɛl nɛ́; 17 mɛ́rɛ́ rí oro mí, Yakɛŋ nɛ́; mɛ́rɛ́ rɩ́ bɛllɛ mɛ́, Gamul ní; 18 mɛ́rɛ́ rɩ́ botoro mí, Delaya nɛ́; mɛ́rɛ́ rɩ́ baná mɛ́, Maaziya nɛ́.19 Nyɛ́ nɛ́ ɓa káŋwɔ́ héwó tʋtʋmɛ́ mɛ́, rɩ́wɔ́ zʋ́ Nyuutɩna Wɩɩsɛ jaa sɩɛrʋ, anɛ ɛ́ Nyuutɩna Wɩɩsɛ, Ɩzɩrayɛl Wɩɩsɛ há makɛ pɔ́wɔ́, a tɩ́ŋwɔ́ naabál Aarɔŋ mɛ́.
Levi duo nɩɛ nɩkaanɛ ná yɩra
20 Ná Levi duo nɩɛ naŋá jɩ́tɩ́náwa yɩra: Amɩrammɛ bɛlɛ sɩɛrʋ, Subayɛl nɛ́; Subayɛl má bɛlɛ sɩɛrʋ Yedeya nɛ́. 21 Rehabiya duo nɩɛ sɩɛrʋ, Isiya nɛ́ kɔ́ʋ́ jatɩ́na. 22 Yisaarɛ duo nɩɛ sɩɛrʋ, Selomɔtɛ nɛ́; ká Selomɔtɛ má duo nɩɛ sɩɛrʋ Yahatɛ nɛ́. 23 Hɩbrɔŋ bɛlɛ nɛ́ ká: Yeriya há ká bihɔ̃́, Amariya nɛ́ ká bʋllɛ nɛrɔ, Yahazɩɛl nɛ́ ká botoro nɛrɔ rɩ́ Yekamehammɛ há ká baná nyúú nɛrɔ; 24 Uziyɛl bio nɛ́ ká Miise. Miise má bɛlɛ nɔ́ŋɔ nɛ́ ká Samɩr; 25 Miise maábɩnɔ́ŋɔ Yisiya má bio nɛ́ ká Zakari. 26 Merari bɛlɛ nɛ́ ká: Mali rɩ́ Musi arɩ́ Yaazia; rɩ́ Yaaziya há kɔ́ʋ́ bio, ʋ má bɛlɛ; 27 bɛlɛ ná Merari bio Yaziya há lʋ́lɛ nɛ́ ká: Sohammɛ rɩ́ Zakuri arɩ́ Ibiri. 28 Mali bɛlɛ nɛ́ ká: Eliyazaarɛ, ʋ é wɩ bii lʋ́lɛ, 29 arɩ́ Kiisi má há lʋ́l Yeramɛl; 30 Musi bɛlɛ nɛ́ ká: Mali rɩ́ Edɛr rɩ́ Yerimɔtɛ. Báála nyáŋ wuu ká jɩ́tɩ́náwa nɛ́, a lɛ Levi jɩmʋ́l sɩɛrʋ. 31 Ɓa má yó bíé anɛ ɛ́ Aarɔŋ bɛlɛ há kɔ́wɔ́ maábinaŋá há lá sɩɛ́ yó bíé kuóro Davidi rɩ́ Sadɔkɛ rɩ́ Ahimɛlɛkɛ rɩ́ vʋk'ɔɔsa jɩ́tɩ́náwa rɩ́ Levitiwa jɩ́tɩ́nawa sɩ́ɛ́. Ɓa tʋ́ŋ ɛ́ nɛ́ a pá jɩ́tɩ́na wuu arɩ́wɔ́ maábinaŋá sɩɛrʋ ɓɩwíé wuu.