Kuóro Davidi ɔ́ɔ́ ɓa dɩɩsɛ Ɩzɩrayɛl nɩɛ wuu
21
1 Sɩtaanɛ ísó cɛ́ Ɩzɩrayɛl nɩɛ mɛ́: A yiki Davidi rʋ́ʋ́ dɩɩsɛ Ɩzɩrayɛl nɩɛ. 2 Ɛ́ nɛ́ Davidi bʋl Zʋwabɛ rɩ́ nɩɛ sɩ́dííre rɩ́ a bʋlɛ́: Ɩ́ mʋ́ dɩɩsɛ Ɩzɩrayɛl nɩɛ, a pɔ́ Bɛrseba mɛ́ ká kaa mʋ́ yakɛ Daŋ mɛ́, a bɩr ko bíl nʋɔ páŋ. Ɛ́ é, ŋ sɩ́ zɩ́ŋwɔ́ nʋɔ. 3 Ɛ́ nɛ́ Zʋwabɛ sɛ́: Rɩ́ Nyuutɩna Wɩɩsɛ a, rɩ́ɩ́ nɩɛ a ɓɩkáná, a peri naasɩ́ zɔlɔ! Oo kuóro, ŋ nyúútɩ́na, ɓa wuu tóí tʋtʋ́nná rɛ́>> Ká bee rɩ́ sɩɛ́ tɛ, ɩ jɩ́já rɩ́ɩ́ tʋ́ŋ nyɛ>> Rɩɩ nɛ́ tʋ́ŋ nyɛ́, ɩ sɩ́ yikí Ɩzɩrayɛl nɩɛ hé wɩ́bɔmɔ sɩɛrʋ. 4 Amá kuóro wɩ́bʋlɩ́ ná fɩ́kɛ́ Zʋwabɛ mɛ́, ʋ isi gʋɔrɛ Ɩzɩrayɛl wuu, a dɩɩsɛ nɩɛ, ká bɩrko Zerizalɛmɛ. 5 Zʋwabɛ sɩɛ́ ka nɩɛ ná ʋ há dɩ́ɩ́sɛ́ nʋɔ ko makɛ pá Davidi. Ɩzɩrayɛl nɩɛ ná wuu há wo tókowí kaá yo lal nʋɔ nɛ́: Sóójiwa bʋ́ɩ́ bʋ́ɩ́ balá arɩ́ bʋ́ɩ́ zɔlɔ (1 100 000). Ká Ziida má nɩɛ ná há wo tókowí kaá yo lal a: bʋ́ɩ́ zɔwaná rɩ́ mɛɛ́sɩ́botoro rɩ́ fí (470 000). 6 Zʋwabɛ wɩ Levi jɩmʋ́l rɩ́ Bɛŋzamɛ jɩmʋ́l nɩɛ dɩ́ɩ́sɛ súúri, bee wɩ́ɛ́, ʋ sɩɛrʋ fa wɩ kuóro wɩ́bʋlɩ́ ná tɔ́rɛ́. 7 Kuóro wɩ́'aalɩ́ né zɔ́kɛ́ Wɩɩsɛ sɩɛrʋ, ɛ́ nɛ́ ʋ bɛŋsɛ Ɩzɩrayɛl wuu.Wɩɩsɛ mɩlmɛ́ Davidi dɩllɛ
8 Ɛ́ nɛ́ Davidi bʋl Wɩɩsɛ rɩ́ a bʋlɛ́: «Ŋ cáásɔ́ aa zɔkɛ. Mʋ́l né mí, ŋŋ́ sʋ́lɩ́, píí cɛ́ŋ, ŋ é, ɩ tʋtʋnnɔ, beé wɩ́ɛ́ ŋ tʋ́ŋ cʋ́llɛ nɛ́.» 9 Nyuutɩna Wɩɩsɛ bʋl Gaadɛ há ká Davidi wɩ́laabʋllɔ rɩ́, a bʋlɛ́: 10 «Mʋ́ bʋl pá Davidi a bʋlɛ́: Náŋ é Nyuutɩna Wɩɩsɛ há sʋ́ʋ́ ná: Ná wɩɩlawa botoro ní; lɩ́sɩ́ há cóú ná, rɩ́ŋ púú ŋmɔ́wɩ́.» 11 Ɛ́ nɛ́ Gaadɛ isi mʋ́ bʋ́l Davidi rɩ́ a bʋlɛ́: «Náŋ é Nyuutɩna Wɩɩsɛ liŋó: Bɛ́llɛ lɩ́sɩ́ há cóú ná, 12 ɩɩ́ já rɩ́ losu zʋ́ɩ́ tɔ́ɔ́ bɩ́ŋsɛ botoro ní yáá, ɩɩ́ já rɩ́ɩ́ dɩŋdɔma nɛ́ wóllí caŋsɛ botoro, a zɔ́kɩ́ yáá, ɛ́ ráá má ɩɩ́ ja rɩ́ Nyuutɩna Wɩɩsɛ tókowí ní ŋmɔ́wɩ́, rɩ́ pʋɔlɩ́bɔmɔ́ zʋ́ tɔ́ɔ́ ká rɩ́ Nyuutɩna Wɩɩsɛ malka ká zɔ́krʋ́ zʋ́ Ɩzɩrayɛl tíé wuu tápʋlɛ botoro ní>> Sɩɛ́ bɩɩnɛ wérí ká páŋ liŋó rɩ́ŋ kaa mʋ́ pá nɛrɔ ná há tʋ́mɩ́ŋ.» 13 Davidi bʋ́l Gaadɛ rɩ́ bʋlɛ́: «Ŋ sɩɛrʋ cáásɔ zɔkɛ! Ŋ taŋa có rɩ́ŋ zʋ Nyuutɩna Wɩɩsɛ nɛ́sɛ mɛ́ nɛ́ kɩ́llɛ, ŋ há zʋ́ nɩbííne nɛ́sɛ, bee wɩ́ɛ́ ʋ susufɔ́ɔ́ zénó! 14 Ɛ́ nɛ́ Nyuutɩna Wɩɩsɛ a pʋɔlɩ́bɔmɔ́ zʋ Ɩzɩrayɛl tíé wuu, nɩɛ bʋ́ɩ́ mɛɛ́sɩbotoro rɩ́ fí sʋsɛ (70 000). 15 Wɩɩsɛ tʋ́ŋ malka rʋ́ʋ́ zɔkɛ Zerizalɛmɛ. Tɛ́ŋ ná mɛ́ ʋ háá zɔkɛ́, Nyuutɩna Wɩɩsɛ béló ná ɛ́ wɩɩla, ʋ sabɩɩna bɩ́rsɛ. Ɛ́ nɛ́ ʋ bʋl malka nɩɓʋ́ʋ́rɔ ná rɩ́ bʋlɛ́: «Mʋ́l né mí, ʋ mɔhɔ̃́, kánɩ́ nɛ́sɛ píwó nyúú.» Ɛ́ mɛ́, rɩ Nyuutɩna Wɩɩsɛ malka ná fa kúó cɛ́ Ɔrna há lɛ́ Zebuuzi tʋ́ɔ́ laka. 16 Davidi ɓɔ́ʋ́ nyúú a ná Nyuutɩna Wɩɩsɛ malka rʋʋ cɛ́ bána rɩ́ tíé pɛ́kɛ, a pʋ́kʋ́ tókowí, a cɛ́ Zerizalɛmɛ mɛ́. Ɛ́ nɛ́ Davidi rɩ́ nɩhɩɛ̃́sɛ laalɛ jɔrʋ, a ɓallɛ káŋwɔ́ sɩ́ɛ́ cú tíé. 17 Ká Davidi sɩɛ́ bʋl Wɩɩsɛ rɩ́ bʋlɛ́: «Ŋ raa wɩ ɛ́ɛ́ ɓa dɩɩsɛ nɩɛ ná rɛ́>> Ŋ nɛ́ a wɩ́bɔmɔ, ŋ nɛ́ zɔ́kɛ́; nɩyɔ́ɔ́wa nyáŋ má sɩɛ́ zɔ́kɛ́ beé>> Ɛ́ wɩ́ɛ́ Nyuutɩna, ŋ Wɩɩsɛ, ŋŋ́ sʋ́lɩ́, fɩ́rɩ́ŋ é ní, ŋ rɩ́rɩ́ŋ jaa nɩɛ. Ká sɩ́ pʋɔlɩ́bɔmɔ́ né píí ŋmɔ́wɩ́ nɩɛ.»
Davidi má koro pá Nyuutɩna Wɩɩsɛ
18 Nyuutɩna Wɩɩsɛ Malka fa bʋ́l Gaadɛ rɩ́, a makɛ rʋ́ʋ́ bʋ́l pá Davidi rʋ́ʋ́ mʋ́ Zebuuzi nɩɛ Ɔrna tʋ́ɔ́, a má koro ráŋ a pá Nyuutɩna Wɩɩsɛ. 19 Ɛ́ nɛ́ Davidi isi mʋ́, anɛ ɛ́ Gaadɛ fa há bʋ́lɛ́ Nyuutɩna Wɩɩsɛ yɩr mɛ́. 20 Ɔrna fa mɩ́ŋ ráŋ aá ŋmɔ́wɛ́ bile ní. Ɔrna bɩrɔ bel rɩ́ malka nɛ́, ɛ́ nɛ́ ʋ bɛlɛ bána há mɩ́nʋ́ laka isi fá féŋsi. 21 Davidi há mʋ́ɛ́ pérí Ɔrna laka, Ɔrna béló a ná Davidi. Ɛ́ nɛ́ ʋ lɛ́ tʋ́ɔ́ ná mɛ́ a mʋ́ ɓírmí Davidi sɩ́ɛ́, a kánʋ́ sɩ́ɛ́ cú tíé. 22 Davidi bʋ́l Ɔrna rɩ́ a bʋlɛ́: «Píí tʋ́ɔ́ né páŋ rɩ́ŋ má koro ráŋ pá Nyuutɩna Wɩɩsɛ. Púú páŋ ká mákʋ́ meéwí nʋɔ páŋ rɩ́ŋ túŋ, ká rɩ́ pʋɔlɩ́ né háá ɓʋ́ nɩɛ cɛ́. 23 Ɔrna bʋ́l Davidi rɩ́ bʋlɛ́: «La, oo, ŋ nyúútɩ́na, a ɔ́ɔ́ ná ɩ há có. Ná nɛsɛ nyáŋ, rɩ́ɩ́ píí ɔsɛ vʋkfise, ká rɩ́wɔ́ cɩ́ksɛ nɛ́ a daasɛ; ká pí bílé ná a sátɔ́ɔ́rɩ́pálɔ́. Ŋ pí nyáŋ wuu pɛ́ɩ́. 24 Ɛ́ nɛ́ kuóro Davidi bʋl Ɔrna rɩ́ a bʋlɛ́: «Aɩ́! ŋ sɩ́ túnú meéwí nʋɔ mɛ́ a pɛ́ɩ́. Ŋ wɩ oŋ ná há wɩ yɛ́lɩ́ kené la ɩ rɩ́, rɩ́ɩ́ ɔsɛ vʋkfísi rɩ́ɩ́ pá Nyuutɩna Wɩɩsɛ. 25 Davidi sɩɛ́ pi salmɛ cááka zɔwalgo (600) a pá Ɔrna, dɩhɩ̃́ ná yɩr mɛ́. 26 Davidi má koro ráŋ, a pá Nyuutɩna Wɩɩsɛ, a ɔsɛ vʋkfíse rɩ́ tɛŋfɩ́ɛ́l vʋka, ʋ daha ká sʋ́l Nyuutɩna Wɩɩsɛ. Ʋ saŋ Davidi sʋ́lɛ́, a lo níŋ lɛ́ bána tuwi dí vʋk ná, koro ná daha.
27 Ɛ́ nɛ́ Nyuutɩna Wɩɩsɛ bʋ́l malka ná rɩ́, rʋ́ʋ́ púú tokówí hóú kuo mí. 28 Ɛ́ tɛ́ŋ mɛ́, Davidi há néí rɩ Nyuutɩna Wɩɩsɛ sáŋʋ́ sʋlɛ́, Zebuuzi nɩɛ Ɔrna tʋ́ɔ́ ná dɩhɩ̃́, ʋ ɔ́sɛ́ vʋka ráŋ. 29 Bee wɩ́ɛ́, Nyuutɩna kɛnɔlɔ́k ná rɩ́ vʋk'ɔ́ɔ́sɩ́koro ná Moyizi há ɛ́ɛ́ gírbétéké ná sɩɛrʋ, fa mɩŋ Gabaɔŋ dúŋdúóŋ ɓaarɩ́ mɛ́ nɛ́. 30 Amá Davidi há né Nyuutɩna malka tokówí ná, héwíŋ zʋ́ʋ́, ʋ báá wɩ kɔwɛ rʋ́ʋ́ mʋ́ ráŋ, a ja Nyuutɩna Wɩɩsɛ.