Amɔŋ kuóro hɩ́ɩ̃́sɛ Davidi nɩtʋmɛ́
19
1 Ʋ há dáánɛ mʋ́ɔ̃́, Amɔŋ duo nɩɛ kuóro Nahasɛ sʋ́wɔ́, kɔ́ʋ́ bio Hanuŋ la kuorí. 2 Ɛ́ nɛ́ Davidi sɛ́: «Ŋ sɩ́ makɩ́ŋ sawér a pá Nahasɛ bio Hanuŋ, anɛ ɛ́ ʋ áná há mákʋ́ sawér a cáásɩ́ŋ». Ɛ́ nɛ́ ʋ sɩɛ́ tʋ́mʋ́ tʋtʋnna náŋa, rɩ́wɔ́ mʋ́ bɔ́llɛ Hanuŋ áná há sʋ́wɛ́ yúó. Davidi wuolo tʋtʋnna ná mʋ́ Amɔŋ nɩɛ tɔ́ɔ́, a zʋ rɩ́wɔ́ bɔ́llɛ Hanuŋ áná yúó. 3 Ɛ́ nɛ́ Amɔŋ nɩɛ sɩ́dííre bʋ́l Hanuŋ rɩ́ bʋlɛ́: Ɩ bɩ́ɩ́nɔ́ rɩ́ Davidi já rʋ́ʋ́ zilí áná nɛ́ tɛ́ ʋ tʋŋ nɩɛ nyáŋ rɩ́wɔ́ ko bɔ́llɩ́ áná yúó>> Ʋ wʋ́ʋ́ nɩɛ nyáŋ tʋ́mɛ́ rɩ́wɔ́ ko zɩŋ tɔ́ɔ́ ná, a kɩ́ɛ́lʋ́, a makɛ rɩ́ kál oro rɩ́wɔ́ ko zɔ́kʋ́ nɛ́>> 4 Ɛ́ nɛ́ Hanuŋ a ɓa kɛsɛ Davidi tʋtʋnna ná, a a ɓa píéríwó tɔma, ká a ɓa cɔ́nnɩ́wɔ́ gɛnnɛ, a pɔ́ sɩ́sɩ́ɛ́nnʋ́wa mɛ́, ká tuwi yákwɔ́ mʋ́bʋʋsɛ mɛ́, ká táwɔ́ ɓa bɩr col. 5 Ɓa ko bʋl ɛ́ pá Davidi, ɛ́ nɛ́ ʋ tʋŋ nɩɛ rɩ́wɔ́ lɩɩ céŋ tʋtʋnna ná, bee wɩ́ɛ́ ɓaá kó rɩ́ hɩ̃ɩ̃sɛ nɛ́. Ɛ́ nɛ́ kuóro a ɓa céŋ bʋl pɔ́wɔ́ bʋlɛ́: Ɩ́ ké Zeriko mí, a kaá ja rɩ́ɩ́wa tɔma bɩrnyʋ́, ká rɩ́ɩ́wa sɩɛ́ zɩŋ bɩrko rɛ́ɛ́wa.Davidi yóó dí Amɔŋ nɩɛ rɩ́ Siiri nɩɛ
6 Amɔŋ nɩɛ nóú rɩ Davidi cɔ́ɛ́ wɩ́wɔ́. Ɛ́ nɛ́ Hanuŋ rɩ́ Amɔŋ nɩɛ tɛ warɛ táláŋ bʋ́ɩ́ rɩ́wɔ́ mʋ́ yɔwɛ lalyóórítórkowa rɩ́ zákzɩ́nna Siiri nɩɛ ná há mɩ́ŋ Mezopotami mí rɩ́ Maaka mɛ́ arɩ́ Soba mɛ́ rɩ́. 7 Ɓa yɔ́wɛ́ lalyóórítórkowa bʋ́ɩ́ mɛrɛ́ rɩ́ fí rɩ́ɩ́ bɛllɛ (32 000), ká yɔ́wɛ́ Maaka kuóro rɩ́rʋ́ sóójiwa rɩ́wɔ́ ko pɛ́ yo lal, ɓa sɩɛ́ mʋ́ cíkwó púl Medeba dɩtɩ́llɛ mɛ́; ká Amɔŋ nɩɛ má lɩ́wɔ́ tɔ́nɛ mɛ́, a káŋwɔ́ tɩɩ cɛ́ lal yóé mí. 8 Davidi há nɛ́ ɛ́, ʋ tʋ́ŋ Zʋwabɛ rɩ́rʋ́ lalyóóríbibara wuu ɓa mʋ́wɔ́ mɛ́. 9 Amɔŋ nɩɛ sɩɛ́ káŋwɔ́ tɩɩ a lɩɩ cɩ́ŋwɔ́ tɔ́ɔ́ dánnʋɔ mɛ́; kuóre ná má há kúé rɩ́wɔ́ sáŋwɔ́ mɛ́ má cɩ́ŋwɔ́ dʋŋɔ gɩr sɩɛrʋ. 10 Zʋwabɛ nóú rɩ sóóji buke bɛllɛ nɛ́ mɔhɛ̃́ rʋ́ʋ́ yo; náŋa mɩ́nʋ́ sɩ́ɛ́rɩ́ ká náŋa mɩ́nʋ́ har rɩ́. Ɛ́ nɛ́ ʋ tʋɔsɛ Ɩzɩrayɛl sóójibibara, a a ɓa cɛ́ caasɛ Siiri nɩɛ sóójiwa ná. 11 Ká pi sóóji káánɛ ná hóú maábinɔ́ŋɔ Abisayi nɛ́sɛ mɛ́, ɓa cɛ́ caasɛ Amɔŋ nɩɛ. 12 Ɛ́ nɛ́ ʋ sɛ́: Rɩ Siiri nɩɛ nɩ́ɩ́ já rɩ́wɔ́ wóllíŋ, ɩ ko pɛ́ŋ mɛ́, ká rɩ Amɔŋ nɩɛ má nɛ́ kúé aá wóllí, ŋ má sɩ́ ko pɛ́ɩ́ mɛ́. 13 Ka dóé, ráá makɛ ballɩ́ pɔ́wɔ́, á dunɩɛ yɩr mɛ́, arɩ́rá Wɩɩsɛ tɔ́nɛ yɩr mɛ́. Rɩ́ Nyuutɩna Wɩɩsɛ é ha tʋ́mʋ́ cóllé! 14 Ɛ́ nɛ́ Zʋwabɛ rɩ́rʋ́ nɩɛ sɩɛ́ tuuperi rɩ́wɔ́ yo Siiri nɩɛ; ɓa fá Zʋwabɛ sɩ́ɛ́ mɛ́. 15 Amɔŋ nɩɛ há néí rɩ Siiri nɩɛ fɔ́ɔ́, ɛ́ nɛ́ ɓa fá Zʋwabɛ maábinɔ́ŋɔ Abisayi sɩ́ɛ́ mɛ́, a mʋ́ zʋ́wɔ́ tɔ́ɔ́. Ɛ́ nɛ́ Zʋwabɛ bɩr mʋ́ Zerizalɛmɛ. 16 Siiri nɩɛ nóó rɩ́ Ɩzrayɛl nɩɛ wówó, ɛ́ nɛ́ ɓa tʋŋ nɩɛ rɩ́wɔ́ mʋ́ yɩ́rɛ Siiri nɩɛ ná há mɩŋ Ɩfɩratɛ mʋnaa daarɛ́. Hadadezɛɛrɛ lalyoore kuóro Sofakɛ nɛ́ fa mɩ́ŋwɔ́ sɩ́ɛ́. 17 Davidi nɩ́wɔ́ koe ná wɩ́ɛ́; ɛ́ nɛ́ ʋ yɩ́rɛ Ɩzɩrayɛl lalyoore wuu hé náŋá mɛ́, ɓa zʋ Zʋrdɛŋ mʋnaa lɛ, a mʋ́ pérwó, a cɛ́ cáásɩ́wɔ́ rɩ́wɔ́ yo lal. 18 Amá Siiri nɩɛ fá Ɩzɩrayɛl nɩɛ sɩ́ɛ́ mɛ́. Davidi rɩ́rʋ́ nɩɛ ɓʋ́ʋ́sɩ́wɔ́ lalyóórítórkowa tɩ́náwa nɩɛ bʋ́ɩ́walpɛ (7000), a ɓʋ́ʋ́sɛ lalyoore ná háá va naasɛ má bʋ́ɩ́ mɛɛ́sɛllɛ (40 000); ɓa ɓʋ́ʋ́ lalyoore kuóro Sofakɛ. 19 Hadadezɛɛrɛ kuówɩɛla wuu há néé rɩ Ɩzɩrayɛl nɩɛ yóó díwó, ɓa kúó saŋ múúríwó tɩɩ pá Ɩzɩrayɛl nɩɛ, ká sʋl rɩ́ tɛŋfɩ́ɛ́l mɩ́ŋwɔ́ pɛ́kɛ. A pɔ́ ɛ́ tɛ́ŋ mɛ́ nɛ́ Siiri nɩɛ fɩ́fá Amɔŋ nɩɛ mɛ́ pɛ́ɛ́ héwíŋ.