Davidi dí ballɩ́ duowa ná há kílú nyúú
18
1 Ɛ́ wɩ́ɛ́ har mɛ́, Davidi yóó dí Filisiti nɩɛ, a múúríwó; a lá Gatɛ tɔ́ɔ́, rɩ́rʋ́ kílo tɔ́wɩ́ɛ́la. 2 Ʋ yóó dí Mʋwabɛ nɩɛ má. Ɓa mɩ́nʋ́ nɛ́sɛ mɛ́, ʋ a ɓa túŋ loŋpó aá pɔ́ʋ́. 3 Davidi yóó dí Hadadezɛɛrɛ há ká Soba kuóro, Hamatɛ caasɛ́ rɩ́, tɛ́ŋ ná mɛ́ ʋ há mʋ́ɛ́ rʋ́ʋ́ la Ɩfɩratɛ mʋnaa. 4 Davidi la Hadadezɛrɛ lalyóórítórkowa bʋ́ɩ́ (1000), zákzɩ́nna bʋ́ɩ́walpɛ (7 000). Sóóji navalla bʋ́ɩ́ mɛrɛ́ (20 000). Ʋ ɔ́ɔ́ ɓa lɩ́sɛ záksɛ peri zɔlɔ rɩ́wɔ́ tórkowa tá, ká a ɓa kʋ́sɛ záksɛ ná náŋa napole conni. 5 Siiri nɩɛ ná há lɛ́ Damasɛ ísó ko pɛ́ Soba kuóro Hadadezɛɛrɛ mɛ́. Ɛ́ nɛ́ Davidi yóó ɓʋ́ʋ́sɩ́wɔ́ nɩɛ bʋ́ɩ́ mɛrɛ́ rɩ́ bɛllɛ. 6 Davidi bíl sóóji púlli Siiri nɩɛ tɔ́nɛ mɛ́, Siiri nɩɛ bɩ́rmʋ́ tʋtʋnna, a túŋ loŋpó aá pɔ́ʋ́. Nyuutɩna Wɩɩsɛ pɛ́ Davidi mí, ʋ há mʋ́ ráŋ ná wuu yo lal, ʋʋ́ dí dóé. 7 Kuóro Hadadezɛɛrɛ lalyoore hɔkɛ́rɛ wuu fa ká salmɛ nɛ́, Davidi lɔ́wɔ́ wuu a kaa mʋ́ Zerizalɛmɛ. 8 Ʋ zʋ́ Hadadezɛɛrɛ tɔ́nɛ bɛllɛ sɩɛrʋ: Tibatɛ rɩ́ Kuŋ, a pa kɔmɔ́ cɩksɛ má ɓɩkana. Ɛ́ kɔmɔ́ nɛ́ Salomɔŋ pii bɩrmɛ, Wɩɩsɛ jaa nafarsɛ rɩ́ naŋtáŋzeno ná arɩ́ cɩksɛ ná ɓa há kené aá tʋŋ Wɩɩsɛ jaa mɛ́. 9 Hamatɛ nɩɛ kuóro Tohu sɩɛ́ nɛ̃, rɩ Davidi yóó dí Soba kuóro Hadadezɛɛrɛ lalyoore wuu. 10 Ɛ́ nɛ́ ʋ tʋ́mʋ́ bio Hadorammɛ, rʋ́ʋ́ mʋ́ bɔ́llɛ Davidi, ká bʋlʋ́ á wérí, ʋ há yó lal rɩ́ Hadadezɛɛrɛ, a yoo dúú. Bee wɩ́ɛ́, Tohu rɩ́ Hadadezɛɛrɛ faá yo náŋá rɛ́. Hadorammɛ pɛ́ pa salmɛ oŋbɩrmɛ́ rɩ́ wárɛ oŋbɩrmɛ́ arɩ́ kɔmɔ́ oŋbɩrmɛ́, a kaa mʋ́ pá Davidi. 11 Kuóro Davidi lɔ́wɔ́ a pii pá Nyuutɩna Wɩɩsɛ, anɛ ʋ há lá sɩ́ɛ́ pi wárɛ rɩ́ salmɛ ná, ʋ há yóé la duowa ná rɩ́; Edɔmmɛ nɩɛ rɩ́ Mʋwabɛ nɩɛ, Amɔŋ nɩɛ rɩ́ Filisiti nɩɛ arɩ́ Amɛlɛkɛ nɩɛ rɩ́; a pii pá Nyuutɩna Wɩɩsɛ ɛ́. 12 Abisayi ná maá há ká Seruya yóó dí Edɔŋ nɩɛ yɛsɛ polo sɩɛrʋ. A ɓʋ́ʋ́sɩ́wɔ́ nɩɛ bʋ́ɩ́ fí ríí córi (18 000). 13 Ʋ bíl sóóji púlli, Edɔŋ tíé wuu mí. Edɔŋ nɩɛ wuu bɩ́rmɛ Davidi tʋtʋ́nná. Davidi há yó lal mʋ́ lɛ ráŋ ná wuu, Nyuutɩna Wɩɩsɛ sáŋʋ́ mɛ́, ʋ dí dóé.Davidi har nɩɛ wɩ́ɛ́
14 Davidi dí kuorí Ɩzɩrayɛl wuu nyúú. Ʋ faá tʋŋ yɛ́rɛ́ arɩ́ taŋá, aá pɔ́ʋ́ nɩɛ wuu. 15 Zʋwabɛ ná maá há ká Seruya nɛ́ kɔ́ʋ́ lalyoore nyúútɩ́na; Ahiluudi bio Zozafatɛ nɛ́ kɔ́ʋ́ nʋɔ wɩ́laabʋllɔ; 16 Ahituub bio Sadɔkɛ rɩ́ Abiyataarɛ bio Ahimelɛkɛ nɛ́ fa ká vʋk'ɔɔsa; ká Sabsa nɛ́ a kɛŋpʋ́ŋsɔ; 17 Yehoyada bio Benaya nɛ fa ká Keretɛ rɩ́ Peletɛ nɩɛ ná háá pɔ́ Davidi mí nyúútɩ́na; Davidi bɛlɛ nɛ́ ká dʋŋdʋ́ʋ̃́ nɩɛ ná há tʋ́kʋ́ mɛ́.