Nataŋ lá Wɩɩsɛ nʋɔ wɩ́ɛ́ bʋl pá Davidi
17
1 Davidi há kenú jaa mɛ́, ʋ bʋ́l Wɩɩsɛ wɩ́laabʋllɔ Nataŋ rɩ́ bʋlɛ́: Sɛɛdɩrɛ daasɛ jaa nɛ́ ŋ zʋ́zʋ, ka Nyuutɩna Wɩɩsɛ nʋtʋmɛ dáka ná mɩŋ táŋtɛ sɩɛrʋ. 2 Ɛ́ nɛ́ Nataŋ bʋl Davidi rɩ́ bʋlɛ́: A wɩ́ɩ́ ná wuu ɩ háá bɩ́ɩ́nɩ́ sɩɛrʋ, bee wɩ́ɛ́ Nyuutɩna Wɩɩsɛ mɩ́nɩ́ har. 3 Amá ɛ́ kal tɩɩ tɩ́taŋ, Wɩɩsɛ liŋó bʋ́l Nataŋ rɩ́ bʋlɛ́: 4 Mʋ́ bʋl páŋ tʋtʋnnɔ Davidi a bʋlɛ́: Ná Nyuutɩna Wɩɩsɛ há sʋ́ʋ́ ná: Ɩ ra wɩ jaá sɔ́ɔ́ páŋ, rɩ́ŋ zʋ mɩŋ ráŋ. 5 Ŋ há lɩ́sɛ Ɩzɩrayɛl nɩɛ Ezipiti mí, a káŋwɔ́ vaa ko aá lɛ zaa, ŋ wɩ jaa sɩɛrʋ pɩ́nɛ́; amá ŋ lɛ́ kɛnɔ lɔ́k mɛ́ nɛ́ a zʋ kɛnɔ lɔ́k. 6 Tɛ́ŋ ná wuu mí, ŋ rɩ́ Ɩzɩrayɛl nɩɛ wuu há valɛ́, ŋ há bʋ́l wɩ́ɩ́ ɓa kuóre ná ŋ há lɩ́sɛ, rɩ́wɔ́ ka Ɩzɩrayɛl nɩɛ vɩ́va oro rɩ́ɩ́ rɛ́, a bʋlɛ́: Beé rí tɛ́, ɩ́ wɩ sɛɛdɩrɛ daasɛ jaa sɔ́ɛ́ páŋ>> 7 Ɛ́ wɩ́ɛ́, mʋ́ bʋl páŋ tʋtʋnnɔ Davidi, a bʋlɛ́: Ná Nyuutɩna Wɩɩsɛ Doewuutɩna há sʋʋ ná: Ɩ faá nʋɔlɛ pieŋse ní, ŋ ko lɩ́sɩ́ pieŋse ná har, a kánɩ́ ko pi Ɩzɩrayɛl nɩɛ há káŋ nɩɛ, kuorí pɛ́ɩ́. 8 Ŋ fa mɩ́nɩ́ har, ɩ dɩmʋ́ɔ́ wuu mí. Ŋ yóó díí dɩŋdɔma wuu pɛ́ɩ́. Ŋ sɩ́ a rɩ́ɩ́ yɩr lɛ, anɛ dúníé kuóre zeŋse yɩra. 9 Ŋ sɩ́ bɩrmɛ dɩhɩ̃́ pá Ɩzɩrayɛl, há káŋ nɩɛ, a káŋwɔ́ ko bil, rɩ́wɔ́ ké ráŋ, ká sɩ́ wɩ́ɩ́ wuu fá; rɩ́ nɩtɩɛnnɛ báá sʋ́ʋ́ fɩ́fɩ́ɩ́sʋ́ anɛ tésíé mí. 10 A pɔ́ tɛ́ŋ ná mɛ́, ŋ há bíl sarɩ́yadííre, ɓa bíbel Ɩzɩrayɛl ŋ nɩɛ mɛ́, ŋ ɔ́ɔ́ ɩ dɩŋdɔma wuu dí hɩɩ̃sɛ, ká ŋ bʋl rɩ́ŋ é Nyuutɩna Wɩɩsɛ nɛ́ sɩ́ sɔ jaa pɛ́ɩ́. 11 Rɩɩ tíé nyúú tápʋlɛ nɛ́ césé, rɩ́ɩ́ ko mʋ́ɩ́ ánáwa rɩ́ má, ŋ sɩ́ a rɩ́ɩ́ tɩɩ bilʋlɩ́, ɩ duo sɩɛrʋ dí kuorí, ká rɩ́ŋ a rʋ́ʋ́ kuorí nalure zʋ tíé. 12 Ʋ nɩ́ɩ́ ísí sɔ jaa rɩ́ɩ́ páŋ, ká rɩ́ŋ a rʋ́ʋ́ kuorí sɩ́ kuótokí a. 13 Ŋ sɩ́ ɔ́ʋ́ áná, ká rʋ́ʋ́ má áŋ bio. Ŋ wʋ́ʋ́ har lɩ́ɩ́ ná, anɛ ŋ fa há lɛ́ kuóro ná há lɛ́ɩ́ sɩ́ɛ́ har ɛ́. 14 Ŋ sɩ́ a rʋ́ʋ́ kéníŋ jaa mɛ́ arɩ́rɩ́ŋ kuódɩtɩ́llɛ mɛ́, a kaá mʋ́ wuu, ʋ kuorí waá tokí ná. 15 Nataŋ bʋl wɩ́ɛ́ ná wuu rɩ́ wɩ́náálɛ né wuu a pá Davidi.Davidi wɩsʋlɔ́ wɩ́ɛ́
16 Ɛ́ nɛ́ kuóro Davidi isi zʋ Nyuutɩna Wɩɩsɛ jaa, a kénú sɩ́ɛ́ ká bʋlɛ́: Ŋ ká béé Nyuutɩna Wɩɩsɛ, ŋ jaa é mɩ́ŋ nɛ́ɛ́, ɩ cúólíŋ mɔ nyɛ>> 17 Kɛ́ɩ́ bel rɩ ɛ́ má ha múúró rí, oo Wɩɩsɛ, ɩ sɩ́ɛ́ mɛ́. Ŋ é ɩ tʋtʋnnɔ, ɩ bʋ́lɩ́ŋ cíé jaa nɩɩsɔ wɩ́ɛ́. Nyuutɩna Wɩɩsɛ ɩ bélíŋ rɩ́ŋ ká nɩpiŋí rí! 18 Rɩ́ŋ má Davidi baa bʋl bee súúri píŋ né ɩ há píé páŋ mɛ́>> Ɩ ɩ̃́ŋ, ŋ é ɩ tʋtʋnnɔ. 19 Nyuutɩna Wɩɩsɛ, ŋ é ɩ tʋtʋnnɔ wɩ́ɛ́ nɛ́, ɩ tɩ́ŋɩ́ sawér wɩ́ɛ́, a a wɩ́zeŋsi nyáŋ wuu, rɩ́ nɩɛ zɩ́ŋwɔ́ mɛ́! 20 Nyuutɩna Wɩɩsɛ nɛ́ŋ wuu toó a nɩ̃ɩ́; Wɩɩsɛ nɔ́ŋ wuu tóó, rɩɩ dʋŋɔ rá, á dɩlla nɩɩ mɛ́. 21 Tíé nyúú wuu mí, duó nɔ́ŋ rɛ́ mɩnɛ́ a nɛ́ Ɩzɩrayɛl, ɩ nɩɛ, wɩɩsɛ nɔ́ŋ mʋ́ lɩ́sɩ́wɔ́ ɓa ɔ́ɔ́ nɩɛ́>> Ɩ a wɩ́zeŋse, wɩ́ɛ́ ná há kéŋ héwíŋ, ɩ yɩr lɛ; ɩ kirí duówa, ɩ nɩɛ ná ɩ há lɩ́sɛ Ezipiti mí, sɩ́ɛ́ mɛ́. 22 Ɩ ɔ́ɔ́ Ɩzɩrayɛl nɩɛ ɛ́ɩ́ nɩɛ a kaá mʋ́ wuu. Ká ɩ é Nyuutɩna Wɩɩsɛ, ɩ ɔ́wɔ́ Wɩɩsɛ. 23 Ɛ́ wɩ́ɛ́, Nyuutɩna Wɩɩsɛ, ɩ há bʋ́l wɩ́ɩ́ ná a mʋ́ tɩ́ɩ́nɩ́ŋ mɛ́, ɩ tʋtʋnnɔ rɩ́rɩ́ŋ jaa mɛ́, lo rɩ́ ɛ́ wɩ́ɩ́ nʋɔ sú a kaá mʋ́ wuu! Tʋŋ ɛ́, a nɩ́ɩ́ há bʋlɛ́. 24 Rɩ́ ɛ́ tʋŋ, rɩ́ɩ́ yɩr a yɩzení a kaá mʋ́ wuu rɩ́wɔ́ bʋlɛ́: Nyuutɩna Wɩɩsɛ, Doewuutɩna, Ɩzɩrayɛl Wɩɩsɛ nɛ́ ká Ɩzɩrayɛl Wɩɩsɛ! Rɩ́ŋ é Davidi, ɩ tʋtʋnnɔ jaa sɩ́ tókú ɩ sɩ́ɩ́ mɛ́! 25 Bee wɩ́ɛ́, ŋ Wɩɩsɛ, ɩ tɩɩ nɛ́ bʋlɛ́ páŋ, rɩ́ɩ́ sɩ́ sɔ́ jaa páŋ. Ɛ́ nɛ́ tɛ ŋ naasɛ duórí, ŋ kení sɩ́ɛ́ aá sʋ́lɩ́. 26 Mʋ́l né mí, Nyuutɩna Wɩɩsɛ, ɩ nɛ́ ká Wɩɩsɛ a bʋl wɩ́wero né wɩ́ɛ́ páŋ é, ɩ tʋtʋnnɔ. 27 Mʋ́l né mí, ɩ hé bárka ŋ jaa mɛ́, a makɛ rʋ́ʋ́ sɩ́ tókú ɩ sɩ́ɛ́ mɛ́! Bee wɩ́ɛ́ ɩ é Nyuutɩna Wɩɩsɛ nɛ́ hé bárka, omo ná sɩɛ́ ɩ há hé bárka, ʋ kéŋ bárka a kaá mʋ́ wuu.