Lalyóóríbibara ná há mʋ́ Davidi rɩ́ Siklagɛ mɛ́
12
1 Davidi há fá Kiisi bio Sayul sɩ́ɛ́ a mʋ́ féŋsi Siklagɛ mɛ́; ná, lalyóóríbibara ná há tɩ́ŋʋ́ har ko, rɩ́wɔ́ pɔ́ʋ́ mɛ́ a yo lal; 2 Ɓa fa ká túyoore ní; a zɩŋ néduu rɩ́ nɛ́gʋɔ kaa yó dɔ́wʋ́ɔ́ rɩ́ túó weri. Ɛ́ nɩɛ wuu ka Sayul maábináŋa ná há lɛ́ Bɛŋzamɛ jɩmʋl nɛ́. 3 Ɓa nyúútɩna nɛ́ ká Ahiezɛɛrɛ. Ahiezɛɛrɛ rɩ́ Zʋwasɛ áná nɛ́ ká Sema há lɛ́ Gibeya. Azɩmavɛtɛ bɛlɛ Yezɩɛl rɩ́ Pelɛtɛ rɩ́ Baraka rɩ́ Yehu há lɛ́ Anatɔtɛ, 4 Isemaya há lɛ́ Gabaɔŋ, ʋ ká lalyoóríbibara mɛrɛ́ rɩ́ fí ná nɔ́ŋɔ nɛ́ kɔ́wɔ́ nyúútɩna má; 5 Zeremi rɩ́ Yahazɩɛl rɩ́ Yohanaŋ arɩ́ Yozabadɛ há lɛ́ Gedera, 6 Eluzayi rɩ́ Yerimɔtɛ, Belɩya rɩ́ Semariya arɩ́ Sefatɩya há lɛ́ Haruf, 7 Koore dunɩɛ: Ɛlkana rɩ́ Isiya rɩ́ Azarɩyɛl rɩ́ Yohezɛɛrɛ, rɩ́ Yasobammɛ; 8 rɩ́ Gedɔɔrɛ tɩ́náwa báálɔ Yerohammɛ bɛlɛ: Yohela, rɩ́ Zebadiya. 9 Gaadɛ jɩmʋ́l sɩɛrʋ lalyóóríbibara náŋa kó pɛ́ Davidi mí gɩrbétéke ná sɩɛrʋ ráŋ ná ʋ há féŋse. Ɓa ɛ́ nɩɛ fa mal lal yóé, ɓa kéŋ dóé anɛ kɩ́ŋkánáwa ká bíérí fɛ́ɛ́ mɛ́ anɛ pallɛ wɩɛmawa. Ɓa kéŋ hɔkɛ́rzeŋsɛ rɩ́ cɔlma. 10 Ezɛrɛ nɛ́ fa káwɔ́ nyúútɩna, Abdɩyasɛ a bʋllɛ nyúú mí nɛrɔ, Ɩlɩyabɛ a botoro nyúú mí nɛrɔ, 11 Mismana a baná nyúú mí nɛrɔ, Zeremi a bɔmmʋ́ɔ́ nyúú mí nɛrɔ, 12 Atayi a balgo nyúú mí nɛrɔ, Elɩyɛl a balpɛ nyúú mí nɛrɔ, 13 Yohana a córí nyúú mí nɛrɔ, Elzabaadɛ a nɛ́mɛ́ nyúú mí nɛrɔ, 14 Zeremi a fí nyúú mí nɛrɔ, ká Makbanayi a fí rí oro nyúú mí nɛrɔ. 15 Gaadɛ nɩɛ nyáŋ fa ká lalyoore nyúútɩ́náwa nɛ́. Ɓa sɩɛrʋ ɓɩwie dóé pérí lalyoore zɔlɔ, ka ɓa sɩɛrʋ ɓɔhɔ̃́ dóé pérí lalyoore bʋ́ɩ́. 16 Ɓa nɩɛ nyáŋ nɛ́ daarɛ Zʋrdɛŋ fuo tɛŋ ná mɛ́ ʋ há sué wáálɛ; a kiri nɩɛ ná wuu há mɩŋ polo nʋɔ wɩɩsɛ dɩpomí rɩ́ wɩɩsɛ dɩzʋʋlɩ́ rɩ́ cɔɔ. Bɩna sɩɛrʋ dʋ́ŋdʋʋ̃́ cana mí nɛ́. 17 Ɛ́ nɛ́ Bɛŋzamɛ nɩɛ náŋa rɩ́ Ziida nɩɛ náŋa má isi mʋ́ Davidi dɩféŋsi ná. 18 Davidi ko lɩɩ cɩŋwɔ́ sɩ́ɛ́ a bʋlwɔ́ rɩ́ bʋlɛ́: «Rɩɩ́wa nɛ́ kéŋ sabɩŋwero kó rɩɩ́wa pɛ́ŋ mɛ́, á sɩ́ hé náŋá mɛ́. Amá, rɩ́ɩ́wa kúó rɩɩ́wa kanɩ́ŋ páŋ dɩŋdɔma nɛ́, kaŋ wɩ wɩ́bɔ́ŋ ɛ́, rá naabálwa Wɩɩsɛ nɛ́ árá pɛ́kɛ sarɩ́yadííro a bɛ́ŋsɩ́wa.» 19 Ɛ́ nɛ́ Wɩɩsɛ sabɩɩna tuwi lalyóóríbibara mɛrɛ rɩ́ fí nyúútɩ́na Amasayi nyúú, ʋ cáási bʋlɛ́: «Izayi bio DavidiÁ kɛ́ɩ́ nɩɛ nɛ́
Á mɩ́nɩ́ har
rɩ́ tɛŋfɩ́ɛ́l pérí, a peri nɩɛ ná má há mɩ́nɩ́ har!
Bee wɩ́ɛ́, ɩ Wɩɩsɛ nɛ́ yóé lal. Ká Davidi láwɔ́ ɓa ɔ́ɔ́ sóójɩwa nyúútɩ́náwa. 20 Manase jɩmʋ́l nɩɛ kúó pɛ́ Davidi mí, tɛ́ŋ ná mɛ́ Filisiti nɩɛ rɩ́ Davidi há kéŋwó tɩɩ rɩ́wɔ́ yo Sayul. Amá Filisiti nɩɛ kuóre wɩ sáŋɛ́ rɩ́ Davidi rɩ́wɔ́ lalyoore mʋ́ lal ná dɩyóé: «Ɓa sɛ́, ʋ wɩ mɔhɛ̃ rʋ́ʋ́ tɩ́ŋrá mɛ́ mʋ́ lal ná dɩyóé, bee wɩ́ɛ́ lal ná yoe tɛ́ŋ mɛ́ ʋ wolo bɩrɛ aá sáŋʋ́ nyúútɩ́na mɛ́ aá yórá. 21 Tɛ́ŋ ná mɛ́ Davidi ha bɩrɛ aá mʋ́ Sɩklagɛ, Manase jɩmʋ́l nɩɛ kúó súúrú lalyoore mí. Ɓa yɩra nɛ́ nyɛ́: Adɩna, Yozabadɛ rɩ́ Yedɩyɛl rɩ́ Mɩsɛl rɩ́ Yozabadɛ rɩ́ Elɩhu rɩ́ Sɩletayi arɩ́ Manase sóójɩwa bʋ́ɩ́ bʋ́ɩ́wa nyúútɩ́náwa. 22 Ɛ́ nɩɛ wuu ká lalyóóríbibara rɛ́ a ko pɛ́ Davidi rɩ́rʋ́ lalyoore mí, ɛ́ nɛ́ Davidi lɩ́sɩ́wɔ́ ɓa a lalyoore sɩ́dííre. 23 Kal wuu, nɩɛ kúó aá suurí Davidi mí, ɓa a ɓɩkáná mɩ́nʋ́ har a nɛ̃ Wɩɩsɛ púl nɩɛ.
Lalyoore ná há kúé súúri Davidi mí Ɩbrɔŋ mɛ́
24 Ná lalyoore ná nʋɔ há kúó pɛ́ Davidi mí Ɩbrɔŋ mɛ́ rɩ́wɔ́ yó la kuóri Sayul rɩ́, a pá Davidi, anɛ ɛ́ Nyuutɩna Wɩɩsɛ fa há sʋ́ʋ́ sɩ́ la. 25 Ziida jɩmʋ́l sɩɛrʋ, lalyoore bʋ́ɩ́walgo rɩ́ zɔlɔ córí (6 800) ní, a ka hɔkɛ́rzeŋse rɩ́ cɔlma. 26 Sɩmɩyɔŋ jɩmʋ́l sɩɛrʋ lalyoore bɩbara bʋ́ɩ́walpɛ rɩ́ zɔlɔ (7 100). 27 Levi jɩmʋ́l sɩɛrʋ báála bʋ́ɩ́wʋná zɔwalgo (4 600), 28 a pi Aarɔŋ duo báálɔ Yoyada má rɩ́rʋ́ báála bʋ́ɩ́toro zɔlwalpɛ (3 700); 29 a sɩɛ́ pi lalyooro bɩbar heŋbiwafɛlɔ Sadɔkɛ rɩ́rʋ́ jaa lalyoore mɛ́rɛ́ rɩ́ bɛllɛ (22). 30 Bɛŋzamɛ jɩmʋ́l há ká Sayul duo sɩɛrʋ, ɓa báála bʋ́ɩ́toro (3000). Ɓa dɩkáŋ nɛ́ fa tʋ́mɛ́ pá Sayul, a kaa ko lɛ zaa. 31 Ɩfɩrayɩŋ jɩmʋ́l sɩɛrʋ, lalyoore bɩbara bʋ́ɩ́ mɛrɛ́ rɩ́ zɔlɔ córí (20 800); ɛ́ nɩɛ wuu fa ka nɩyɩ́rá rɛ́ ɓa jɩɩsɛ mɛ́. 32 Manase jɩmʋ́l fá ná há mɩŋ wɩɩsɛ dɩzʋʋlɩ́ rɩ́, ɓa báála bʋ́ɩ́ fí rí córí (18 000). Ɓa nɛ́, ɓa lɩ́sɛ rɩ́wɔ́ mʋ́ bil Davidi rʋ́ʋ́ dí kuorí. 33 Ɩsakaarɛ jɩmʋ́l sɩɛrʋ sóóji hɩ́ɛ̃́sɛ zɔwɛllɛ (200) rɩ́wɔ́ tʋtʋnna, ɓa wuu ka nɩɛ ná há ɛ̃ wɩ́ɛ́ cɛ́rsɛ, a rɩ́ wɩ́ɛ́ ná Ɩzɩrayɛl nɩɛ há mɔhɛ̃ rɩ́wɔ́ a. 34 Zabɩlɔŋ jɩmʋ́l sɩɛrʋ, báála ná há ɩ̃́ lal wɩ́ɛ́ weri, a wóllí lalyooricɩksɛ rɩ́wɔ́ duo wuu kaá tʋ́mɛ́ weri; a káŋwɔ́ tɩɩ rɩ́wɔ́ yo lal rɩ́wɔ́ sɩɛrʋ wuu; nɛ́ nɩɛ bʋ́ɩ́mɛɛ́sɛllɛ rí fí (50 000). 35 Nɛftalɩ jɩmʋ́l sɩɛrʋ, sóójihɩɛ̃́sɛ bʋ́ɩ́ (1000), arɩ́ sóójiwa há kéŋ hɔkɛ́rzeŋsi rɩ́ cɔlma má bʋ́ɩ́ mɛrɛ́ rɩ́ fí rɩ́ balpɛ (37 000). 36 Daŋ jɩmʋ́l sɩɛrʋ, sóójiwa bʋ́ɩ́ mɛrɛ́ rɩ́ córí arɩ́ zɔwalgo (28 600) ní kéŋwó tɩɩ lal yoé mí. 37 Asɛɛrɛ jɩmʋ́l sɩɛrʋ sóójiwa bʋ́ɩ́ mɛɛ́sɛllɛ (40 000) há ɛ̃ lal yo weri ní kéŋwó tɩɩ rɩ́wɔ́ yó lal. 38 Rubɛŋ jɩmʋ́l rɩ́ Gaadɛ jɩmʋ́l rɩ́ Manase jɩmʋ́l fá ná sɩɛrʋ, ɓa nyáŋ nɛ́ mɩ́ŋ Zʋrdɛŋ fuo wɩɩsɛ dɩpomí rɩ́ cɔɔ. Ɓa má lalyoore ná há kéŋ lalyóórícɩksɛ nɛ́ báála bʋ́ɩ́ zɔlɔ rɩ́ mɛrɛ́ (120 000). 39 Ɛ́ lalyoóre wuu há kéŋwó tɩɩ lal yoe mí, rɩ́ Ɩzɩrayɛl nɩkáánɛ ná wuu nɛ́ kúé hé náŋá mɛ́ Ɩbrɔŋ mɛ́, a vʋʋrɛ tʋŋ nʋɔ mɛ́, a pi kuorí pá Davidi rɩ́wɔ́ sɩɛrʋ wuu. 40 Lalyoore ná wuu kúó ké Davidi laka Ɩbrɔŋ mɛ́, ɓa maábináŋa a ɓɩdííle rɩ́ nyɔɔlɔ́ pɔ́wɔ́ ráŋ, ɓa dí kaá nyɔ tápʋlɛ́ botoro. 41 Tɔ́nɛ ná há kílíwó nɩɛ, a lɛ́ Isakaarɛ jɩmʋ́l sɩɛrʋ rɩ́ Zabɩlɔŋ jɩmʋ́l arɩ́ Nɛfɩtalɩ jɩmʋ́l sɩɛrʋ, cɩ́ɩ́nɛ ɓɩdííle rɩ́ kokusi, zɔ́nɛ, nyʋ́kmawa, kokúme ká zɔɔwa, rɩ́ nɛsɛ, a kaa ko pá Davidi: Ɓa nɛ́ ká míŋ, ɛlɛnɔŋhɩlɛ́ rɩ́ pirnɔŋhɩlɛ́ rɩ́ dɩvɛŋ rɩ́ nʋʋ rɩ́ nɛsɛ arɩ́ pieŋse, a kaa ko pá Davidi. Bee wɩ́ɛ́, tɔ́ɔ́ ná wuu mɩŋ tɛŋfɩ́ɛ́l rɩ́ satɔrɔ́ mɛ́.