Davidi dí Ɩzɩrayɛl wuu kuóri
11
1 Ɩzɩrayɛl nɩɛ wuu ísó ko Davidi rɩ́ Ɩbɩrɔŋ mɛ́, a bʋ́lʋ́ rɩ́ bʋlɛ́: Á rɩ́rɩ́ nɛ́ ká duo, a a jaá má. 2 Tɛ́ŋ ná mɛ́ Sayul fa há ká kuóro, ɩ nɛ́ fa dí Ɩzɩrayɛl lalyoore sɩ́ɛ́ a káŋwɔ́ lɩɩ yo lal, ká bɩr káŋwɔ́ aá ko. Nyuutɩna Wɩɩsɛ sɩɛ́ fa bʋ́lɔ́ pɛ́ɩ́ bʋlɛ́: «Ɩ nɩ́ɩ́ á rɩ́ɩ́ nʋɔlɛ Ɩzɩrayɛl nɩɛ há káŋ nɩɛ, ɩ nɛ́ sɩ́ a sɩ́dííro». 3 Ɩzɩrayɛl nɩhɩɛ̃́sɛ ná wuu há kó Ɩbɩrɔŋ Davidi rɩ́, ʋ bíl nʋtʋmɛ ʋ rɩ́wɔ́ pɛ́kɛ, Nyuutɩna Wɩɩsɛ sɩ́ɛ́. Ɓa ɔ́ŋsɛ lɩ́sɛ nʋʋ hóú mí, a pí Ɩzɩrayɛl kuóri pɔ́ʋ́, anɛ ɛ́ Samɩɛl fa há lá Nyuutɩna Wɩɩsɛ nʋɔ wɩ́ɛ́ bʋl.Davidi yóó lá Zerizalɛmɛ
4 Davidi rɩ́ Ɩzɩrayɛl nɩɛ wuu mʋ́ɔ́ rɩ́wɔ́ yó Zerizalɛmɛ ná yɩr nɔ́ŋɔ há ká Zebuuzi. Ráŋ nɛ́ fa Zebuuzi nɩɛ mɩ́ŋ. 5 Ɛ́ nɛ́ Zebuuzi nɩɛ bʋl Davidi rɩ́ bʋlɛ́: «Ɩ wɩ́ rɛ́ɛ́ zʋ!» Amá Davidi yóó a la Sɩɔŋ há káwɔ́ tɔ́ɔ́ ballɩ́ dɩdíí, ɓa kaá yɩ́rɛ Davidi zʋ́ɔ́. 6 Davidi fa sɛ́: «Lályooro ná há sɩ́ la sɩ́ɛ́ ɓʋ́ Zebuuzi nɛrɔ, ʋ nɛ́ rɩ́ŋ lɩ́sɛ rʋ́ʋ́ áŋ lalyoore nyúútɩna, a láwɔ́ sɩ́ɛ́.» Ɛ́ nɛ́ Zʋwabɛ nɛ́ la sɩ́ɛ́ mʋ́ yówó, ʋ lɩ́sʋ́ ʋ ɔ́ɔ́ lalyoore sɩ́dííro. Ʋ maá yɩ́r nɛ́ ká Seruya. 7 Davidi ké tɔ́ɔ́ ná ballɩ́ dɩdíí ní, ɛ́ nɛ́ tɛ ɓa kánʋ́ aá yɩ́rɛ Davidi zʋ́ɔ́. 8 Ʋ ɛ́ har mɛ́, Davidi bɩ́rɔ́ sɔ zɔ́nɛ ná há kíl tɔ́ɔ́ ná, a ká mʋ́ yakɛ dúŋdúóŋ ná ɓa háá yɩ́rɛ Milo kílo mí, ká Zʋwabɛ bɩrmɛ tɔ́ɔ́ ná kaanɛ. 9 Davidi dóé ɔ́sɔ́ aá súúri wuu, bee wɩ́ɛ́ Nyuutɩna há ká lalyoore wuu Wɩɩsɛ fa mɩ́nʋ́ har.
Davidi lalyóóríbɩbara
10 Ná Davidi lalyóóríbɩbara ná rɩ́ Ɩzɩrayɛl nɩɛ ná wuu há pɛ́ɛ́ Davidi mí, ʋ kuorí díí tɛ́ŋ mɛ́ anɛ ɛ́ Nyuutɩna Wɩɩsɛ wɩ́bʋlɛ há bʋ́lɛ́ tɩɩnɛ Ɩzɩrayɛl mɛ́. 11 Ná Davidi lalyóóríbɩbara ná yɩra: Hakmoni bio Yasobiyammɛ nɛ́ ká nɩɛ botoro púl nyúútɩna. Ʋ nɛ́ ɓʋ́ʋ́sɛ nɩɛ zɔtoro lal balá arɩ́ cɔlmɛ. 12 Eleyazarɛ nɛ́ tʋ́kʋ́ mɛ́, ʋ áná nɛ́ ká Dodo há lɛ́ Ahoha duo nɩɛ sɩɛrʋ. Ʋ ká lalyóóribibara ná botoro nɔ́ŋɔ nɛ́. 13 Ʋ nɛ́ ká bɩbar ná nɔ́ŋɔ há keŋ Davidi mʋ́ Pasdamimmi, ráŋ ná Filisiti nɩɛ há kué hé náŋa mɛ́ rɩ́wɔ́ yo Ɩzɩrayɛl nɩɛ. Ɛ́ kal Ɩzɩrayɛl lalyoore bɩ́rɔ́ fá Filisiti nɩɛ sɩ́ɛ́. Ɔ́rzɛ baka fa mɩŋ róŋ. 14 Eleyazarɛ rɩ́rʋ́ lalyoore sɩɛ́ fá zʋ cɛ́ ɔ́rzɛ baka ná mɛ́, a yoo la baka ná ká yoo dí Filisiti nɩɛ. Nyuutɩna Wɩɩsɛ la ballɩ́ ɓɩzeno a pá Ɩzɩrayɛl nɩɛ wérí. 15 Kal oro, sóójɩbibara mɛrɛ́ rɩ́ fí sɩɛrʋ, ɓa botoro tuwi Davidi rɩ́ Adulaŋ paalɔ bʋɔ sɩɛrʋ, ká Filisiti nɩɛ má ciki Refayimmi polo mí. 16 Tɛ́ŋ ná mɛ́ Davidi há féŋsi paalɔ bʋɔ ná sɩɛrʋ, rɩ Filisiti nɩɛ púl nɔ́ŋɔ fa mʋ́ɔ́ lá Beteleyɛmɛ a mɩ́ŋ róŋ. 17 Omo nɔ́ŋɔ hɩɛŋ ka Davidi, ɛ́ nɛ́ ʋ sɛ́: «Áŋ rɛ́ sɩ́ isi mʋ́, a a vil ná há mɩŋ Beteleyɛmɛ dánnʋɔ mɛ́ nyii, a kaa ko páŋ rɩ́ŋ nyɔ>>» 18 Ɛ́ nɛ́ sóójibɩbara ná botoro isi mʋ́ zʋ Filisiti nɩɛ púl ná sɩɛrʋ a lɛ, a a Beteleyɛmɛ dannʋɔ vil ná nyii kaa ko pá Davidi. Amá Davidi há lá nyii ná ʋ wʋ́ɔ́ nyɔɛ́ có, ʋ píwó bɩ́sɛ tá tíé a pá Nyuutɩna Wɩɩsɛ anɛ vʋk nyitáálɛ. 19 Ká bʋlɛ́: «Rɩ́ŋ Nyuutɩna Wɩɩsɛ ka nyii nyáŋ nyɔɛ bɩɩna kɛ́kɩ́ŋ mɛ́. Ɓa nɩhɩ̃́ nɩɛ ná há yówó mɩɩsɛ tá, a mʋ́ a nyii ná ko páŋ cɛ́l nɛ́. Ɛ́ nɛ́ ʋ wɩ có rʋ́ʋ́ nyɔ́wɔ́! Wɩ́ɩ́ ná bɩbara ná botoro há ɛ́ɛ́ nɛ́ ɛ́. 20 Zʋwabɛ maábinɔ́ŋɔ Abisayi nɛ́ fa kɔ́wɔ́ wuu botoro nyúútɩna. Ʋ nɛ́ kal oro púú cɔ́lmɛ, a cɔ́ksɛ dɩŋdɔma zotoro ɓʋ́ʋ́sɛ a la yɩr ɓa botoro ná sɩɛrʋ. 21 Bʋllɛ nyúú mí nɩɛ botoro ná sɩɛrʋ, ʋ nɛ́ lá píŋ, a ɔ́wɔ́ nyúútɩna. Amá ʋ wɩ dʋ́ŋdʋ́ʋ̃́ nɩɛ botoro ná péré. 22 Benaya há lɛ́ Kabɩsɛlɛ áná yɩr nɛ́ Yoyada; ʋ naabál fa ká lalyóóríbibár rɛ́, a a wɩ́piŋe ɓɩkana. Ɛ́ Benayahu nɛ́ ɓʋ́ Mʋwabɛ nɩɛ báduoru bɛllɛ. Ʋ nɛ́ ísé, kal oro a tuwi vil sɩɛrʋ a ɓʋ́ kɩ́ŋkáná, ɛ́ tɛ́ŋ mɛ́, rɩ waarʋ zénó, nyii pii ɓaŋ. 23 Ʋ nɛ́ báá ha ɓʋ́ Ezipiti nɩɛ báálɔ oro há pérí mɛ́ɛ́tɩr bɛllɛ rɩ́ fá má. Ɛ́ báálɔ fa kéŋ cɔlmɛ ʋ nɛ́sɛ mɛ́ ʋ nɛ̃ pɛŋsɔ́ɔ́rɔ vákuo, ká Benaya ka daa dʋŋɔ; a mʋ́ ka Ezipiti nɩɛ báálɔ ná cɔlmɛ la a púú cɔ́kʋ́ ɓʋ́. 24 Yoyada bio Benaya há tʋ́ŋ tʋtʋmɩ́ ná nɛ́ ɛ́. A lá yɩr ɓa bɩbara ná botoro sɩɛrʋ. 25 Ʋ lá yɩpiŋó kɩ́llɛ lalyóóribibara mɛrɛ́ rɩ́ fí ná wuu, ʋ taŋa wɩ dʋ́ŋdʋ́ʋ̃́ bɩbara ná botoro péré. Ɛ́ nɛ́ tɛ Davidi púú, ʋ a sóójɩwa ná há pɔ́ʋ́ mɛ́ nyúútɩna. 26 Ná sóójɩbibara ná náŋa yɩra: Zʋwabɛ maábio Asayɛl, Dodo bio Ɛlhana há lɛ́ Beteleyɛmɛ, 27 Samɔtɛ há lɛ́ Harɔɔrɛ, Hɛlɛsɛ há lɛ́ Palɔŋ, 28 Ikɛsɛ bio Ira há lɛ́ Tekoa, Abɩɛzɛɛrɛ há lɛ́ Anatɔtɛ, 29 Sibkayi há lɛ́ Husa, Ilayi há lɛ́ Ahua, 30 Maharayi há lɛ́ Nɛtɔfa, Baana bio Hɛlɛdɛ há lɛ́ Nɛtɔfa, 31 Ribayi bio Itayi há lɛ́ Gibeya, Bɛŋzamɛ dɩtɩ́llɛ, Benaya há lɛ́ Pɩratɔŋ, 32 Hurayi há lɛ́ Gaasɛ polcʋ́ɔ́rɛ, Abɩyɛl há lɛ́ típaŋtaŋŋɩ́, 33 Azɩmavɛtɛ há lɛ́ Bahurimi, Eliyaba há lɛ́ Salbɔŋ, 34 Hasɛmmɛ bɛlɛ há lɛ́ Giizɔŋ, Sage bio Zonataŋ há lɛ́ Haraarɛ, 35 Sakaarɛ bio Ahiyammɛ há lɛ́ Haraarɛ, Elifal bio Uur, 36 Hɛfɛɛrɛ há lɛ́ Mekera, Ahiya há lɛ́ Palɔŋ, 37 Hesiro há lɛ́ Karmɛl, Ezibayi bio Narayi, 38 Nataŋ maábinɔ́ŋɔ Zowɛl, Hagiiri bio Mɩbaarɛ, 39 Selɛkɛ há ka Amɔŋ dunɛrɔ, Narayi háá laalɛ Zʋwabɛ lalyóórí cɩksɛ a lɛ́ Berotɛ; Zʋwabɛ maá yɩr nɛ́ Seruya, 40 Ira há lɛ́ Yɛtɛɛrɛ jaa, rɩ́ Garɛɛbɛ má há lɛ ɛ́ jaa, 41 Uuri há lɛ́ Hiti duo sɩɛrʋ, Alayi bio Zabadɛ, 42 Siiza bio Adina há lɛ́ Rubaŋ jɩmʋ́l sɩɛrʋ ka a Rubaŋ jɩmʋ́l nyúútɩ́na rɩ́rʋ́ lalyoore mɛrɛ́ rɩ́ fí, 43 Maaka bio Hanaŋ, Zosafatɛ há lɛ́ Mitini, 44 Uziya há lɛ́ Asɩtarɔtɛ, Sama rɩ́ Yehɩɛl, ɓa áná nɛ́ ká Hotammɛ há lɛ́ Arɔyɛɛrɛ, 45 Siimri bio Yediyɛl, rɩ́rʋ́ maábinɔ́ŋɔ Yoha há lɛ́ Tiisi, 46 Elɩɛl há lɛ́ Mahava, Elnamɛ bɛlɛ Yeribayi rɩ́ Yosaviya, Itima há lɛ́ Mʋwabɛ, 47 Elɩɛl rɩ́ Ɔbɛdɛ rɩ́ Yasɩyɛl há lɛ́ Soba.