ƖZƖRAYƐL KUÓRO DAVIDI WƖ́Ɛ́
Kuóro Sayul sʋʋ wɩ́ɛ́
10
1 Filisiti nɩɛ yó Ɩzɩrayɛl nɩɛ. Ɩzɩrayɛl nɩɛ fá ká Filisiti nɩɛ ɓʋ́ʋ́sɩ́wɔ́ ɓɩkana Gilbowa paalɔ nyúú. 2 Filisiti nɩɛ kíró tɩ́ŋ Sayul rɩ́rʋ́ bɛlɛ mɛ́ bɩbarɩ́. Ɓa wólli ɓʋ́ kuóro Sayul bɛlɛ Zonataŋ, Abɩnadaabɛ, rɩ́ Malkisuwa. 3 Lal ná dúóró kɩ́ŋkáŋ a pá Sayul. Filisiti nɩɛ túyoore ko túkú mí, héwíŋ zʋ́ʋ́, ʋ cícélwó sɩ́ɛ mɛ́. 4 Ɛ́ nɛ́ Sayul bʋl nɛrɔ ná há láálʋ́ lalyóórícɩksɛ rɩ́ a bʋ́lɛ́: «Fókí tókowí a cɔ́kɩ́ŋ ɓʋ́, a makɛ rɩ́ Filisti nɩɛ, pɛŋkɛnnɛ tɩ́náwa nyáŋ sɩ́ koo bɛ́ŋsɩ́ŋ.» Amá nɛrɔ ná há láálʋ́ lalyóórícɩksɛ vɔ́ɔ́: Bee wɩ́ɛ́ héwíŋ cáásɔ́ zʋ́ʋ́ wérí. Ɛ́ nɛ́ Sayul púú tókowí a bɩr cɔ́ŋsɛ tíé ká ɓál cúú mí, a ɓʋ́ʋ́ tɩɩ. 5 Amá nɛrɔ ná há láálɛ Sayul lalyóórícɩksɛ há neé rʋʋ sʋ́wɔ́, ʋ má púú tókowí, a kaa bɩr cɔ́ŋsɛ tíé, a má ɓal cúú daha, a ɓʋ́ʋ́ tɩɩ. 6 Sayul rɩ́rʋ́ bɛlɛ ná botoro arɩ́rʋ́ jaa nɩɛ wuu sʋʋ naasɛ nɛ́ ɛ́. Ɓa wuu ní hé náŋá mɛ́ sʋsɛ.7 Ɩzɩrayɛl nɩɛ ná wuu há mɩŋ polo sɩɛrʋ, há néé rɩ́ Ɩzɩrayɛl lalyoore wuu fɔ́ɔ́, ká Sayul rɩ́rʋ́ bɛlɛ má sʋsɛ; ɓa fɔ́ɔ́ ká tɔ́wɔ́ tɔ́nɛ, Filisiti nɩɛ ko ké róŋ.
8 Ʋ tɔ́ɔ́ há pʋlɛ́, Filisiti nɩɛ há mʋ́ɛ́ rɩ́wɔ́ wúlli sʋsɛ, ɓa ná Sayul rɩ́rʋ́ bɛlɛ lɛlɛ Gilbowa paalɔ nyúú. 9 Ɓa wúlli Sayul gɛnnɛ wuu, ká cókú nyúú, a pɔ́ʋ́ lalyooricɩksɛ má. Ká ɓa a nɩɛ búóli labáárɛwero né Filisiti tɔ́ɔ́ wuu mí a pá venni rɩ́ nɩɛ wuu. 10 Ɓa bíl Sayul lalyóórícɩksɛ ɓa venni jaa mɛ́, ká ɓásʋ́ nyúgbaŋa Dagɔŋ jaa sɩɛrʋ.
11 Yabɛsɛ tɔ́ɔ́ nɩɛ ná wuu há mɩŋ Galaadɛ dɩtɩllɛ́ nɛ̃ wɩ́ɛ́ ná wuu Filisiti nɩɛ há píé a Sayul mí. 12 Tɔ́ɔ́ ná baŋcɩpɩrtɩɩna wuu mʋ́ pá Sayul rɩ́rʋ́ bɛlɛ lɛlɛ a kaá bɩrɛ ko Yabɛsɛ. Ɓa húwó heŋgbele Yabɛsɛ mɛ́, tuu ná ɓa háá yɩ́rɛ terebɛŋtɛ mʋ́l; ka vɔwɛ nʋɔ tápʋlɛ́ balpɛ.