Davidi kéŋ Wɩɩsɛ nʋtʋmɛ dáka ná bɩrko Zerizalɛmɛ
13
1 Davidi ɔɔ ɓa yɩ́rɛ sóójiwa bʋ́ɩ́wa nyúútɩ́náwa rɩ́ zɔlɔwa nyúútɩ́náwa arɩ́ sɩ́dííre ná náŋa wuu ɓa ko ɓa vʋʋrɛ. 2 Ɛ́ nɛ́ Davidi bʋlwɔ́ rɩ́ bʋlɛ́: «Rɩ́ɩ́wa nɛ́ néé rɩ ɛ́ wéró, a a Nyuutɩna Wɩɩsɛ cólle, ɩ́ lo rá tʋŋ nɩɛ á maábináŋa ná há pɩ́sɛ́ mɩŋ Ɩzɩrayɛl tíé wuu mí rɩ́ vʋ́k'ɔɔsa arɩ́ Levi dunɩɛ ná wuu há mɩŋ tɔ́nɛ ná náŋa sɩɛrʋ rɩ́; rɩ́wɔ́ yɩ́rwɔ́, rɩ́wɔ́ kórá rɩ́. 3 A makɛ rá bɩrmʋ́ ka Wɩɩsɛ nʋtʋmɛ dáka ná kaa kórá tɔ́ɔ́, bee wɩ́ɛ́, Sayul kuorí mí, á wɩ dáka ná pii wɩ́ɛ́ bɩ́ɩ́nɛ́.» 4 Ɛ́ nɛ́ nɩɛ ná wuu sáŋ rɩ́wɔ́ tʋ́ŋ ɛ́: Ɛ́ wɩ́ɩ́ cɛ́rɔ́ a pɔ́wɔ́ wuu. 5 Davidi ɔɔ ɓa yɩ́rɛ Ɩzɩrayɛl nɩɛ wuu, a pɔ́ Ezipiti polcʋ́ɔ́rɛ mɛ́, a kaa mʋ́ yakɛ Hamatɛ nʋɔ mɛ́, rɩ́wɔ́ mʋ́ Kiriyatiyarimi pi Wɩɩsɛ nʋtʋmɛ dáka ná kaa bɩrko. 6 Davidi rɩ́ Ɩzɩrayɛl nɩɛ wuu mʋ́ Baala há mɩŋ Kiriyatiyarimi mí, Ziida dɩtɩ́llɛ sɩɛrʋ, rɩ́wɔ́ pi Wɩɩsɛ nʋtʋmɛ dáka ná, Nyuutɩna Wɩɩsɛ ná há mɩŋ malkapiŋe nyúú, ɓa yɩ́yɩ́rʋ́ yɩr ráŋ. 7 Ɓa mʋ́ Abinadaabɛ jaa, a pi Wɩɩsɛ dáka ná hé tórkofɛlɔ mɛ́, Uza rɩ́ Ahiyo kaa va. 8 Davidi rɩ́ Ɩzɩrayɛl nɩɛ wuu sɩɛ́ jʋ́jʋɔsɛ rɩ́wɔ́ dóé Nyuutɩna Wɩɩsɛ sɩ́ɛ́. Ɓa yɩ́ yɩɩla, a mu mulli rɩ́ nyɩ́sɛ, a du ceŋsi rɩ́ beŋtérsi arɩ́ kuléŋléŋwa hé. 9 Ɓa há mʋ́ɛ́ peri Kidɔŋ tʋɔ, nɛsɛ kéŋ tórko ná bíksi, nʋtʋmɛ dáka ná jɩ́ja rʋ́ʋ́ ɓal, ɛ́ nɛ́ Uuza tɛ́rʋ́ nɛ́sɛ a kɛ́rka. 10 Ɛ́ nɛ́ Nyuutɩna cɔ́ɛ́ isi Uza nyúú, ɛ́ nɛ́ ʋ ŋmɔ́wʋ́ yo, ʋ há tɩ́kɛ dáka ná mɛ́ wɩ́ɛ́. Ʋ sʋwɛ ráŋ, Wɩɩsɛ sɩ́ɛ́. 11 Davidi cɔ́ɛ́ wɩ́ɔ́, Nyuutɩna Wɩɩsɛ há ŋmɔwɛ Uuza ɓʋ́ wɩ́ɛ́. Ɛ́ nɛ́ ɓa ka ɛ dɩhɩ̃́ aá yɩ́rɛ Pɛrɛsɛ'Uuza, a ko aá lɛ zaa wuu. 12 Ɛ́ kal, Nyuutɩna Wɩɩsɛ héwɩ́ŋ zʋ́ Davidi, ɛ́ nɛ́ ʋ sɛ́: «Ŋ wɩ Wɩɩsɛ dáká né wo la kaá zʋ́ŋ jaa. 13 Davidi vɔ́ɔ́, ʋ wɩ dáka ná kené zʋ́ʋ́ jaa, ʋ zʋɔ mɛ́, ká a ɓa kaa mʋ́ tá Gaatɛ tɩ́náwa báálɔ Obɛɛd'Edɔŋ jaa mɛ́. 14 Dáka ná mɩŋ Obɛɛd'Edɔŋ jaa mɛ́, a peri caŋsɛ botoro, ɛ́ nɛ́ Nyuutɩna Wɩɩsɛ hé Obɛɛd'Edɔŋ jaa rɩ́rʋ́ ɓɩɛ wuu nyúú bárka.