24
1 Zʋakimi kuorí dí tɛ́ŋ mɛ́ nɛ́, Babɩlɔɔnɛ kuóro Nabikanezaarɛ ko yóú, a dí dóé ʋ nyúú, a dáánɛ peri bɩŋsɛ botoro ká Zʋakimi baa isi cɩ́nʋ́ mɛ́. 2 Ɛ́ nɛ́ Nyuutɩna Wɩɩsɛ yiki bibara ná há ká Babɩlɔɔnɛ nɩɛ, Siiri nɩɛ, Mʋwabɛ nɩɛ arɩ́ Amɔŋ nɩɛ hé Zʋakimi mí rɩ́wɔ́ zɔ́kɛ Ziida dɩtɩ́llɛ, anɛ ɛ́ Nyuutɩna Wɩɩsɛ fa há bʋlɛ́ a tɩ́ŋʋ́ wɩ́laabʋlla ná há kɔ́ʋ́ tʋtʋnna mɛ́. 3 Nyuutɩna Wɩɩsɛ tɩɩ nɛ́ fa pá ŋmɛ́nɔ, wɩ́ɛ́ nyáŋ wuu tʋŋ, a makɛ rʋ́ʋ́ sɩ́ɩ́ sɩ́ Ziida dɩtɩ́llɛ ná. A tɩŋ Manase wɩ́bɔma ná wuu ʋ há ɛ́ɛ́ wɩ́ɛ́, 4 arɩ́ nɩɛ ná há wɩ wɩ́ɩ́ zɔ́kɛ́ kɔ́ʋ́ bɩ́sɩ́wɔ́ cɛ́l sú Zerizalɛmɛ, ɛ́ nɛ́ Nyuutɩna Wɩɩsɛ báá fa wɩ có rʋ́ʋ́ píí cɛ́.5 Zʋwakimi wɩ́'állɛ ná náŋa, ʋ tʋtʋmɛ́ wuu mɩŋ Ziida kuóre kɛnɔ sɩɛrʋ nɛ́. 6 Zʋakimi sʋwɛ, kɔ́ʋ́ bio Zʋakɛŋ lɔ́ʋ́ nyúú mí a dí kuorí. 7 Ezipiti kuóro báá wʋ́ʋ́ tɔ́ɔ́ mɛ́ lɩ́ɛ́, bee wɩ́ɛ́ Babɩlɔɔnɛ kuóro lá Ezipiti kuóro ɓɩɛ wuu ní, a pɔ́ Ezipiti polcʋ́ɔ́rɛ mɛ́ ká mʋ́ yakɛ Ɩfɩratɛ fuo mí.
Zʋwakimi dí Ziida kuorí; dɩŋdʋ́ʋ̃́ lal nɩkɛsɛ́ wɩ́ɛ́
8 Zʋakɛŋ kúó aá dí kuorí, rʋ́ʋ́ fa kéŋ bɩŋsɛ fí arɩ́ córí ní, ká dí kuorí caŋsɛ botoro Zerizalɛmɛ mɛ́. Ʋ maá yɩr nɛ́ fa ká Nehusta, Ɛlnataŋ há lɛ́ Zerizalɛmɛ toló ní. 9 Zʋakɛŋ ɔ́ɔ́ zɔkɛ Nyuutɩna Wɩɩsɛ mɛ́ anɛ ɛ́ ná tɩɩ ʋ áná há ɛ́ɛ́. 10 Ɛ́ tɛ́ŋ mɛ́ nɛ́, Babɩlɔɔnɛ kuóro Nebikanezaarɛ tʋtʋnna mʋ́ tɔ́ Zerizalɛmɛ hé, rɩ́wɔ́ yóú. 11 Babɩlɔɔnɛ kuóro Nebikanezaarɛ tɩɩ mʋ́ɔ́ cɛ́ tɔ́ɔ́ ná ʋ tʋtʋnna há tɔ́ɛ́ hé sɩɛ́. 12 Ɛ́ nɛ́ Ziida kuóro Zʋakɛŋ rɩ́rʋ́ maá, rɩ́rʋ́ tʋtʋnna, rɩ́rʋ́ tʋtʋ́nnɛsɩ́dííre arɩ́rʋ́ tɔ́ɔ́ nɩhɩɛ̃́sɛ káŋwɔ́ tɩɩ lɩ́ɩ́ mʋ́ pá Babɩlɔɔnɛ kuóro. Ʋ kánʋ́ tɔ́ bɩnajaa, rʋ́ʋ́ kuorí díí bɩŋsɛ córi nyúú mí ní fa. 13 Anɛ ɛ́ ná Nyuutɩna Wɩɩsɛ fa há bʋ́lɛ́, ʋ pá Nyuutɩna Wɩɩsɛ jaa kuóɓɩɛ ná arɩ́ kuóro jaa kuóɓɩɛ ná wuu a kaa col; ká zɔkɛ salmɛ ɓɩɛ ná wuu Ɩzɩrayɛl kuóro Salomoŋ fa há ɛ́ɛ́ bil Nyuutɩna Wɩɩsɛ jaa ná sɩɛrʋ. 14 Ká kɛsɛ Zerizalɛmɛ nɩɛ wuu kaa col: tʋtʋ́nnɛ́sɩ́dííre wuu, rɩ́ lalyóóríbibara, ɓa hé náŋá mɛ́ a nɩkɛsɛ bʋ́ɩ́ fí (10 000), rɩ́ kɔmɔ́ tʋtʋnna arɩ́ lukre wuu. Nɩyáára dʋŋɔ nɛ́ káánɛ tɔ́ɔ́ ná mɛ́. 15 Ʋ kéŋ kuóro Zʋakɛŋ rɩ́rʋ́ maá, rɩ́rʋ́ háála, rɩ́rʋ́ tʋtʋ́nnɛ́nɩhɩɛ̃́sɛ arɩ́ Ziida nɩpiŋe lɛ Zerizalɛmɛ mɛ́ a kaa mʋ́ Babɩlɔɔnɛ. 16 Ʋ kɛ́sɛ́ lalyoore ná wuu, ɓa nɩɛ bʋ́ɩ́walpɛ, kɔmɔ́ tʋtʋnna arɩ́ lukre má há hé náŋá mɛ́ nɩɛ bʋ́ɩ́ (1000). Ɓa wuu ká lalyóóríbɩbara nɛ́, Babɩlɔɔnɛ kuóro kɛ́sɩ́wɔ́ kaa col Babɩlɔɔnɛ. 17 Zʋakɛŋ áŋwie Mataniya nɛ́, Babɩlɔɔnɛ kuóro bil rʋ́ʋ́ la Zʋakɛŋ nyúú mí a dí kuorí, ká bɩrsʋ́ yɩr hé Sedesiyasɛ.
Sedesiyasɛ dí Ziida kuorí
18 Sedesiyasɛ kúó aá dí kuorí rʋ́ʋ́ fa kéŋ bɩŋsɛ mɛrɛ́ arɩ́ oro ní. Ʋ dí kuorí bɩŋsɛ fí arɩ́ oro ní Zerizalɛmɛ mɛ́. Ʋ maá yɩr nɛ́ Hamutal, Zeremi há lɛ́ Libna toló ní. 19 Sedesiyasɛ ɔ́ɔ́ zɔ́kɛ Nyuutɩna Wɩɩsɛ mɛ́ anɛ ɛ́ tɩɩ ʋ áná Zʋakimi há ɛ́ɛ́.
20 Nyuutɩna Wɩɩsɛ cɔ́ɛ́ há wɩ́ɛ́ nɛ́ tɛ́ nyɛ ná peri Zerizalɛmɛ arɩ́ Ziida, ʋ a ɓa kɛ́kʋ́ mɛ́ a mʋ́ dɩbóli. Sedesiyasɛ isó cɛ́ Babɩlɔɔnɛ kuóro mí.