Kuóre dʋŋdʋ́ʋ̃́ kɛnɔ
Laadíná
Kuóre dʋŋdʋ́ʋ̃́ kɛnɔ né máŋsɛ Ɩzɩrayɛl nɩɛ kuorí díí wɩ́ɛ́ nɛ́, Samɩɛl kɛnɔ la sɩ́ɛ́ a bʋ́lwɔ́ wɩ́ɛ́. Kuóre kɛnɔ né má caksɛ bɛllɛ nɛ́, anɛ Samɩɛl kɛnɔ, beé wɩ́ɛ́, ʋ sɩɛrʋ wɩ́ɛ́ ná wuu wɩ kɛŋgʋmɩ́ balá sɩɛrʋ wúó zʋ́.
Kuóre kɛnɔ ná sɩɛrʋ, kuóro wuu há cɔ́ Wɩɩsɛ mɛ́ ɛ́, nɩ́ɩ́ dúú sariya. Tɔ́ɔ́ ná wɩ́ɛ́ ɔsɛ́, lʋ́ʋ́ há zil Wɩɩsɛ aá mɔ́ ɛ́ nɛ́. Ɓa veŋɓaarɔ́ arɩ́wɔ́ kéké Wɩɩsɛ sɩ́ɛ́ mɛ́ nɛ́ fa kéŋwó zɔkɛ́ aá ko. Wɩɩsɛ tʋ́mʋ́ wɩ́laabʋ́lla ná há kénú dóé anɛ Eli nyɛ, rɩ́wɔ́ líísi kuóre ná rɩ́rʋ́ wɩ́jaalɩ́.
Kuóre kɛnɔ né kéŋ cɔrɛ botoro: Dʋŋdʋ́ʋ̃́ cɔɔ, a pɔ́ sapíítir 1-2, bʋ́l kuóro Davidi hátɩŋnɛ́ bɩŋsɛ wɩ́ɛ́ nɛ́. Ʋ sʋʋ har mɛ́, ʋ bio Salomɔŋ nɛ́ lɔ́ʋ́ nyúú mí.
Bʋllɛ cɔɔ, a pɔ́ sapíítir 3-11, Salomɔŋ kuorí jɛ́llɛ́ wɩ́ɛ́ nɛ́. Ʋ ná kuóɓɩɛ kɩ́ŋkáŋ, ʋ yɩr má lɛ́. Ʋ sɔ́ Wɩcʋɔlɩjɩzeno Zerizalɛmɛ mɛ́. Amá ʋ mɩɩsɛ há kúé a cɛ́ tenné mí, ʋ bɩrʋ́ har a tɛ Wɩɩsɛ, ká ɓaarʋ́ háála wɩŋsa nɛ́. Ʋ sʋwɛ kɔ́ʋ́ bio Rʋbʋwamɛ lɔ́ʋ́ nyúú mí.
Botoro nyúú mí cɔɔ, a pɔ́ sapíítir 12-22, Ɩzɩrayɛl tɔ́ɔ́ caksɛ bɛllɛ: Ziida há mɩŋ wɩɩsɛ dɩpomí nedú ɔ́ʋ́ dʋŋɔ, ká Ɩzɩrayɛl má há mɩŋ wɩɩsɛ dɩpomí nɛ́gʋ́ɔ́ má ɔ́ʋ́ dʋŋɔ. Ɩzɩrayɛl kuóre ná wuu vɛ́ Nyuutɩna Wɩɩsɛ, kaá ɓaarɛ wɩŋsa náŋá nɛ́, amá Ziida dɩtɩllɛ́ é kuóre ná sɩɛrʋ, ɓɩkana nɩ́ɩ́ tɩŋ Nyuutɩna Wɩɩsɛ, ɓa Wɩɩsɛ.
Kɛnɔ né sɩɛrʋ wɩ́nyúnni:
Salomɔŋ kuorí díí wɩ́ɛ́: sapíítir 1
Davidi sʋʋ wɩ́ɛ́: sapíítir 2. 1-12
Salomɔŋ tíŋ wɩ́ɛ́: sapíítir 2. 13 - 46
Salomɔŋ mákʋ́ zɩ́mɛ́: sapíítir 3 - 5. 14
Salomɔŋ sɔ́ Wɩcʋɔlɩjɩzeno: sapíítir 5.15 a kaá mʋ́ sapíítir 8
Wɩɩsɛ ta nʋʋsɛ a pá Salomɔŋ: sapíítir 9
Saba hákuóro mʋɔ́ a ná Salomɔŋ: sapíítir 10
Salomɔŋ há bɩrʋ́ har tɛ Wɩɩsɛ arɩ́rʋ́ sʋʋ wɩ́ɛ́: sapíítir 11
Ɩzɩrayɛl isó a cɛ́ Rʋbʋwamɛ mɛ́: sapíítir 12
Wɩ́laabʋ́llɔ bʋ́lɔ́ a cɛ́ Zerobʋwamɛ mɛ́: sapíítir 13
Ziida arɩ́ Ɩzɩrayɛl kuóre wɩ́ɛ́: sapíítir 14 -16
Eli wɩ́laabʋ́lɛ́: sapíítir 17-19
Kuóro Akaabɛ rɩ́rʋ́ hákuóro Zezabɛl wɩ́ɛ́: sapíítir 20-22.40
Zozafa arɩ́ Ahaziya wɩ́ɛ́: sapíítir 22. 42-54