Kuóro Davidi ɔ́ɔ́ ɓa dɩɩsɛ Ɩzɩrayɛl nɩɛ wuu
24
1 Nyuutɩna Wɩɩsɛ cɔ́ɛ́ báá wɛ́ Ɩzɩrayɛl nɩɛ nyúú, ɛ́ nɛ́ ʋ yiki Davidi héwó mí a bʋlɛ́: «Mʋ́ dɩɩsɛ Ɩzɩrayɛl duo rɩ́ Ziida duo nɩɛ wuu.»2 Ɛ́ nɛ́ kuóro bʋl Zʋwabɛ há kɔ́ʋ́ lalyóórí nyúútɩ́na, a mɩ́nʋ́ laka rɩ́ bʋlɛ́: «Gʋɔrɛ Ɩzɩrayɛl duo nɩɛ wuu sɩɛrʋ, a púl Daŋ há mɩŋ wɩɩsɛ nɛ́gʋ́ɔ́, ká kaa mʋ́ lɛ Bɛrseba wɩɩsɛ dɩpomí néduu; a a rɩ́wɔ́ dɩ́ɩ́sɩ́wɔ́ nɩɛ wuu, a makɛ rɩ́ŋ zɩ́ŋwɔ́ káŋ mʋɔsɔ.» 3 Ɛ́ nɛ́ Zʋwabɛ bʋl kuóro rɩ́ bʋlɛ́: «Rɩ́ Nyuutɩna Wɩɩsɛ, ɩ Wɩɩsɛ a rɩ́wɔ́ a ɓɩkáná a peri naasɩ́ zɔlɔ, rɩ́ŋ nyúútɩ́na kuóro tɩɩ sɩ́ɩ́ ná. Amá beé rí yíkí, ŋ nyúútɩ́na, ɩ sɛ́ rɩ́wɔ́ a nyɛ wɩ́ɩ́>>» 4 Kuóro wɩ́bʋlɩ́ ná fɩkɛ Zʋwabɛ rɩ́ lalyoore nyúútɩ́nawa ná wuu ɓa sáŋʋ́ sɛ́; ɓa isi kuóro laka, a mʋ́ rɩ́wɔ́ dɩɩsɛ Ɩzɩrayɛl nɩɛ. 5 Ɓa zʋ Zʋrdɛŋ fuo daarɛ; a mʋ́ ciki Aroyɛrɛ rɩ́ tɔ́ɔ́ ná há mɩŋ Gaadɛ polo sɩɛrʋ néduu rí. A tenni Gaadɛ dɩ́tɩllɛ́ ká caasɛ Yazɛrɛ rɩ́. 6 Ɓa mʋ́ɔ́ peri Galaadɛ dɩ́tɩllɛ́, a tuwi Kadɛsɛ. A lɩɩ tɩŋ Dayaŋ rɩ́rʋ́ kilo tɔ́nɛ́, a mʋ́ peri Sɩdɔŋ. 7 Ɓa mʋ́ɔ́ zʋ Tiiri bɩbazʋ́ɔ́, a lɩɩ zʋ Hivitiwa tɔ́nɛ rɩ́ Kanaŋ tɩ́náwa tɔ́nɛ wuu. Ká mʋ́ peri Bɛrɩsɩba há mɩŋ Ziida wɩɩsɛ dɩpomí néduu rɩ́. 8 Caŋsɛ nɛ́mɛ́ arɩ́ tápʋlɛ mɛrɛ́ nɛ́ ɓa pii gʋɔrɛ Ɩzɩrayɛl tíé wuu ká bɩrko zʋ Zerizalɛmɛ. 9 Zʋwabɛ sɩɛ́ ka nɩɛ ná ɓa há dɩ́ɩ́sɛ́ nʋɔ ko makɛ pá kuóro. Ɩzɩrayɛl nɩɛ ná wuu há wo tókowí kaá yo lal nʋɔ nɛ́: Sóójiwa bʋ́ɩ́ zɔlɔ córí (800 000). Ká Ziida má nɩɛ a: bʋ́ɩ́ zɔmmʋ́ɔ́ (500 000).
Wɩɩsɛ mɩlmɛ́ Davidi dɩllɛ
10 Davidi há ɛ́ɛ́ ɓa dɩɩsɛ nɩɛ ná ko tenni, ʋ baŋcɩla dʋ́mɔ́. Ɛ́ nɛ́ ʋ bʋl Nyuutɩna Wɩɩsɛ rɩ́ bʋlɛ́: «Ʋ ká wɩ́bɔ́ŋ ɓɩzeni rí ŋ a ɛ́. Amá, Nyuutɩna Wɩɩsɛ, héí tʋtʋnnɔ suúri ɛ́ wɩ́bɔmɔ wɩ́ɛ́, beé wɩ́ɛ́ ŋ tʋ́ŋ cʋ́llɛ nɛ́.»
11 Ʋ tɔ́ɔ́ há pʋ́lɛ́, Davidi ísó rɩ Nyuutɩna Wɩɩsɛ púú wɩ́bʋlɛ pɔ́ʋ́ wɩ́laabʋllɔ Gaadɛ, ʋ ná há ná wɩ́ɛ́ kaa ko bʋl aá pá Davidi. Ʋ sɛ́: 12 «Mʋ́ bʋl pá Davidi a bʋlɩ́ŋ é Nyuutɩna Wɩɩsɛ sɛ́: “Ná wɩɩlawa botoro ní; lɩ́sɩ́ há cóú ná, rɩ́ŋ púú ŋmɔ́wɩ́.”» 13 Gaadɛ isi mʋ́ ná Davidi a bʋl ɛ́ pɔ́ʋ́, ká sɩɛ́ bɔ́sʋ́: « Ɩɩ́ já rɩ́ losu zʋ́ɩ́ tɔ́ɔ́ bɩŋsɛ balpɛ nɛ́ yáá, ɩɩ́ já rɩ́ɩ́ dɩŋdɔma nɛ́ wóllí caŋsɛ botoro, a kírí rɩ́ fɩ́fá yáá, ɩɩ́ ja rɩ́ pʋɔlɩ́ bɔmɔ́ ná háá táárɛ nɩɛ nɛ́ zʋ́ɩ́ tɔ́ɔ́, tápʋlɛ botoro>> Sɩɛ́ bɩɩnɛ wérí ká páŋ liŋó rɩ́ŋ kaa mʋ́ pá nɛrɔ ná há tʋ́mɩ́ŋ.» 14 Davidi bʋl Gaadɛ rɩ́ bʋlɛ́: «Ŋ sɩɛrʋ wuu ní zɔ́kɛ́...! Ŋ taŋa có rɩŋ ɓál Nyuutɩna Wɩɩsɛ nɛ́sɛ mɛ́ nɛ́ kɩ́llɛ, ŋ há zʋ́ nɩbííne nɛ́sɛ, bee wɩ́ɛ́ ʋ susufɔ́ɔ́ zénó.»
15 Ɛ́ nɛ́ Nyuutɩna Wɩɩsɛ lo pʋɔlɩ́ bɔmɔ́ ná háá taarɛ nɩɛ, tuwi Ɩzɩrayɛl tíé wuu mí, a pɔ́ cɩcʋ́ɔ́ a kaá já Wɩɩsɛ tɛ́ŋ makɩ́ wuu mí. A pɔ́ Daŋ há mɩŋ wɩɩsɛ dɩpomí nɛ́gʋ́ɔ́, ká mʋ́ yakɛ Bɛrɩsɩba há mɩŋ wɩɩsɛ dɩpomí néduu, nɩɛ bʋ́ɩ́ mɛɛ́sɩbotoro rɩ́ fí (70 000) ní sʋ́sɩ́wɔ́ jamáŋ sɩɛrʋ. 16 Malka há tɛ́rʋ́ nɛ́sɛ rʋ́ʋ́ fa zɔkɛ Zerizalɛmɛ, rɩ́ Nyuutɩna Wɩɩsɛ sabɩɩna bɩrsɔ́. Ɛ́ nɛ́ ʋ bʋl malka nɩɓʋ́ʋ́rɔ ná há mɩŋ nɩɛ sɩɛrʋ rɩ́ bʋlɛ́: «Ʋ mɔhɔ̃́, kánɩ́ nɛ́sɛ píwó nyúú.»
Ɛ́ mɛ́, rɩ Nyuutɩna Wɩɩsɛ malka ná fa kúó peri Aravɩna ná há lɛ́ Zebuziti, tʋ́ɔ́ nɛ́. 17 Davidi há ná malka ná, rʋ́ʋ́ mɩŋ nɩɛ ná sɩɛrʋ aá ɓʋ́ʋ́sɛ, ʋ bʋl Nyuutɩna Wɩɩsɛ rɩ́ bʋlɛ́: «Ŋ nɛ́ á wɩ́bɔmɔ, ŋ nɛ́ á wɩ́ɩ́ zɔkɛ; ŋ nɩɛ nyáŋ má sɩɛ́ á béé>> Ɛ́ wɩ́ɛ́, fɩ́rɩ́ŋ é ní, ŋ rɩ́rɩ́ŋ jaa nɩɛ.»
Davidi má vʋk'ɔ́ɔ́sɩkoro a pá Nyuutɩna Wɩɩsɛ
18 Ɛ́ kal tɩɩ nɛ́ Gaadɛ mʋ́ ná Davidi, a bʋ́lʋ́ rɩ́ bʋlɛ́: « Isi mʋ́ Zebuzitiwa Aravɩna tʋ́ɔ́, a má koro ráŋ a pá Nyuutɩna Wɩɩsɛ.» 19 Davidi isi mʋ́ anɛ ɛ́ Nyuutɩna Wɩɩsɛ há tɩ́ŋ Gaadɛ mɛ́ bʋ́lʋ́ rɩ́. 20 Aravɩna má béló, rɩ kuóro rɩ́rʋ́ nɩɛ nɩ́ɩ́ kóú rí. Ɛ́ nɛ́ ʋ mʋ́ céŋwó, a ɓírmi a ka sɩ́ɛ́ cú tíé kuóro sɩ́ɛ́. 21 Ká bɔsɛ Davidi bʋlɛ́: «Beé kéníŋ nyúútɩ́na kuóro ʋ isi aá kóú tʋtʋnnɔ rɩ́>>» Ɛ́ nɛ́ Davidi sɛ́: «Ŋ kúó rɩ́ɩ́ píí tʋ́ɔ́ né ní páŋ rɩ́ŋ yɔwɛ, a má koro ráŋ pá Nyuutɩna Wɩɩsɛ, ká rʋ́ʋ́ lɩ́sɛ nɩɓʋ́ ná ʋ há píé yoo hé tɔ́ɔ́ mɛ́.» 22 Aravɩna bʋl Davidi rɩ́ bʋlɛ́: «Rɩ́ŋ nyúútɩ́na kuóro la óŋ ná wuu ʋ háá jɛ́ɛ́, a ɔsɛ vʋk pá Wɩɩsɛ. Ná nɛsɛ nyáŋ, ɓa sɩ́ a vʋk'fisí pʋsɛ, ká rɩ́ torko né rɩ́ nɛsɛ baŋcɩksɛ nɛ́ a daasɛ. 23 Ŋ é Aravɩna píwó wuu pɛ́ɩ́, ŋ kuóro. Rɩ́ Nyuutɩna Wɩɩsɛ, ɩ wɩɩsɛ sáŋɩ́ wɩsʋlɔ́!» 24 Ɛ́ nɛ́ kuóro bʋl Aravɩna rɩ́ bʋlɛ́: «Aɩ́! ŋ jáŋ yɔwɛ nɛ́, a túŋwó meéwí há ká ɛ́ pɛ́ɩ́. Ŋ wɩ oŋ'mɔlɛ́wa ja, rɩ́ŋ pii ɔsɛ vʋk'fisí pá Nyuutɩna Wɩɩsɛ, ŋ Wɩɩsɛ.»
Davidi sɩɛ́ la tʋ́ɔ́ ná rɩ́ nɛsɛ ná wuu yɔwɛ wárɛcaaka mɛɛ́sɛllɛ rɩ́ fí. 25 Davidi má koro ráŋ, a ɔsɛ vʋkfíse rɩ́ tɛŋfɩ́ɛ́l vʋka, a pá Nyuutɩna Wɩɩsɛ ʋ daha.
Nyuutɩna Wɩɩsɛ cɔwɩɩlɔ́ sɩɛ́ pɔrɛ, ʋ a pʋɔlɩ́ bɔmɔ́ ná háá ɓʋ́ʋ́sɛ nɩɛ Ɩzɩrayɛl mɛ́ toki.