Davidi hatɩ́ŋnɛ́ líŋsi
23
1 Davidi hatɩ́ŋnɛ́ líŋsi ní nyɛ: Izayi bio Davidi nʋɔ wɩ́ɛ́,
báálɔ ná kéne há wéró nʋɔ wɩ́ɛ́,
nɛrɔ ná Zakɔbɛ Wɩɩsɛ há lɩ́sɛ́
Ɩzɩrayɛl nɩɛ nɩcólli ná ɓa háá dɛnnɛ́.
2 Nyuutɩna Wɩɩsɛ Sabɩɩna tɩ́ŋɩ́ŋ mɛ́ bʋl wɩ́ɛ́,
ʋ wɩ́bʋlɛ ha mɩ́nɩ́ŋ neŋdulí mí.
3 Ɩzɩrayɛl Wɩɩsɛ bʋ́l wɩ́ɛ́,
nɛrɔ ná há ká Ɩzɩrayɛl nabʋ́ɩ́ bʋ́lɔ́ páŋ bʋlɛ́:
«Kuóro ná háá fá Wɩɩsɛ héwíŋ, ʋ nɩɛ kaa kéne mí,
aá dí nɩɛ sarɩ́ya arɩ́ táŋá,
4 ʋ nɩhɩ̃́ wɩɩsɛ há pómé cɩ́cʋɔ, pʋmmɔ ná mɩŋ nɛ́,
cɩ́cʋɔ ná duóbásɛ há wɩ wɩɩsɛ mɛ́ kɛ́rɛ́.
Ʋ wuuró rɩ́ duóŋ níí a nyɔ́ɔ́ nyʋ́ tíé.
5 Ŋ jaa ká ɛ́nɛ́ Wɩɩsɛ sɩ́ɛ́ mɛ́:
bee wɩ́ɛ́, ʋ tá nʋɔ páŋ, nʋɔ ná há wáá giri,
ká bil kíŋse ɛ́ nʋɔ wɩ́ɛ́, ɓa kɛ́rʋ́ mɛ́.
Ŋ há có wɩ́ɛ́ ná nɛ́ ʋ a aá páŋ,
ŋ ballɩ́ díí ká nyaamɩ́.
6 Amá nɩkɔŋsa é nɩhɩ̃́ cɛ́ɛ́ ɓa há cónné tá nɛ́.
Ɓa wɩ cíké aá kʋɔrɩ́wɔ́ rɩ́ nɛ́yɔ́wa.
7 Nɛrɔ ná háá jɛ́ɛ́ rʋ́ʋ́ pɔ́wɔ́,
ʋʋ́ ja hɔtérke ní, ɛ́ rá má deŋgulí há gbesó,
a kʋɔrɛ hé níŋ mí ɓa dí mʋ́ɔ́lɛ dɩbalá.
Davidi lalyóórí bɩbara
8 Ná Davidi lalyóórí bɩbara yɩra:
Isibal há lɛ́ Hakɩmɔŋ, ká nɩɛ botoro púl nɔ́ŋɔ nyúútɩ́na nɛ́. Ʋ yɩr nɔ́ŋɔ má nɛ́ fa ká Adino, a lɛ́ Ɛsɩnɩ. Ʋ nɛ́ kal oro ɓʋ́ʋ́sɛ nɩɛ zɔlɔ córí (800) naasɩ́ balá arɩ́ cɔlmɛ.
9 Eleyazarɛ nɛ́ tʋ́kʋ́ mɛ́, ʋ áná nɛ́ ká Dodo há lɛ́ Ahoha; bɩbara ná botoro há kéŋ Davidi mʋ́ lal, tɛ́ŋ ná mɛ́ ʋ háá yo Filisiti nɩɛ, nɔ́ŋɔ nɛ́. Ɛ́ kal, Ɩzɩrayɛl lalyoore bɩ́rɔ́ fá a zɛ́ pallɛ. 10 Amá ɛ́ Eleyazarɛ nɛ́ ísé cɛ́ daha a yo Filisiti nɩɛ wuu, ʋ nɛ́sɛ bɔl, ká koriki cɔ́ʋ́ tókowi til mí. Nyuutɩna Wɩɩsɛ mákɛ́ ballɩ́ pá Ɩzɩrayɛl nɩɛ wérí ɛ́ kal. Ɩzɩrayɛl lalyoore sɩɛ́ bɩrko Eleyazarɛ rɩ́; ɓa taŋa de bɩrko rɩ́wɔ́ pa nɩsʋsɛ ɓɩɛ nɛ́.
11 Hararitiwa Age bio Sama má nɛ́ tʋ́kɛ́. Filisiti nɩɛ fa kúó ciki ráŋ ná ɓa haá yɩ́rɛ́ Lehi mí, síŋsúóŋ baka sɩ́ɛ́ fa mɩŋ ráŋ. Ɛ́ nɛ́ Ɩzɩrayɛl lalyoore isi fá ká tá Filisiti nɩɛ. 12 Amá Sama isó cɛ́ daha baka ná sɩ́sɩ́ɛ́nʋ́wa, a kaa la ká ŋmasɛ Filisiti nɩɛ; Nyuutɩna Wɩɩsɛ mákɛ́ ballɩ́ pɔ́wɔ́ wérí ɛ́ kal,
13 Kal oro, ɓɩɛ kʋsɛ́ cɛ́rɛ́, sóójibɩbara mɛrɛ́ rɩ́ fí ná háá pɔ́ Davidi mí, ɓa sɩɛrʋ botoro kó Davidi rí, rʋʋ mɩŋ Adulaŋ paalɔ bʋɔ sɩɛrʋ, ká Filisiti nɩɛ má náŋa ko ciki Refayitiwa polo mí. 14 Davidi há féŋsi ráŋ ɛ́ tɛ́ŋ mɛ́, rɩ Filisiti nɩɛ náŋa má mʋ́ɔ́ pɔ́ Beteleyɛmɛ mɛ́. 15 Nyinyʋɔ́sɛ ka Davidi, ɛ́ nɛ́ ʋ sɛ́: «Áŋ rɛ́ sɩ́ isi mʋ́, a a vil ná há mɩŋ Beteleyɛmɛ dánnʋzʋʋlɩ́ mɛ́ nyii, a kaa ko páŋ rɩ́ŋ nyɔ>>» 16 Ɛ́ nɛ́ bɩbara ná botoro isi mʋ́ zʋ Filisiti nɩɛ ná sɩɛrʋ lɛ, a mʋ́ a nyii Beteleyɛmɛ dánnʋɔ vil ná mɛ́; a kaa bɩrko a pá Davidi. Amá Davidi wʋ́ɔ́ nyɔ́ɛ́ có; ʋ píwó bɩ́sɛ tá tíé a pá Nyuutɩna Wɩɩsɛ anɛ vʋk nyitáálɛ. 17 Ká bʋlɛ́: « Rɩ́ Nyuutɩna Wɩɩsɛ ka nyii nyáŋ duo nyɔ́ɛ́ bɩɩna kɛ́kɩ́ŋ mɛ́. Ɓa nɩhɩ̃́ nɩɛ ná há yówó mɩɩsɛ tá, a mʋ́ a nyii ná ko páŋ cɛ́l nɛ́.» Ɛ́ nɛ́ ʋ wɩ có rʋʋ nyɔ́wɔ́!
Bɩbara nyáŋ botoro há tʋ́mʋ́ nɛ́ ɛ́.
18 Zʋwabɛ maábinɔ́ŋɔ Abisayi há Seruya bio ní fa kɔ́wɔ́ wuu botoro nyúútɩ́na. Ʋ nɛ́ kal oro púú cɔlmɛ, a cɔ́ksɛ nɩɛ zotoro (300) ɓʋ́ʋ́sɛ, a la yɩr ɓa botoro sɩɛrʋ. 19 Ʋ lá píŋ kɩ́llʋ́ náŋa ná, a nɛ́ ɔ́wɔ́ nyúúttɩ́na; amá ʋ wɩ dʋ́ŋdʋ́ʋ̃́ nɩɛ ná botoro péré.
20 Benaya há lɛ́ Kabɩsɛlɛ áná yɩr nɛ́ Yoyada; ʋ naabál fa ká lalyóórí bɩbar rɛ́, a a wɩ́piŋe ɓɩkana. Ɛ́ Benaya nɛ́ ɓʋ́ Mʋwabitiwa báduoru bɛllɛ. Ʋ nɛ́ ísé, kal oro a tuwi vil sɩɛrʋ a ɓʋ́ kɩ́ŋkáná; ɛ́ tɛ́ŋ mɛ́, rɩ waarʋ zénó, nyii pii ɓaŋ. 21 Ʋ nɛ́ báá ɓʋ́ Ezipiti nɩɛ báperí oro má. Ɛ́ báálɔ fa kéŋ cɔlmɛ ʋ nɛ́sɛ mɛ́, kɔ́ʋ́ má ka daa dʋŋɔ; ʋ mʋ́ɔ́ kánʋ́ cɔlmɛ ná nɛ́ la, a púú cɔ́kʋ́ ɓʋ́. 22 Yoyada bio Benaya há tʋ́ŋ tʋtʋmɩ́ ná nɛ́ ɛ́. A la yɩr ɓa bɩbara ná botoro sɩɛrʋ. 23 Ɓa sóójibɩbara mɛrɛ́ rɩ́ fí ná sɩɛrʋ, ʋ nɛ́ la yɩpiŋo kɩ́llɩ́wɔ́ wuu; ʋ taŋa wɩ dʋ́ŋdʋ́ʋ̃́ bɩbara ná botoro péré. Ɛ́ nɛ́ Davidi púú, ʋ a sóójiwa ná háá pɔ́ʋ́ mɛ́ nyúútɩ́na.
24 Nɩɛ mɛrɛ́ rɩ́ fí ná sɩɛrʋ, Zʋwabɛ maábinɔ́ŋɔ Asayɛl fa mɩŋ ráŋ. Ɓa náŋa nɛ́ ká: Dodo bio Ɛlana há lɛ́ Beteleyɛmɛ. 25 Sama há lɛ́ Harodi. Elika há lɛ́ Harodi. 26 Helɛsɛ há lɛ́ Pɛlɛtɛ. Ikɛɛsɛ bio Ira há lɛ́ Tekua. 27 Abiyezɛr há lɛ́ Anatɔtɛ. Mebunayi há lɛ́ Husa. 28 Salmɔŋ há lɛ́ Ahoa. Maharayi há lɛ́ Netofa. 29 Ɓaana bio Hɩlɛbɛ há lɛ́ Netofa. Ribayi bio Itayi há lɛ́ Gibeya, Bɛŋzamɛŋ dɩtɩ́llɛ. 30 Benaya há lɛ́ Piratɔŋ. Hidayi há lɛ́ Gaasɛ polli tɔ́nɛ nɔ́ŋɔ. 31 Abiyalbɔŋ há lɛ́ Araba. Azɩmavɛtɛ há lɛ́ Bahurimi. 32 Eliyaba há lɛ́ Salbɔŋ. Yaseŋ bio Yonataŋ. 33 Sama há lɛ́ Hararɛ. Sararɛ bio Ahiyamɛ, há lɛ́ Hararɛ. 34 Maaka tɩ́náwa Ahasɩbayɩ bio Elifɛlɛtɛ. Ahitofɛl há lɛ́ Gilo bio Elɩyamɛ. 35 Hesirayi há lɛ́ Karamɛlɛ. Parayi há lɛ́ Arabɛ. 36 Nataŋ bio Yɩgaalɛ há lɛ́ Soba. Bani há lɛ́ Gaadɛ jɩmʋ́l. 37 Selɛkɛ há ká Amoniti. Narayi há lɛ́ Beeroti, a faá cɩ́ɩ́nɛ Seruya bio Zʋwabɛ lalyóórí cɩksɛ. 38 Ira há lɛ́ Yetɛɛrɛ duo, Garɛbɛ má há lɛ́ Yetɛɛrɛ duo. 39 Uuri há ká Hititi. Ɓa wuu hé náŋá mɛ́, nɩɛ mɛrɛ́ rɩ́ balpɛ.