Zoziyasɛ baa bil nʋtʋmɛ ʋ rɩ́ Nyuutɩna Wɩɩsɛ pɛ́kɛ
23
1 Ɛ́ nɛ́ kuóro a ɓa yɩrɛ Ziida rɩ́ Zerizalɛmɛ nɩhɩ́ɛ̃́sɛ hé náŋá mɛ́ ʋ laka. 2 Kɔ́ʋ́ isi a mʋ́ Nyuutɩna Wɩɩsɛ jaa, ʋ rɩ́ Zerizalɛmɛ rɩ́ Ziida nɩɛ, rɩ́ vʋk'ɔɔsa, rɩ́ wɩ́laabʋlla arɩ́ nɩɛ wuu duó, heŋbíísi arɩ́ nɩhɩɛ̃sɛ. Kuóro sɩɛ́ karmɛ nʋtʋmɛ kɛnɔ ná ɓa há néé Nyuutɩna Wɩɩsɛ jaa sɩɛrʋ, ʋ sɩɛrʋ wɩ́bʋlɛ́ ná wuu. 3 Kuóro isi cɩ́ koro daha, Nyuutɩna Wɩɩsɛ sɩ́ɛ́ a bíl nʋtʋmɛ. Ɛ́ nʋtʋmɛ wɩ́jáálɩ́ nɛ́ ká rʋ́ʋ́ cɛ́ tɩ́kɛ Nyuutɩna Wɩɩsɛ, aá zílú kíŋse, ʋ wɩ́makɛ́, ʋ wɩ́bile arɩ́ wɩ́ɛ́ ná wuu há pʋ́ŋsɛ nʋtʋmɛ kɛnɔ ná sɩɛrʋ, rɩ nɛrɔ wuu tɩ́ŋwɔ́ rɩ́rʋ́ sɩɛrʋ wuu arɩ́rʋ́ dʋma wuu. Nɩɛ ná wuu saŋ ɛ́ nʋtʋmɛ.Ziida wɩ́cʋɔlɔ́ bɩ́rsɛ́ wɩ́ɛ́
4 Ɛ́ har mɛ́, kuóro bʋl vʋk'ɔɔsɔ́ nɔhɔ̃́ Hilkiya rɩ́ vʋk'ɔɔsa ná há tʋ́kʋ́ mɛ́ arɩ́ vʋk'ɔɔsa ná háá pɔ́ Wɩɩsɛ jaa dánnʋɔ mɛ́ rɩ́, a bʋlɛ́ rɩ́wɔ́ lɩ́sɛ cɩksɛ ná wuu ɓa há kené aá ɓáárɛ Baal, Akeera arɩ́ bána nyúú caŋwʋllɛ Nyuutɩna Wɩɩsɛ jaa ná sɩɛrʋ. Ɓa nyɩ́kwɔ́ Zerizalɛmɛ tɔ́ɔ́ har nɛ́, Sediroŋ polo sɩɛrʋ, a páwɔ́ tápʋmmɔ a kaa ko Bɩtɛl. 5 Zoziyasɛ kírí nyɩɛrʋ vʋk'ɔɔsa ná Ziida kuóre fa há lɩ́sɛ́ rɩ́wɔ́ nyɩ́kɛ tulaalewa Ziida tɔ́nɛ dɩɓáárɛ́ arɩ́ Zerizalɛmɛ kiló wuu mí. Ʋ kírí ɓa ná má fa há nyɩ́kɛ tulaalewa aá pá Baal rɩ́ wɩpomí rɩ́ cana rɩ́ onni ná wuu há kéŋ pʋmmɔ arɩ́ bána nyúú caŋwʋllɛ. 6 Ʋ ɔ́ʋ́ ɓa lɩ́sɛ Akeera dáɓáárɩ́ ná Nyuutɩna Wɩɩsɛ jaa sɩɛrʋ; a káá lɛ́ Zerizalɛmɛ tɔ́ɔ́ har, a mʋ́ Sediroŋ polo sɩɛrʋ, a nyɩ́kʋ́ ráŋ, a ló ʋ dí mʋ́ɔ́lɛ, ɓa pɔ́ʋ́ tápʋmmɔ yoo tá nɩɛ lɛlbulli dɩhɩ̃́. 7 Zoziyasɛ baa ɔ́ɔ́ ɓa gínní báála arɩ́ háála ná haá tʋŋ cɔ́rmɛ aá ɓáárɛ́ venni jɩɩsɛ fa há mɩ́ŋ Nyuutɩna Wɩɩsɛ jaa sɩɛrʋ, ráŋ ná háála fa há sɔ́ gɛluŋe aá pá Akeera. 8 Ká Zoziyasɛ a Ziida tɔ́nɛ wuu, a pɔ́ Geba mí ká mʋ́ yakɛ Bɛrsɩba mɛ́, vʋk'ɔɔsa wuu ko Zerizalɛmɛ; kɔ́ʋ́ zɔ́kɛ dɩɓáárɛ́ ná, ɛ́ vʋk'ɔɔsa fa há nyɩ́kɛ tulaalewa ráŋ. Ʋ zɔ́kɛ dɩɓáárɛ́ ná há mɩ́ŋ tɔ́ɔ́ dánnʋʋsɛ mɛ́. A zɔ́kʋ́ ná fá há mɩ́ŋ tɔ́ɔ́ tɩ́na Zozie dánnʋ́ɔ́ mɛ́, nɛ́gʋɔ rɩ́, rɩ́ɩ́ nɛ́ tɩ́ŋ tɔ́ɔ́ ná dánnʋɔ oro wuu aá zʋ. 9 Vʋk'ɔɔsa ná fa haá ɔsɛ vʋka dɩɓaarɛ́ ná mɛ́, báá wɩ ŋmɛ́nɔ kéné rɩ́wɔ́ zɩ Nyuutɩna Wɩɩsɛ koro ná daha Zerizalɛmɛ mɛ́, amá ɓa fa wo sɩbʋrtó dɩpɛ́ŋwa aá dí ɓa maábináŋa sɩɛrʋ. 10 Kuóro ɔ́ɔ́ koro ná ɓa haá yɩrɛ Tofɛtɛ, a mɩŋ Hɩmɩnɔŋ polo sɩɛrʋ, zʋ busunnu a makɛ rɩ́ nɩɛ baa sɩ́wɔ́ heŋbólli ɛ́ rá má tolé káá mʋ́ ɔsɛ vʋk'fisé ʋ daha rɩ́ pá veno Molɛkɛ. 11 Ʋ vɔ́ʋ́ rɩ záksɛ ná Ziida kuóre fá há lɩ́sɛ́, wɩpomí ɓaarɛ́ yɩr mɛ́, sɩ́ ɛ́ tʋ́mʋ́. Ɛ́ záksɛ sɩɛ́ fá mɩŋ jɩɩsɛ ná há tʋkɛ Nyuutɩna Wɩɩsɛ jaa ná mɛ́ nɛ́, ʋ dánnʋ́ɔ́ laka, ɓa rɩ́ minísi Netanɩmelɛkɛ jaa nɛ́ ká tɛ́sɩ́ɩ́. Zoziyasɛ ɔ́ɔ́ ɓa nyɩkɛ tórkówa ná fá há ká wɩpomí ná ɓɩɛ. 12 Ʋ ɔ́ɔ́ ɓa búksi korsi ná Ziida kuóre fa há ɛ́ɛ́ ɓa sɔ́ Ahaazɛ jɩtuko luso daha, arɩ́wɔ́ ná Manase há sɔ́ɛ́ Nyuutɩna Wɩɩsɛ jaa wólli ná bɛ́llɛ sɩɛnnɛ. Ʋ ɔ́ɔ́ ɓa búksíwó ɓa dɩmɩ́nɛ́ mɛ́, a páwɔ́ oŋkulewa yó hé Sedɩrɔŋ polo sɩɛrʋ. 13 Kuóro zɔ́kɛ dúŋdúóme ná daha ɓa háá ɓáárɛ́ venni ráŋ, Salomɔŋ fa há mɛ́ɛ́ zɔ́krʋ́ paalɔ́ wɩpomí néduu rɩ́, a caasɛ Zerizalɛmɛ. Ʋ fa mɔ́ʋ́ a pá Sɩɩdɔŋ nɩɛ veŋbɔmɔ Asɩtarte rɩ́ Mʋwabɛ nɩɛ veŋbɔmɔ Kɛmɔɔsɛ, arɩ́ Amɔŋ nɩɛ veŋbɔmɔ Mɩlkɔmɛ nɛ́. 14 Zoziyasɛ ɔ́ɔ́ ɓa zɔ́kɛ dɔ́wɩ́cɔ́ŋsɛ, rɩ́ dácɔ́ŋsɛ ná ɓa háá ɓáárɛ ká pá nɩbííne heŋgbele a tɔ́ ɛ́ dɩɓáárɛ́ mɛ́.
Ɩzɩrayɛl wɩcʋɔlɔ́ bɩrsɛ́ wɩ́ɛ́
15 Zoziyasɛ zɔ́kɛ koro ná fa há mɩ́ŋ Bɩtɛl mɛ́, arɩ́ dɩɓáárɩ́ ná Nebatɛ bio Zerʋbʋamɛ fa há lɩ́sɛ́, rʋ́ʋ́ yíkí Ɩzɩrayɛl nɩɛ a hé wɩ́bɔmɔ sɩɛrʋ. Ʋ zɔ́kɛ ɛ́ koro arɩ́rʋ́ dɩɓáárɩ́, a nyɩ́kɛ dɩɓaarɩ́ ná, ʋ bɩ́rmɛ kúŋkoló, ká nyɩ́kɛ dácɔ́ŋsɛ ná ɓa háá ɓáárɛ. 16 Zoziyasɛ bɩrɔ́ a bél, rʋʋ ná lɛlbulli paalɔ́ nyúú. Ɛ́ nʋʋ tʋŋ nɩɛ ɓa mʋ́ pá heŋgbele ná lɛlbulli ná sɩɛrʋ, a kaa ko a nyɩkɛ koro daha, ʋ tɩŋ ɛ́ mɛ́, a a ʋ zʋ busunnu anɛ ɛ́ Nyuutɩna Wɩɩsɛ wɩ́laabʋllɔ fa há bʋlɛ́, wɩ́ɛ́ ná ʋ fa há bʋlɛ́ ná tɩɩ nɛ́. 17 Ɛ́ nɛ́ Zoziyasɛ bɔsɛ: «Oŋmáálɛ orí rɩ́ ŋ bíbél nyɛ́>>» Tɔ́ɔ́ ná nɩɛ bʋlʋ́ rɩ́ a bʋlɛ́: «Wɩɩsɛ báálɔ ná há lɛ́ Ziida lɛlbule ní, ʋ nɛ́ fa lá sɩ́ɛ́ bʋl wɩ́ɛ́ nyáŋ wuu, ɩ há ɛ́ɛ́ mʋ́l né mí, a cɛ́ Bɩtɛl koro né mí.» 18 Zoziyasɛ sɛ́: «Ɩ́ lo ɛ́ lɛlbule ráŋ! Rɩ́ nɛ́ŋ wuu sɩ́ ɛ́ wɩ́laabʋllɔ heŋgbele mí tɩ́kʋ́!» Ɛ́ nɛ́ ɓa ɓɩɛ́na wʋ́ʋ́ heŋgbele mí tɩ́kɛ́ anɛ ɓa há wɩ wɩ́laabʋllɔ ná há lɛ́ Samari ko heŋgbele mí tɩ́kɛ́ ɛ́. 19 Zoziyasɛ zɔ́kɛ́ venni jɩɩsɛ ná wuu Ɩzɩrayɛl kuóre fa há sɔ́ɛ́ Samari tɔ́nɛ mɛ́, a tɩ́ŋwɔ́ mɛ́ a a Nyuutɩna Wɩɩsɛ cɔ́ɛ́ wɛ. Ʋ zɔ́kwɔ́ anɛ ɛ́ ʋ fa há tʋ́mɛ́ Betɛl mɛ́. 20 Ʋ ɓʋ́ʋ́sɛ dɩɓaarɛ́ vʋk'ɔɔsa wuu fa há mɩŋ ráŋ, dɩɓaarɛ́ korsi ná daha, a nyɩkɛ nɩbííne heŋgbele má ɓa daha. Ɛ́ har mɛ́ nɛ́ ʋ bɩrko Zerizalɛmɛ.
Pakɛ cana díí wɩ́ɛ́
21 Zoziyasɛ pá nɩɛ wuu ŋmɛ́nɔ a bʋlɛ́: « Ɩ́ dí Pakɛ cana a píŋsi Nyuutɩna Wɩɩsɛ, ɩ́ Wɩɩsɛ anɛ ɛ́ há pʋ́ŋsɛ nʋtʋmɛ kɛnɔ né sɩɛrʋ.» 22 A pɔ́ tɛ́ŋ ná mɛ́ sárɩ́yadííre fa há dí Ɩzɩrayɛl tɔ́ɔ́ sɩ́ɛ́, a ko peri tɛ́ŋ ná mɛ́ kuóre há dí Ɩzɩrayɛl arɩ́ Ziida kuorí, ɓa ha wɩ Pakɛ cana nyɛ ná díé. 23 Kuóro Zoziyasɛ kuorí díí bɩŋsɛ fí arɩ́ córí nyúú mí ní, ɓa di Pakɛ cana ɛ́, a píŋsi Nyuutɩna Wɩɩsɛ Zerizalɛmɛ mɛ́.
Zoziyasɛ kuorí díí dɩgúlli wɩ́ɛ́
24 Zoziyasɛ há có rʋ́ʋ́ zíl wɩ́ɛ́ ná há mɩŋ wɩ́bile kɛnɔ ná vʋk'ɔɔsɔ́ nɔhɔ̃́ Hilkiya há néé Nyuutɩna Wɩɩsɛ jaa sɩɛrʋ, ʋ ɔ́ɔ́ ɓa kiri nɩɛ ná háá yɩrɛ lɛlnʋʋsɛ rɩ́ muulináára Zerizalɛmɛ arɩ́ Ziida tɔ́ɔ́ mɛ́, ká a ɓa zɔkɛ terafiimiwa a, rɩ́ veŋgúlli arɩ́ oŋɓáárɛ ná náŋa wuu. 25 Kuóre ná há lá Zoziyasɛ sɩ́ɛ́ a dí kuorí, oro wuu wʋ́ʋ́ nɩ́ɛ́sɛ́, a bɩ́rko Nyuutɩna Wɩɩsɛ rɩ́, rɩ́rʋ́ sɩɛrʋ wuu, rɩ́rʋ́ dʋma wuu arɩ́rʋ́ táŋa wuu, anɛ ɛ́ Moyizi wɩ́bilé ná há makɛ́. Kuóre ná má há tɩ́ŋʋ́ har ko, oro wuu wʋ́ʋ́ nɩ́ɛ́sɛ́. 26 Amá Nyuutɩna Wɩɩsɛ wɩ lóé rʋ́ʋ́ cɔwɩɩlɩ́zeno ná pɔrɛ, cɔwɩɩlɩ́zeno ná ʋ fa há kené cɛ́ Ziida mɛ́, rʋ́ʋ́ pɔrɛ, a tɩŋ wɩ́bɔma ná wuu Manase há ɛ́ɛ́ a zɔ́kʋ́ mɛ́. 27 Ɛ́ nɛ́ Nyuutɩna Wɩɩsɛ sɛ́: «Ŋ sɩ́ a rɩ́ Ziida kɛ́kɩ́ŋ mɛ́, anɛ ɛ́ ŋ há ɛ́ɛ́ Ɩzɩrayɛl kɛ́kɩ́ŋ mɛ́. Ŋ sɩ́ vɛ́ Zerizalɛmɛ tɔ́ɔ́ né, ŋ fa há bɛ́llɛ́ a lɩ́sɛ tá, arɩ́ jaa ná ŋ fa sɛ́: Ŋ yɩr sɩ́ yɩ́rɛ ráŋ.» 28 Zoziyasɛ wɩ́'állɛ ná náŋa, arɩ́rʋ́ tʋtʋmɛ́ ná wuu háá tʋ́mɛ́ mɩŋ Ziida kuóre wɩ́'állɛ kɛnɔ sɩɛrʋ nɛ́. 29 Ʋ kuorí díí tɛ́ŋ mɛ́ nɛ́ Faarɔŋ Neko há ká Ezipiti kuóro mʋ́ Ɩfɩratɛ caasɛ́, rʋ́ʋ́ yo Asiiri kuóro. Kuóro Zoziyasɛ isí kɛ́rʋ́; Faarɔŋ há noú, ʋ ɔ́ɔ́ ɓa ɓʋ́ʋ́ Megido mí. 30 Ʋ há sʋ́wɛ́ Megido mí, ʋ tʋtʋnna cɩ́ɩ́nʋ́ rɩ́ tórko a ko Zerizalɛmɛ, a húú ʋ lɛlbule sɩɛrʋ. Tɔ́ɔ́ nɩɛ lɩ́sɛ Zoziyasɛ bio Zʋwakaaze nɛ́, a ɔ́ŋsɛ lɩ́sɛnʋʋ a hóú mí, a bílú ʋ dí kuorí ʋ áná nyúú mí.
Zʋakaaze dí Ziida kuorí
31 Zʋakaaze kúó aá dí kuorí rʋʋ fá kéŋ bɩŋsɛ mɛrɛ́ rɩ́ botoro ní. Caŋsɛ botoro dʋŋɔ nɛ́ ʋ dí kuorí Zerizalɛmɛ mɛ́. Ʋ maá yɩr nɛ́ ka Hamutal, Zeremi há lɛ́ Libina tolo ní. 32 Zʋwakaaze ɔ́ɔ́ zɔkɛ Nyuutɩna Wɩɩsɛ mɛ́, anɛ ɛ́ ʋ naabálwa há ɛ́ɛ́. 33 Faarɔŋ Neko kénú vɔwɛ rɩ́ bɛŋzɛl Ribla mɛ́, Hamatɛ tɔ́ɔ́ mɛ́, rʋ́ʋ́ fa haá dí kuorí Zerizalɛmɛ mɛ́. Neko ɓá loŋpó a pá Ziida tɔ́ɔ́ nɩɛ rɩ́wɔ́ túŋ wárɛ zíŋ há pérí kiló bʋ́ɩ́toro (3000) arɩ́ salmɛ kiló mɛrɛ́ rɩ́ fí (30). 34 Ká Faarɔŋ Neko lɩ́sɛ Zoziyasɛ bio Eliyakiŋ rʋ́ʋ́ dí kuorí ʋ áná nyúú mí, a bɩ́rsʋ́ yɩr hé Zʋakimi. Ʋ kéŋ Zʋakaazɛ é tɔ́ bɩnajaa, Ezipiti mí, ʋ sʋwɛ róŋ. 35 Zʋakimi pí meéwí arɩ́ salmɛ a pá Faarɔŋ Neko. Ʋ ɓá lóŋpo a pá tɔ́ɔ́ nɩɛ, a makɛ rʋ́ʋ́ wólli túŋ kíŋ ná Faarɔŋ há ɓɛ́ɛ́ a pɔ́ʋ́. Ʋ fɩ́kɛ́ nɛrɔ wuu mí tɔ́ɔ́ ná sɩɛrʋ, rʋ́ʋ́ tɛ meéwí arɩ́ salmɛ a tɩ́ŋʋ́ kanɛ́ mʋɔsɔ mɛ́, rʋ́ʋ́ laa pá Faarɔŋ Neko.
Zʋakimi dí Ziida kuorí