Ezekiasɛ pʋɔlɩ́ rɩ́rʋ́ duóre wɩ́ɛ́
20
1 Ɛ́ cɛ́rɛ́ mɛ́, kuóro Ezekiasɛ ɓálʋ́ sʋ́ʋ́rɛ pʋɔlɩ́. Wɩɩsɛ wɩ́laabʋllɔ Ezayi há ká Amɔtɛ bio, mʋ́ a bʋlʋ́ rɩ́ a bʋlɛ́: “Ná Nyuutɩna Wɩɩsɛ há sʋ́ʋ́ ná: Makɛ wɩ́ɛ́ a pɛ́ɩ́ jaa nɩɛ, beé wɩ́ɛ́, ɩ pʋɔlɩ́ né waá a rʋ́ʋ́ tɛ́ɩ́, ɩ sɩ́ sʋwɛ.” 2 Ɛ́ nɛ́ Ezekiasɛ kánʋ́ sɩ́ɛ́ cú zeŋ mí, ká sʋl Nyuutɩna Wɩɩsɛ a bʋlɛ́: 3 “Aá! Nyuutɩna Wɩɩsɛ ŋŋ sʋ́lɩ́ rɛ́, líísí tɩɩ rɩ́ŋ vá taŋá sɩɛrʋ, rɩ́ sapʋmmɩ́, a ɔ́ʋ́ ná háá tɔrɩ́ sɩɛrʋ tɛ́ŋ wuu mí!” Ká Ezekiasɛ bɩ́bɩ́sɛ sɩ́mɩɩrʋ kɩ́ŋkáŋ! 4 Ezayi fa ha wɩ sɩ́sɩ́ɛ́nnʋwa wuolwie ná sɩɛrʋ lɩ́ɛ́. ká Nyuutɩna Wɩɩsɛ bʋlʋ rɩ́ a bʋlɛ́: 5 Bɩ́rmʋ́ bʋl Ezekiasɛ há káŋ nɩɛ nyúútɩ́na rɩ́ a bʋlɛ́: “Ná Nyuutɩna Wɩɩsɛ, ɩ naabál Davidi Wɩɩsɛ, há sʋ́ʋ́ ná: 'Ŋ nɩ́ɩ́ sʋlɛ́, a néí sɩ́mɩɩrʋ má. Ɛ́ wɩ́ɛ́, ŋ sɩ duórí; rɛ́ɛ́ rɩ́ tápʋ́lɛ́ botoro, ɩ báá sɩ́ wólli a mʋ́ Nyuutɩna Wɩɩsɛ jaa. 6 Ŋ sɩ́ tʋ́kɩ́ mɩɩsɛ rɩ́ɩ́ dí bɩŋsɛ fí arɩ́ bɔmmʋ́ɔ́ a súúri! Ŋ sɩ́ lɛ́ɩ́ rɩ́ Zerizalɛmɛ nɩɛ tá Asiiri kuóro nɛ́sɛ mɛ́. Ŋ sɩ́ pɔ́ tɔ́ɔ́ né mí, a tɩ́ŋɩ́ŋ tɩɩ wɩ́ɛ́ arɩ́rɩ́ŋ tʋtʋnnɔ Davidi wɩ́ɛ́.”7 Ezayi sɛ́: “Ɩ́ pi pirnɔŋhɩlɛ́ dúŋsi dúŋ balá!” Ɓa pi tɔ́ʋ́ fʋ́ʋ́ ná mɛ́, Ezekiyasɛ duóri. 8 Ɛ́ nɛ́ Ezekiasɛ bʋl Ezayi rɩ́ a bʋlɛ́: “Nyɩnɛ orí mí rí, rɩ́ŋ tɩŋ a zɩŋ rɩ́ Nyuutɩna Wɩɩsɛ ɓɩɛ́na sɩ́ dúóríŋ, rɩ́ŋ wólli mʋ́ʋ́ jaa, rɛ́ɛ́ rɩ́ tápʋlɛ́ botoro>>” 9 Ɛ́ nɛ́ Ezayi bʋlʋ́ rɩ́ a bʋlɛ́: “Ná nyɩnɛ ná ɩ há sɩ́ tɩ́ŋʋ́ mɛ́ a zɩ́ŋ rɩ́ Nyuutɩna Wɩɩsɛ há sʋ́ʋ́ ná nʋɔ sɩ́ sú: Ɩɩ́ ja rɩ́ wɩpomɩ́ fɩ́ɛ́l rʋ́ʋ́ mʋ́ sɩ́ɛ́ nanʋɔsɩ́ fí ní yaa, ɛ́rá má ʋʋ nʋkɛ nanʋɔsɩ́ fí ní>>» 10 Ezekiasɛ sɛ́: “Wɩpomɩ́ fɩ́ɛ́l sɩ́ɛ́ mʋɩ́ nanʋɔsɩ́ fí ká mɔ́lɛ́, a rʋ́ʋ́ nʋkɛ har nanʋɔsɩ́ fí.» 11 Ɛ́ nɛ́ wɩ́laabʋllɔ Ezayi sʋl Nyuutɩna Wɩɩsɛ, ʋ a fɩ́ɛ́l ná nʋkɛ nanʋɔsɩ́ fí, a cɛ́rɛ Akaazɛ naŋcólsɩ́ɛ́.
Ezekiasɛ cákɔ́ la nɩtʋmɛ́ ná há lɛ́ Babɩlɔɔnɛ
12 Ɛ́ tɛ́ŋ tɩɩ mɛ́ nɛ́, Babɩlɔɔnɛ kuóro Merodakibaladaŋ há ká Baladaŋ bio tʋŋ nɩɛ rɩ́wɔ́ ka kɛnɔ arɩ́ zilé omo mʋ́ pá Ezekiasɛ, bee wɩ́ɛ́ ʋ fa nɩ́ɔ́ rɩ́ Ezekiasɛ ká pʋɔlá. 13 Ezekiasɛ cákɔ́ a lá nɩtʋmɛ́ ná, a káŋwɔ́ gʋɔrɛ ráŋ ná ɓa háá bílú cɩkpiŋe, wárɛ, salmɛ, tulaaléwa arɩ́ nʋnnɛ ná sɔ́ŋ há wero. Ʋ mákʋ́ lalcɩksɛ arɩ́rʋ́ kuóɓɩɛ́ wuu dɩbilé a pɔ́wɔ́. Ʋ wɩ óŋ wuu kené féŋsíwó mí, ʋ jaa sɩɛrʋ arɩ́rʋ́ dɩtɩ́llɛ wuu sɩɛrʋ. 14 Ɛ́ har mɛ́, wɩ́laabʋllɔ Ezayi kúó a ná kuóro Ezekiasɛ, a bɔsʋ́ bʋlɛ́: “Nɩɛ nyáŋ sɛ́ beé rí a pɛ́ɩ́>> Nɛɛ́ rɛ́ ɓa lɛ́>>” Ezekiasɛ sɛ́: “Ɓa lɛ́ Babɩlɔɔnɛ nɛ́ ko, tɔ́boli rí. 15 Ezayi báá sɛ́: «Ɓa sɩɛ́ ná beé rí ɩ jaa sɩɛrʋ>>» Ezekiasɛ sɛ́: «Óŋ ná wuu há mɩ́nɩ́ŋ jaa sɩɛrʋ, ŋ wɩ́ŋ kuóɓɩɛ óŋ wuu kené féŋsíwó mí.» 16 Ɛ́ nɛ́ Ezayi bʋl Ezekiasɛ rɩ́ a bʋlɛ́: “Zesi Nyuutɩna Wɩɩsɛ líŋo: 17 'Tápʋ́lɛ́ rɩ́ɩ́ kué, rɩ́ onni ná wuu há mɩ́nɩ́ jaa sɩɛrʋ, arɩ́ onni ná wuu ɩ ánáwa há jɛ́ɩ́ bíl, a ko aá lɛ́ zaa, rɩ́wɔ́ pɔ́wɔ́ wuu col Babɩlɔɔnɛ. Óŋ waá káánɛ, Nyuutɩna Wɩɩsɛ nɛ́ bʋl ɛ́. 18 Ɓa sɩ́ kɛ́sɩ́ bɛlɛ ɓɩkana, há kɛ́ɩ́ nɩɛ, ɩ tɩɩ há lʋ́lɛ́ a mʋ́ ráŋ, rɩ́wɔ́ a tʋtʋnna Babɩlɔɔnɛ kuóro zʋ́ɔ́ mɛ́.» 19 Ezekiasɛ bʋl Ezayi rɩ́ a bʋlɛ́: «Nyuutɩna Wɩɩsɛ líŋo né ɩ há bʋlɛ́ ká wɩ́wérí rí.» Ʋ sabɩɩna mɛ́, ʋ báá sɛ́: «Ŋ mɩnɛ́ wuu mɩ́, tɛŋfɩ́ɛ́l sɩ́ mɩ́ŋ, wálmɛ waá mɩŋ.»