Manase dí Ziida kuorí
21
1 Manase kúó aá dí kuorí rʋʋ fa kéŋ bɩŋsɛ fí arɩ́ bɛllɛ nɛ́. Ʋ dí kuorí Zerizalɛmɛ mɛ́ bɩŋsɛ rɩ́ fí arɩ́ bɔmmʋ́ɔ́ nɛ́. Ʋ maá yɩr nɛ́ fá ká Hefisiba. 2 Ʋ ɔ́ɔ́ zɔ́kɛ Nyuutɩna Wɩɩsɛ mɛ́, a tʋŋ wɩ́tɩɛnnɛ ná wuu, duowa ná Nyuutɩna Wɩɩsɛ há kíré ká lá tɔ́ɔ́ ná a pá Ɩzɩrayɛl nɩɛ, ɓa há ɛ́ɛ́. 3 Ʋ bɩrɔ́ sɔ́ dɩɓaarɛ́ ná ʋ áná Ezekiasɛ fa há zɔ́kɛ́. Ʋ sɔ́ korsi a pá Baal, a cɔ́ŋsɛ dápékisi anɛ ɛ́ Ɩzɩrayɛl kuóro Akaabɛ fa há ɛ́ɛ́. Ʋ ɓírmí bána nyúú onni ná kéŋ pʋmmɔ wuu sɩ́ɛ́, a ɓáárɩ́wɔ́. 4 Ʋ má korsi Nyuutɩna Wɩɩsɛ jaa ná sɩɛrʋ. Ɛ́ jaa wɩ́ɛ́ nɛ́ Nyuutɩna Wɩɩsɛ fa sɛ́: «Zerizalɛmɛ mɛ́ nɛ́, ŋ sɩ́ a rɩ́ŋ yɩr nyɩɩsɛ.» 5 Nyuutɩna Wɩɩsɛ wɩcʋ́ɔ́lɩjaa wúólli ná bɛllɛ wuu sɩɛrʋ, ʋ má korsi ráŋ a pá bána nyúú onni ná há kéŋ pʋmmɔ. 6 Ʋ ɔ́ɔ́ ɓa púú bio má tɩɩ hé níŋ mí a ɔsɛ vʋk; ʋ já nyɩ́nɛwa háá máŋsɛ cíé wɩ́ɛ́, ká vʋrɛ má. Ʋ bíl nɩɛ ná háá yɩ́rɛ lɛlnʋʋsɛ arɩ́ muulináára. Ʋ ɔ́ɔ́ zɔkɛ Nyuutɩna Wɩɩsɛ mɛ́, a tɩ́ŋ bɔ́ŋbɔ́ŋ ná ʋ há ɛ́ɛ́ aá súúri, ʋ sɩ́ɛ́ mɛ́. 7 Ʋ má veŋgúle a pá veno ná ɓa háá yɩ́rɛ Akeera, a púú bil Wɩcʋɔlɩjaa ná sɩɛrʋ. Ká Nyuutɩna Wɩɩsɛ fa bʋl Davidi rɩ́rʋ́ bio Salomɔŋ rɩ́ a bʋlɛ́: «Zerizalɛmɛ tɔ́ɔ́ mɛ́, Wɩcʋɔlɩjaa né ní, ŋ bɛ́llɛ lɩ́sɛ Ɩzɩrayɛl jɩmʋ́ʋ́la ná fí rí bɛllɛ wuu sɩɛrʋ, rɩ́ŋ a rɩ́ŋ yɩr yɩ́rɛ ráŋ, a káá mʋ́ wuu. 8 Ŋ báá wáá a rɩ́ Ɩzɩrayɛl nɩɛ lɛ tɔ́ɔ́ ná ŋ há píé pɔ́wɔ́ naábálwa mɛ́ rɩ́ɩ́ bɩ́baarɛ, rɩ ɓa nɛ́ ɓɩ́ɛ́na tɩ́ŋ wɩ́ɛ́ ná wuu ŋ há máŋsɛ a pɔ́wɔ́ arɩ́ wɩ́bilé ná wuu ŋ tʋtʋnnɔ Moyizi há máŋsɛ a pɔ́wɔ́.» 9 Amá ɓa wɩ zésé; ká lo Manase tɛ́lwɔ́, ɓa ɔsɛ a bɔ́ŋbɔ́ŋ a kɩ́llɛ duowa ná Nyuutɩna Wɩɩsɛ fa há zɔ́kɛ Ɩzɩrayɛl nɩɛ sɩ́ɛ́ mɛ́.10 Ɛ́ nɛ́ Nyuutɩna Wɩɩsɛ tɩ́ŋʋ́ wɩ́laabʋlla ná há kɔ́ʋ́ tʋtʋnna mɛ́, a bʋlɛ́: 11 «Ziida kuóro Manase há a wɩ́lɔrɛ́ nyáŋ wuu; a tʋŋ bɔ́ŋbɔ́ŋ a kɩ́llɛ Amoritiwa ná fa há lɔ́ʋ́ sɩ́ɛ́ a ɔ́wɔ́ ná wuu; ʋ há yíkí Ziida nɩɛ ɓa aa zɔkɛ a tɩ́ŋ venni mí, 12 ɛ́ nɛ́ tɛ Nyuutɩna, Ɩzɩrayɛl Wɩɩsɛ sɛ́: “Ŋ sɩ́ a rɩ wɩ́hála cáásɛ pérí Zerizalɛmɛ arɩ́ Ziida nɩɛ wuu, a mɔ́ rɩ́ nɛ́ŋ ná wuu há sɩ́ nʋ́ʋ́, rʋ́ʋ́ dɩlla cɩ́ɩ́mɛ. 13 Ŋ sɩ́ zɔkɛ Zerizalɛmɛ anɩ́ŋ há zɔ́kɛ Samari arɩ́ Akaabɛ jaa nɩɛ ɛ́. Ŋ sɩ́ píési Zerizalɛmɛ nɩɛ ká tɔ́ʋ́ wúólí, anɛ ɓa háá tiisi gbaŋa ká kaa bɩrɛ cú ɛ́. 14 Ŋ sɩ́ vɛ́ŋ nɩtɩ́llɛ ná sɩɛrʋ nɩkáánɛ́ tá. Ŋ sɩ́ táwɔ́ a pɔ́wɔ́ dɩŋdɔma, rɩ́wɔ́ píésíwó tɔ́ɔ́ ɓɩɛ wuu, ká rɩ́wɔ́ ɓɩl, 15 bee wɩ́ɛ́, ɓa ɔ́ɔ́ zɔ́kɩ́ŋ mɛ́, a de pɔ́ tɛ́ŋ ná mɛ́ ɓa naabálwa há lɛ́ Ezipiti mí, a ko aá lɛ́ zaa, ŋ nɩɛ ɔ́ɔ́ ŋ cɔ́ɛ́ wɛ́.” »
16 Ʋ ná há súúre, Manase bɩ́sɛ nɩɛ ná há wɩ wɩ́ɩ́ zɔ́kɛ́ cɛ́l kɩ́ŋkáŋ, a sú Zerizalɛmɛ a pɔ́ʋ́ nʋɔ nɔ́ŋɔ mɛ́ ká mʋ́ yákɛ nɔ́ŋɔ mɛ́. A sɩɛ́ súúri wɩ́bɔmɔ ná ʋ há yíkí Ziida nɩɛ hóú sɩɛrʋ, ɓa aa zɔ́kɛ Nyuutɩna Wɩɩsɛ mɛ́. 17 Manase wɩ́'állɛ ná náŋa, ʋ tʋtʋ́mɛ́ wuu, wɩ́bɔmɔ ná ʋ há ɛ́ɛ́, ɓa mɩŋ “Ziida kuóre wɩ́'állɛ kɛnɔ” sɩɛrʋ nɛ́. 18 Manase há sʋ́wɛ́, ɓa húú ʋ zʋ́ɔ́ zaadɛ sɩɛrʋ nɛ́, ʋ nɛ́ ɓaá yɩ́rɛ “Uza zaadɛ” má. Ʋ bio Amɔŋ nɛ́ lɔ́ʋ́ nyúú mí a dí kuorí.
Amɔŋ dí Ziida kuorí
19 Amɔŋ kó aá dí kuorí rʋʋ kéŋ bɩŋsɛ mɛrɛ́ arɩ́ bɛllɛ nɛ́; ʋ dí kuorí bɩŋsɛ bɛllɛ nɛ́ Zerizalɛmɛ mɛ́. Ʋ maá yɩr nɛ́ ká Mesulemɛtɛ, Harʋsɛ há lɛ́ Yotiba toló ní. 20 Amɔŋ ɔ́ɔ́ zɔkɛ Nyuutɩna Wɩɩsɛ mɛ́ anʋ́ʋ́ áná Manase. 21 Ŋmɛ́nɔ ná ʋ áná há píé, ʋ tɩɩ nɛ́ ʋ má tɩ́ŋ. Ʋ ɓírmi venni ná ʋ áná há ɓáárɛ sɩ́ɛ́, a cʋ́ɔ́lɩ́wɔ́. 22 Ʋ vɛ́ Nyuutɩna Wɩɩsɛ, ʋ ánáwa Wɩɩsɛ a tá; ʋ wɩ Nyuutɩna Wɩɩsɛ ŋmɛ́nɔ píé.
23 Ɛ́ nɛ́ Amɔŋ tʋtʋnna isi a cɩ́nʋ́ mɛ́, a ɓʋ́ʋ́ ʋ jaa mɛ́. 24 Amá tɔ́ɔ́ ná nɩɛ ɓʋ́ʋ́sɛ nɩɛ ná wuu fa há isé cɛ́ kuóro Amɔŋ mɛ́, ká lɩ́sʋ́ bio Zoziyasɛ nɛ́ rʋ́ʋ́ nɛ́ lɔ́ʋ́ nyúú mí a dí kuorí. 25 Amɔŋ wɩ́'állɛ ná náŋa arɩ́rʋ́ tʋtʋmɛ́ mɩŋ “Ziida kuóre wɩ́'állɛ kɛnɔ” sɩɛrʋ nɛ́. 26 Ɓa húú ʋ lɛ́lbule sɩɛrʋ “Uza zaadɛ” ná sɩɛrʋ. Kɔ́ʋ́ bio Zoziyasɛ dí kuorí ʋ nyúú mí.