Ezekiasɛ dí Ziida kuorí
18
1 Ela bio Ooze há dí Ɩzɩrayɛl kuorí bɩŋsɛ botoro nyúú mí ní, ká Ahaazɛ bio Ezikiyasɛ má dí Ziida kuorí. 2 Ʋ fa kéŋ bɩŋsɛ mɛrɛ́ arɩ́ bɔmmʋ́ɔ́ nɛ́ ká dí kuorí bɩŋsɛ mɛrɛ́ arɩ́ nɛ́mɛ́ Zerizalɛmɛ mɛ́. Ʋ maá yɩr nɛ́ fa ká Abi, Zakari toló. 3 Ezekiasɛ ɔ́ɔ́ tɔrɛ Nyuutɩna Wɩɩsɛ sɩɛrʋ, anʋ́ naabál Davidi há tʋ́ŋ ɛ́. 4 Ʋ nɛ́ zɔ́kɛ́ dɩɓaarɛ́, dɔ́wɩcɔ́ŋsɛ́ ká conni dapékísí ná. Ká ceŋŋi kɔmɔ́ dʋŋ ná má Moyizi fa há ɛ́ɛ́ ɓa bɩrmɛ. Bee wɩ́ɛ́, ɛ́ tɛ́ŋ wuu mí, Ɩzɩrayɛl nɩɛ fa ha físi tulaaléwa aá pá ɛ́ dʋŋ ɓa haá yɩ́rɛ Nehustaŋ. 5 Ezekiasɛ lá Nyuutɩna Wɩɩsɛ, Ɩzɩrayɛl Wɩɩsɛ dí a kɩ́llɛ Ziida kuóre ná wuu há lɔ́ʋ́ sɩ́ɛ́, ɛ́ rá má ɓa ná há tʋ́kʋ́ mɛ́. 6 Ʋ cáásɔ́ vɔ́wʋ́ tɩɩ cɔ́ Nyuutɩna Wɩɩsɛ mɛ́, ʋ wʋ́ʋ́ tɩɩ kené kɛ́kʋ́ mɛ́. Ʋ cɩ́nɔ́ a tɩkɛ kíŋse ná wuu Nyuutɩna Wɩɩsɛ fa há makɛ́ a pá Moyizi. 7 Nyuutɩna Wɩɩsɛ fa mɩŋ Ezekiasɛ har, ɛ́ nɛ́ tɛ ʋ wɩ́'állɛ fa cɛ́rɛ́ aá pɔ́ʋ́. Ʋ isó cɛ́ Asiiri kuóro mí, a lɔ́ʋ́ tɩɩ ʋ nɛ́sɛ mɛ́. 8 Ʋ nɛ́ yóé dí Filisiti nɩɛ, a kírwó mʋ́ peri Gaaza rɩ́rʋ́ dɩtɩ́llɛ, a la tɔ́nɛ ná ɓa há sɔ́ɛ́ a kɛ́rɛ arɩ́ pʋ́pɔ́ɔ́ra dɩmɩnɛ́ wuu.Samari lɛɛ liise wɩ́ɛ́
9 Ezekiasɛ há dí Ziida kuorí bɩŋsɛ baná nyúú mí, rɩ Ela bio Oze má há dí Ɩzɩrayɛl kuorí, ʋ bɩŋsɛ balpɛ nyúú mí ní, Asiiri kuóro Salmanazaarɛ mʋ́ rʋ́ʋ́ yó Samari, a tɔ́ʋ́ hé. 10 Bɩŋsɛ botoro nʋɔ mɛ́ nɛ́ kɔ́ʋ́ la Samari, Ziida kuóro Ezekiasɛ kuorí díí bɩŋsɛ balgo nyúú mí ní, rɩ Ooze há ká Ɩzɩrayɛl kuóro, ʋ é kuorí díí bɩŋsɛ nɛ́mɛ́ nyúú mí ní. 11 Asiiri kuóro kɛ́sɛ́ Ɩzɩrayɛl nɩɛ mʋ́ Asiiri, a bílwó Hala mɛ́, Gozaŋ dɩtɩ́llɛ́ polo Habɔɔrɛ mɛ́ arɩ́ Medi tɔ́nɛ mɛ́. 12 Bee wɩ́ɛ́, Ɩzɩrayɛl nɩɛ wɩ Nyuutɩna Wɩɩsɛ ɓa Wɩɩsɛ wɩ́makɛ́ tɩ́ŋɛ́, ká zɔ́kʋ́ nʋtʋmɛ ná má; ɓa wɩ kíŋse ná Nyuutɩna Wɩɩsɛ há tɩ́ŋʋ́ tʋtʋnnɔ Moyizi mí a máŋsɛ zésé má tɩɩ, rɩ́wɔ́ sɩɛ́ tɩŋ nɛ́.
Sanaŋkeribi yóó dí Ziida dɩtɩ́llɛ
13 Ezekiyasɛ há dí kuorí bɩŋsɛ fí rí baná nyúú mí ní, Asiiri kuóro Sanaŋkeribi ko yoo la Ziida dɩtɩ́llɛ tɔ́sɔɔkɛ́rɛ́ wuu, a tɩ́llɩ́wɔ́. 14 Ɛ́ nɛ́ Ziida kuóro Ezekiasɛ tʋŋ rɩ́wɔ́ ka liŋó mʋ́ Lakiisi pá Asiiri kuóro a bʋlɛ́: «Ŋ zɔ́kɔ́ rɛ́! Baá sɩ́ŋ yó. Ŋ sáŋɔ́ rɩ́ŋ túŋ kɩ́ŋ ná ɩ há sɩ́ ɓá páŋ.» Asiiri kuóro ɓá wárɛ kííló bʋ́ɩ́ nɛ́mɛ́ (9000) arɩ́ salmɛ kííló zɔlɔ nɛ́mɛ́ (900) kɩŋ a pá Ezekiasɛ. 15 Ezekiasɛ píési Nyuutɩna Wɩɩsɛ jaa rɩ́ kuóro kuójaa má sɩɛrʋ wárɛ wuu pɔ́ʋ́. 16 Ɛ́ tɛ́ŋ mɛ́ Ezekɩasɛ lɛ́ksɛ Nyuutɩna Wɩɩsɛ jaa dánnʋʋsɛ bonni salmɛ arɩ́wɔ́ dánnʋʋsɛ dagɛrɛ́ salmɛ ná ʋ tɩɩ fa há ɛ́ɛ́ ɓa hé, a hé náŋá mɛ́ a pá Asiiri kuóro.
Sanaŋkeribi sóójipúl nɔhɔ̃́ wɩ́bʋlɛ́
17 Asiiri kuóro cɛ́ Lakiisi mí ká tʋ́mʋ́ sóójiwa nɔhɔ̃́ rɩ́ tʋtʋnna nɔhɔ̃́ arɩ́ púl nɔhɔ̃́ ná háá pɔ́ʋ́ mɛ́, a hé sóójiwa ɓɩkaná ɓa har, ɓa mʋ́ Zerizalɛmɛ, kuóro Ezekiasɛ rɩ́. Ɓa há mʋ́ɛ́ peri tɔ́ɔ́ ná, ɓa mʋ́ɔ́ cɛ́ nyúú rɩ nyibʋɔ naa ná há mɩŋ kɛnnʋɔsa dɩtʋmɩ́ ŋmɛ́nɔ́ laka nɛ́. 18 Ká buóli hé kuóro mí. Ɛ́ nɛ́ Eliyakiŋ há ká Hilkiya bio, ká a kuóro zʋ́ɔ́ nɔhɔ̃́, rɩ́ kɛŋpʋ́ŋsɔ Sebna arɩ́ Yʋa há ká Azafɛ bio, ká a kuóro kɛŋbíllo, lɩ́ɩ́ céŋwó. 19 Asiiri púl nɔhɔ̃́ ná bʋlwɔ́ rɩ́ a bʋlɛ́: «Ɩ́ ká Asiiri kuóro, Kuózeno liŋó né a mʋ́ pá Ezekiasɛ: Bee yɩɛla rɛ́ ɩ ká, a píí tɩɩ tɩ́ɛ́kʋ́ mɛ́>> 20 Ɩ bɩ́ɩ́nɔ rɩ wɩ́bʋlɛ dʋŋɔ wo lalyóórilɩŋ arɩ́ baŋcɩpɩrɩ́ aá pá lalyóóre>> Áŋ yɩɛla rɛ́ ɩ má ka, a saŋ isi cɩ́nɩ́ŋ mɛ́>> 21 Ná ɩ píí yɩɛla hé Ezipiti mí, rʋ́ʋ́ tɩ́ɛ́kɩ́, mʋʋdaa haá bórí, aá cɔ́kɛ nɛ́ŋ ná wuu há púú tɩɩ tɩ́ɛ́kʋ́ mɛ́, nɛ́sɛ aá kɩ́ɛ́sɛ: Ezipiti kuóro Faarɔŋ nɩɩsɔ nɛ́ ɛ́, a pá nɩɛ ná wuu há píwó yɩɛla a hóú mí! 22 Nyɛ́ mɛ́, ɩ́ sɩ́ bʋl páŋ, rɩ́ɩ́wa yɩɛlɛ Nyuutɩna Wɩɩsɛ, ɩ́ Wɩɩsɛ nɛ́. Ɩ tɩɩ Ezekiasɛ nɛ́ zɔ́kʋ́ dɩɓaarɛ́ arɩ́rʋ́ korsi, ká bʋl Zerizalɛmɛ rɩ́ Ziida nɩɛ rɩ́, rɩ́wɔ́ mʋ́ Zerizalɛmɛ koro ná dʋŋɔ sɩ́ɛ́ nɛ́, aá ɓírmí a kaŋwɔ́ sɩ́ɛ́ aá cú tíé. 23 Ɛ́ wɩ́ɛ́, a rɩ́ɩ́ rɩ́rɩ́ŋ nyúútɩ́na Asiiri kuóro pɛksɛ náŋá: ŋ sáŋɔ́ rɩ́ŋ pɛ́ɩ́ záksɛ bʋ́ɩ́wʋllɛ (2000), rɩɩ nɛ́ wo zákzɩnna aá ná rɩ́wɔ́ káŋwɔ́ aá va. 24 Ɛrɛ́ rɛ́, ɩ sɩ́ a ká kíríŋ nyúútɩna tʋtʋnna sɩɛrʋ ɓɩwie bala má tɩɩ>> Ɩ há tɩ́ŋ lalyóórítórkowa arɩ́ záksɛ wɩ́ɛ́ a píí yɩ́ɛ́la hé Ezipiti mí! 25 Ŋ há kúé rɩ́ŋ yo tɔ́ɔ́ né, a zɔ́kʋ́, ʋ ɛ́ úrí Nyuutɩna Wɩɩsɛ mɛ́ rɛ́>> Nyuutɩna Wɩɩsɛ nɛ́ bʋlɛ́ páŋ bʋlɛ́: Mʋ́ yo tɔ́ɔ́ né, a zɔ́kʋ́!» 26 Ɛ́ nɛ́ Eliyakiŋ há ká Hilkiya bio rɩ́ Sebina arɩ́ Yʋa sʋl Asiiri nɩɛ nɔhɔ̃́ ná a bʋlɛ́: “Á sʋlɩ́ rɛ́, pi Aramɩɛŋwa liŋó ní a bʋlɩ́ tʋtʋnna rɩ́, áá nʋ́ʋ̃́ rɛ́! Amá, sɩ́rá rɩ́ bʋlʋ́ Zuwifiwa nɩɛ liŋó mí, nɩɛ ná wuu há mɩŋ zekumé né daha zésírá rɛ́.» 27 Amá púl nɔhɔ̃́ ná bʋlwɔ́ rɩ́ a bʋlɛ́: “Ɩ bɩ́ɩ́nɔ́ rɩŋ nyúútɩ́na liŋó né kɛ́ɩ́ rɩ́rɩ́ɩ́ nyúútɩ́na dʋŋɔ wɩ́ɩ́ rɛ́>> Ʋ ká nɩɛ nyáŋ wuu há mɩŋ zekúme ná daha wɩ́ɩ́ rɛ́, rɛɛ́ rɩ́ mʋ́ɔ́ ɩ́ rɩ́wɔ́ bɩna sɩ́ ɛɩ́wa ɓɩdííle ká rɩ́ɩ́wa fɩ́ɩ́rʋ́ má ɛɩ́wa nyinyɔ́ɔ́lɛ́!» 28 Ká púl nɔhɔ̃́ ná baa isi cɛ́ dahá, a cáási rɩ́rʋ́ dóé wuu, Zuwifiwa liŋó mí a bʋlɛ́: “Ɩ́ zesi Asiiri kuóro, Kuózeno liŋó: 29 Ɩ́ ná kuóro há bʋlʋ́ ná: Ɩ́ sɩ́ ló rɩ́ Ezekiasɛ nyɩ́sɩ́wa. Ʋ wɩ́ɩ́wa wo la aá tá ŋ nɛ́sɛ mɛ́. 30 Ɩ́ sɩ́ ló rɩ́ Ezekiasɛ bʋl kánɩ́wa yɩɛla mʋ́ hé Nyuutɩna Wɩɩsɛ mɛ́, ká bʋlɛ́ rʋ́ʋ́ ká pʋmmɩ́ rʋ́ʋ́ nɛ́ sɩ́ lɛ́ɩ́wa a tá, ká pɔ́ rɩ́ Asiiri kuóro sɩ́ tɔ́ɔ́ né lá. 31 Ɩ́ sɩ́ Ezekiasɛ rɩ́ zésú, ɩ́ zesi Asiiri kuóro há sʋ́ʋ́ ná, ʋ sɛ́: ɩ́ ló rɩ́ tɛŋfɩ́ɛ́l mɩ́ŋrá pɛkɛ, ká lo rɩ́ŋ tɩ́llɩ́wa. Ɛ́ é, nɛrɔ wuu sɩ́ dúú vínyi tunɔnɔ, ʋ pirnɔnɔ ká nyɔ́ʋ́ vɩ́lɛ́ nyii. 32 Kaá dɛllɛ tɛ́ŋ ná mɛ́, ŋ há sɩ́ ko kɛ́sɩ́wa mʋ́ tɔ́ɔ́ ná há nɩhɩ̃́wa tɔ́ɔ́ né, tɔ́ɔ́ ná há kéŋ bile rɩ́ dɩvɛ́ŋ, tɔ́ɔ́ ná há kéŋ ɓɩdííle rɩ́ vínyiwa, há kéŋ olíviwa nʋʋ arɩ́ tʋʋ. Ɛ́ wɩ́ɛ ɩ́ sɩ́ ná wáána, ɩ́ wáá sʋsɛ.” Ɛ́ wɩ́ɛ́, ɩ́ sɩ́ Ezekiasɛ rɩ́ zesú, ʋ há sɛ́ Nyuutɩna Wɩɩsɛ sɩ́ lɛ́ɩ́wa tá ná, ká nyɩsɛ́ rɛ́. 33 Duowa ná náŋa wɩŋsa wólló lɔ́wɔ́ tɩɩ tɔ́nɛ tá Asiiri kuóro nɛ́sɛ mɛ́ rɛ́>> 34 Hamatɛ rɩ́ Arɩpadɛ wɩ́ŋsa ná mɩ́ŋ nɛ́ɛ́>> Sefarivayimi, Hena arɩ́ Ava wɩŋsa mɩ́ŋ nɛ́ɛ́>> Ɓa wólló la Samari tá ŋ nɛ́sɛ mɛ́ rɛ́>> 35 Ɛ́ tɔ́nɛ wɩŋsa wuu sɩɛrʋ, oro wuu wɩ wóllé lɔ́ʋ́ tɩɩ tɔ́ɔ́ tá ŋ nɛ́sɛ mɛ́. Ɛ́rɛ́ mɛ́ rɛ́ sɩɛ́, rɩ́ Nyuutɩna Wɩɩsɛ la Zerizalɛmɛ tá ŋ nɛ́sɛ mɛ́>>» 36 Nɩɛ ná wuu fa há mɩŋ ráŋ síkló, ɓa wɩ nʋɔ oro wuu lɩ́sɛ pɔ́ʋ́, bee wɩ́ɛ́ kuóro Ezekiasɛ fa sɛ́ rɩ́wɔ́ sɩ́ nʋɔ wuu lɩ́sʋ́. 37 Ká Eliyakiŋ há ká Hilkiya bio, a nɛ́ a kuóro zʋ́ɔ́ nɔhɔ̃́, ʋ rɩ́ kɛŋpʋ́ŋsɔ Sebina arɩ́ Yʋa há ká Asafɛ bio, ká nɛ́ a kuóro kɛŋbíllo, káŋwɔ́ gɛnnɛ cɔ́nnɛ́, ká bɩrko a cesi Asiiri nɩɛ púl nɔhɔ̃́ wɩ́bʋlɛ́ ná a pá Ezekiasɛ.